اتوقى بي توب الحذر.
بي قوالة .لاتظلم بشر.
وكتين تكون سامع كلام.
ويكون كلام قاسي وخطر.
ابعد من الشــك والظنون.
واتحرى من اصل الخبر.
.
اصلا مافي حاجة في الدنيا دي .. بتحصل الا بي سبب .. ومسبب الاسباب هو رب السماوات والارض .. وفي كتير كلام بتكون سامعو . بتكون محتاج لي تأكيد . لي شي تشوفو بي عينك .
وحتى مرات البتشوفو قدامك . قد يكون في جانب غايب عليك . يعني لو جات قدامك غنماية بيضاء ماشة .. انت بتقول جات قدامي غنماية بيضا.. لكن برضو المفروض ماتكون متأكد من انها بيضاء ..
احتمال تكون بيضاء وسوداء .. يعني لونها بالجيهة العليك ابيض والجيهة التانية الانت ماشايفها تكون سودا .. عشان كدا مافي زول يدعي الاحاطة بي كل شي .. ويكون متأكد من كل شي .. وما تحكم بمجرد معرفتك القاصرة .. حتى تتاكد من جوانب الاشياء ..
والنظر من عدة زوايا ..
كان في قاضي من قضاة المسلمين في الزمن السابق . جاهو واحد عينو مفقوعة .. قال ليهو يامولانا القاضي . في واحد اسمو فلان الفلاني فقع عيني واهدي عيني مفقوعة .. القاضي قال ليهو مابحكم ليك الا اسمع منو .. الجماعة القاعدين قالو ليهو يا مولانا القاضي .. الزول عينو مفقوعة قدامك .. انت داير تتاكد من شنو تاني؟ .. قال ليهم لغاية ما اشوف المتهم .. احتمال عينيهو الاتنين مفقوعات ..
المهم انو الزول يتأكد .. من المنقولات .. قبل مايبدا في اطلاق الاحكام والتصرف ..
في واحد اسمو عوض ود الضريس . راكب في البص السياحي .. من الخرطوم ماشي على مدينة ود مدني .. مدينة الجمال والحنية .. عوض بتونس مع واحد راكب جمبو في البص ..
وكل مرة عوض يعاين للزول ده .. هم الاتنين اعمارهم قريبة بعض
في نهاية العشرينات .
كل مرة يديهو نظره لغاية ما الزول اتعقد ..
قام عوض قال ليهو كيف الاحوال؟ .. معليش معاك .اخوك عوض الحاج. بقولو لي ود الضريس . ده اسم انقيب حق ابوي ..(لقب) ..
ممكن نتعرف عليك؟.. لانو وشك ده ماغريب علي ..
قال ليهو ابدا والله ماحصل اتلاقينا.. لكن ما مشكلة نتعرف معاك..
انا شايفك من قبيل بتعاين لي انا ذاتي قلت الاتكون مشبهني .
انا اخوك صلاح حمد من مدني .
عوض قال ليهو اصلا من مدني ولاساكنين هنا ساي ؟
قال ليهو والله اصلا" اهلنا من نهر النيل.. لكن جو بدري واستوطنو في البلد دي .. والبلد دي احتضنتهم وقعدو ..وانقطعو من البلد ديك .. والله هسي انا بالذات بلدنا ماشفتها ..
قال ليهو والله يهودا الحاصل علينا كلنا .. عارف ياصلاح اخوي ابواتنا ديل ..عندهم حقوق وطين .. في الشمالية ونهر النيل . وكت تجي مشاكل الوراثات .. بفوتو يخلو حقهم لي اخوانهم ..عشان الواحد يشتري اخوانو بالزايلة ..
لانهم كان قعدو واتناكفو في الواطة .. الخوة بتخرب ..
