#أميرة_قلبي❤
بقلم زهور جمال الدين(23)
_
ثانى يوم وقبل صلاة الجمعه
فارس من لما فاق وقبل ماينوض من مكانه اتصل بي رقم اميرة .. لكن هيا داسة تليفونها فى دولابها ومقعمزة مع خواتها جايين عندهم وحوش يردس احرف من حوشنا نهار الجمعه😁..
ناض من مكانه وخش دار دوش وطلع لبس ملابسه وصلى ورجع اتصل بيها من جديد .. ماردتش .. حس ان تعلقه بيها زايد معش قادر يفارقها لحظه .. نزل للدور الاول لقى الصالة فاضيه .. قعمز عالصالون وقعد ينادى
-فارس/ انسام ... انسام
-انسام من الدور الثانى / ايوووة
ونزلت للصاله / صباح الخير
-فارس/ صباح الخيرات .. وين الفطور
-انسام / من عيونى .. امى عاجنه سفنز خلى نقليك قبل اصبر شوى
-فارس/ صابرين وشن ورانا غير الصبر .. غير جيبي القهوة هيا الاولة تعرفينى نفطر عليها
-انسام تضحك / هاهاهاها حاضر
طلعت مفيدة من المطبخ تمسح فى ايديها
-فارس/ صباح الخير يااام
-مفيدة😔 / صباح الخيرات
-فارس/ خيرك شن فى
-مفيدة/ ومنين بيجينى الخير .. الناس كلها تكبر صغارها تستريح الا انا
-فارس ساوى تقعميزته وتلفتلها/ خيركم شن فى شغلتينى
-مفيدة/ خوك الفرخ الصغير دايرلى مشاكل
-فارس/ اشرف!!!... خيره
-مفيدة والعه/ معش تنطق اسمه قدامى.. يديرلى مع بوه ليله امس ناقص غير الضرب ماضربنيش
-فارس/ غير فهمينى خيره شن دار
-مفيدة / ضاحكه عليه بنت عمرها قريب زى امه ويكلم فيها ويتعارك معانا يبي يخطبها
-فارس / اهاا... ووين تعرف عليها
-مفيدة/انا مش موضوعى كيف يعرفها .. انا موضوعى المبدأ نفسه .. معقولة ياخد مدرسته اللى تقري فيه
-فارس بدى يضحك/ ااه ..هاهاهاها.. قصدك اشرف يتبع فى ابلته .. خيره شنو هبل ..
جابت انسام فنجان القهوة معاه اميه فى صفرة وحطتها الطاولة قدام فارس ..
خدى فارس الفجان وشرب منه/ صحيتىىىى
مشت انسام للمطبخ وخلتهم
-فارس/ تعرفى يااام ... القصه هادى تفكر فيا بي رئيس فرنسا .. تخيلى مرته كانت تقري فيه وهوا صغير .. وشوفى النصيب لما كبر بدت زوجته
-مفيدة تعيط/ وهوا بيمارى رئيس فرنسا ولا شنو...هادوكا اجانب كفار يديرو هكى واكبر ..لكن احنا ماعندناش
-فارس/ مفيش حاجه اسمها هما كفار ويديرو هكى ... حتى احنا دينا الاسلام ونقدرو نديرو هكى ..مفيش ايه فالقران دكرت عمر معين بين الزوج والزوجه
-تلفتتله مفيده فاتحه عيونها/ حيه عليا....غبارتى كان تقوله الكلام هدا ويبدا مقاعد راسه بيك سلم وليدى فكنى مالفلسفه متعك .. الموضوع هدا مرفوض ورد بالك كانا جاك توقف معاه
-فارس/ ان شاء الله خير
-مفيدة واثقه انه بيساعد اشرف مزال تبى تهدده😁/ اسمع والله كان توقف معاه لما نزعل منك .. ولا يقولك برا معاى وتمشى معاه والله نخاصمك ومعش نكلمك..اهو قتلك من توة
-فارس/ تى باهى عاد فهمناك يااام
نزل عمك حمد من فوق لابس عربي وحاط العبايه على يده
-فارس/ صباح الخير يا بوى
-حمد / صباح النور .. واتى للجمعه ولا شنو
-فارس/ واتى غير نفطر بس
-حمد يشبح لى مفيدة ويتنفخ/ وين ولادك ولا مش مصليين
-مفيدة/ محمود فى حوشه واشرف نشبح فيه فاق من بكرى
وتلفتت للمطبخ تنادى/ يا انسام .. تعالى اركبي لخوك ناديه
-انسام / هى شويا بس السفنز فى الزيت منقدرش نخليه ينحرق
-طلع فارس تليفونه/ تو نتصل بيه انا
