نقطة ضعف

الحلقة 12

#نقطـة_ضعف
الجزء الثاني
الحلقة 12
أما عند نور يلي كانت تحضر في فطور حسن قبل ما يمشي للجامعة بينما فادية كانت راقدة ، رن هاتفها فـ شافت المتصل يلي كانت مسرة وردت
نور : الو
مسرة : اهلين نور كيف حالك
نور : الحمدالله ع كل حال ، انتِ كيف حالك ؟
مسرة : بخير ، سمعت باللي صار مع راجلك ، ربي يفك اسره ويرجعلكم سالم يااارب
نور تنهدت وقالت : امين يارب
مسرة : معاش كلمكم ؟
نور : لا والله ، اول يوم شدوه اتصل بيا وبعدها لحد الأن ما سمعت عليه شي
مسرة : ربي يطمن قلبك
نور : انشالله ، كاتر غيابي ؟
مسرة : ايه تعرفي هلبا والمشرف اليوم يسأل عليك وقال لازم تجي اداومي
نور عقدت حواجبها بإنزعاج وقالت : من عقلهم هاذم يتكلمو ؟ راجلي محبوس ونفسيتي مدمرة ويبوني نجي نداوم ؟
مسرة بترجي : قلتلهم هالكلام ، لكن بجديات لو ماجيتيش معناها مشكلة كبيرة للمصحة ، الدكتورة ايمان عندها إجازة وضع ، والدكتور محمد مسافر عنده مؤتمر طبي ، ومعاش فيه دكاترة اطفال !
نور طفت ع الحليب قبل مايفيج بـ ثواني وقالت : حتى ني عندي ظروف ومانقدرش نداوم
مسرة : نور عارفة ظروفك ، لكن مافيش حل اكتر من حالة تجي ونردو فيها لأن ماعندناش دكاترة !
نور سكتت اما مسرة كملت كلامها وقالت : بالله عليك يا نور تعالى اسبوع اقل شي بس
تنهدت نور وقالت : اوك خلاص ، تو نجي غدوا ، لكن ما تقيدونيش بمواعيد ودوام كامل
مسرة : في ميزان حسناتك يارب
كملت نور المكالمة وسكرت الخط ، وتلفتت للباب لما سمعت فادية قالت : صباح الخير
نور : صباح النور
فادية بإستغراب : في من كنتي تكلمي ؟
نور : دكتورة معاي ، تسأل عليا
فادية حكت شعرها وقالت بخيبة امل : نسحابه حُسام !
نور تنهدت وقالت : مش حسام
خشت فادية للمطبخ وقالت : هاتي نعاونك
نور : كل شي واتي حطي الطواسي والسزوة ع الطاولة بس
وبدت تحط فادية ، ف قعدت نور تشبحلها ثواني وقالت : فادية !
فادية شافتلها : نعم ؟
نور بإرتباك : كان عندكم جدكم او عمك اي قريبكم يعاني من مرض نفسي
فادية جبدت كرسيها وقعمزت : ايه
وسكبت لروحها طاسة شاهي وقالت : مرض الاكتئاب ، هو مش اكتئاب اكتئاب لأن مرات يفرح هلبا ومرات يرقاله هلبا هكي بدون اي سبب ، يسحابوه مختش ياناري لن كبر وطلع الطب باش عرفوه مريض نفسي
نور ابتلعت ريقها وهي متكيه ع الرخامة وقالت بنوع من الازعاج : من هو باه ؟
فادية : جدي الله يرحمه ، راجل حنينة فاطمة الله يرحمها يلي قعدت عندنا وقعدي رادة بالك منها !
نور رفعت حواجبها وقالت بإدراك :اهاااا ، الله يرحمهم
فادية قالت بعد خدت حبة زيتونة وكلتها : علاش تسألي ؟
نور : لا شي نسأل بس
فادية بإصرار : اكيد فيه حاجة !
