بدايه جديده

كيفية الاغتسال من الجنابه والحيض؟

_طريقة الإغتسال من الحيض والجنابة🌸_

أولا يا بنات خليكم عارفين ان طريقة الإغتسال من الحيض هي نفسها بالظبط طريقة الإغتسال من الجنابة.."الفرق بينهم بس النية"
يعني مثلا لو عليكي البريود فهتنوي انك داخلة تغتسلي من البريود ولو متجوزة فهتنوي انك داخلة تغتسلي من الجنابة

"وهي برضو نفس الطريقة اللي زوجك هيغتسل بيها"

والجنابة دي اللي هما متجوزين يعني وكدة لكن انتي لو بنوتة مش متجوزة فهتغتسلي بس من الحيض..

ثانيا لازم تتأكدي كويس ان البريود خلصت من عليكي ومتغتسليش كدة من نفسك..لأ لازم تشوفي الأول علامة الطهر وهي علامة من العلامتين

"يا اما هتظهرلك القُصة البيضاء وهي عبارة عن افرازات بيضا"

"يا اما هيحصل لك جفاف تام "ودا هتعرفيه انك تمسحي بالقطنة "لو طلعت بيضا تماما فانتي خلاص كدة هتغتسلي..ولو طلع عليها الوان فاستني شوية لحد اما يحصل لك جفاف ومفيش حاجة تنزل تاني"

ملحوظة : الطريقة اللي هشرحها دي مش فرض ولكنها سُنة عن الرسول صلى الله عليه وسلم والأفضل طبعا انك تغتسلي بيها..لكن مجرد انك نويتي تغتسلي من الحيض وغرقتي جسمك وشعرك وكل حاجة كدة بالمياة فانتي كدة بإذن الله اغتسلتي"

_طريقة الإغتسال🌸_

أولا هتنوي انك هتتخلصي من الحدث الأكبر
أو هتغتسلي من الحيض لو كنتي حائض
أو هتنوي انك تغتسلي من الجنابة لو كنتي متجوزة

"وخليكم فاكرين ان النية بالقلب مش باللسان"

1/هتغسلي ايدك 3 مرات والبعض قال انك بتبدأي بغسل الفَرْچ على طول وبإذن الله الاتنين صح

وعلشان حبايبي اللي مش عارفين يعني ايه فَرْچ فمن غير احراج خالص هو الجهاز التناسلي للمرأة وكتبتهولك بالتشكيل علشان تعرفي تنطقيه..لانك لازم تكوني عارفة اسمه علشان لو حد اتكلم قدامك تبقي فاهمة كل حاجة

2/هتغسلي الفَرْچ كويس جدا لحد اما تتأكدي ان مفيش أي بقايا دم "وتغسلي بإيدك الشمال مش باليمين"

"سُنة عن الرسول صلى الله عليه وسلم انه كان بيستعمل ايده الشمال فى غسل الفَرچ"

3/لو عاوزة تغسلي ايدك بالصابون بعد اما غسلتي الفرچ وكدة فمفيش أي مشكلة

4/هتتوضي الوضوء العادي خالص اللي بتتوضيه قبل الصلاة ما عدا بس رجلك "يعني هتغسلي كله زي ما متعودة فى الوضوء وهتسيبي رجلك مش هتغسليها"
ومش غلط انك تغسلي رجلك أثناء الوضوء لكن الرسول صلى الله عليه وسلم كان بيحب يسيبها للآخر

5/هتغسلي الجانب اليمين من شعرك 3 مرات وتدعكي كويس بإيدك علشان المياة توصل لأرضية راسك..ونفس النظام على الجانب الشمال من شعرك..وممكن تغسلي شعرك كله على بعضه 3 مرات..بإذن الله كله صح

