#جدو (٢٠)
مجاهد يوسف
رغم انو نادر كان زعلان على حالو وحبو الجواهو لحليمة والراح في خبر كان ساي قبال ما يتولد ويبقى بين طرفين الا انو كان شايف روحو سعيد ومستانس انو اليوم قاعد مع حليمة ويتونس معاها لحظة كان كايس ليها زمن مع انو ما عمل عشان يلقاها او ما حاول يلاقيها وما كان صعب لو كلم هدى اكانت بتناديها واكان ممكن تحبو لانها لسة صغيرة وقلبها ما زال خصب وما عرف حب قبل كدا والدليل هي فرحانة اليوم بكلامو عن جدو وشايف الحب لجدو باين في عيونها مع انها ما قعدت واتكلمت معاهو غير مرة واحدة لكن حبتو لانو اول واحد دق بابها جادي وزول في نظر اي بنت في الحلة جنتل ومالي مركزو وكلهن بحبنو
هدى جابت الشاي وبقت تمرق وتدخل دايرة تخليهم براهم بأي طريقة وتستجدي بقلبها في نادر انو يلقى ليهو طريقة ويتشجع ويوضح ليها مشاعرو احتمال يقلب الطاولة علي جدو الاصلن ما بحب حليمة ولا هي بتحبو ويفوز اخوها بقلبها وينقذ حبها وحبو من الموت الاجباري ، نادر زاتو دخل في عالم تاني ونسى حتى نفسو مع نظراتو لعيون حبيبتو حليمة ولقاها كل ما يمدح ليها في جدو بتفرح وتسعد وبقى يحكي ليها عنو عشان السعادة الفي عيونها دي تزيد وتسعدو وبقى مرات يألف ليها مواقف رجولية وبطولية لجدو تأليف ساي من راسو وهي مستمعة ليهو وبشغف ومستمتعة بكلامو لانو طلع ليها جدو دا ملك يمشي على الأرض وهو ما عارف او ما منتبه لكلامو دا ال كلما زاد زاد حبها لجدو والمسافة البينو وبينها بقت توسع وهدى زاتها حبها زاد لجدو بسماعها لكلام نادر عنو والالم مقطع فلبها لمن تشوف الفرحة في عيون حليمة بجدو
بهناك جدو صحى بعد صلاة العشاء ولسة سكران صحاهو الباب لمن دق وكان قايلو دا عباس ومشى علي التلاجة اول بقبق باقي القزازة في بطنو وطلع فتح الباب لقاهو دا ياسر وبراهو ما معاو عباس فتح ليهو الباب ودخل وراهو
_كيفك يا علي
_تمام اتفضل اتفضل اقعد اخد راحتك
_اوكي تعال اقعد انا جيتك عشان موضوع مهم شديد
_تشرب شنو اول شاي جبنة عصير ؟
_لا لا انا ما جيت اتضيف عندك
_ما حلوة ياخ عندي باقي قزازة اجيبو ليك طيب
_لا لا انا ما بشرب اصلا وكرهتي في الدنيا الناس البشربو وامس جاملتكم ساي وربنا يغفر لي ، المهم
_قبل المهم والله لازم تشرب حاجة الشاي ما بطال
_لا لا موية بس لوىسمحت
_موية شنو ياخ شاي عشان نتونس بيو
_انا ما جاي اصاحبك واتونس معاك يا زول واقعد بس
_قعدنا وعباس ركس مالو ما جاء معاك
_انا قصدت اجيك براي عشان الموضوع الدايرك فيهو ما داير زول يعرفو
_خير خير ان شاء الله ، بس انت شكلك دا ما غريب علي ومن امس بحاول اتذكر لاقيتك وين ما قادر اتذكر
_انت ما لاقيتني نهائي انا لكن انا بعرفك معرفة صاح وانت زاتك ح تعرفني كويس وزي جوع بطنك ومن الليلة تاني ما حتنساني كلو كلو
_ما فاهم وضح لب كلامك وبتعرفني من وين ؟
_ما وكتو حاليا بس هسي انا جاي اقول ليك ابعد من عبير
_عبير ؟ وانت مالك ومال عبير
_دا برضو ما وكتو حاليا بس احسن ليك تختى دربها نهائي وما عندك بيها شغلة
_شنو الشابكني ما وكتو ما وكتو وجاي تهدد فيني وتتدخل في حاجات ما بتخصك
_عبير لو ما بتخصني ما اتدخلت واحسن ليك ابعد من دربها
_هوووي انت ما بتعرفني والله ، ما سمعت بجدو انت وللا شنو ، عباس ما قال ليك ؟
