بدايه جديده

♕♡الحب♕♡

*▪هـو الـحـب حـرام ؟!*

ج/ لا الحب مش حرام ولا عمره هيكون حرام ﻷن الحب هو أساس الرحمة وأساس التفاهم والتناغم بين العالم💜
و أجمل شعور بيحس الإنسان بيه هو الحب ...ولو كان حرام مكنش التاريخ نقل لينا حب النبي ﷺ لما قال عن السيدة خديجة رضي اللَّهُ عنها.. " إني رزقت حبها "  ولا لمّا قال عن السيدة عائشة رضي اللَّهُ عنها " لا تُؤذونى فى عائِشــة " .

*↩ لكن تفرق أنتِ سلـكتِ أنهي طريق في الحب ده الحلال ولا الحرام ؟!*

في ناس بتعمل حاجات حرام بـ إسم الحب للأسف ....من أنها تكلم ولد مش من محارمها بإسم "بحبه وعادي ...وبنتعرف عـ بعض...وهو هيجي يخطبني ...وأموت لو سبته"
غير الشات وسهر الليالي وكلام بيكسر الحواجز ومقابلات وهدايا ..
ونسيت إن ده حرام وأن ربنا قال "ولا متخذات أخدان"
يعني ولا حبيبي ولا صحبي مينفعش اصلاً وده مش حب ده إختلاط ومخالفة ﻷوامر اللَّه وكده بنشوِّه صورة الحب .

وهو لو كان بيحبك بجد كان إتقدملك فوراً ويدخل بيتك من بابه مش يبعدك عن ربك ورضاه ويرميكِ في جهنم .

وبعدين هتيجي تقولي علاقتنا مبنية علي الإحترام تمام ، هي فـ اﻷول بتبقي كدا ،
بعد كدا كلمة حلوة فـ خروجة فـ مسكة ايد لحد ما ممكن تقعوا فـ الزنا والعياذ بالله وممكن متقعوش فيه بس في النهاية هيعود عليكم بالأذية يعني لما هو يسيبك وأنتِ متعلقه بيه شوفي أنتِ هتتعبي نفسياً إزاي وفي ناس بتحتاج لسنين علشان تتعافي من الحب الباطل ده ..

ربنا قال "ولا تقربوا الزنا " مش "ولا تزنوا " يعني إبعدوا عن أي حاجة تكون السبب في وقوعكم في الزنا ، وكمان قال ولا تتبعوا خطوات الشيطان والخطوات دي بتبقي متمثلة في مكالمة بينك وبينه سواء شات أو تليفون مثلا أو مقابلة أو أو ..

يبقي نبعد عن العلاقات دي ونقرب من ربنا ونستني الحلال أفضل.

↩ *- هتيجي واحدة تقولي طيب لو أنا بحب واحد ومش بكلمه ولا هو يعرف ده حرام ؟!*

= هرد وأقولك لا مش حرام ﻷن قلبك مش بأيدك ده بأيد ربك بس لازم تعفي نفسك وتغضي بصرك عنه واكتفي بالدعاء انه لو خير ليكِ ربنا يجمعك بيه في الحلال إنما مش تقعدي تبحلقي فيه وفـ صوره وتجيبي الأكونت بتاعه وتراقبيه في صمت وتحاولي تعرفي عنه كل حاجة وتحاولي تفتحي معاه كلام !!!

↩ *- طب واحدة تانية تقولي إنها بتحب واحد وهو بيحبها بس إمكانياته مش سامحه إنه يتقدم في الوقت الحالي تعمل إيه ؟!*

= اقولك متكلموش بعض ولا تتقابلوا لحد لما يدخل البيت من بابه ويبقي حلالك إنما جو الإرتباط علي أمل أنه هيجي يتقدملك وكدة أحب أقولك إن ده مش بيحصل مافيش طريق بدايته غلط بيكمل فـَ علشان تحافظِ علي نفسك ومتغضبيش ربنا ابعدي تماماً وهو لما يكون نفسه يبقي يجي يتقدملك ..