#جدو (٩)
مجاهد يوسف
كلام هدى حرقو شديد ورد فعلها الما متوقعو لمن قال داير يخطب حليمة خلاهو يشعر بإنو بقى ما عندو أي قيمة بالنسبة ليها كان متمني انها تزعل وللا تصر وشها وتتضايق لكن ما تمت ليهو مناهو ولا لقى الكايسلو
نادر اتضايق شديد من كلام جدو والدهشة والحيرة اللتنين بانن في وشو دا غير الاحباط
ولا خشمو ما فتحو ومبروك لجدو ما قدر يقولها سكت ساي ودخل الاوضة زي الداير يغير هدومو واول ما غاب من عين جدو وامو وهدى قعد يتنفر ويسب ويسخط ويشلت بكراعو في الهواء وكره نفسو وكره اي حاجة وحتى اخوه الفي الخليج كرهو لانو مكلمو ليهو شهور بالعقد وقاعد بهناك يتمحرك وللا بعمل في شنو ما عارف
وقال لو ما داير يرسلو اكان يوريني عشان انا ما انتظر هواء ساي واربط امالي واحلامي علي شي وبعدينك كلها تطلع سراب
هدى دخلت علي نادر وقالت ليهو صاحبك دا امس ساعة انت نايم جاء و قال لي دايرك تساعديني عشان يشوف حليمة وانا أبيت هسي معقول داير يخطبها وهو ولا شافها ؟
نادر قال ليها علي كيفو وهو اصلو كدا من قام عنيد خلاس ومعاكس ولايوق ولو ختا ليهو حاجة في راسو مستعد يعمل المستحيل عشان يصل ليها وهسي انا متأكد انو حليمة دي شوف ساي ما شافها لكن ختاها في راسو
نادر غير هدومو ومرق مع جدو والكويس انو السيد زاتو اكان قاعد مع ناس حليمة عمة جدو وجدو اول ما طلع شاف العربية اتكيف وقال السيد دا ود حلال ودي عربيتو والله وفر علينا مشوار زاتو بجيتو دي
وقال لنادر عارف انا سبحان الله حكاية اعمل لي عربية دي نهائي ما ختيتها في راسي وما عارف ليه احتمال عشان في الخرطوم مخصصين لي عربية خاصة وبسواقها لكن لازم اعمل لي عربية والله لانو هسي السيد دا لو لقيناهو مافي الا نمشي لحسن وللا عبد الجبار عشان نمشي ليهو
نادر ولا رد عليهو اكان في همو وفي الموقف الهو فيهو دا ، وبدل يكون ماشي يخطب حبيبتو لروحو الليلة ماشي مع صاحبو عشان يخطبها ليهو
هدى بعد ما كانت صامدة وسفهت جدو واتعاملت قدامو بإنو ولا هاميها غلبها تتحمل وشعرت برضو بإحباط وقلبها زي المقبوض ودخلت الاوضة وبكت لمن قالت بس ما سكتت الا لمن جاتها حليمة اخت عبدو السميح في البيت عشان تتونس معاها قشقشت دموعها وغسلت وشها وكتمت الجواها وما ظهرت ليها اي حاجة وديك زاتها ما عارفة حاجة لكن لمن هي في الطريق شافت جدو ونادر في الشارع ماشين علي بيت ناس حليمة
جدو ونادر دقوا الباب وجاهم الطيب جاري سلم عليهم ودخلهم علي الديوان جدو قال ليهو نادي لينا السيد
السيد اكان بقرا ليهو في جريدة وبشرب ليهو في شاي وحليمة بتو اكانت قاعدة جمبو جاهو الطيب قال الدقوا الباب ديل جدو ونادر صاحبو وانا فتحت ليهم الديوان وجدو قال لي نادي لينا السيد دايرنك
حليمة طوالي وقفت علي حيلها والسيد قال للطيب خير دقايق بس وبقوم عليهم وانت امشي جيب ليهم حاجة باردة من الدكان
وحليمة قالت ليهو يا ابوي لو جدو دا جاء عشاني انا ما موافقة ومن هسي كلمتك
قال ليها ما تسبقي الحوادث يا بتي وخليني بعد امشي اشوفو داير شنو بعدين اتكلمي
قالت ليهو المهم انت بس عرفت رأيي من هسي ووريتك ليهو وان شاء الله ما يكون جاء عشاني
الرضية امها جات لكزتها قدام ابوها وقالت ليها ها العويرة دي اوعك تقولي كدا ومالو جدو والله بنات الحلة ديل كلهن بريدنو وبتمننوا منى
قالت ليها مالي ومالن انا ؟ هن حرات علا انا ما دايراهو
