#أميرة_قلبي❤
بقلم زهور جمال الدين(17)
_
فى دار نوم عمك حمد
-مفيدة مقعمزة على كرسى وشادة السبحه فى يدها/ صراحة مش راكبة يا حاج .. معقولة تمشى تخطب نفس البنت مرتين
-عمك حمد متكى فى سريره يبي يقيل/ وشنو فيها ..هدا ولدى وهدا ولدى والحياة نصيبات
-مفيدة/ توة زى فارس ولدك زى مروان ولد الناس
-حمد / لا والله مروان ولدنا ويتيم الاب والام ...وشنو تحسابينى انا اللى رافعنى بنخطبله .. سلم عمامه الزوز وخواله الثلاثه .. انا ضيف زينى زين الناس
-مفيدة/ حتى كانك ضيف ما اسمك الا مشيت فالخطبوبة
-حمد / شوف الكلام الخارب .. يعنى كانا البنيه ماجابهاش النصيب مع فارس نقولو معش تاخد بكل... مسكينه ربي يسهللها ويجيبهالها زينه
-مفيدة/ ربي يجيبهالها زينه وماقلنا شى ...لكن تخاف فارس يزعل كان سمع بيك مشيت معاهم
-حمد / وشنو اللى بيزعله ..شنو خدوها منه .. ولا ضربوه على يده .. ماهو منه ليه سيب ولا عبرنى ولا قال بوى بنحشمه مع الناس
-مفيدة/ قدر الله وماشاء فعل
-حمد/ ولا ولدك الثانى اللى دارلى العار مع مرته .. وفالاخير هوينها اطلقت منه وراسه فى اللوطا
-مفيدة ماطاقتش فى ولدها/وعلاش راسه فى الوطا يا حنه
وبالك هوا فالاصل يبي يطلقها لكن بعد مايربيها ويدلها
-حمد شبحلها / يعنى انتى عارفه ان ولدك يبي يدل مرته
-مفيدة خافت / حاشانى .. والله ماندرى عليه ولا نعلم باللى بينهم سمعت بالطلاق الغيابى زينى زيكم
-حمد / امالامعش تتفلسفى وتقولى الكلام اللى يولى عليك .. ونوضى وتيلى جيلابيتى
_________________________________________
_
قدام حوش جميلة
فارس وصل للمطار ..طول خدى تاكسى ومشى لى حوش اميرة .... طقطق عالباب ...
فتحت مروة من ورا الباب/ شكوون
-فارس/ لو سمحتى نبى نكلم اميرة
-مروة مازبطاتاش او ماكنتش تتوقعه اصلا / معليش من حضرتك
-فارس/ غير ناديها بس
خشت مروة للحوش .. لقت وفاء مقعمزة فالصالة وولدها فى حجرها ..
-وفاء/ خيرك لونك مخطوف
-مروة قعمزت جنبها / الباب طقطق وفتحت
-وفاء شبحتلها/ ايييه وشنو المشكلة
-مروة/ اللى يطقطق عالباب يبي اميرة ..وتقريبا الصوت اللى سمعته.....
-وفاء قامت راسها شبحتلها / صوت شكون ادوى خيرك
-مروة/ تقريبا صوت فارس
-وفاء/ تبصري !!.. االطف ياربي فارس خارج ليبيا وشن بيجيبه هنايا وفاليوم هدا بالدات
-مروة / حتى انا حايرة علاش جى فاليوم هدا بالدات ... بالك غير قصده يفسد عليها
-وفاء قامت تليفونها / اول شى خلى نتاكدو منه هوا ولا لا ..وبعدها نقولو لى امى وهيا تتصرف
-مروة / فى شكون تكلمى
-وفاء تتصل/ بنكلم ايهاب .. يجى يشوفه العازى اللى فم الحوش منهوا
وبالفعل وفاء خدت تدابيرها واتصلت بي ايهاب اللى طلع من حوشهم مستعجل يبي يتاكد هل الشخص فارس والا لا ..
وصل قدام حوش جميلة يلاقى فارس واقف انصدم ....
سلم عليه
-ايهاب/ اهلين فارس ..الحمدالله على سلامتك امتى روحت
-فارس/ توووة كيف واصل... ونبيك تناديلى اميرة
-ايهاب انحرج/ هوااااا .....بالك ماعندكش علم ان اليوم خطوبه اميرة
-فارس/ باهى غير ناديهالى ...نبيها لحظه وحدة وتخش فى حالها
-ايهاب / احمم... باهى شوية بس هى ...
وخش للحوش وخلى فارس يراجى برة
