نقطة ضعف

الحلقة 1

#نقطة_ضعـف
الحلقة 1

أرتمت نـور بتعب ع صالون حجرة الدكتورة مسرة ورمت القفازات الزرق في السلة بـ مهارة وغمضت عيونها بـ إرهاق
مسرة شافتلها وابتسمت وهي خاشة بـ كوبين كابتشينو ، دفت مسرة الباب وسكراته بضهرها ، وحطت كوب قدام نور الي فتحت عيونها لما شمت ريحة القهوة الزكية
مسرة : هذا امتياز هكي دار فيك !
نور قعمزت : حالـة تعرفي
مسرة : خودي قهوة صحصحي ، العناصر النسائية ناقصة ومرغوبة في اي لحظة توقعي ينادو علينا
نور ارتشفت من القهوة رشفة وحطتها فوق الطاولة : جت في وقتها صحيتي
مسرة : سلمك
نور: شفت من الدم اليوم لن كبدي درهت
مسرة : خدمتك كلها في الدم يا دكتورة
نور : عارفتها 
مسرة قعمزت ع كرسيها وقالت بـ جدية : سمعت بـ جرحة من مدينتنا هلبا انصابو في الجبهة ، نتوقع في لحظة يخشو علينا بالإسعاف
نور ارتشفت رشفة تانية وقالت بإنزعاج : هذا كله من الي أسمه الديب ع اتفه حاجة يلم سياراته ويديرلنا جبهه
مسرة : هذا الي مدايرلنا هيبة هني يا ماما
نور: لا هيبة لا بطيخ مكسد ويشري في المشاكل شوفي قداش واحد انصاب في جرته
مسرة : ما غصب حد ع شي ، هو مجرد ما يقول حاجة يوافقوه
نور : وعلاش يقول هو اصلاً ؟
مسرة : خيرك كارهتيه ؟ نسيتي ان هو الي شد المفرخ يلي خنبو المحلات الفترة الي فاتت ؟ وحبس المشعوذة الي كانت ادير في السحر في المقبرة ؟ ووفرلنا الغاز ؟
وفجأءة سمعو صوت سيارات الإسعاف ، وفتح الدكتور رياض عليهم الباب بسرعة وقال بإسعجال : الجرحى وصلو نبو مساعدة بسرعة
ناضت نور ومسرة واتجهو لغرفة الاسعافات الي كانت مليانة بالجرحى بـ مختلف الإصابات ، رصاص ، شظيات ، حرائق !
اتجهت مسرة لـ الدكتور رياض يلي كان يعقم في جرح واحد مصاب وبدت تساعد فيه ، اما نور فتحت الستارة ع صوت الممرضة يلي نادتها
كان الوسيم ملطخ بـ بدلته العسكرية بالدم وهو شاد زنده بألم مكبوت
اتجهتله وهي مش عارفة كيف تقدر تساعده بحكم قلة خبرتها
شافتله بقلة حيلة و سمعت صوت الدكتور وهو يقول : دكتورة نور نحي للـديب التجاكة اني جايلك !
نور ارتبكت لما عرفت ان هذا الديب الي نص المشاكل من ورا راسه ، مكانتش تعرف شكله حق المعرفة ، اغلب صوره يلي ينزلو فيهم الصفحات كانو مش واضحات ، ف عادة يكون في السيارة ، او صورة مختلسة وهو في مصرف ، وما الى ذلك، فتحتله التجاكة بسرعة وارتباك وهي حاسة نفسها تصبصب عرق ، نظراته الغريبة ليها وريحة الدم المريبة اربكتها ، صوت انينه الكبوت عطتها مسؤولية كبيرة جداً ، وبسرعة ما فتحتها وبدت تحاول تنحيها
نور بجدية : ساعدني انحيها بالله عليه
حسام من غير تعليق نحا ايده الملطخة بالدم من علي مكان الجرح في زنده ، وساعدتها الممرضة انها ترمي التجاكيت العسكري
نور شافت للجرح العميق بـ إشمئزاز وقالت : دكتور الجرح عميق بس ما اعتقدش فيه رصاصة !
شافلها حسام الملقب بالذيب  بجدية وقال : مافيشي رصاصة !
