#كروموسـوم 💙
الحلقة 14 ماقبل الاخيرة
الكاتبة : MeMe Ali
وفي هداكا الوقت كان عمر نازل من سيارته وهو يحشي في سلاحـه في خصر سرواله من تالي وهو مش ناوي ع خير ، خش ولقاهم مقعمزين في صالة الريسبشن ع الصالونات بجنب بعضهم وهو شـاد هاتفها وهني انفجر عمر بالغضـب وحس ان كلام امتنان صـح !
شافلهم نظرات غضب واتجلهم بخطوات مسرعة وطلع سلاحه وسحبه ووجهه عليهم وقال : مشالله !
شافتله أسيل بصدمة ونبضات قلبها زادت ، زياد عقد حواجبه ووقف ووقفت بعده اسيل بخوف ، جت متاعت الريشبسن وهي حاملة مـق القهوة متعها معاها ولما شافت عمر يلي حامل سلاحه طاح منها مق القهوة تكسر وعيطت بـخوف !
شافلها عمر ووجه السلاح عليها ووخر خطوات وقاللها بغضب : اقعدي هني ! ما تتحركيش
وخرت البنت امتع الريسبشن لدرجة لصقت ع الحيط ونظرات الخوف مالية عيونها
رجع عمر المسدس ووجها ع زياد يلي واقف وداس اسيل وراه وقاله بغضب : شـن جاي تبي ؟
عمر وهو يشبح لـ اسيل وعروق جبهته بارزات من الغضب : يا حقيرة يا خاينة هذا علاش تبي تطلقي ؟ باش تاخدي راحتك معاه يا فـاسدة !
اسيل عيونها تعبو دموع والخوف مسيطر ع ملامحها قالت : والله العظيم لا
عيط عليها عمر وقال : كذااابة ! اني الغبي يلي جبتك هني بـ يديا ! سجلتك عنده بـ فلوسي باش في الاخير تخونيني معاه !!
طلعو استاذين من غرفة الاساتذة وانصدمو بالمنظـر والطلبة كذلك فتحو باب كلاساتهم ووقفو يتفرجو بـ اندهاش من الموقف يلي قدامهم
زياد عقد حواجبه وقال : تي شن تخرط انت فايق علي روحك ولا واخد حاجة !؟ تبيني اني وله ؟ اطلع برا واني لاحقك ودير يلي تبيه مش مكان عراكات هني
عمـر وهو يشبح لـ اسيل نظرات غيض وكره : والله لما نقتلك ونشرب من دمك يا فاسدة يـا بنت ستين كلب !
زياد عيط عليه بغضب : قتلك اطـلعلي برااا وفكنا من المعيـلة !
اسيل بدت تبكي وهي لابدة ورا زياد وقالت : عمر الموضوع مش زي ما انت تفكر والله فاهم الموضوع غلـط !
عمر شاف للطلبة والزحمة وهو مزال موجه مسدسه عليهم وقال بقهرة : ريتوها البنت اللطيفة هذه ؟ هده كانت مرتي واني يلي جبتها وسجلتها هني باش في اخـر حلقة تخوني مع المستر متعها وتطلب الطلاق ع خاطره
اسيل بدت تبكي بحرقة وخوف من الفضيحة والعار وقالت بصوت واطي سمعها بيه زياد : يارب استرني يارب ماصدقت ارتحت منه ياربي سلم يارب سلم !
جي الاستاذ يلي واقف ورا عمر بـ يهجم عليه فـ تلفتله عمر لما حس بحد قرب عليه وقال : يجرب حد يتحرك ولا يطلع هاتفه ولا يدير اي لقطة ، وحق الله المخزن لما نفرغه فيه !
اسيل وهي تبكي : عمر !
عمر شافلها وقال بغضب : والله ما تبدا دفينتك الا غدوا يا خامرة يا حقيرة يا خااينة يا @&£(؛:(£"
وهني زياد انفجر بالغضب وكان يبي يمشيله الا ان اسيل شدت في كم كبوطه وقالت وهي تبكي : لا زياد !
عمر شاف لزياد وعيط : نحيييي خلي نقتلهاااا حوول !
زياد : يلي تبي اديره ديره فيا !
عمر بإنفعال : مانبيكش انت نبيها هي حووول خيرلك !
زيـاد : مش عيل باش نحول ونرخي بيها زي هلبا ناس !
عمر رفع حواجبه وقال : وحاكيتلك ومفضفضتلك زياادة !! تي حول خير ما "&£)£@£) كلكم وربي لما نقتلها ونشرب من دمهااا حوووول من عليها قتلك
زياد بإصرار وهو عاقد حواجبه : كانك راجل اطلعلي برا ونحيلي يلي في ايدك بس !
عمر بنظرات كره وغيض : اخر من يتكلم ع الرجولية انت !
وهني زياد معاش قدر يتمالك اعصابه واتجهله وحتى اسيل لما شداته ما قدرتش تردعه شدله ايده يلي فيها السلاح وقامها الفوق فـ انضربت طلقه في السقف وناضو الطلبة يتعايطو بـ خوف وفزع ، ضرب زياد عمر بوكس لدرجة عمر وخر ومسح خشمه بـ كمه و سلاحه ووجهه ع زياد وطلق رصاصة اخترقت جنب زياد فـ زاد الصراخ وعيطت اسيل بخوف وفزع وشاف زياد للدم يلي طالع منجنبه وشده وطلع عمر يجري بخوف بعد الضجة والفوضى يلي دارها وركب سيارته وهرب بينما الاساتذة والطلاب انشغلو بـ إصابة زياد
نقلوه للمصحة ، ومشت اسيل مع طالبة تسوق حبت تمشي معاهم وتطمن
وفي هداكا الوقت كانت امه مقعمزة وتشرب في قهوتها مع سلوى وسلمى وولدها الكبير سراج
رن هاتفها وكان رقم زياد فـ ردت وقالت : الو
أ.محمد : الو السلاك عليكم
عقدت ام زياد حواجبها لما حست ان الصوت غريب عليها وقالت : وعليكم السلام ، من معاي ؟
أ.محمد : اني استاذ محمد زميل مستر زياد في الكورس ولقيت رقمك اخر رقم مكلمه
ام زياد وقفت بـ خوف وقالت : انشالله خير شن فيه
أ.محمد : زياد انصاب برصاصة وهو حالياً في المصحة
انصدمت ام زياد وقالت : شنووو ؟؟ كيف انصااب وين امتى ؟!
أ.محمد : بكري شوي صارت مشكلة في الكورس وخش واحد بسلاحه وضربه ، المهم انصاب في بطنه وقاعد ما طلعش الدكتور طمنا عليه
امه : وين انتم في اما مصحة ؟
سمالها الأستاذ محمد اسم المصحة وسكرت ام زياد الخط وشافت لصغارها يلي كانو يشبحولها بخوف وقالت وهي تبكي : خوكم زياد انصاب نوض سراج خل نمشو المصحة