ولو شعرك مربوط وعاملاه ضفيرة مثلا ومستعجلة جدا وعاوزة تغتسلي بسرعة وتلحقي تخرجي فمفيش مشكلة لو سِبتي شعرك مربوط بس المهم المياة توصل لأرضية راسك وتدعكي بايدك..
والبعض قال انك لازم تفكي الضفيرة عند الاغتسال من الحيض ومتفكيهاش عند الجنابة..والبعض الاخر قال انك عادي لو سبتيها مربوطة فى الاتنين بس طبعا الأفضل انك تفكي شعرك خالص علشان تتأكدي ان المياة وصلت لأرضية شعرك وهكذا

6/هتغسلي الجانب اليمين من جسمك وبرضو تدعكي كويس جدا بإيدك فى كل حتة فى جسمك "تحت الصدر وتحت الإبط وعند السُرة وهكذا"
ونفس النظام برضو على الجانب الشمال من جسمك

7/لو تفتكري انتي كنتي مغسلتيش رجلك فى الوضوء..فهتغسليها بقى 3 مرات عادي خالص كإنك بتتوضي

وبكدة انتي الحمدلله اغتسلتي من الحيض أو من الجنابة

عاوزة بقى اما تخلصي تستحمي بصابون وشامبو والحمى العادي خالص بتاعنا براحتك ولو عاوزة تستحمي الأول وبعد كدة تغتسلي وتخرجي على طول فبراحتك خالص بإذن الله كله صح..ولو عاوزة تخرجي على طول من غير ما تستحمي بعد اما تخلصي اغتسال فبرضو براحتك

بس أهم حاجة انتي لو لمستي فَرْچك بعد اما خلصتي اغتسال فانتي كدة وضوئك انتقض ولازم تتوضي تاني والله أعلم..
لكن لو هتغتسلي بالطريقة اللي شرحتها فوق وتلبسي وتخرجي على طول فانتي كدة على وضوء وممكن تصلي عادي خالص "لانك لو تلاحظي انك أصلا اتوضيتي وانتي بتغتسلي"

وبالنسبة للصلاة🌸

والكلام ده جايباه من الشيخ ابن باز وبإذن الله على ثقة

انتي مثلا اغتسلتي بعد الظهر..متقوليش بقى انا مش هصلي النهاردة وهبدأ بكرة من أوله..لأ مينفعش
انتي طالما حضرتي الصلاة دي وانتي على طهارة فلازم تصلي

يعني انتي مثلا اغتسلتي بعد الظهر وقربتي على صلاة العصر فهتصلي الظهر والعصر لان المسافة بينهم مش بعيدة وهتكملي يومك عادي

ونفس النظام برضو لو مثلا اغتسلتي بعد المغرب فهتصلي المغرب والعشاء وهكذا بقى

ولو مثلا اغتسلتي قبل الظهر بساعتين كدة فانتي خلاص كدة مش هتصلي الفجر وهتبدأي من أول الظهر

وركزوا معايا كدة فى اللي جاي💜
انتي خلاص اهو شوفتي علامة من العلامتين اللي قولت عليهم واغتسلتي وكله تمام..بس بعد كدة نزل عليكي افرازات مثلا بني أو بيضا مصفرة وهكذا فهتعملي ايه؟!

بصي يا غالية..الافرازات دي اسمها استحاضة والاستحاضة غير الحيض خالص

الحيض بيبقى دمه تقيل وريحته وحشة وفيه عروق كدة ولونه احمر غامق

الاستحاضة بتكون عبارة عن افرازات شفافة كدة وملهاش ريحة وبيكون لونها غير لون الحيض..يعني مثلا بني أو أصفر أو أبيض مصفر وهكذا

فالاستحاضة دي احنا مش بنغتسل منها..لو عاوزة تغتسلي تاني عادي طبعا وده الأحسن

لكن متخافيش بإذن الله انتي كدة بس كل اللي عليكي انك تتوضي منها قبل كل صلاة

والأحسن لو تحطي قماشة كدة صغيرة بعد اما تغتسلي علشان لو نزلت عليكي تشيلي القماشة دي وتتوضي وتصلي وهكذا

بس أهم حاجة تكوني شوفتي علامة من العلامتين ومغتسلتيش كدة من نفسك💜

يارب يكون الشرح كان مُيسر عليكم💜