#كروموسـوم 💙
الحلقة 3
واقعية
الكاتبة : Meme Ali
انصدمت اسيل في كلمة منى ، والي زاد صدمها لما طلعت من جنبها وهي شادة في ايد بنتها كذلك
وما ان ركبت منى حتى حست اسيل بـ ايد شدت ايدها بـ غل ولقاته عمر ووجهه ما يبشرش بالخير ، جبدها من ايدها وركبها وهي تقوله : ايدي عمر نحي ايدي خيرك !
خش بيها للشقة ومنها لدار النوم وحذفها ع السرير بغله وسكر الباب وتلفتلها وقال بعصبية : تعلي في صوتك علي امي يلي مش متربية ! مجابتهاش امها يلي تعيط في وجه أمي ! امي تسواك وتسوى عشرة زيك انتِ وولدك !
اسيل وقفت وقالتله وهي تبكي : شداته من وذنه قريب قطعتهاله ، كان راجت شوية اني كنت طالعة بنكشخ عليه وبنضربه
اتجهلها عمر وقال بإنفعال : بترضبيه وانتِ ما ترضيش فيه حتى دقة الشوكة ؟ تي علي مني تكذبي ! فوق ما ولدك مش طبيعي مش متربي
أسيل مسحت دموعها لما يأست من تعاطف عمر معاها وقالت : اوك اني ولدي مش طبيعي ومش مرتبي اني مش بنت اصول ، علاش مخليني هني في الحوش اماله ؟
عمر قرب منها وقال بهدوء وبنظرات غيض : لأنه اماليك مش ح يستقبلوك بـ ولدك !
انصدمت وسكتت اسيل، وكأنه مش نفس الشخص يلي كان محتويها في حضنه قبل شوية ، وطلع هو وقربع الباب ونزل لـ امه
لقاها في الدار تكلم في بنتها وتحكيلها يلي صاير ووزعتها لما سمعت صوت عمر ينادي فيها وقالتلها : هي سكري خوك نزل !
وسكرت الخط وقالت : تعالى اني هني !
خشلها لدار المعيشة ولقاها مقعمزة وجوها متكهرب ، باس ع راسها وقاللها : حقك عليا
امه شافتله لما قعمز جنبها وقالت : كانك تبي رضاي تزوج عليها !
انصدم عمر وقال : يما شن هالكلام
امه : ايه وانت شن ناقصك الف بنية تتمناك وانت قاعدلي مع هالتل المجعوطة اللفعـة حتى صغار ما جابتهملك !
عمر وهو يحاول يقنعها : يام اني موظف وحالي حال المعاش ماني قد نفتح زوز حياش
امه حطت ايدها ع ركبته وقالتله : نبيع ذهبي ع شانك
عمر : شن تقولي يما خيرك
امه : وماتنساش المرحوم مخليلكم قطعة ارض انت وخوك قسمها وبيع حصتك كانك مش قابل بـ ذهبي
عمر سكت ، ولما حسـت انه نوعاً ما اقتنع حبت تزيد الجرعة واديرله اغراءات : والله بنيت خالتي مفيدة عندها بنية زي العسسل ، هذاكا الجسم ، وهذاكا الشعر ، وهديكا البيوضية زي الجبنة ، هذا غير الفلاحة زي النار لهلوبة مشالله ، كان اضيعها من ايدك لما تخسرها ، اني من زمان عاجبتني ليك لكن انت الله غالب تسكر في راسك وجبتها بـ مزاجك
عمر شافلها وقال : والله المرا لما تحرج كان تسمع بيا نتزوج عليها
امه عقدت حواجبها بإستنكار : خل تحرج في ستين داهية انشالله !
عمر : مايجيش يما عـاد !
اما عند منى يلي طلعت بنتها وهي لافة عليها فوطة الدوش ودخلتها لدارها الحايسة بالألعاب وقالت بغضب : معاش تحلمو تنزلو لوطة ! انزلكم نظيفين عفيفين تركبولي بـ كيلوات وسخ وتراب اني معاش عندي جهد ليكم
وقعمزت ع سرير قيس ووجندت رغد قدامها وهي تمسحلها في شعرها الطويل بالفوطة بعنف ، خشلها قيس وقال : ماما رغد هي يلي بدت وضرباته برشادة
شافتله رغد وقالت بغضب الاطفال : كداااااب
شافتله امه كذلك وقالت : ضم فمك كلمة ومعاش تدوي معاي حتى انت !
