نقطة ضعف

الحلقة 9

#نقطة_ضعـف
الحلقة 9
اتجهتله نور بإرتباك ، ووصلت ونبضات قلبها تزيد في كل خطوة لن وصلتله ووقفت وراه ، كانت تبي تنطق اسم مصطفى صديق مروان لكن هيئة الشاب ماكانتش نفس هيئة مصطفى القصير والنحيل ، فـ فضلت انها تقول " السلام !
تلفتلها الديـب وقال : وعليكم السلام
نور انصدمت وقعدت تشبحله بدهشة ، اما هو وقف وهو مستغرب من نظراتها المذهولة ، وهو يسحاب انها تعرفه ان هو حسام !
الديـب عقد حواجبه بإستغراب : نور ! خيرك مصدومة !
نور شدت جبهتها بإرتباك وصدمة : انت ! انت شن جابك كيف مافهمتش انت الي كنت تكلم فيا طول هالشهرين ؟
الديـب : من تسحابيني ؟
نور : لا مش مصدقة !
الديـب انزعج : مني يلي كان في بالك ؟
نور : ما توقعتكش انت نهائي
الديـب بغضب : وهاني طلعت اني ، اماله ع اي اساس تقولي عرفت منو وتكلمي فيا ع اساس انك عارفتيني والي نحس فيه اني نفس احساسك ؟
نور بإرتباك بدت تلعثم في الكلام : أ أني ممكانش في بالي انت
الديـب بإلحاح : مني يلي كان في بالك ؟
نور : قصدي كيف هكي
الديـب : تي شن هو يلي كيف فهميني ؟
نور بدت تتراجع تدريجياً : مكانش في بالي هكي بالله انساهم هالشهرين وانسى رقمي وكلامي وكل شي
الديـب بإنفعال : تعالي جاي شن تخرفي انتِ شن هو يلي ننساه بالزبط ؟ توا بعد ما طمعتيني وسايرتيني تبي تفوتي وين تسحابي روحك ما نلعبوش حني راه
نور خنقتها العبرة لما انفعل الديـب وحست نفسها في ورطة : لا مش هكي في بالي والله حسبتك شخص تاني
الديـب : مادخليش فيك حسبتيني من حسبتيني ، انتِ حبيتيني ولا لا ؟
نور سكتت ودموعها يلمعو ، مش مصدقة نفسها انها واقفة قدام الديب يلي كانت ما تشوفش فيه الا في الفيس  وصورته مرتبطة بالسمعة السيئة واخبار الحرب ، وهو يعترفلها بحبه ليها !
الديـب وهو يفنص فيها : جاوبيني !!
نور معاش قدرت تمسك دموعها اكثر من هكي وانهارت بالبكاء وجت باش تمشي شدها من ايدها وتلفتتله هي بخوف ، خوف انه يشهدر بيها او يضرها او يضر حد من عيلتها ، بالرغم انها تعلقت بيه بس حست ان فيه حاجز بينها وبينه بعد ماعرفت انه الديب !
شافلها الديـب بهدوء وقال : قعمزي ارتاحي
نور وهي تبكي : خليني بنمشي
الديـب : قعمزي ما تشقينيش
قعمزت نور ع الكرسي الخشبي ومشي الديـب خدالها شيشة مية وكلينكش من الكشك القريب وقعمز جنبها وحط اللكلينكس بينهم ومدلها المية : هاك اشربي
خدت منه نور بإيدين يرجفو وفتحتها وشربت رشفة بسيطة وسكرتها
الديـب : أهـدي !
نور مسحت دموعها وهي تحاول تهدى
الديـب : علاش تبكي ؟
نور بصوت مخنوق : مانسحابش هذا كله بيصير
الديـب : شن كنتي تسحابي ؟
نور : حاجة تانية
حسام : قوليلي
نور : انسى الموضوع
الديـب : من كنتِ تسحابيني ؟
نور شافتله بترجي : ماتزعلش ؟
الديـب ابتسم ع براءتها : مش ح نزعل
نور : واحد تاني
الديـب : مني ؟
نور : صديق حبيبي السابق
الديـب انزعج : علاش توقعتيني صديق صاحبك ؟
نور : لأن الصراحة ما خطرش في بالي غيره
الديـب : يعني اني ماخطرتش في بالك
نور : حتى نسبة 1‎%‎
الديـب : الله يبشرك بالجنة ، باهي الحمدالله شبحاتي ما فضحونيش
نور : حسبته مجرد اعجاب بس
حسام : كان من الأول اعجاب ، وفجأة لقيته حُب !
