نقطة ضعف

الحلقة 16

سامحوني بنات الفترة هذه صايرلي شوية ظروف هذا علاش معاش انزل بالحلقين وفي الوقت
نحاول قدر الإمكان ان انزل حتى حلقة وحدة
قراءة ممتعة ♥️
#نقطة_ضعـف
الحلقة 16
فتحت ام نور الباب ع نور وزالت ابتسامتها وارتبكت لما شافت امها
امها عقدت حواجبها : نـور ؟
نور وهي تتكلم في الهاتف حكت شعرها بإرتباك وقالت : خلاص فادية نهدرزو بعدين المهم اطمنت ع امك وخالاتك
الديب فهم : تمام مية مية
نور : باي توا
وسكرت الخط وشبحت لـ امها.
امها : في منو كنتي تكلمي ؟
نـور : فادية ، خالتها دايخة ومريضة قعدت تسأل فيا شن يديرولها
امها : شن صابرين ؟
نور : اي نوعاً ما ، خير من اليومين يلي فاتو الحق
وفات اليوم ، وفات أسبوع جتهم فيه اميرة في نهاية الاسبوع تحكي وتهدرز في غرفة نور
اميرة : اي وبنمشو شهر عسل لـ مصر
نور بإنزعاج وهي متكية ع سريرها : طامعه حتى في شهر عسل مع هالشيباني المكحكح !
اميـرة بثقة : تو لما يشوفني يرجعوله ايام الشباب ، اصلاً معاش كلمته باش يستاحشني
نـور : بتجيبي لروحك المشاكل
اميرة : شوفي حبيبتي كان فيه مشاكل ح يجو ح يجوله هو اما اني ما دخلي في شي . اصلاً العرس عائلي ومش ح نقولو لحد وهو مش مداير عرس ح يروح بيا طـول
نور ببرود : امتى ؟
اميرة : الخميس الجاي
نور قعمزت بعد ماكانت متكية : الخمس الجاااي ؟؟ يرزيكم فيه هالخميس تتسهوكي انتِ ؟
اميرة : كيف امك مقالتلكش ؟
نور وهي مذهولة : بجديات تدوي
اميرة : متخافيش كانك ع القفطـ..
وقطعت عليها نور وهي تتكلم بإنفعال : تي قفطان شنو المرا امها كيف متوفية وهو يبي يتزوج مصح وجهه
اميرة بجدية : احترمي نفسك راجلي ما نسمحلكش تحكي عليه بالطريقة هذه راه
نور : أميـرة اعقلي بالله عليك شن هالهبال هذا
اميرة مدت ايدها لشعر نور الناعم وخدت خصلة منه وبدت تلعب بيه وتلف فيه ع صبعها : نور حبيبتي الحلوة لازم تعرفي حدود كلامك مع عمتك يا قلبي قرب عمرنا ع بعض مش معناها تقولي اي شي من فمك
نور نزلت ايد عمتها : مش عارفة شن يقولك عقلك
عمتها شافتلها بثقة وقالت : الديب مش ح يتزوجك !
نور انصعقت وقالت بصدمة : شن تقولي ؟
عمتها ابتسمت بخبث : تسحابيني راقـدة ع وداني ؟ تستغبي فيا انتِ وياه ومدايرين روحكم فالحين وماحد يدري ع علاقتكم !؟
نور بإنكار وهي تستغبى : ع شن تقولي مافهمت شي !
عمتها زالت ابتسامتها المكاره وقالت بنفاذ صبر : تسحابي روحك الذكية الوحيـدة يلي في العيلة ! نسيتي انك طالعتيلي اني ؟
نـور : مانحبش التلميحات راه
عمتها : عارفاتك ، لو انك تحبي التلميحات راك ما ارتبطتيش بالديب ، كلنا نعرفو انه مستحيل يحكي بالألغاز والتلميحات ، يقول في كلامه زي الصاعقة ويخليك تحوسي
نـور استسلمت بعد ما عرفت ان عمتها متأكدة : من قالك ؟
اميرة : منراجيش في حـد يقولي ، عرفت بروحي
نور بنظرات كلها غضب : كيف عرفتي ؟
اميرة مدت ايدها لـهاتف نـور وشداته بأطراف اصابعها واضافرها المبرودة وقالت : تليفونك يا بخيلة!
