لستُ ضعيفة

الفصل الأول حياتي قبلك

"انا اسمي مني عمري ٢٣ سنة بشتغل في شركة تسويق لمنتجات العناية بالبشرة و كان كل همي او اكبر طموحاتي اني اترقى   كانت أحلامي صغيرة على قدي  انا عايشة لوحدي  في بيت صغير في مدينة زحمة   ابويا و امي ساكنين في  الارياف بس انا طبيعة شغلي هي الي حكمت عليا اني ابعد عنهم  عندي اخ أصغر مني و هو محمد سنه ١٨ سنة  و قاعد مع بابا و ماما و انا كل أسبوع بروح ازورهم  اصحابي معنديش الا شخص واحد بس و هو... أنا  ايوه اصل انا مش بثق  في الناس من بعد الي حصلي من أصحابي الانتيم لما عرفت انهم بياخدوا صوري و يبعتوها للشباب الي عندهم عشان ميبعتوش صورهم ف قطعت علاقتي بيهم نهائي لان اي بنت  مكاني كانت هتعمل كدا  معلش طولت عليكم بس خلاص مش هطول تاني و هدخل في الأحداث على طول 😅"
.................................................................................
صباح جديد
الساعة ٦ صباحاً
" كان يوم حلو و نزلت من البيت بدري عشان اروح الشغل بدري عن باقي الموظفين عشان موضوع الترقية يبقى سهل  و في طريقي لهناك عديت على راجل بيبيع ورد "
منى: بكام الوردة يا عم الحج
الراجل : ب ٢ جنيه يا آنسة
منى : طيب اعملي رابطة من التلت الوان دول
الراجل : حاضر يا آنسة  ثواني
منى : هو ايه الي منزل حضرتك بدري كدا يا عم الحج دا حتى الجو فيه لسعة برودة و الناس مش في الشارع دلؤتى
الراجل : انا يا بنتي بسعي على رزقي لان ربك قال أسعى يا عبد و انا أسعى معاك و بعدين الجو دلؤتى احلى من بعد كام ساعة لان الهواء لسة متلوثش ولا الدنيا بقيت دوشة و تحسي انك مالكة العالم كله لأنك بس الي في الشارع  ... اتفضلي يا بنتي
منى: ميرسي اوي  و ربنا يرزقك و يحفظك و اتفضل الفلوس اهي
الراجل :بس دول كتير اوي
منى: دول قليلين و أنت تستاهل اكتر والله ربنا يكرمك يا راجل يا عجوز يا طيب
"ابتسامة الراجل العجوز كانت من قلبه فعلا حسيت بسعادة كبيرة اوي لاني كنت السبب في سعادته و كمان كنت  اول رزقه و اول استفتاح ليه  و كمان كلامه عجبني جدا و حسيت فعلا اني مالكة العالم كله لوحدي ... وصلت الشغل و انا على وشي ابتسامة كبيرة و قلبي طاير من الفرحة و طلعت فازة ايزاز و حطيت فيها الورد و حطيتله مية عشان ميدبلش  و يموت   بس قطع خلوتي صوت المدير "
المدير أمجد : انتي بتعملي ايه هنا بدري كدا يا منى
منى: الموظف المثالي لازم يكون قبل معاده موجود يا فندم
المدير أمجد : حلو اووي و حلو الورد دا   كمان
منى : ميغلاش على حضرتك يا فندم
امجد بابتسامة :  انا هاخد واحدة بس و انتي يلا ابدئي في شغلك و متنسيش ان المسابقة الي هتحدد مين الموظف المثالي قربت خلاص
منى: تمام يا فندم
"ابتسامة من كل شخص تقابله كفيلة بجعلك سعيد❤️...... بالنسبة للمسابقة دي هي تطبيق لنظرية اجنبية للترفيه و لتحفيز العمال و الموظفين يعني يوم فري و في نفس الوقت هدية لكل الي عايز يعلي في شغله"
..................................................................................
الساعة ٩ صباحاً
" صحيت كعادتي و قعدت و فتحت التليفون و مقومتش من على سريري  و فضلت كدا لحد ما امي دخلت "
ام شريف : انت هتفضل كدا لحد امتي يا ابني
شريف : يوووه يا أمي هنرجع تاني للكلام دا تاني
ام شريف : انا خايفة عليك يا شريف يا ابني زعلان مني عشان خايفة عليك  انا عايزاك تبقى احسن من اخواتك  كلهم بيشتغلوا و عليوا و أنت لسة زي ما انت انا مش هقولك  خليك زيهم لا انا هقولك خليك احسن منهم ياريت يا ابني عشان خاطر  انك و بعدين سيب الزفت الي في ايدك و قوم شوف حالك
شريف بنرفزة: قايم يا أمي سممتي بدني على الصبح و و بتقوليلي خايفة عليك
ام شريف : انت مش هتعرف قيمة امك ولا الي بعمله دا الا لما ربنا يفكترني ساعتها بس هتعرف قد ايه كلامي كان مهم
"طبعا انتوا عرفتوا ان اسمي شريف  عندي ٢٥ سنة انا أصغر اخواتي الاولاد الأكبر هو حامد و دا عنده ٣٦ سنة متخرج من كلية هندسة  و متجوز واحدة قمر و مخلف عيلين شبهها و بصراحة بحقد عليه  لأنه ربنا كرمه من كل حاجة مراته و قمر و عياله و حلوين لامهم و شغل و مبسوط و عيشته مرتاحة اما اخويا الاوسط و هو تامر  سنه ٢٩ سنة بس ايه مقضيها ع الاخر و بيشتغل شغلانة هو بيحبها بيشتغل شيف في أكبر المطاعم و مدلع اوي من مديره  إنما أنا ف انا الفاشل الي بيحب قعدة البيت الي مش بفكر في الشغل نهائي و وقتي كله نت و لعب بالبنات الي ازهق منها اسيبها و ادور على غيرها.... لحد ما جيه يوم كنت بقلب في الفيس و بالصدفة لاقيت اعلان  لطلب موظفين في شركة تسويق لمنتجات العناية بالبشرة و بالصدفة كمان كانت قريبة من البيت و مواعيد شغلها من ٨ و المرتب حلو اوي  ... بصراحة لعبة في دماغي لان المرتب عجبني و كمان قريبة من البيت ف قولت اجرب و اهو منها ارتاح من كلام امي الي بتنكد عليا بيه كل يوم الصبح "
..................................................................................
يوم جديد
الساعة ٨
موظفة الانترفيو : اتفضل يا فندم أملي الاستمارة دي و بعد شوية هتقابل الي هيعمل معاك الانترفيو
شريف : تمام شكرا
بعد خمس دقايق.....
موظفة الانترفيو: اتفضل يا فندم من هنا
" دخلت الأوضة و مكنتش متوقع اني هشوف الشخص دا هنا و كانت مفاجئة ليا و ليه"
شريف بندهاش : هو انت........