#اميرة_قلبي❤
بقلم زهور جمال الدين(11)
فى حوش عفاف ....
عفاف مقعمزة تهدرز هيا ورندة صاحبتها ...
-عفاف/ نقولك لزنى من حوشه وحاط رقمى عالمشغول .. معقولة هدا طلال اللى كان مايهبل لو يحس انى زعلانه من حاجه ... انا مش مستوعبه راهو
-رندة/ الراجل قاعد عريس ..يعنى طاهق وتصرفاته لا ارديا لازم تكون هكى
-عفاف / لالالا منزلبحش روحى..فى شى متغير..انا الوحيدة اللى نحس بي طلال ونعرف كل تصرف يدره شن معناه
-رندة حطت فنجان القهوة / راجلك وين
-عفاف / وين نندرى عليه ...طالع مالصبح ابصر وين يدور
-رندة خدت صحن الكيكه / بتسافرى معاه
-عفاف وقفت عالشباك / مالاول ماكنتش منمشى .. لكن لما لقيت طلال ماشى قررت نمشى
تلفتت لى رندة/ انا ما قاهرنى شى .. غير الصور والرسايل اللى راحو منى فالتليفون اللى حرقناه يومها لما شده انيس
-رندة تضحك/ واللى يجيبهملك
-عفاف جت تمشى بخطوات سريعه قعمزت جنبها / قصدك الصور عندك !!!... قولى
-رندة / اللى ماتعرفيشى يومها انى نزلت الصور عندى عالايكلاود .. لان فتحت الايكلاود تبعك عندى فى جهازى ونزلته منه الصور اللى كانو على تليفونك .. وبعدها حرقت كل البرامج اللى فيه ...
غمزتلها / يعنى الصور عندى يا حبي
-عفاف/ ينصر دينك
-رندة تضحك/ بيش تعرفى بس
-عفاف وقفت / والرسايل
-رندة / الرسايل لا....لكن الصور خديتهم بالكامل
عفاف فرحانه / اهو بنسافر ونشوفه ...كانا حط عقله فى راسه ورجع زى ماكان باهى .. وكانا قعد هكى ..تو نعرف انا كيف نهدده بالصور اللى بينى وبينه
-رندة مستغربه/ تهدديه بالصور!!!... ماهو بضرى نفسك هكى
-عفاف/ انا بنهدده بس ..مش معقولة بنفضح روحى..
تلفتتلها/ وبعدين حتى لو انفضحت .. عليا وعلى اعدائي
-رندة/ بلا تلكليك زايد يا عفاف .. تى والله كان يسمع انيس بحكايه زى هادى مايبدا الا مشردك
-عفاف😱/ ووك عليا ...انتى غير جبتى سيرته رعشت
..قولى يقتلنى مش يشردنى
-رندة/ خلاص متفقين .. غدوة نجيبلك التليفون اللى نزلت فيه الصور
-عفاف/ اهو نوصلك انا وتمديهولى
-رندة/ لاااا ياحبي .. داساته فمكان خطير ومش فى حوشنا..
صعب نعطيهولك اليوم 😊
-عفاف/ باهى نروح ناخده منك
-رندة/ صار بتسافرى معاه غدوة
-عفاف / بنمشى يا وخيتى ...بالك نتلاقى معاه بروحنا و ندير حل للحال اللى وصلناله
-رندة/ انتو وين بنمشو
-عفاف/ تركيا
___________________________________________
_
فى المستشفى
-فارس/ يا حاج الموضوع عركة ادت الى ضرب .. يعنى مممن عماد صارله استفزاز ... بس ماتوصلش للقتل
-مهند / الضرب اللى انضرباته متع واحد يبي ينهيلها حياتها
-محمود/ تى ماهو صكر فمك وانت من لما جيت ماقلتش كلمه باهية
-فارس/ لاااااا خليه يقول ... حقه .. شنو احنا كانا صار فبناتنا هكى بنسكتو
-مهند / ايوووووه..اهو طلع كلام الحق..بترضوها فى وحدة من بناتكم انتو ان يصيرلها هكى
-فارس / اكيدة لا
-محمود / انت شن تقول يا فارس
-فارس خدى مهند من كتافه/ نقول فكلام الحق ..وانا عبير تعز عليا ومانرضاش فيها حاجه واللى بيديره مهند ماشى عليا ....
خداه ومشو خطوات..وحمد يضحك على فارس اللى ماشى فالممر مع مهند.. عارفه يبي يزلبحه ويهديه
-صالح شبح لى حمد / اسمع يا حمد ونشهد بالله كان مش نعزك وفى بيناتنا عشرة مانسكت .. لكن الله غالب جانى الشرك فالحجر وبنتى الثانيه عندكم
-حمد / وحتى عبير ماناش مسلمين فيها... تنوض على خير وهنا وتروح حوشها
-صالح / وهوا وينه ولدك اللى ضارب ومخرب .. ولا مايقدرش يجى يقول شن صار فعيالى
-حمد / دايرلك حساب .. شنو تحساب عملته بسيطه .. من بكرى وهوا يتصل بي فارس ويطمن عليها وينشد شنو صار معاها لكن مقدرش يطب
-صالح / عملته فيها مش صغيرة .. وانا عارف ولدى مهند على حق .. لكن الله غالب ..حنمشى معاك ونقوله يغير التقرير انه حادث ..وامرى لله
جى مهند ومعاه فارس
-حمد يشبح لى فارس/ شنو
-فارس ضرب مهند على كتفه/ مهند هدا بطل .. ويخاف على خواته ويعرف مصلحتهم وكأنه شيبانى كبير
-مهند / دير رايك يابوى .. واحنا عيلة وحدة