فـات اليوم ، حل الليل :
سمعت اسيل يلي كانت فاتحة النت في دارها صـوت الباب انفتح ف عرفت انه عمر ، ولأنها مش حابة تتلاقا معاه طفت هاتفها وحطاته ع الكمادينو ودارت روحها راقدة
خش هو لدار ايوب ولقاه راقد ، خش للمطبخ ولقي عشاه محطوط ومغطي ، قعمز ع الطاولة كلي فمين وناض خش لداره وين ما لقي اسيل راقده وعاطية بالظهـر
شافلها بتأنيب ضمير ، يتيمة مسكينة معندهاش الا امها واختها المتزوجة وخوها المنجر ديمة ورا مرته ،
اتجه للسرير وقعمز ع جهته شافلها وطبس عليها وهمس في وذنها : أسـيل !
فتحت اسيل عيونها وعقدت حواجبها بحزن ، قعدت ثواني تفكر لن طبس مرة ثانيه وباس خدها فـ شافتله وقالت : علاش قتلي هكي بكري ؟
عمر قعمز وقال : لأني كنت فاصل وما نشبحش في الدنيا قدامي
قعمزت اسيل بدورها وقالت : ايوب قريب ركباته حالة نفسية !
عمر قعد يشبح للحزن يلي في عيونها ، وباش يرضي قلب اسيل كان لازم يرضي ايوب فـ قال : تو نطلعوه غدوا وندهورو بيه ونغيروله جوه
شافتله اسيل بـ استغراب فـ قال : لكن عندي طلب !
اسيل : شنو ؟
عمر : تنزلي تتأسفي من امي !
اسيل نزلت راسها ثواني بحيرة ورجعت شافتله وقالت : باهي خلاص !
فات اليوم ، ثاني يوم الصبح :
نزلت اسيل وفي ايدها حافظة كيك ، خشت بيها لحوش عزوزتها يلي لقتها في المطبخ تجهز في فطورها وقالت : صباح الخير !
شافتلها عزوزتها بإنزعاج وما ردتش ورجعت تكمل في تجهيزها ولا كأن فيه شخص
حطت اسيل الحافظة فوق الرخامة وقالتلها : عمتي
شافتلها عزوزتها :ها ؟
اسيل بخجل : سامحيني ع امس مكانش قصدي نعلي صوتي عليك
عزوزتها بحقد : عليتيه وفات فيك وسمعتي الجيران ان كميلة يهزبو فيها كناينها
اسيل : من حرارة الموقف تصرفت تصرف غبي مكانش لازم نتصرفه ، حقك عليا سامحيني
اتجهت اسيل لعزوزتها وباست راسها ، فـ شافتلها العزوز بعدم رضا وقالت : قصي من باسطيك وحطيه
ابتسمت اسيل وخدت السكينة وقصت وفطرو كلهم مع بعض
ومع العشيات نزلت اسيل وهي مبدلة وشادة في ايدها ايوب بسعادة انه ح يطلع واخيراً ، نزلو للجنان فـ لقو عمر في السيارة يولع فيها ، وعزوزتها تسقي في الغرس
شافتلهم العزوز وحطت الطوبو في العشب ومشت لسيارة ولدها وقالت : طالعين ؟
شافتلها اسيل وقالت : ايه
عزوزتها :اماليك ؟
اسيل : لالا ، بنغيرو لـ ايوب جوه
شافت العزوز بحقد لـ ايوب الفرحان بـ طلعته ورجعت شافت لـ اسيل وحطت يديها في جنبها وقالت : خيرني اني ما يتغيليش جوي ؟
نزل عمر من السيارة وقال لـ امه : هي بري بدلي حوايجك نستنو فيك
ابسمت العزوز ابتسامة انتصار وشافت لـ اسيل بشماتة بالرغم ان اسيل مش زاعجها موضوع طلوعهم مع بعض ابداً
ركبو السيارة ورفعهم للملاهي ، نزلت اسيل ونزل بدها ايوب وهو يشوف في الزحمة والناس والصغار بسعادة واندهاش ، شدت اسيل في ايد ايوب وخشت للملاهي مع عمر وامه
شاف عمر لـ اسيل وطلع فلوس من جيبه وهمسلها : هاك لعبي بيهم ايوب اني بنقعمز مع امي !
خدت منه اسيل الفلوس برضا ، فـ هو مش هامها ع قد ما هامها ايوب
قعمز عمر وامه ع الكرسي الخشبي وهما يشبحو لـ اسيل يلي شادة في ايد ولدها وواقفه في الكشك تشري في تذاكر
امه بإنزعاج : عيـل راد باله من عيل !
