#أميرة_قلبي❤
بقلم زهور جمال الدين (22)
_
فى مكتب اميرة
تم الاجتماع وطلعو روحو كلهم ... وضمو البنات المكتب والحاجات ....
طلعو وخلو اميرة مقعمزة على مكتبها .... طق الباب وخش فارس رجعلها بعد ما طلع لى مكتبه ..
اميرة تشبحله وساكته وهوا يشبحلها وساكت
-اميرة/ ليش جاى
لف فارس عالمكتب وقرب منها
اميرة تشبحله / سألتك ليش جاى
-فارس/ اميرة انا غيرتى عليك بتقتلنى.. وشفتى قبل شوى شن صار معش تحكمت فى نفسى ..
اميرة تشبحله وساكته
-فارس قرب خطوة ثانيه / وقبل شوى فى مكتبى قعدت ساعه نخمم فى بروحى .. وقررت قرارات مش عارف نستقر عليها والا لا
-حركت راسها وقامت خشمها /سألتك انت ليش جاى
قرب منها اكثر وحط يديه الزوز على خدودها/ جاى لانى نحبك .. وقبل كل شى مش متحمل انك تروحى للحوش وانتى زعلانه
اميرة بدت ترعش اول مرة يقرب منها بالشكل الكبير هدا
-فارس قاعد حاط ايديه الزوز ع خدودها / انا عارف انى سببتلك هلبا مشاكل كبيرة.. وخليتك حايسه فى افكارك ..
سامحينى .. بس الحب كان اقوا منى
بحركة لا اردايه منها حطت يديها على يديه الزوز ونزلتهم من خدودها طول / ارجوك لو سمحت
-قص عليها/ نسألك سؤال
-اميرة بهدوء/ اسأل
-فارس/ انتى معش تحبينى .... وبالله عليك ماتجاوبي لين تفكرى كويس
اميرة كرامتها ناضت عليها وتحسست من الموقف
-غمضت عيونها / منغير مانفكر ..ولا نحسب.. الحب اللى كان بينا انتهى من فترة .. وانا وانت مستحيل مزال يكون فى موضوع بيناتنا تربطنا
-فارس/ هدا اخر كلام عندك
-اميرة/ هدا اول كلام قلتهولك لما روحت ليبيا...واخر كلام عندى
-فارس وخر خطوة / تمام..وانا حنخليك فى حالك.. حندوس على قلبي بيش نخليك فى حالك .. وتقعدى سعيدة منغير اى ازعاج منى
-اميرة صوتها انغص/ احسن ما ادير
-فارس/ التنفيدية ح ننقلها للفرع الرئيسى .. بيش تقعدى براحتك
-اميرة/ طريق السلامه وربي يوفقك
فارس يشبحلها ومش مصدق اللى يسمع فيه...كان متمنى انها تنهار قدامه وتكشف عن حبها ليه وتقوله ماتسيبش المكان
-فارس/ انتى تعرفى ان نقل التنفيدية يبي يبي وقت .. ممكن ايام وممكن اسابيع .. ماتخافيش مش حنزعجك بكل
-اميرة واطت عيونها / لا مفيش مشكلة
-فارس يشبحلها موجوع/ عن ادنك
-اميرة/ ادنك معاك
وطلع وصكر الباب .. خلاها فالمكتب بروحها ... اميرة ماتحملتش وانفجرت بالبكى ..
وخدت شنطتها وناضت روحت للحوش
_________________________________________
_
قيس الضهر
ركبو طلال ومروان للطيارة .. سفرتهم طرابلس_تونس_روما
ركبو الطيارة نزلو فى تونس ترانزيت ومنها مشو لى روما .. وصلو بالسلامه و نزلو فى الفندق اللى متعودين يقعدو فيه كلهم .. خدو كل واحد فيهم غرفه