لن خش حسن وقال بطريقته العفوية في الكلام  : صبحخير
نور : صباح النور ، قعمز افطر
اتجه حست لثلاجة المية وخدي طاسة وقال وهو يصب في المية : لالا مانفطرش الصبح ، منورة
نور بعتاب : توا هذا كله وتيته ع خاطرك ! كول توست اقل شي وجبة الافطار اهم شي راه
شرب حسن طاسة المية في مرة وحده وقاللها : حتى الديب كنتي تعطي فيه في نصائح طبية هكي ؟
نور : ايه ، وح نعطيه تاني !
حسن : انشالله ربي يردهولنا سالم
فادية ونور في نفس الوقت : يااارب
حط حسن الطاسة ع الرخامة وقال : هي توصي حاجة ؟
نور : سلامتك
وقال هو طالع : هي سلام
نور بإهتمام : رد بالك وانت تسوق ، ما تجريش !
سمعاته قال : انشالله
وسمعت صوت تسكيرة الباب
فات اليوم اما تاني يوم في المصحة ، خشت نور لمكتبها فـ طقطق الباب وسمحت للطارق بالدخول ، وكان الدكتور رياض
خش الدكتور وقعمز قدام نور : كيف حالك
نور بتعب : الحمدالله
رياض : سمعت باللي صار ، ربي يفك اسره
نور  : امين يارب
رياض : موقف ما يتنساش منك انك جيتي وانتِ تمري بـ هالظروف ، بارك الله فيم وفي ميزان حسناتك انشالله
ابتسمت نور بمجاملة وقالت : بعد اصرار الدكتورة مسرة طبعاً
رياض ابتسم وقال : وفي ميزان حسناتنها حتى هي ، نستأذنك اني حالياً عندي حالات يراجو فيا ، قلت نجي ونطمن عليك
نور شافتله وقالت : شكراً دكتور ، اذنك معاك
ناض رياض وطلع من المكتب ونور مش طايقة اي شخص ، بدت في حالاتها وبالرغم كل يلي صاير كانت تساير في الاطفال وتسمع لشكاوي اولياء امورهم بكل رحابة صدر
وفي نهاية الدوام خش طفل يبلغ من العمر حوالي الـ 4 سنوات ومعاه امه
خشت وامه وقالت : السلام عليكم دكتورة !
نور : وعليكم السلام
قعمزت الام وقعمز في حجرها ولدها وقالت نور : كيف حالكم ؟
الام : الحمدالله ، لكن وليدي مريض شوية
شافلها الولد وقال بطريقة جدية وبعتاب : اني مش مريض !
ضحكت نور ع طريقة كلامه يلي ما تليقش بعمره ابداً وقالت بلطف : باهي شن رايك تقعمز ع السرير ونشوفوك مريض ولا لا ؟
الولد ببراءة : نرقدو ؟
نور ابتسمت وقالت : ايه
ناض الولد واتجه للسرير ومعاه نور يلي قاماته وقعمزاته عليه وقالت : ايواه شطور ، كم عمره ؟
امه : 4 سنين
لبست نور السماعات وقالت : شن اسمه الحلو
الولد : حُسام
وقفت نور لثواني وشافتله بحب وقبلاته من خده قبلة طويلة وكأنها تقبل في الديب ، ورجعت شافتله وقالت : اسم حلـو ❤️
ضحك الولد بسعادة ، شافت نور لـ امه وقالت : من شن يشكي ؟
الام وقفت واتجهتلها وقالت : ماياكلش ! النهار كامل يقعد ع طاسة مية عادي جداً ، والمشكلة انه حركي هلبا ومايهفتش
نور عقدت حواجبها بإستغراب وهي حاطة السماعة  علي قلبه وهي ساكتة حتى تسمع وضع النبضات
حركت السماعة لحنجرته وقالتله:  تنفس بالقوية
الولد ببراءة : كيف ؟
نـور : زيني اني
وخدت نفس عميق وقالت : هكي