عارف ياصلاح .. انا واحد من تلات اخوان .. ابونا . اتنازل لي اخوانو من تركة ابوه وجا الخرطوم وهو شاب.. وجا اشتغل بي ضراعو.. واتزوج من توتي .. وسكن امدرمان . ونحن مولودين في امدرمان.. لكن اصلا ابوي ما انقطع من البلد .. اي فرح اي كرهـ
بسافر يمشي البلد ..يعدي يومين بالكتير.. وبجي راجع .. ونحن هنا ابوي ربطنا بي اهلنا .. وبقينا نعرف اولاد اعمامنا الساكنين هنا ..واي زول عندو علاقة بالاسرة في الخرطوم.. نحن بنعرفو وبنجاملو في اي مناسبة ..
صلاح قال ليهو طيب هسي انت جاي مدني لشنو ..ونازل وين ..؟؟
ما ترح تنزل معانا.. نكرم مثواك بواجب الضيافة ؟؟
عوض قال ليهو والله انا عندي خالي هنا ..في مدني ..عيان ضاربو يرغان ..
وعندو اطفال صغار.. وشغلو في يدو ..عندوقدرة فول في السوق .. انا كنت معاهو قبل سنة .. عديت لي معاهو كم شهر كدي ..شغال معاهو .. وهسع ضرب تلفون ..قال عوض يجي يمسك القدرة ..عشان انا عيان ..
اصلا ياصلاح ..انا قاعد في ام درمان لافي زي الاهبل.. شغل ساي مالاقيهو .. وابوي كل يوم ينقنق .. والشهادة ماجابت شي .. والشغل في اي محل بقى مابغطى معاك حق مصاريفك ومواصلاتك .. والله جربت اي حاجة .. بنيان نقاشة كهربجي .. اشتغلت تحميل في شركات .. اشتغلت مراسلة .. ماخليت شغلة ما اشتغلتها ..قلنا كدي نشوف مدنيكم دي.. احتمال نلقى فيها المنى ..
صلاح قال ليهو والله ياخي مدني حنينة.. واي زول بجيها مابرجع منها قمحان .. دحين انت مادام داير تشتغل في السوق في محل خالك .. بتاخد فكرة كافية عن السوق.. والوضع هنا عامل كيف .. وانا متأكد انك حتى بعد خالك يبقى كويس.. ويمسك شغلو..انت بتلقى ليك شغل كويس هنا ويغطي معاك ..
عوض قال ليهو قول يارب .. قال ليهو يارب ياكريم تتوفق ..
عوض قال ليهو .. انتو ساكن وين في مدني .. ؟؟
صلاح قاليهو نحن ساكنين في عووضة .. قال ليهو بعرفا كويس مشيت ليها كتير .. انا خالي ساكن في حي جزيرة الفيل .. منطقة عجيبة وجميلة بالرغم من انها حي في مدينة لكن والله تذكرك القرية في الحنية والتواصل والمحبة البين الناس ..
انا قعدت مع خالي السر فترة اتعرفت مع الناس وبقى عندي اصحاب بالرغم من اني بجي راجع من السوق المساء ..
اصلا خالي بشتغل فطور بس الساعة 12 بكون خلص اي حاجة بحصل صلاة الضهر في البيت .. تاني بجي راجع المساء يشد القدرة
وانا برجع معاهو ..
انا متعود على الحوامة اللدهي تلقاني حايم السوق ده بكراع كلب
وماخليت ناس ماعرفتهم ..
اولاد خالي 4 تلات اولاد وبت . البت الكبيرة بتقرا في العالي والاولاد صغار تامن وسادس ورابع ولاتالت ماعارف .. المهم شفع يعني . هسي بي مرضو ده تلقاهو اتردم ديون المسكين ..
الناس ديل يتونسو الاتنين ويحكو والبص ماشي وقزازو مقفل وصوت المكيفات ده شغال اشششش ..
وصلاح فتح في الونسة مع عوض وبتكلمو عن القرى على القري العلي يمين الزلط وشمال الزلط ..