السيد قال للرضية نحن الكلام دا من امس موش اتكلمنا فوقو وحسمناهو وانتهينا منو ؟ خلوني اشوفو داير شنو اول ما تخمنن ساي وانتي يا حليمة ما تقولي عشان انا مخليك براحتك تقومي تتكلمي مع امك بطريقة زي دي انا لو اقتنعت بيهو بوافق
السيد مرق فات علي الديوان وسلم علي نادر وجدو والطيب جاء وجاب ليهم البارد والسيد قال ليهو كلم الرضية أختك التعمل الشاي وقعدوا يتونسوا ويضحكوا وما خلوا شي في ونستهم مسكوها من الحلة والظروف والشغل والحكومة والاسعار والبنوك ما خلوا حاجة لمن الطيب جاب الشاي وشربوهو هم ينضموا ونادر مرات يشاركهم الونسة ومرات يسرح في همو لمن جدو قال للسيد بعد الونسة الحلوة دي خلونا في المهم والموضوع الجينا ليهو
وقال للسيد الحقيقة انا جاي عشان اطلب يد بتك حليمة وانا ما يحتاج طبعا تسأل عني وواضح وصريح وزي الجريدة الحائطية ما عندي شي بغبى عليك وكان سألت الرضية بت عمتي حليمة وللا حليمة عمتي زاتها بتوريك قلت شنو ؟
السيد رغم انو كان متوقع الكلام وما كان مفاجأة بالنسبة ليهو لكن عمل لجدو انو اتفاجأ بالكلام دا وقال ليهو ما نقول الا خير وخليني كم يوم كدا وبرد عليك عندي شورة
جدو قال ليهو شاور براحتك لكن ما بقدر اخليك اكتر من يومين لانو انا اجازتي كلها باقي لي فيها اربعة يوم بس وداير انهي الموضوع دا عشان اشوف غيرو وانا جاهز من وإلى ما ناقصني شي
السيد قال ليهو يومين بسيطات وما بسون حاجة اديني تلاتة اربعة يوم ولو تم المراد كل شي ملحوق
جدو قال ليهو طيب عرفت عندك شورة خد راحتك وبديك تلاتة يوم اعتقد اني ما قصرت وبصبرهن لكن هسي توريني انت رايك شنو
السيد قال ليهو بوريك بوريك ما تستعجل يا علي والفيهو الخير ربنا يسويهو
جدو قال ليهو انا سألتك عن رايك الشخصي فيني ما عن شورتك
السيد عاين في نادر يستجدي فيهو بنظراتو اكان يسكت منو صاحبو دا ونادر فهم المقصود وقال ليهو خلاس يا جدو ياخ ما قال ليك كلها تلاتة يوم بس وبرد عليك
وجدو لسة مصر يحرج السيد وتاني قال ليهو سمح خلينا من موضوع الخطوبة والعرس وريني ساي رايك فيني شنو بصفة عامة
السيد قال ليهو زول كويس واهلك كويسين وما فيك كلام صاح انا ما من الحلة لكن اغلب ناس الحلة بعرفهم وابوك الله يرحمو اكان زول تمام رغم البينو وبين عمي زمان لكن ما فيهو كلام وانت زاتك وقفتك مع عمك العبيد الأمس بتدل على انك زول ضكران وما ساهل وانا فعلا ما بعرفك كويس لكن سامع بيك والناس كلهم يشكروا فيك ، نادر قال لجدو اها بعد الكلام دا داير شنو تاني ؟
جدو قال ليهو دايرو يوريني هو موافق وللا لا قبل ما يشاور
السيد قال ليهو ما تستعجلني وكلها زي ما قال نادر تلاتة يوم ويصلك الرد وتعرف الحاصل بس عندي سؤال يا جدو انت حليمة بتي دي آخر مرة شفتها متين ووين ؟
جدو قال ليهو عارفها من زمان وطوالي قام علي حيلو ونادر قام معاهو واستأذنوا من السيد ومرقوا فاتوا
نادر بعد مشوا من البيت شوية قال لجدو ياخ انت مالك لايوق كدا زنقت الراجل وحرقت لي روحي والله قربت امرق واخليكم
جدو قال ليهو عارف يا نادر دي اول مرة في حياتي اتونس فيها مع السيد دا
_زول كويس ومحترم خلاس
_ انا ما شايفو كدا يا نادر والزول دا من عيونو ساي عرفتو غتيت وشكلو كدا ناوي يرفض
_ما اظنو برفض ولو رفض يعني شنو بتو لا اول ولا آخر بت ولا البنات كملن
_لو رفض والله بتعب شديد معاي
_بتعب كيف يعني معاك يا جدو؟
_كدي بس خليهو لو راجل وربنا غضبان عليهو يرفض وبتشوف جدو بعمل فيهو شنو؟
يتبع....