تبعها ، سمعت مجرى تنفسه الطبيعي ونحت السماعات وخدت العود الخشبي وقالتله افتح فمك
كشفت ع حنجرته وفمه ورجعت لمكتبها وقالت : تجبرو فيه ع الماكلة ؟
الام رجعت وقعمزت قدامها وقالت : لالا لما يقول ما نبيش ينوض يلعب ومايكلم فيه حد
نور : قداش ليه ماياكلش ؟
الام : فترة طويلة يمكن 8 شهور
نور : شوفي في العادة من الطبيعي ان الطفل يمر بمرحلة تنقص فيها مكالته خاصةً في العمر مابين التلاته السنين والستة سنين ، لكن لو طولت الحالة هذه معناها الطفل يعاني من مشكلة ، اما تقرحات والالتهابات في الفم والحنجرة تسببله الم لما ياكل ، وولدك فمه وحنجرته سليمة ، فـ تكون الاحتمال التاني يلي هو انه يعاني من فقر دم تسببله فقدان شهية
طلعت نور ورقة وكتبت عليها بخط الدكاترة الغير مفهوم وقالت لـ الام : اديريله تحليل دم ، ترجعيلي وع حسب النتيجة نعطيك العلاج
الام : اوك
خدت الام من نور الورقة وشكرتها وطلعت مع ولدها يلي حب نور ودارلها باي وهو طالع
تم الدوام وروحت نور يلي اتصل بيها العم فيصل وهي في السيارة وتسوق وردت وهي ملهوفة لعل وعسى جايبلها اخبار ع الديب وقالت : الو عمي فيصل
فيصل : كيف حالكم ؟
نور : الحمداللله كيف حالك انت ؟
فيصل : بخير في نعمة
نور : طمني عمي
فيصل : شفته اليوم
نور بلهفة : كيف حاله ؟ شن وضعه ؟ مقالكش امتى بيطلع ؟ موصاكش نوكلوله محامي ؟
فيصل : اهدي يا بنتي اهدي ، حاله كويس زي ما تعرفيه يا جبل ما يهزك ريـح ، ماطلب مني شي غير انه يبي يشوفك بس !
بعد يومين ، كانت مقعمزة نور بتوتر وحزن في مكتب العقيد يلي تفاهم معاه فيصل انه يفضيلهم المكتب حتى يتلاقو
انفتح الباب ببطء ، وقفت نور لما شافت الديب مكلبش وزوز شرطة شادينه ، فتحوله الباب وطلعو وسكروه زي ما أمرهم العقيد
قعدت نور ثواني تشبحله بحزن واشتياق ولهفة ، وبسرعان ما اتجهتله وارتمت في حظنه وهي تبكي !
قام يديه المكلبشات حتى تخش بينهم وهي ايد ع راسه وايدها الثانيه شادة تيشرته وتبكي بحرقة وتقول : استاحشتك هلبااا ، علاش هكي صار فينا حسام علاش قولي
الديب بحزن : مكتـوب !
نور تبكي بغزارة لدرجة دموعها بلو كتفه وهي تقول : ياربي نطلعو من هالمشاكل بسرعة خلاص تعبت تعبت
الديب : كله ح يفوت ، معاش تبكي !
نور بصوت يرجف : أسفة ، اسفة ع كل يلي صار وع المشاكل يلي سببتهملك ، ما نسحابش هذا كله صاير معاك
سكت الديب وهو عاقد حواجبه وهو شاك ع شن تحكي
طلقاته نور وشافتله وهي تتلمس في وجهه وتمسح ع شعره وقالت وهي تبكي : علاش ما قلتليش ؟ علاش ما سمحتليش نوقف معاك ونساعدك ؟
الديب عقد حواجبه من عليها وقال : ع شنو
نور : ع مرضك !
الديب تنهد ونحا يديه من عليها وقال : كيف عرفتي ؟
نور : مش مهم كيف عرفت المهم اني عرفت ، مش مصدقة انك طول هالفترة كنت تعاني واني جنبك وانت مش قايلي ! 
