#جدو (١١)
مجاهد يوسف
نادر اول ما صحى الصباح مشى محل اتصالات واتصل علي أخوه قعدتو عاطل طالت وبقى زاتو ما عارف يعمل شنو وقال يتأكد من أخوهو اول عشان لو العقد بتأخر يمشي يشوف ليهو شغلة يشتغلها احسن ليهو من الحلة وقعاد الحلة ، اخوهو قال ليهو اصبر شوية برسلو ليك نادر قال ليهو متين يعني حدد لي عشان انا والله زهجت من العطال ومن الحلة زاتها
_حاضر يا سيدي العقد والله برسلو ليك
_ياخ انا ما اتصلت عشان اعرفك بترسلو وللا ما بترسلو انا دايرك بس تحدد لي عشان اكون علي بينة
_اقرب فرصة بالكتير شهر ولو اتأخر تب ما بصل شهرين واتوقعو في أي لحظة
_والله ما طمنتي ياخ
_ما طمنتك كيفن
_نفس كلامك لمن اتصلت عليك المرة الفاتت
_ياخ انا والله ساعي ليك شديد وما تشفق كلو شي مقدر ومكتوب امكن بكرة يصلك وامكن بعد شهر
_ خير خير لكن انا بمشي اشوف لي شغل على بال ما يصلني لاني ما بقدر اقعد منتظر اكتر من كدا وبقت علي حكاية كتلوك ولا جوك جوك
_بجيك ان شاء الله ما تشيل هم يا نادر
_سمح المرة دي مالك أخرت المصاريف ؟
_الزول البحول معاهو اليومين ديل واقف ما عارفو مالو لكن في الاسبوع دا بتصلكم امي وهدى كيف كويسين ؟
_والله تمام يا الفاتح وبسلموا عليك وأمي قالت ليك تعال عرس
_اي قريب قريب ان شاء الله بعد انتهي من موضوع عقدك دا حتى اشوف عقدي
_ههههههههههه جنس عقودات لكن
_يا عمك خليها علي ربك يللا مع السلامة
_خلي بالك من نفسك مع السلامة
الفاتح اخو نادر دا حكايتو حكاية هو اكبر واحد واحد ابوهو مات وشال الشيلة من صغير وكان مصر الا نادر وهدى يكملو دراستهم مافي شغلة في الدنيا دي ما اشتغلها ساب المدرسة واشتغل كمساري واشتغل سواق وهو صغير واشتغل عسكري خلاها وبقى مكانيكي وكهربائي وباع الخضار وآخر حاجة قبل يسافر اشتغل سواق خاص مع واحد في الخرطوم عندو ولدو في السعودية اتعرف عليهو وصاحبو شديد لمن جاء اجازة وبقى ليهو زي اخوهو وكل اهلو حبوهو قام داك لمن سافر رسل ليهو عقد عمل سواق برضو لكن في شركة وسافر وبقى شايل اهلو لمن نادر اتخرج وهدى برضو باقي ليها شوية وتتخرج واهلو امورهم ظابطة مافي شي ناقصهم لكن الفاتح الامورو مجهجهة وما عندو حاجة وراتبو برسل اكتر من نصو والباقي بروح ساي مصاريف واتصالات ما عندو اي شي وشغال لكن لحدي متين ما عارف ونادر بعد اتخرج ما لقى اي شغل وبقى ليهو عاطل ساي وزاد ليهو همو لمن قال ليهو ياخ رسل لي عقد
الفاتح عارف لو قدر رسل العقد لنادر دا بنفعهم كلهم حتى هو زاتو برتاح وبفضى لنفسو لكن لا قادر يشتري العقد ولا قادر يخليهو لانو بحلحل ليهو مشاكل كتيرة لو نادر قدر جاء وربنا وفقو على الاقل بشيل مصاريف البيت . والفاتح حاول كتير لكن اقل عقد لقاهو اطناشر ألف يجيبها من وين وكيف ما عارف وبقى كايس حتى صاحبو داك الجابو دق خروج نهائي واستقر في السودان
نادر رجع البيت وبطنو طامة وعرف موضوع العقد دا زي المجلي كدا والفاتح ما حسم الموضوع خلاهو عايم ساي زي لمن سألو قبال تلاتة شهور وبقى محتار يمشي يشوف ليهو شغلة وللا ينتظر ولو داير يشوف شغلة بشهاداتو دي مافي اي طريقة الا بواسطة او يمشي لجدو ودرب جدو دا ما بدورو وللا كمان يكرفس شهاداتو دي كلها ويزحها بعيد ويخش السوق ويعمل زي ما عمل الفاتح زمان الشغلة البلقاها قدامو كلو ينقشط فيها
علوية امو جات لقتو يفكر ومحتار وسألتو من الفاتح اخوهو وطمنها وقالت ليهو قال برسل ليك العقد متين ؟ وراها انو ما حدد زمن معين قالت ليهو يا ولدي بدل تنتظر في الفاضي ساي ما تشوف جدو صاحبك دا بشغلك
قال ليها يمة جدو دا منظم مع ناس الحزب وانا جني وجن السياسة والاحزاب ما بنفع معاهم ولا هم بنفعوا معاي
قالت ليهو والله احسن ليك من السفر والبشتنة وعاين ليهو مالي مركزو وبنى بيتهم وشغال ما عندو عوجة وهسي داير يعرس امش ليهو ما بقول ليك لا ولو دايرني انا اكلمو ليك بكلمو مو اخوك
