أنا أضيع

البارت 22

'' انا اضيع''

الكاتبه زهراء المياحي

'؛'؛'؛'؛'؛'؛'؛'؛'؛'؛'؛'؛'؛'؛'؛

ميس: كعدت بالاستقبال اهز برجلي انتظر فرات شوي ودخل حسام گالب وجها

حسام: ام المشاكل لا تخافين مراح يجي فرات؛ صار عنده شغل اهم من مشاكلج

ميس: اخذت المنظفات وصعدت انظف بالغرف الفوگ رغم مبيهن اثاث بس من قهري اريد اسوي اي شي؛ ساعه ونص خلصت كل شغلي الفوگ طبيت لغرفتي نصبت المكتبه وگعدت ارتب بكتبي ورواياتي هو وگف فوگ راسي

حسام: دبه غاز موجوده ومسواك جبتلج وطباخ جديد مليت من اكل المطاعم سويلنا عشه جعت

ميس: رحت للمطبخ سويت عشه صبيتله هو ياكل مدنگ؛ لتفت اباوعله رفع راسه درت وجهي ودخلت غرفتي؛ صار ليل اخذت فراشي ونمت بالاستقبال

_ثلاث ايام نفس الروتين البيت كله نظفته تنظيف زين عزلت كل شي ورتبت كل شي ؛ عمتي هند وخلود رجعن اجني يطمنن علي واشترن هدايه للبيت ونقوصات؛ الصبح اتعارك وي حسام وبليل ادخل للاستقبال انام ضايجه منا؛ يوم عن يوم جاي يخبلني بتصرفاته؛ واسلوبه الجاف والبارد شنو يتوقع مني اسكت اله واخضع؟ واصير جوه رجلي؟؟

.........

ميس: يوم ثاني دخل حسام للاستقبال حط علبه تلفون وگعد مقابيلي فتحتها تلفون؛ رفعت راسي باوعتله ؟

حسام: فيس ماسنجر واتساب ماكو! ماريد تسولفين وي عماتج وتسون كروب مدري شنو

ميس: منو مسوي گروب؟ وليش شبيهن عماتي معاجباتك ؟

حسام: احذرج بس

ميس: وبعد شنو الممنوع مني؟ خو ليش تنطيني تلفون اخذه وهاي هي

حسام: اششش ياله كافي صوت ما اسمع

ميس: هههههه شوف اسلوبك شلون متحسن صاير للاسوء

حسام: نفس منج ما اسمع لعبانه روحي منج

ميس: حلو شعور متبادل واخيرا صفه اني وياك نتشارك بيها

حسام: انجبي لج

ميس: عافني وطلع يسب بيه

_صار ليل طبيت سبحت ولبست دشداشه قصيره شوي فتحت شعري گويته وتمدتت نايمه ع القنفه بالاستقبال؛ بقيت أگلب بالتلفون وارتب باعداداته؛ سمعت صوت بالمطبخ عفت التلفون وطلعت هو يفتر بالمطبخ باوعلي رجع دار وجها يفتح النار
شنو دسوي؟

حسام: جعت

ميس: باوعت للساعه 11ونص؛ اي اكيد يجوع اذا متعشي من وكت؛ شنو تريد اسوي ؟

حسام: اي شي اتزقنب

ميس: گلبت بعيوني؛ اطلع من المطبخ لان اني منظفته وانت وسخته

حسام: يعني هسه انتي اجيتي تسوين اكل الي مو حباً بيه حباً بالمطبخ الي نظفتي ماتردي يتوسخ؟