#جدو (١٤)
مجاهد يوسف
السيد الصباح جاب ليهو عتود من عتان حاجة حليمة فنقلو ضبحو والرضية وامها ظبطن الفطور
والطيب مشى بيت ناس جدو رسلتو امو قالت ليهو امش كلم خالتك ام جدو خليها زاتها التجي تفطر معانا ولقى جدو يشرب في الشاي قال ليهو السيد قال ليك جيب معاك نادر
جدو قال ليهو خير وبعد فات قال نادر اسوقو معاي لشنو انا مشيتي دي ما عشان احقق خطوبة ولا شي بس داير اشوف بتهم الوافقت دي زاتها شكلها كيف وعشان اعرف تشكر امي ليها داك كيفن ، لكن مالو نادر برضو اكتر من اخ اسوقو معاي لاني السيد دا انا زاتي ما بريد ونستو واخليهو يتونس معاو
غيروا ملابسهم وامو فاتت قدامو وهو فات لنادر والغريبة المرة دي لا اتشيك شديد ولا بهل في روحو فتيل ريحة زي المرة الفاتت لبس ليهو جلابية وطاقية وفات لنادر
ونادر من شافو ساي قال ليهو اها الجماعة ديل امس ردوا عليك وللا ما ردوا ؟
_الجماعة منن ؟
_كيف الجماعة منن ؟ ما تتبله علي قالوا شنو موافقين وللا اتشوكشت في رويسك دا ؟
نادر قال الكلام دا وكان داير يتظورف ويعمل فيها لجدو انو زي الما هاميهو ردهم مهما كان عشان ما يحسسو بإنو في قلبو شي ، ودايرهم يرفضوا بكل حواسو رغم صحوبيتو لجدو
جدو ضحك ضحكة الزول الضامن من الاول وقال ليهو انا اخوك يا نادر ، بقدروا يرفضوا ؟
_ياخ عليك الله ردوا وللا لا ؟
_ردوا ياخ من امس بالليل وقالوا موافقين وهسي انا عازمني فطور وجيت اسوقك معاي
نادر اتضايق ضيق شديد وحاول بكل قوتو انو يخفيهو واصطنع ليهو ابتسامة اصفر من الصفراء وبالقوة وقال ليهو
_ تمام ، مبروك
_ومالك قايلها كدا ؟ بايخة ومستفزة وزي المجبور عليها، وهسي عليك الله دي ابتسامة ليك دي ؟ عاوج لي خشمك كدا زي الكافتك شيطان ؟ ، تمام ومبروك ، والله انت اول زول كلمتو ولو عارفك بايخ كدا ولا كان كلفت نفسي وجيت كلمتك
جدو زعل من نادر شديد ونادر بقى زي المطرطش لا عارف يبارك ليهو ولا عارف يعتذر عن مباركتو ليهو ولا عارف يعمل شنو وهو زاتو في روحو والاحساس بالاحباط الحاسيهو
_انت زعلان جادي يا جدو ؟
_ياخ ما زعلان ولا حاجة والله طممت بطني زاتو من الخطوبة
_ليه انا عملت شنو هسي ؟
_ما عملت حاجة ياخ قفل علي الموضوع دا خلاص
_في شنو يا جدو ياخ ؟
_نادر انت بتحب حليمة دي ؟
_أنا ؟ ح حل حليمة شنو البب البحبها ؟
_ما تكضب يا نادر لو بتحبها كلمني انا لسة خلقتها ما شفتها والله ولا بتحرك فيني شعرة
_أحبها شنو انت عوير ؟
_طيب مالك لمن قلت ليك وافقوا اتغيرت كدا ؟ والله انا حافظك حفظ
_يعني دايرني انطط واجري في نص الحوش واشيلك زي الجبت ليك قون وشلنا بيهو الكاس وللا دايرني ازغرد وللا اعمل شنو ؟ وريني بس
_والله انت انصدمت وظاهر في وشك ، وابتسامتك كانت مصطنعة وصفراء وعويرة وبلهية كانت حتى كلامك تمام ، مبروك