دي الدوينيب ودي العيكورة ودي فداسي ودي شنو وشنو المهم يازول الناس ديل اتعرفو بي بعض تعرف لصيق وكل واحد شال تلفون التاني ..
اصلا عوض ده زول ايجابي شديد وبخش في الناس بي سرعة وبتعرف على الناس وزول اجتماعي لدرجة ..
في اي محل يمشي ليهو بعمل ليهو اصحاب ..
وكتير جدا بتعرض لمواقف بتاعة احراج بي دخوله في الناس .. ومرات بنحشر في مواضيع ماعندو بيها اي شغلة .. بعمل فيها مصلح اجتماعي هه ..وبلاقي احراجات .. وصدمات من الناس لكن هو زول بالو واسع ومابزعل بي سرعة ..
المهم يازول البص وصل مدني والناس نزلت . وعوض وصلاح اتوادعو .. واتواعدو انهم يتلاقو ان شاء الله ..
وعوض شايل ليهو شنطة فيها هدومو ولوازمو .. وكيس فيهو فيهو هدايا ولعبات .. يفرح بيها اولاد خالو الصغار .. وتوب وشبشب مرسلاهن امه لي مرة فهيمة مرة خالو ..
اها يازول وصل البيت في جزيرة الفيل .. ووقف الركشة قدام الباب .. والساعة كانت قريب 2 .. والاولاد جو برة ..وقعدو يكوركو
عوض جا عوض جا .. الجماعة الفي البيت جوة استبشرو .. والسر خالو اخو امه فرح بي جيتو شديد ..
ودخل ورحبو بيهو وفعلا لقا السر عيان وعيونو ديل صفر شديد .. وشفايفو ولسانو .. وعليهو اثر بتاع كوي في يديهو تحت الابهام طوالي ..
قال ليهو والله ياعوض جيتك دي فرحتني فرحة .. لامن حسيت بي نفسي بقيت كويس وحيلي شداني ..
عوض قال ليهو يعني اسافر بكرة طوالي هههه .. والبيت كلو ضحك
قال ليهو لالا ياخي انا قاصد اني فرحت نفسيا بي جيتك .. انا تعبان ياعوض ياولدي .. والله قبل يويمن ماقلت بصبح للصباح من الاستفراغ والهبوط .. غايتو امس الصباح مشيت لي زول كواني شوية الليلة حسيت بي روحي احسن ..
والله ياولدي الزول وكت يكون في منطقة وهو غريب فيها ومافي زول من لحمك ودمك .. بتشعر فعلا بالخوف .. والله انا مارسلت ليك عشان الشغل ووبس .. انا لاني خفت من المجهول اموت في البلد دي .. ومافي زول في راسي ساي ..
قال ليهو ماتقول كدي ياخال .. ان شاء الله بعد عمر طويل ..
فهيمة جات شايلة ليها عصير لي عوض وبتنقنق .. والله ياعوض ياولدي خالك ده اظنو اتوهم ليهو كم يوم ماعندو سيرة غير الموت
التقول بالله هو اول زول يمرض ..
المهم كملو ونستهم ديك وعوض اطمن على خالو والعصر مرق على شباب الحلة واصحابو الزمان يسلم عليهم ..
وجا راجع قريب المغرب لقى خالو تعبان جدا وكارباهو حمى لدرجة غريبة ..
وجسمو منحل .. والمراة قاعدة جمبو وتبكي .. وبتحنس فيهو عليك الله يا السر النوديك الدكتور ..
وهو بقول ليها لا دكتور ولاغيرو .. انتي براك شفتي الدكتور قال لي ده اخر علاج ليك .. والسر المسكين بتكلم بي اخر نفس ..
عوض قال ليهو لالا مابنسمع كلامك.. لازم نقوم نوديك انت تعبان ياخال .. وهو وكت الكلام كتر عليهو بقى يعاين بعيونو .. وفجأة سحب عيونو زي البعاين في السقف ..
بتكلمو معاهو كدي كضم وتاني بقى مابرد ..
الى اللقاء .
