.قد ايه مؤلم انك تكتشف خيانه حبيبك ليك؟! . يوم١٤/١/٢٠٠٤ . كنت مضطرة استخدم تليفون بابا وياريت ما كنت استخدمته .لقيت رساله جياله الفضول وقتها كان قاتلنى أقرأها . عارفه أن مينفعش لانه خصوصيته بس مقدرتش فتحت الرساله لقيتها رساله بشعه من واحده ماتربتش ولا حتى تعرف يعنى ايه اخلاق . ماكنتيش قادره استوعب ولا حتى انطق وأقول إن شوفت الرسالة .كان لازم اتعامل عادى .لكن كنت بموت من جوايا كل ما ابص فى وشه واشوف قد ايه بيتعامل مع ماما عادي من غير ما يحس بالذنب .عدت شهور وانا بشوف خيانته ليها قدام عينى .كان بيقابلها فى بيتنا . كل ما كنت بدخل من باب البيت بشم ريحه برفانها .كنت مستغربه ازاى ماما مش حاسه . قررت فى يوم أن اقولها بس مترددة في كل خطوة بمشيها لعندها .لحد ما وصلت وقولتلها .ازاى ممكن يكون ده رد فعلها .ازاى عارفه وساكته كل ده .ازاى قبلت على كرامتها كل ده . ليه مسابتوش . ؟! بقيت مش عارفه اقولها ايه صدمتى فيهم كانت كبيرة مابقتش عارفه اذا كانوا بيحبوا بعض ولا لا. من يومها وانا فهمت كل كلام ماما ليا أن ليه ماليش ضهر وليه لازم ابقي مستقله .