نادر اتضايق من كلام امو وقال ليها خليهو هسي الموضوع دا ولو بقيت عليهو بكلمو براي ما بيني وبينو حواجز وزي ما قلتي اخوي
جدو كوكو دق الباب ودخل قالت ليهو هدا براهو جاك كلمو ما تبقى عوير احسن ليك وجدو جاء داخل سلم وقال ليهم فطرتو وللا لسة ؟ قالت ليهو منتظرنك والفطور زاهب فوق النار هسي بنتهي وبكورك ليكم وفاتت عليهو
جدو قعد مع نادر وقال ليهو مالك شكلك دا ما عاجبني الليلة قال ليهو مشيت اتصلت علي الفاتح وجيت
_يا سلام ، وكيف الزول دا والله طولت منو طول ما جايي ؟
_ما ذكر لي جية لكن انا اتصلت عليهو بخصوص العقد
_اها قال ليك شنو ؟
_قال لسة والله اصبر اصبر وانا والله لا بقدر اصبر ولا حاجة
_ياخ انت زاتك والله شغال بالفارغة بس عقد شنو وسفر شنو وبهدلة وتعب في الفاضي مية مرة قلت ليك تعال شغلك جاهز لكن ما بتسمع كلامي
_ياخ لكن ،،
_لكن شنو ياخ انت قايل انا غالبني اشغلك اها والله لو الفاتح جاب ليك العقد ما تسافر بيهو اديني موبايل الفاتح هسي
_داير تقول ليهو شنو ؟
_انت مالك ومالي سفر انساهو اديني موبايل الفاتح ياخ
_آي بس اول وريني داير تعمل شنو
_ما دايرو ياخ خليهو معاك
وجدو فات بهناك قال لحاجة علوية عندك رقم الفاتح قالت ليهو مكتوب في كراس جوة دقيقة النجيبو ليك ودخلت قالت لهدى اديني نمرة الفاتح دايرها جدو اسرعي اسرعي وهدى قطعت الورقة من الكراس وادتها ليها وامها جرت بيها لجدو جري
شالها وقال ليها هدى وين ؟
قالت ليهو قاعدة جوة اناديها ليك ؟ قال ليها لا لا بسأل ساي واتصل من موبايلو علي الفاتح وقعد مع امو في المطبخ
_يا توحة كيفك ؟ معاك جدو ، اي علي يعني في كم جدو ، تمام تمام كلنا تمام وانا وفي بيتكم ، اي اي سمح خير ، الحمد لله ، ياخ اسمعني عشان ما عندي هسي رصيد كتير بالنسبة للعقد حق نادر انساهو ما تشتغل بيهو
اي ما تشتريهو ولا ترسل مصاريف زاتو تاني خلاص نادر اشتغل ابقى داب رقبتك ما عندك شغلة بزول بكلمك انا تاني مرة تانية وهاك أمي علوية دايرة تسلم عليك
حاجة علوية مبسوطة شالت الموبايل من جدو واول ما سمعت صوت الفاتح قعدت تبكي وجدو مرق خلاها تكلم فوقو وكورك لهدى قال ليها تعالي كلمي الفاتح برضها جات كلمتو
وجدو شال موبايلو وقال للفاتح خلاس زي ما قلت ليك ما عندك شغلة بالناس ديل بعد كدا نادر شغال احسن منك يللا باي ودا رقمي
حاجة علوية مبسوطة دايرة تطير من الفرح وقعدت تدعو لجدو دعوات كتيرة وقالت لهدى والله ما قصر ود حلال وفيهو الخير
هدى لسة بتريد جدو والموقف دا خلاها تريدو زيادة وعارفاهو من زمان بحاول في نادر ونادر المابي لكن كويس الليلة حسمو بالقوة وقطعو معاهو
نادر سمع الكلام دا كلو وقال لجدو اها والشغل شنو اوعى .. جدو قاطعو قال ليهو ياخ ما عندك اي شغلة بسياسة انا بشغلك معانا في البنك محاسب وبس تاني داير شنو ؟قال ليهو يا زول معاكم معاكم الرهيفة التنقد
جدو قال ليهو اها ومصاريفكم كيف قال ليهو الفاتح برسلهن قال
جدو ضحك وقال ليهو ياخ الفاتح دا خلاص كفاهو خليهو يشوف روحو وانا قلت ليهو ما ترسل تلقاهو ولا عندو زاتو وهاك ديل طلع ليهو قروش كتيرة نادر قال ما بشيلهن جدو ختاهن تحت اللحاف وقال ليهو علي كيفك ما دايرهن ما دايرهن لو راجل النجي بكرة ألقاهن هنا
_لو لقيتن بتعمل شنو يعني ؟
_بعمل بيهن نايم بس ههههههههههه
_جدو ياخ ممكن سؤال وتجاوب عليهو بصراحة وبدون لف ودوران ؟
_ياتو يوم انا بلف وادور عليك ؟ اسأل ساي ، بس ما تقول لي ليه اتقدمت لحليمة ؟
_آي والله براك عرفتو
_بفهمك بعدين ما هسي
_كدا لفيت ودورت
_ما لفيت ودورت ولا شي بس أجلت الاجابة شوية بكون لفيت لو جاوبتك وكضبت عليك
_التأجيل برضو لف ودوران وزوغة من الاجابة لانك خطبتها من غير حتى تشوفها جاوب جاوب ياخ وفهمني
_بفهمك والله كل حاجة بس ما هسي
يتبع.....