نور تنهدت وسكتو لثواني غلب ع صمتهم صوت الموج
الديـب : باهي هاك عرفتيني توا الديب كيف بيصير ؟
شافتله نور وهي مش مصدقة ان الديب الي عمره ماسمع قرار حد ولا طاع كلمة حد ولا مداير حساب لحد يعطيها حق قرار مصير علاقتهم الحديثة
سكتت لثواني وقالت بتردد : مش عارفة
الديـب : مانلعبش اني لو انك خايفة
نـور : عارفاتك راجل وما تلعبش ، بس خايفة من حاجـة تانية !
الديـب عقد حواجبه بإستغراب : شنو ؟
وقطع عليهم رنين هاتفه ، شاف حسام لهاتفه ودار سايلنت ورده في جيبه  وشافلها باش تتكلم
نور : ان نكمـل معاك ونرتبط بيك وفي الاخير لـقدر الله تصيرلك حاجة ، والله ماعندي جهد لوجاع القلب
الديـب : خيرك تفاولي ؟
نور : قلت لقدر الله
حسام : الأعمار بـ يد الله !
نور : ونعم بالله
الديـب : باهي كيف توا ؟!
نور : انت شن رايك يعني ؟
الديـب : تبي رايي ؟
نور : ايه
الديـب : واضح من غير ما ندوي
نور : متأكد من مشاعرك ؟
الديـب : اول مرة في حياتي نكون متأكد هكـي !
سكتت نور وهي في حيرة من امرها ، بالرغم انها متعلقة جداً بالمتصل المجهول الا انها مترددة بعد ما عرفاته انه الذيب
نور : ماعرفتش علاش درت هذا كله !
الديـب : لأني نحبك !
تفاجأت نور وتحشمت من كلمته يلي من غير مقدمات وقعدت تشبح لنظرات الحـب يلي في عيونه ، اول مـرة شخص يشبحلها بالطريقة العميـقة هذة !
وسكتت شوية وقالت : قصدي علاش ارقام غريبة وجو وتكذب وتقول نتلاقو برا المنطقة لأني محظور منها
الديـب : تبينا نتلاقو غادي باش يصورونا وينشرو الصور في الفيس وتصير شهدرة والجماعة الي متعارك معاهم كلهم يزبطوك ويحطوك في راسهم ؟
نور : باه هاك قلتها لو انت تحكي جديات ماه ح يزبطوني يعني
الديـب شافلها بجدية : قصدك متلاً بعد ما نخطبك ونتزوجو ؟
نور سكتت بخجل لـ ثواني ونزلت راسها وقالت بصعوبه : ايه
الديـب بهدوء : متخافيش كل شي مخططتله ، كل الي نراجي فيه توا انك تتخرجي وتاخدي شهادتك بس ، نبيش نضيع عليك تعب سنين في اخر سنة !
نور بفضول : لشني مخطط ؟
الديـب : لكل شي ، ح تعرفي مع الوقت
نور : من حقي نعرف توا ! لو فعلاً تبيني !
الديـب تنهد وشافلها بجدية : بس تخرجي ح نجي نتقدملك ، اقل من شهر خطوبة ونديرو العرس ومنه تاني يوم ع المطار ، اني مرتب لكل شي 
نور : سيوره ومروحين
الديـب : من قال ؟
وقطع عليهم صوت رنين هاتف نور ، طلعت هاتفها وردت ع رهف
نور : الو
رهف وهي تتكلم بسرعة : اررركبي اجري ماما كيف ناضت من الطاولة تبي ادور عليك بتشوفك خيرك عطلتي !
نور وقفت : اوك لحظة هاني جاية
وسكرت الخط
نور : اني لازم نمشي ، خالتي ادور عليا
الديـب وقف وقال بتفهم : باهي تمام ، نتكالمو بعدين
نور بتردد: اوك ، يلا باي
حسام : باي
وعطاته نور بالظهر ومشت بخطوات مسرعة ، وكيف خشت للمطعم لقت خالتها كيف تبي تطلع
خالتها : خبرك عطلتي !
نور بإرتباك : خدتني صاحبتي بالتهدريز
خالتها : رعشتيني نسحابهم خطفوك ، هي اركبي جابو العشي
نور : اوك
وركب نور وخالتها للطاولة ، وتعشو وروحو
ومع الساعة 11 ، طقطقت الخالة ع غرفة رهف وفتحت الباب وقالت لنور الي كانت  مقعمزه ع السريز ورهف يلي راقده ويتفرجو ع المسلسل التركي
خالتها : نور رهف اني بنرقد ، كان جي عبدو افتحوله الباب
رهف : حاضر
خالتها : هي تصبحو ع خير
وسكرت الباب
قعمزت رهف بحماس وقالت لنور : حقااا تعالي احكيلي شن صار معاك
تلفتتلها نور وقالت : تلاقينا وياريتنا ما تلاقينا !