_انت وعباس اللتنين كلاب وانا بأدبكم
_يا زول هوي
_داير تعمل شنو يعني ؟ والله الراجيك يا جدو كعب تب وانا ما ح ارحمك نهائي وانا وريتك من هسي بتتعب معاي والله وما برحمك
_عشان عبير ؟
_لا لا ما عشان عبير وانا زاتي ما بعرفها عبير دي بس ابعد منها
_طيب عشان شنو تاني ؟
_ الحساب كتير وما تستعجل كل شي بوقتو
_هسي انت جايني من هناك تهدد وتتوعد وما عارف روحك عامل فيها شنو وداير تخوفني ؟
_يللا انا ماشي ولو راجل كلامي دا ما تنفذو
ياسر مرق فات وجدو اتصل علي عباس
_ركس ممكن تجيني ضروري؟
_الليلة مافي طريقة يا جدو لاني مشغول شوية لكن بكرة بجيك في البنك ، مالك في شنو ؟
_دايرك في موضوع مهم جدا حاول تجيني الليلة لو الساعة مية
_تمام يللا لبعدين يا عمك
قفل الخط من عباس وياسر عمل ليهو قلق وسافوتة في راسو ما قدر ينتظر لمن عباس يجيهو واتصل علي زول تاني
_ابو جلمبو تعال لي ضروري
_في مشكلة ؟ تعال وبعدين بفهمك
_براي وللا معاي ال...
_ لا لا براك هسي وضروري ما تتأخر
_ وجب
عباس جاء وقال لجدو جيتك لكن مشغول ما كملت شغلي في شنو انا راجع سريع
_ياسر
_مالو دا معاك ؟
_الزول دا منو وجاء من وين وكيف وداير تقرير مفصل عنو
_معليش اعفيني من دي لانو تبع المك والزول دا موصيني عليهو شديد وما عارف عنو اي حاجة وقال لي لو جدو سألك عنو وريني
_المك دا قصدو شنو يعني ؟
_ما عارف والله لكن انت عشان مايل للكبتن وما بتسمع كلامو وبتتذكر موقفو داك معاك
_حريقة فيهو وفي المك والاتنين يطيروا فرررر انا جدو ما عارفني وللا شنو ؟
_والله يا جدو لو داير كلامي ابقى مع المك والكبتن دا ماسورة ساي لو اتورطت ولا بعرفك وانت عارف كدا وعارف عمل شنو لابو جلمبو براك ، الناس ديل ما تقيف قدامهم وداير بيهو شنو ياسر
_ انا ما شغال بيهو لكن براهو جاني هنا وقعد يهدد ويقول في كلام اكبر منو وقال لي تبعد من عبير
_ههههههههههه لا لا لا دا دخل في اللحم الحي كدا ، المهم انت عارفني انا اخوك ومعاك لابعد حد وبجيب ليك الدايرو يا حبوب
قبل عباس يفوت ابو جلمبو جاء زول مانع منعة جد وطويل ومفتل التقول مصارع وشو ما بشبه جسمو نهائي بتحس فيهو براءة طفولية وابتسامة عفوية وملامح بساطة كدا تحس انو زول عفوي وطيب ومسالم لكن زول كعب تب والبقع في يدو بنسيهو اسمو زول متناقض وشكلو متناقض جدا
_ركس شخشيا هنا ؟ كيفك يا معفن
عباس سلم عليهو وقال لجدو لا لا ياخ ما توري بيهو الزول دا والموضوع ما بستاهل تدخل الغول دا
ابو جلمبو ضحك بعد سلم علي جدو وقال فهمونا الحاصل شنو ، عباس قال ليهو ارجع ياخ ما في حاجة وجدو قال ليهو في والله عندي واحد قل ادبو ورفع لي قرن
ابو جلمبو قال ليهو دا ما شديد وللا شنو وين ألقاهو وانسى بس
عباس قال لجدو جدو لا ياخ وانا بحل الموضوع دا وساق معاهو ابو جلمبو وفات
لكن جدو حلف يتغدى بي ياسر قبال يتعشى بيهو اتصل على طه وطه دا زميل جدو وليهو في الجامعة سبعة سنة لا اتخرج منها ولا اترفد ولا بقرا زاتو بس اسم طالب وراتبو بصلو اول بأول
نادر بهناك بعد حليمة فاتت كان سعيد جدا بونستو وقعدتو معاها وهدى دايرة تموت من الغيظ اما حليمة ففرحانة بجدو فرح شديد وشايفة روحها اسعد بت في العالم
يتبع.....