شافلها عمر وقال : 25 سنة مش صغيرة اضن !
امه شافتله : 25 سنة كيف متزوجين توا مش ليهم سبعة سنين ، اني يوم جبتهالي حتى الدحية ما تعرفش تقلها فرخة 19 سنة !
عمر بـ ضيق : يام طالعين بنغيرو جو ما تنكديش عليا توا
ورجع شاف لـ اسيل وهو يتبع فيها بعيونه وهي تتنقل بـ ولدها الفرحان من لعبة لـ لعبة
امه شافتله وقالت : امتى تبيني نخطبلك ريان ؟
عمر تفاجأ وشافلها وهو. عاقد حواجبه : من ريان ؟
امه : ريان بنت مفيدة !
عمر بترجي : يما اني مرتاح مع اسيل وكانك ع الصغار بنمشو للأردن نعالجو !
امه بإصرار : الفلوس يلي بتصرفهم في العلاج تجيب بيهم مرا خيرلك ، اسبوع وتلقاها حامـل !
عمر : باه بنجيبها وين بنسكنها ؟ لوطة معاك ؟ ولا في دار ايوب ؟
امه : في حوش خوك !
عمر : خوي قاعد ما صينش الشقة يلي خذاها !
امه : ما خصكش فيه انت غر قول تم تو اني ندبرلك
عمر عقد حواجبه بإستغراب وقال : خيرك تكرهيها ؟
امه : ما نكرهاش ، اني واجعني حالك من غير جيلك اطوطح من غير صغار فرحان بـ هالفرفوط ، خوك اصغر منك ومتزوج بعدك مالي الحوش بـ اربعه والخامس في الطريق !
عمـر سكت لما شاف اسيل اقتربت وفي ايدها طربوشين فوشار وشادة في ايوب يلي شاد الطربوش في ايده ومش طايقه صبر ياكله وهو حاطه في فمه وياكل
مدتلهم واحد واحد وخدو الزوز ، عمر شافلها : كملتو دورتكم ؟
اسيل : لالا غر دهشت من الوقوف قلت نجي نقعمز شوية بيه
امه وهي تلقط في البوشار قالت ببرود : ع اساس مثقله في الثامن داهشة من الوقوف
انصدمت اسيل مـن كلمتها وفي ثواني تجمعو الدموع في عيونها ، شافت لـ عمر المنزعج من كلمة امه بإستنجاد وعيونها تقوله " تكلم ! دافع عليا ! خودلي حقي ! "
شاف لـ امه فـ سبقاته هي لما وقفت وقالت : هي اني نبي نروح !
مسحت اسيل دمعتها من حافة عينها بصبعها ، وقال عمر : مزال خلي نتعشو ونروحو !
امه مدتله طربوش الفوشار وناضت تنفض في عبايتها من بقاياه وقالت : اني ما يعجبش فيا وسخ هالمقاهي والمطاعم روح بيا قتلك !
ايوب شاف لـ حناه وقال ببراءة : لا
حناه شافتله وقالت بإنزعاج : ناقص تحكم فيا انت !
عمر : يما وسعي بالك ساعة من الزمان ونروحو ، ما تبيش تاكلي معانا براحتك احني مش معطلين
امه بأسلوب تهديد : والله كان ما تروح بيا توا لما ناخد تاكسي ونروح بروحي
ناض عمر وقال بإنزعاج : باه خلاص اهو مروحين
ناضت اسيل وروحو ، وكإنها فعلاً غيرت جوها ، بكن للأسوء !
روحو للحوش ، خشت اسيل بـ ايوب ووراها عمر ، طلقت اسيل ايد ايوب بإنزعاج وخشت لدار النوم وهو وراها ، حذفت شنطتها ع السرير وقالت : غدوا الصبح وانت ماشي للخدمة حطني في حوش اماليا
عمر قعمز ع السرير : اسيل !
اسيل شافتله بنفاذ صبر وعيونها يلمعو وقالت : عمـر اني بجديات تعبت ، عمري ما قلت هالكلمة واني نعنيها زي اليوم ، امك ماخلت كلمة تجرح وما قالتلهالي ، ماخلت يوم وما ضايقتني فيه ، نبي نعرف اني في شن ضايقتها ؟ شن درتلها ؟ علاش مش طايقتني ؟ تقارن فيا بـ منى كل يوم وتقارن في حوش منى المليان صغار بالقبرة متعنا ! تصدق انها مسمية حوشك مقبرة ؟ ع خاطر هادي ومافيشي صوت جري وعياط ودوشة ! اني مليت عمر اني تعبت وحقربي خلاص واصلة لحلقي
وقعمزت ع السرير وحطت يدها ع وجهها ، شافلها عمر بشفقة ومسح ع ظهرها : تحملي واصبري شن عندنا بنديرولها !
