تحت الارهاب

حلقة 8

#تحت_الارهاب

حلقة ( 8 )

بقلم محمد مالك

_

منذر واقف في نص المركز وايديه ع راسه
ويشوف للعمال يمسحو فالدم من الارض
بعد ما رفعو راكان وجثة المدير !

مش فاهم شئ !
شن السبب ؟! بس كلمته الاخيرة
تواصل معاي !

رواد: السلام عليكم
منذر..كان سارح تلفت: وعليكم السلام
رواد: اني محقق في موضوع جريمة الي صارت من ساعة
منذر: تمام تفضل كيف نساعدك
رواد: علي حسب علمي الزوز انتو تخدمو علي نفس القضية وصاحبك حسب الكلام
منذر..قعد يفكر في رده كيف حيكون ! : ااه لا صاحبي لا شئ علاقة عمل ممكن اربعة ايام بس منصاحبش مجرمين
رواد..رفع حاجبه: اني مش مصدقك لكن تمام نمشو للي بعده قالك شئ راكان قبل الجريمة ؟!
منذر: لا كان طبيعي
رواد..يشوف لي منذر وساكت: تمام اني توا عندي مشوار لي عائلة راكان ياريت تتفضل معاي
منذر: تمام

طلع رواد ومعاه منذر !

ركبو السيارة وتوجهو لحوش راكان

______

راكان..في زنزانة
وحاط ايديه الزوز علي وجهه ويتنفس بهدوء
الي درت صح ؟ غلط ؟! مش مهم بس ولدي رجع ومزال بنتي هيااا يا منذر تعالي وقولي ولدك رد للحوش !

نفتح باب الزنزانة وخش محامي راكان

محامي: شن درت في نفسك انتا
راكان..حول ايديه من وجهه: درت الي درته بكامل ارادتي
محامي: تعرف عقوبة الي درته من 15 لي 30 سنة ومرات القاضي يزيدك حكم !
راكان: عارف
محامي: مدام عارف كيف ادير في روحك هكي !!
راكان: تعرف شعور انك تشوف حد من صلبك ! ينهان ويتعذب يبدا في خاطرك تكون مكانه ومستعد تحرق الدنيا ع خاطره
محامي: وشن فادك ان تقتل مديرك توا ؟!
راكان: تمام نبيك تمشي لي حوشي تشوف ولدي رجع ولا لا
محامي: دقيقة دقيقة يعني متفاهم معا المجرمين علي انك تقتل مش يردو صغارك
راكان: ايه وولدي بس البنت لا
محامي: من حيطلع البنت !! انتا كنت الامل الوحيد ليها !
راكان: مقدرتش نخسرهم الاثنين
محامي: اني ماشي الحوش نشوف ولدك وراجعلك وان شاء الله نقدر نخفف عليك حكمك حتا شوي
راكان: تمام بسرعة بس
محامي طلع وسكرو الزنزانة وراه

راكان..رجع حط ايديه ع وجهه وتنهد

________________

هيفاء..في حضنها سمير ..وتبكي : بوك ميردش مش عارفة خيره
سمير: سامر وين ماما
هيفاء..دموعها نزلو بحرارة : سامر توا معا الملائكة فوق
سمير: عندي ربي ؟
هيفاء: ايه عند ربي سارة اختك كيف حالها ! حد مسها ضربها ؟!
سمير: لالا فيه راجل جاي بيدير ابرة ضربته
هيفاء..باست سمير: شوف لما يجي بابا احكيله كل شئ تمام !
سمير..هز راسه بمعني تمام