_جدو مافي حاجة وانا لو ما فرحت ليك بفرح لمنو انت اكتر من اخوي ياخ
نادر بكاء والبكية دي كان دايرها من قبيل وحضن جدو عشان ببكيتو دي يشيل الافكار الختاها في راسو دي. مع انو البكية كانت علي حالو لكن قضت الغرض . وكانوا بتكلموا في نص الحوش وبكية نادر دي مرقت علوية امو وهدى اختو وشافنو حاضن جدو ويبكي وجن جاريات الاتنين مزرزرات وامو كانت حنينة خلاس قايلة في خبر كعب وللا الفاتح ولدها جاتو حاجة ودموعها كبن شو والعجب هدى قالت ليهم الفاتح مالو ؟ وهي زاتها دميعاتها مرقرقات ليها في رموشها
جدو ونادر اتلفتوا عليهن مخلوعين وشالوها سوا الفاتح ؟ مالو الفاتح
علوية حيلها مات ومنتظرة بس رد منهم عشان بردلب تقع وهدى أخير امها لانو لا جدو ولا نادر مافي شي ببكيهم
نادر اتدارك الموقف وقال ليهن الفاتح ما عندو عوجة بس جدو دا خطب حليمة وانا فرحان ليهو ومن الفرحة بكيت ، ودي دموع فرح ، علوية وهدى تمن الاتنين بكيتن وعلوية باركت ليهو وهدى اتلفتت منهم ومشت علي الصالة بعد ما قالت ليهو مبروك لكن خلعتونا خلعة السوتها فينا ما بتمرق بالساهل
ومشت تمت بكاها جوة الصالة وبكاء كان علي حظها وحبها الكاتماهو سنين وطلع وهم ساي وانكتب عليهو الموت من غير ما تبوح بيهو
جدو قال ليهم والله لو عارفكم التلاتة بتتبكوا لي كدا ولا كنت جيت كلمتكم
نادر قال ليهو ياخ دا اول عرس في بيتنا ما نبكي من الفرح لشنو ؟
جدو مشاها وصدقو وقال ليهو يللا استحمى وغير هدومك وورح معاي ليهم
نادر فات وخلاهو مع امو ومشى يغير
ودخل لقى هدى لسة بتبكي
قال ليها ها انتي لسة بتبكي مالك ؟
قالت ليهو ساي
_ساي دي شنو ؟ مافي حاجة اسمها ساي ، مالك؟
_ببكي ساي يا نادر ، البكاء حرام ؟
_ما حرام لكن مافي بكاء بدون سبب
_أنا ببكي ساي بدون سبب ياخ
_ عشان خلعناكن انا وجدو قبيل لمن انا بكيت ؟
_آي عشان خلعتونا ، خلاص ارتحت ؟ ياهو دا السبب
_لا لا والله دا ما السبب لانو لو هو اكان بتسكتي من قبيل
_نادر بالله عليك خليني ياخ
_اخليك كيف ؟ الا توريني الببكيك شنو ؟
_ما قلت ليك عشان انخلعتا
_لا لا دا ما السبب
ونادر اتذكر سؤال جدو ليهو لمن قال ليهو انت بتحب حليمة ؟ جاهو فجأة كدا وطوالي قال لهدى انتي بتحبي جدو ؟
_جدو ؟ انا ؟ لا طبعا ، احب ليهو شنو دا كمان
_مالو عيبيهو لي ؟ يا هدى انا ما اخوك بس ، انا صاحبك برضو وصديقك وما قاعدة تدسي مني شي ولا قاعد ادس منك شي خليك صريحة معاي
_نادر امشي غير وألحق صاحبك وبطل حركاتك دي داير تقولني كلام انا ما بعرفو ؟
_انا بمشي منك هسي بس لكن ما بخليك الا اعرف المبكيك شنو
_خير بعدين بوريك السبب
جدو كورك لنادر يللا يللا ياخ بتسوي في شنو انت ؟
نادر غير ملابسو سريع وسرح شعرو وجاء مارق لجدو استأذنوا من حاجة علوية وفاتوا
يتبع....