نور : كيف عرفت ؟
حسام : الرصاصة الرابعة الي تخشلي  خلال سنتين !
جي الدكتور رياض والي كان مرتبك من كثرة العدد وقلة الإمكانيات
رياض بسرعة القى نظرة ع الجرح : اووف عميق
حسام بألم : شن الباقي ؟
رياض : دخلت زوز ع غرفة العمليات ، وتلاته جروح بسيطة وواحد عنده شظية تبي الإستئصال من الرجل ، متخافش اطمنت عليهم كلهم وجيتك
حسام : تمام
رياض : دكتورة ناديلي ع نادر
نور : حاضر
واتجهت للدور الثاني ونادت ع نادر يلي نزل يجري ، ونزلت وراه للغرفة التانية
مرت ساعتين ع ما هدت الاوضاع ، طلعت نور هاتفها من جيب البالطو ، الساعة 8:15 ، الدنيا ظلام ، والليل بسرعة ما يحل في في الشتي
رجليها تعبو من الوقوف بالرغم انها لابسة حذاء رياضي مريح ، خطمت من الممر وتفاجأت لما القت حسام طالع وحاط تجاكته ع كتافه حطان
نور سرعت خطواتها ووقفت قدامه : وين طالع حالتك ما تسمحلكش تطلع !!
حسام شافلها وبإستعجال قال : بنطلع الجبهة قعدت فاضية
نور : وضعك مش مستقر ، نزفت هلبا وتوا كيف كملت كيسة الدم لازم تقعد مستلقي ناوي تنتحتر انت ؟؟
حسام بنفاذ صبر تفاداها وطلع ، وكيف تلفتت بإنزعاج من حركته شافت رياض المستغرب
رياض : ما شفتيش الديب وين ؟
نور بإنزعاج : الديب متعكم كيف  طلع للغابة هوينا !
رياض : تي كيف هذا مفروض يقعد
نور : لحق عليه توا كيف طلع
وطلع رياض يجري بعده ، خشت نور لغرفة مسرة الي لقتها تلم في حاجاتها
نور : مروحة ؟
مسرة : اي اتصل بيا محمود قالي اني قدام المستشفى
نور : غريبة اني بابا قاعد ما اتصلش
ومجرد ما طلعت هاتفها لقاته يتصل : ابن الحلال
وردت : هاني طالعة
وسكرت الخط وسلمت ع مسرة وطلعت
ركبت سيارة بوها المتواضعة
بوها : شن صار قالو جوكم الجرحى ؟
نور : ايه جونا
بوها : لقيتهم كاتبيهم ع الفيس 20 واحد وزوز حالات وفاة
نور : كذب ما يجوش 8 او 9 وكلهم اصابات خفيفه يمكن تنين او تلاته رصاص والحمدالله مافيش ولاحالة وفاة
بوها ولع سيارته وانطلق وهو يهدرز ع الذيب وبو الديب
نور : ايه حتى هو عنده اصابة في ايده ، وماقعدش ساعتين وطلع زي الجن
بوها : زي القط بسبعة رواح ! هادي مش اول مرة نسمعو بيه متصاوب
نور : ايه قالو صح 
وفات اليوم ، وفاتو الأيام ، لليوم يلي كنت فيه نور تحوس في حوش جيرانهم وتعاون فيهم وتوتي معاهم لعرس ولدهم يلي بعد غدوا
نور فتحت دولاب المطبخ : معاش فيه كلينكس ؟
ايناس بنت جيرانهم : شوفي الدولاب
نور : مافيش !
ايناس : حيييي احلفي
ناضت ايناس واتجهت للدولاب ، رسمي صح ، نص البضاعة قاعدة في حوشكم
نور شافت ل ايناس : نمشي نجيب ؟
ايناس : ياريت تعرفي
نور : اوك
طلعت نور من المطبخ ولبست وطلعت ، عبرت الشارع بخطوات مسرعة ، خشت الحوش خدت شن تبي وحطت في الكيسة السودة وطلعت ، قصت الطريق وهي تشوف للكيسة وتتأكد
لن سمعت صوت كلاكس قريب منها وتلفتت ولقت السيارة جاية بسرعة اتجاهها
يتبع ..