اسيل شافتله بدموعها : مش قادرة نتحمل اكتر من هكي ، حطني في حوش اماليا نقعد اسبوع شهر لن نطيب خاطري
عمر : واني لمني بتخليني ؟
اسيل : لـ امـك !
وناضت من جنبه وهي منزعجة من ردة فعله الركيكة ، كان لازم يواسيها ويساريها اكثر من هكي !
فات اليوم ، وتاني يوم حطها في حوش اهلها زي ما حبت
اما عند اهل عمر ، كانـت امتنان مقعمزة وتعبي في دماغ امها ع اسيل المسكينة وتقول بإنزعاج : حلوة والله حتى هو خوي من حقه ولد سليم يقيمله اسمه ، اصلاً الماغوليين ما يعيشوش اكتر من تلاتين سنة !
امها بتوعد : والله لما نزوجهاله يبي ولا ما يبيش
امتنان : تعرفي لازم نديرولها مشكلة هديكا المصيصة باش يكرهها ويتزوج عليها !
وبينما كانت امتنان وامها يديرو في مؤامرة ع اسيل ، كانت هي منشغلة في مساعدة امها في المطبخ
امها شافتلها وهي تقرض في المعدنوس : قوليلي !
اسيل وهي تجلي في الاماعين : نعم ؟
امها : خيره جوك متعكر ؟
اسيل : لالا شي
امها تنهدت : كتومـة زي عادتك !
فـات اليوم ، وخشت اسيل بترقد بجنب ولدها الراقـد ف لقت عمـر يتصل
ردت عليه وقالت : ألـو
عمر : كيف الحال ؟
اسيل قعمزت ع السرير : تمام الحمدالله
عمر : شن جو ايوب
اسيل شافت لأيوب ورجعت تلفتت القدام وقالت ؛ اهو راقد
عـمر : اماليك كشف حالهم
اسيل : كويسين كلهم
عمـر : خيرك تكملي فيا هكي باه !؟
اسيل : نكلم فيك عادي
عمر : باهي شن نجيك غدوا روح بيك ؟
اسيل : شن استاحشتني ؟
عمر : ايه
اسيل : لالا غدوا بتجي ياسمين ، مستاحشتها قداش ليا عليها خليها بعد غدوا
عمر : باه يا ستي براحـتك
اسيل : اني نعسانة تصبح ع خير
عمر : تلاقي قدامك والخير
وسكرت الخط ، ورقدت
مر اليوم الثاني عادي ، وروحت اسيل لحوشها في الليل
خشت لدار النوم حتى تبدل وخشلها عمـر وقال : عندي ليك مفاجأة !
اسيل شافتله بإستغراب : شن هي ؟
عمـر طلع ورقة استمارة طالب من ورا ظهره ومدهالها ، عقدت هي حواجبها بإستغراب وخدت الورقة ولما قرتها عرفت انها استمارة تسجيل في دورة معتمدة للغة الانجليزية !
فتحت عيونها بسعادة وحضناته بفرح
حضنها كذلك هو وقال : عارف كان حلمك تكملي قرايتك وتتكلمي الانجليزي بطلاقة ، وحملك في ايوب خلاك توقفي قيدك في الكلية اللغات ومنها تبطلي مرة وحدة ، قلت يلا خلي ترجع تكمل
طلقاته اسيل وشافتله بفرحة : انحبـك ❤️
عمر شدلها ايدها وباسها : اني اكثـر ! كل يلي نبيه منك معاش تنزعجي من امي وكلامها ، خش من هني يطلع من هني ، اتفقنا ؟
اسيل وهي مبتسمة : نحاول ، انشالله
عمر : غدوا نمشو اديري امتحان تحديد مستوى
اسيل وهي مبتسمة : انشالله
وفعلاً صار ، فات اليوم ورفعها اليوم الثاني للكورس
خشت أسيل للكلاس زي ما طلبو منها الريسبشن ، حطت حقيبها ع الطاولة امتع المقعد الفردي وما هي دقايق حتى خش شاب اتضح انه أستاذ وهو حامل الورقة ليها وللطالب يلي معاها ، مد للطالب وخش مدلها وابتسملها وقال : موفقـة !