رهف : علاش من طلع ؟! مش مصطفى قصدك ؟
نور : لا ، انتِ من تتوقعي
رهف : هي ما تحمسينيش منو
نور : الذيب !
رهف عقدت حواجبها بإستغراب : متقوليليش الذيب يلي في بالي !
نور : ايه
رهف ابتسمت : اضرب ع القوي يااا ، غر كيف صار شكله يشوف فيك في حوش اماليه
نور : اي تلاقينا مرتين او تلاته في حوش اماليه ، وفي الحرب الاولى تفكرتيها يلي انضرب فيها محمد برصاص ، حتى هو انضرب وجي للمستشفى وتلاقينا وعقمتله الجرح
رهف حطت خدها ع ايدها وقالت برومانسيه : الله ♥️
وبعدين نحت ايدها ع خدها وعقدت حواجبها بعتاب : باهي خيرك هكي مش فرحانة
نور : مش عارفة نحس في روحي مترددة هلبا
رهف : علاش ؟
نور : لما تلاقيت معاه انصدمت وما نكذبش عليك بكيت من الخوف ، توقعته يشهدر بيا ولا يفضحني ! ماخطرش ع بالي نهائي انه هو
رهف : شفت صورته هو محلاااه يعطيه جدري
نور : رهف خيرك سطحية هكي ؟
رهف : ياحيوانة هذا الحق يجنن ولد الكلب
نور : باهي نكمل ولا بتقعدي تتغزلي في جمـاله ؟
رهف : كملي كملي 
نور : المهم هو كان منفعل لكن لما شافني نبكي انطفي وهدي وتغير حتى نبرة صوته
رهف : ياحليلي ، باه كملي شن صار
نور : المهم قعمزنا ووهدرزنا ، لكن حسيت بيه جاف وقاسي وجدي هلبا
رهف بنفاذ صبر : واحد يحارب في الجبهه ، طول عمره وهو في الدم والمشاكل ، مسؤولية منطقة كاملة ع راسه كيف متوقعتيه يعني
نور : باهي مفروض يكون رومانسي معاي !
رهف : والنبي اهو كنتِ تكلمي في الرومانسي يلي فاتك وتزوج غيرك ريحي روحك بنت خالتي الناس الي زي الذيب تفعل ما تقولش !
نور اقتنعت : حق
رهف : نتفكر فيه مروان قداش ما حسدناك ع الكلام الحلو يلي تسمعي فيه منه ، عمره ماناداك بأسم ، ياحبيبتي ياقلبي يا روحي ياعيوني ، من غير فايدة ! 
نور : شكلي تعودت ع الاسلوب هذا ، لأني اضايقت لما محكاليش ع شن يحس ، تخيلي حسيت روحي تقولي مقعمزه في مقابله شرعية !
رهف : هههههههههه يعطك قهرة التشبيه
نور : قصدي مفروض قالي عجبتيني وحبيتك وديمة في بالي وخشيتي قلبي وكلام حلو ، مش تقولي شركة معاه في الخدمة
وبدت نور تقلد في طريقة كلامه الرجـولية : متخافيش اني مرتب لكل شي !
ورجعت تتكلم عادي : مش هكييييي الناس يكلمو في حبيباتهم 
ورهف ميتة بالضحك
نور شافتلها بجدية : تضحكي ؟
رهف : ماتبيشي اعطيهولي ! تي هذا شخصية ياجاهلة شن عرفك انتِ
نور سكتت شوية وقالت بإعتراف : اوك هو صح شخصية مانقدرش ننكر ، وتحسيه هيـبة ويفرض احترامه عليك غصباً عنك ، لكن متصحرررر راجل نحس فيه معنداش مشاعر 
رهف : كان يقولك كلام حلو لما كنتو تهدرزو ؟
نور : مش هلبا ! تلاته مرات قال نحبك بس
رهف شبحتلها بخنس : طلعتي تعدي فيهم يا خطيرة
نور : حبيت شخصيته ع الهاتف ، بس في الواقع نحس فيه مش نفس الراجل
رهف : طبيعي حبيبتي مش من اول لقاء ح يقولك كلام حلو وابصر شنو قصدي مرات يسترزنها
نور : يمكن ، لكن تبي الحق ؟
رهف : ايه
نور : هيـبة ♥️🔥
رهف : هلبااا
اما عند اميرة وورجب يلي كانو يهدرزو بالهاتف
اميرة : الخميس الجاي عندنا اللمة الخميس يلي بعده
رجب بإرتباك : انشالله حاضر
اميرة بدلع : من بتجيب معاك حبي ؟
رجب : بنجي اني واختي
اميرة : زوز بس ؟
رجب : ايه حبي مانبوش نكلفوكم
اميرة : امممم باه احسن
رجب : اههه ايه
اميرة : ولدك عنده علم.؟
رجب : ناقص غر نشاوره
اميرة : احسن
رجب : ايه اماله شنو
اميرة : هههههههه يسلملي حبيب روحي
وكذاك نور ، اتصل بيها الديـب
وردت نور : الـو
الديـب : الو شنالاخبار
نور : الحمدالله وانت
الديـب : تمام
نور : روحـت ؟
الديـب : ايه كيف خشيت الحوش
نور : الحمدالله ع السلامه
الديـب : الله يسلمك
نور : نبي نسألك بكري ونسيت !