نور عقدت حواجبها بإستغراب وكملت اميرة وهي توضحلها : بخلك هو سبب مشكلتك يلي طحتي فيها ، هاتفك ما يطلعش الرمز الا بعد خمسة دقايق من الإقفال ، لانك مترددة وباخلة ادخلي الرمز كل ما تسكري وتفتحي ، يومها مجرد ما نضتي من جنبي وخليتي هاتفك شديته وفتحته نبي نشوف الساعة ، مشي فتحلي ! لقيت رسالة من الذيب ، رقمه مميز قدرت نحفظه ، روحت وسميت لرجب الرقم وقالي انه حسام
نور قعدت تشبحلها وهي مذهوله ، ناضت اميرة واتجهت للزيانة وقعمزت ع الكرسي يلي قدامها وقالت : وبعدين ما نستغربش ! بنية حلـوة ، رقيقة ، ذكية ، اكيد الديب مش ح يقدر يقاوم
نـور : الموضوع مش زي ما انتِ تفكري
عمتها : مش مهم كيف صارت ، المهم انكم تحبو بعض ، ولو يسمع بوك ح يزعل هلبا منك يا نونو
نور قعدت ساكتة بغضب وغيض ، اما اميـرة تلفتت للزيانة وخدت الروج الوردي ودارت منه وقالت ورداته : واكيد لو زعل معناها ح يبطلك ومش ح تحضري التخرج
سكتت اميرة لثواني قبل ما تشد البودره وتفتحها وتكمل وتقول : ولو ما حضرتيش التخرج معناها ..؟
ونفخت ع البوردة ف طايرت غبرتها في الهواء وقالت : معناها 7 سنين في الهواء !
نور ابتلعت ريقها بصعوبة
اميرة تلفتت لنور وقالت بإستعطاف : واكيد الدكتورة ما تبيش تخسر هالسنين بعد ما وصلت اللقمة للفم !
نور : ما تشدينيش من ايدي يلي توجع فيا ، لأني مستعدة نقطعها !
اميرة رفعت حواجبها بدهشة ووقفت وقالت بإستفزاز : اوووووو شايفاتك مستغنية
نور : اميرة
اميرة رجعت وقعمزت جنبها وقالت بهدوء : شوفي حبيبتي ، اني عمتك وما يهونش عليا يضيعو هالسنين عليك ، ولذلك عندي حل حلو
نور عقدت حواجبها بإستغراب ، وكملت عمتها وقالت بهدوء : ماتفسديش عليا عرسـي ، ابعدي ع الي اسمه ديب ، وصدقيني ح ننسا الموضوع بـ رمته
نور : اميرة بجديات ؟
اميرة : اعتقد ان ساهل عليك تسيبيه ، ماليكمش اربعة شهور علاقة  !
نور : اميرة
اميرة شافتلها بخبث : يعني يا تسيبيه يا تسيبي قرايتك !
نور ضحكت بقهر : هههههه تدوي من عقلك ؟
اميـرة : ايه
نـور سكتت وهي مش قادرة تفكر بينهم ، ابتسمت اميرة وقالت : مافيهاش تفكير اعتقد
نور بحزن : خليني بروحي
اميرة وقفت وقالت بهـدوء : اللون الازرق ح يطلع عليك تحفـة في العرس !
ومجرد ما طلعت اميـرة انهارت نور بالبكي ، حضنت مخدتها وهي تبكي بشدة ، اتصل بيها حسام ، شافت الأسم .
حطت هاتفها قدامها وزاد بكاءها ، ولولا ضغط المخدة ع فمها ووجها لكان صوتها سمّـع الجيران كلهم
بعتلها الديـب رسـالة مكتوب بيها 
" جاتك الحـالة ؟ "
شافت نور لرسالتها الي واضح باعتها بنفاذ صبـر وردت الهاتف ، ومجرد ما حطاته اتصل هو
مسحت دموعها وشربت رشفة مية وردت عليه بتماسك
نور : ألـو
الديـب بعصبية: باهي الي رديتي !
نـور : كنت مشغولة شوي ، نحضر في روحي للتخرج
الديـب هدي شوية : شن صار في بدلتك ؟
نـور : قالي الخياط تلقيها واتية غدوا
الديـب : باهي تمام معاش عندك شي معانها
نـور : تقريـباً
الديـب : اني غدوا احتمال نازل لطرابلس بالك نخطم عليك لو بتمشي الكلية
نـور ببرود : علاش بتخطم ؟
الديـب : هكي ، مستاحشـك ♥️
سكتت نور وفي ثواني صمتها تجمعو الدموع في عيونها بسهولة ، وكأنه حـط ملح ع الجرح
الديـب : حبيبي ؟
نـور قعدت ساكتة خوفاً انها تتكلم ويسمع صوتها ويعرف انها تبكي ، لكن دهاء الديب عرفها من نفسها المرتعش
الديب : شن صاير معـاك ؟
نـور اصرت انها تقعد ساكتة ، محافظة ع نفسها ومتماسكة
وكـالبالون وخزها  هو لما قال : فاهمك من غير حتى ما تتكلمي ، عارفك شادة بكيتك وماتبيش تسمعيني صوتك ، ادوي شن صايـر !؟
وهني انفجرت هي وحطت ايدها ع فمها وبدت تبكي
الديب استغرب من طريقة بكاءها الهستيرية وقاللها بإندفاع : نور ادوي شن صاير ما تحرقينيش من مضايقك ؟!