بادلاته اسيل نفس الابتسامـة وقالت : انشالله
وبحكم خلفيتها ع الانجليزي قدرت تجاوب اغلب الاسئلة ، بالرغم ان ليها سنين مسيبة القراية ، لكن الافلام والاغاني الانجليزية ساعدتها تحافظ ع بنك الكلمات يلي في دماغها
حلـت وقعمزت تراجي لن انتهي الوقت المحدد وخش نفس الإستاذ يلي تشوف فيه يتخطف قدام الباب ومرا مرا ترفع في عيونها تلقاه يشبحلها ، ف يتعقد ويدير روحه مش مركز معاها
مدتله الورقة وطلع وطلعت هي وراه وهو يقوللها : خليلنا اسمك ورقمك في الريسشبن حتى نتصلو بيك ونعطوك النتيجة !
اسيل : انشالله !
اتصلت بـ عمر وجي وروح بيها وخطم ع حوش امها حتى تاخد ايوب يلي روح بالسيف معاهم وعاجبه جـو حوش جده
روحت اسيل وخشت لحوش عزوزتها وين ما لقاته زاحم بـ امتنان ومنى وصغارهم
قعمزت اسيل معاهم وجنبها ايوب يلي منعاته من الطلوع واللعب مع الصغار
امتنان شبحت لـ منى وقالت : امتى بتنتقلـو ؟
منى : خلاص بيركب السيراميك الجديد ويزوق وبنحولو اثاثي بنرفعه معاي قاعد جديد كله
اسيل عقدت حواجبها بإستغراب وقالت : بتحولو للشقة ؟
منى : ايه
امتنان : ايه الحوش فوق معاش يسدهم اربعة صغار في دار وحدة معاش يلايم
اسيل متجاهلة تلقيحة امتنان : باهي انشالله ع خير
منى : انشالله
امتنان : معاش مشيتي للدكتور اسيل ؟
اسيل : ع شنو ؟
امتنان بوقاحة : ع الحمل ع شنو يعني ؟
اسيل : لالا ، عمر قال بنمشو للأردن ، غر عنده شوية اجراءات وارواق قاعد يجري عليهم
خشت عزوزتها وفي ايدها وراق نعناع ، حطتهم جنب اسيل وقالتلها : نوضي ديريلنا شاهي نعدلو بيه روسنا ، حماتك وسلفتك يتوحمو الزوز
شافت اسيل لـ امتنان وقالت : بجديات ؟
امتنان : ايه
اسيل : باهي مبارك مبارك انشالله يجي وليد يساير خوه
امتنان بنظرات خبث : عقبالك يا حنة
اسيل ابتسمت بـ مجاملة : انشالله
عزوزتها قعمزت جنب بنتها وقالت بتوبيخ : تي نوضي يا بنت
ناضت اسيل ، وع خاطـر عمر لا أكثر ولا أقل !
دارتلهم الشاهي وماقعمزتش معاهم ، ركبت لحوشها هي ايوب
بدلت حوايجها وقعدت اظم وتحوس في حوشها
ومع المغرب خش عمـر للصالة يلي لقي فيها امه وامتنان بس لأن منى ركبت
سلم عليهم وقعمز جنبهم
امه : خوك قريب يكمل الصيانة وبيحول !
عمر شافلها ببرود : وباه ؟
امه : بنخطبولك بنفرحو بيك
عمر بإنزعاج : يمااا خليني نمشي للأردن وكان قالولي وضعها ميؤوس تو نتزوج وعد مني اني !
امتنان ناضت وقعمزت بـ جنبه وقالت : يا وخي احني شن نودولك غير الخير ، مرتك مش صاير منها وحتى لو حملت ح تجيبلك ماغولي تاني ، تربح خلينا نخطبولك هالبنية والله ماك نادم عليها
وبسرعان ما فتحت هاتفها امتنان وفتحت ع صورة ريان في وحدة من المناسبات مصورين مع بعض ومدتله الهاتف فـ شاف هو لصورة ريان البيضة ، لابسة قفطان اسود كُم ، وشعرها اسود مفتوح وحاطة مكياج خفيف
مدلها الهاتف وقال : فكوني من هالموال
امتنان : ريت محلاها ؟
وقف عمـر وقال : يتقعدو انتو تنقو فوق راسي ، نركب ارجلي
نادت عليه امـه لكن ما ردش وركب
يتبع ..