الديـب خش للدار يلي كانت عبارة عن سرير فردي وفراشات ارضيات ودولاب وقال بفضول : شنو ؟
الديـب : معقولة مسيب الجبهه وجاي تتلاقا معاي ؟
الديـب : غريبة ما نزلوش في النت الاخبار !
نور : اخبار شنو ليا يومين مافتحتش الفيس
الديـب : مدايرين تعاهد سلمي ، لذلك قتلهم تراجعو خلي نشوفو السلمي متاعهم كيف شكله
نور : امممم
الديـب : عندك سؤال تاني ؟
نور سكتت لثواني وقالت : بصراحة ايه
الديب : اسألي !
نور : تو لما تعرفت عليك وقعدنا نهدرزو قلتلي انك خريج هندسة
الديب : ايه خريج هندسة
نور : يعني مش كذب ؟
الديب : حسبالك يلي في الجبهة كلهم جاهلين يا دكتورة ولا كيف ؟
نور بإرتباك : لا مش هكي قصدي ، بس الصراحة ما توقعتكش خريج كلية
الديب : عندك الـحق ما نلومكش هذه الفكرة السائدة ع الي يحاربو كلهم ! انه ما يعرفش يكتب أسمه ، جاهل ، متخرج من صف سادس !
نـور : فعلاً صح هذه الفكرة الي واخدينها كلنا
الديب تنهد : سؤال تالت.؟
نور : لالا
الديـب : باهي كويس
نور : ايه
الديـب : امتى مروحة ؟
نور : بعد غدوه
الديـب : بتجي للحوش ؟
نور : ايه ، لازم نمشي حناك تاعبة
الديـب : عندي علم ، قالتلي فادية
نور بعد ما تفكرت قالت بإندفاع : حيييييييي فادية
الديـب تفاجأ : خيرك ؟
نور : مغبااااني
الديـب بإنفعال : تييي خيرك !!؟
نور : يومها وريتلها الرسايل والأرقام يلي كنت تبعتلي بيهم في الرسايل ، لاحظتها انصدمت وانخطف لونها ! توا تفكرت روحي معناها عندها علم بالموضوع
الديـب انصدم : شني ؟؟!
نور بإرتباك : حي عليا عمممملة سـودة
الديـب تنهد وهو يحاول يكبت غضبه : يهديك الله ! 
نور : كيف بندير توا ؟
الديـب : اسمعيني جاي ، معاش تجبديلها سيرة الموضوع ولا عاد تهدرزيها ع شي ، خليني اني تو نتصرف معاها
نور : اوك تمام
الديـب : وياريت هالموضوع مايسمع بيه خد لن ندير خطـوة رسمية
تلفتت نور لـ رهف يلي كانت تتفرج ع المسلسل بعدم انتباه ليها : انشالله
ومر الوقت ، ومر اليوم ، واليوم يلي بعده ، وروحت نـور وفي نفس اليوم مشت لحوش اهل حسام
خشت للحوش وسلمت ع الجدة ، وفحصت ضغطها وطمنت زينب الواقفة ع الباب ، طلعت زينب باش تقضي شغل الحوش ، وخش الديـب بغير توقع للغرفة وسلم ع حناه وشاف لنور الخجولة
الديـب بطريقة رسمية : شن حالها يا دكتورة
نور وهي شادة ضحكتها : الحمدالله كويسة
الديـب : ردي بالك عليها والله تصيرلها حاجة ما نخلصوكش كويس 
جداه ضرباته بعكازها ع ايده : اسكت عيب البنت ادير في واجبها وزيادة
الديـب تلفت ل جداه : مش مقصرة معاك صار !؟
جداه : مشالله عليها حق ربي ينقال
نور بأدب : سلمك هذا واجبـي 
جداه : والله كان خالك ما تزوج راني خطبتهاله
نور تحشمت ومعاش عرفت شن تقول ووجهها احمر ، الديـب قال بجدية : باهي الي تـزوج !
خشت فادية وهي تشبحلهم الزوز نظرات غريبة ، سلمت ع نور ونادت ع خوها
فادية : حسام نبيك في كلمتين
يتبع ..