نور وهي تبكي : احني غلط ، علاقتنا غلط ، حبنا غلـ..
وقطع عليها الديـب بعصبية : تي ياسر وانتِ شادتيهالي علاقتنا مستحيلة واحني غلط وعلاقتنا غلط ايه غلط وعاجبتني ونبيها وترا يطلع راجـل ويقول حاجة والي خالقك لما نحرقه قدامك ، نحيها هالأفكار من عقلك ومعاش تنكدي عليا تربحي خليني نعرف نتصرف
نور كانت تبي تعترفله بكل شي ، تحكيله ع عمتها وكيف هددتها ، لكنها مش واثـقة في تمالك الديب لـ اعصابه ، عارفاته عصبي جداً ومتهور ويدير اي شي ، لذلك فضلت السكوت والإنسحاب التدريجي
نور مسحت دموعها بعد ما خدت قرار في نفسها : اوك تمام
الديب تنفس بعمق وهدي : اوعديني انك ح تحكيلي اي شـي يصير معـاك وتنحي هالفكرة من راسك
نور سكتت لثواني قبل ما تكذب وتقول : وعـد
الديب بجدية :  معاش تبكي ، والله ما نتحمل حد يزعلك ولا يبكيك
نـور ارتشفت انفها وقالت : انشالله
اما تاني يوم ، ناض الديب البايت في حوش ولد خاله ع صوت الدوشه ، وناض وسأل وهو مستغرب ع سبب الضجة لي يخبروه ان خالـه توفى !
عقد حواجبه وهو مش مصدق ، لن شاف الدموع في عيـون خاله التاني ، ف اضطرو انهم يزيدو يقعـدو اسبوع تاني في الجبـل ، لاحظ فيهم الديب ابتعاد نـور التدريجي عليـه ، خلالها مسـاحة فاصلة بينها وبينه زي ماتبي وهو يسحاب انها مشغولة في تخرجها ، وماعنداش علـم بموضوع العرس نهائي !
بعد مـرور الأسبوع قررو يروحو لحوشهم ، تلاته اسابيع كانو كفيلات يخلوهم يرجعو لحوشهم مشتاقين ، درس الديب سيارته المتعلية قدام الحوش وفتح الكوفن ونزل وخلى حسن ينزل في الشناطي ، امـا هو خش وفتح الباب ووامه وفادية وراه
خش هو اول واحد وبعده اخته وامه ، ولقي الضي والـع وصوت التلفزيون عـالي
خش وهو عاقد حواجبه بإستغراب ويحاول يطرد وسوسة الشيطان ، لكن مجرد ما خش الصالة شاف المنظر الي مكانش حاب يشوفه وطلعو توقعاته في محلهم
أميرة مقعمزة بجنب رجـب ومتكية راسها ع كتفة وياكلو في المكسـرات!
مجرد ما شافو الديب ساوو تقعميزتهم
الديـب بصدمة : تزوجتها ؟!
بوه وقف وقال بثقة مزيفة : ايه
خشت بعده امه وفادية وحسن وشهقت امه لما شافتلها بروجها الاحمر الفاقع وشعرها البني الهادي المفتوح وحطت ايدها ع قلبها وهي مش مستوعبة 
اما الديـب مقدرش يتمالك اعصابه واتجهه لبوه يجري وشده من سوريته وهو يتكلم في وجهه بعصبية : تزوجت ع امي ياواطي ياحقير
اتجهه حسن للديب وهو يحاول يفك بـوه من بين يديه
الديب وهو يعيط بعصبية وخانق بوه : خللليني بنقتللله الواطي تزوج علي امه هالفاسد هذا انت شنو طينتك بالزززبط شنووو طينك تي هي الي خلاتك راجل هي الي دارتلك قدر بين الناس يا حقير طلقها ولا رد لأمي فلوسها
بوه بخوف : ماعنديش فلوس
اميرة بغضب : أطلقه يا قليل الأدب !
تلفتلها الديـب وشافلها بغضب وطلق بوه ودفه لدرجة انه طاح ع الصالون واتجهلها بخطوات بطيئة ووقف قدامها وقال بغضب : طالعلك لسـان يا حربـة !
اميرة انهزت ثقتها بنفسها لما شافت لنظراته المخيفة يلي كلها شـر وحاولت تتمالك نفسها : احترم نفسك
الديب زاد قرب منها وهي وخرت لدرجة لصقت ع الحيط
الديب وهو يشبح لثقتها المهزوزة يلي في عيونها وقاللها بصـوت واطي : سبب واحد بس مخليني شـاد روحي عليـك !
اميرة : نور !
يتبع ..