الصفحه السابعه. الحقيقه ؟! لاول مرة اقدر انام فيها من غير دواء كانت امبارح .كنت دايما مستنيه اللحظة اللى اوجعه فيها صحيح ممكن تكون بطريقه غلط بس كنت مبسوطه وانا بقوله كل كلمه .كل حاجه قولتها كانت كدب انا عمرى ما ابقى زى الستات اللى يعرفهم .مكدبش أن حاولت لكن معرفتش كل نهايه اسبوع بروح البار اتفرج على كل الناس اللى هناك فى منهم اللى بيخون مراته ومنهم اللى مع حبيبته ومنهم اللى وحيد عايز ينسى اللى وجعه زى حالاتى .مقدرتش اكون واحده بالحقارة دى لأن طول الوقت صورة ماما قدامى بتمنعنى من الغلط وان ارتكب الجريمه دى فى حق نفسى أولا . ناس كتير بتفتكر أن مش كويسه لمجرد أن عايشه لوحدى . حكموا عليا من غير مايعرفونى كويس اوقات بقول ليهم حق لما يشوفونى راجعه بليل متأخر لوحدى وأوقات تانيه بقول كل واحد يبص لنفسه الاول فى المرايا . عانيت كتير من الفكرة دى بس بقيت متعوده و واثقه فى نفسى أن طول ما انا مابعملش حاجه غلط محدش ليه عندى حاجه .انا حرة فى تصرفاتى وحياتى .