الديب : ماكنتش نبي نحملك مسؤولية كبيرة
نور مسحت دموعها وقالت: اني نبي ! حسام اني نبي نتحمل مسؤولية كبيرة معاك ، نبي نتحمل مسؤوليتك ومسؤولية حوشك وولدك ومرضك وتعبك وكل شي ، نبي نكون جنبك ع المرة قبل الحلوة علاش تبي تباعدني علي هذا كله ؟ 
نزل راسه الديب وكأنه يفكر ورجع شافلها لما قالتله هي بأهتمام : دواك ليك اكتر من اسبوع موقف عليه ! ح ترجع تتنكس لو مخديتاش تاني
الديب : نعرف
نور : جبتهولك اني ع فكرة
الديب عقد حواجبه ، اما هي اتجهت للصالون الجلدي يلي قدامه طاولة موضوع فوقها ساكو وفتحاته وقالت : لقيتك داسه في السيارة
لحقها الديب وقعمز ع الصالون الي مقابلها وشاف ليديها البيض المقبعات بالازرق ويلي حاولت تخفيهم بكم سوريتها الواسعة
عقد حواجبه بإنزعاج وفجأة جبدلها ايدها بقوه وقاملها كمها بسرعة ورجع شافلها وقال : شن هذا ؟
نور : خيرك حسام خلعتني !
الديب بغضب : خيرهم يديك مبقعات هكي ؟
نور : ما ادورش ، يطلعولي لما نقعد ايامات جوي مش حلو
الديب وهو مازال عاقد حواجبه ومش فاهم : كيف لكن اول مرة تصيرلك !
نور : لا صارتلي زمان لما تعاركت انت مع عمامي لكن ماحدش شافهم او لاحظهم
نحت يديها من يديه وقالت : المهم جبتلك حوايج لكن ماكترتش لأنك مش ح اطول
الديب : من قالك ؟
نور شافتله بتفاؤل وقالت : كلمت صاحبتي خوها محامي ، قتلتها تربطني بيه وكملته وقالي انه لو حصلنا تنازل نقـ..
فقطع عليها الديب بإنزعاج وغضب : شنو ؟ كلمتييه ؟!
نور قالت ببراءة : حسام سيبت الموضوع كله وعلقت ع اني كلمته
الديب بإنزعاج : بالله عليك خليني متهني ماتكلميلي حـد ، حبستي كلها مؤامرة ومشكلة قديمة بيني وبين شخص واصل في الحكومة وهو يلي ورا هذا كله !
نور عقدت حواجبها بإستغراب : مشكلة شنو ؟
الديب تنهد وشدلها يدها بحب وقال بصبر : شوفي الوقت عندنا محسوب بالتانية هني ، مانبيش نضيعهم في شرح وتبرير يلي صايرلي توا ، المشكلة هذه مطولة وتبي صبر ، صبر وقوة مني ومنك حتى انتِ يلي بتتحملي مسؤولية روحك و ايهم والحوش ، اني لحد الأن ما نعرفش شن ح يصير بعدين ومانعرفش هو شن يبي مني بالزبط غير انه يبي ينتقم مني ، يمكن عن طريقك او طريق ايهم اني مش عارف، الي عارفه انك لازم تسمعي كلامي وتنفذي بالحرف الواحد يلي بنقولوهم !
قعدت نور تشبحله وعيونها يلمعو والخوف باين فيهم وقالت : حسام تخوف فيا
انفتح الباب بالقوة فأنخلعت نور ونحت ايدها بخجل ، شافلهم الديب وقال : مداهمة ؟
الشرطي : تم الوقت
وقفو الزوز ، فقال الديب لنور : نسيت نقولك ڤايس ڤيرزا !
عقدت نور حواجبها وقالت : شني ؟
الديب : سلميلي ع امي والعيلة كلها وبوسيلي ايهم
نور بحزن : انشالله !
خشو الشرطين واحد خدي الساكو وتاني وقف جنب الديب وقاله : هياا !
قال الديب لنور : ردي بالك ع روحك
وطلع وهي تترقب فيه بألم لن طلع من المكتب واتسكر الباب 
قعمزت نور خمسة دقايق حتى تستجمع قواها وهي تفكر شن يقصد بالـ "vise versa “ , وطلعت روحت
وبعد نصف ساعة ، فتحت سحـر الباب لـنور وانصدمت بيها !
نور بنظرات حزن : سحر !
يتبع ..
كالعادة رايكم وتوقعاتكم ؟ وتعليقاتكم ع الأحداث ❤️