#جدو (١٧)
مجاهد يوسف
قبل حليمة تدق الباب هدى قالت ليها بعرفك عشان النقاب ، قالت ليها بفكو بس خايفة ما يفتح الباب هو ويفتحو واحد من أخوانو تبقى مشكلة
قالت ليها اتوكلي ساي بس انتي دايرة تصلي لشنو ؟
قالت جدو دا خطبني ساي ولا شافني وانا متأكدة لو لاقيتو في اي فجة غير بيتنا ما بعرفني وعاوزة اخليهو يشوفني من غير ما يعرف اني حليمة دي فكرتي عشان كدا انا بسأل من خالتو أم سلمة وبرجع ليك نمشي البيت عشان اشوف ردة فعلو شنو ؟
والله فكرتك سمحة لكن انا ما معاك فيها وما عارفة ليه ما تزحي النقاب وخشي ساي
حليمة دقت الباب وجدو عاين فيهو كدا وقال دا منو هسي دا وابى يفتحو ومشى لاخوانو لقاهم في التلفزيون قال لعامر امش شوف دا منو الفي الباب دا ولو اي زول سألك مني انا مافي الا نادر بس ونادر بدخل براو عارفني قاعد
عامر فتح الباب ولقاها دي حليمة بعرفها هو ومن شافتو نزلت النقاب وقال اتفضلي قالت ليهو خالتو ام سلمة في قال ليها مافيشة عند ناس البكاء
جدو سمع انو دا صوت بت طوالي جاء قال لعامر دا منو ؟
حليمة قالت لعامر هسس ما تقول ليهو دي حليمة
_دي منو يا عامر الفي الباب ؟
_دي دي فاطنة بت ال.. ال.. بت الجاك جيرانا ديل
جدو طوالي جاء وعامر فات
_اهلا وسهلا عمي الجاك كيف اتفضلي
_كويس الحمد لله خالتي ام سلمة في ؟
_بتجي بعد شوية اتفضلي خشي استنيها ومالك مكمكة كدا انتو النقاب دا بقى موضة وللا شنو ؟
حليمة دخلت وجدو عندهم سريرين مطلعنهن في الحوش وكانوا بطلعوا التلفزيون برضو في الحوش لكن عشان الحلة فيها بكاء ما طلعوهو ومشغلنو جوة في الصالة قعدت في واحد من السريرين وقالت ليهو انا ما منقبة من زمان وبديت ألبسو قبل كم يوم
_طيب لو عادي زحيهو خليني على الاقل اعرفك
_بس عشان شينة ما دايراك تخاف لمن تشوفني وتقوم جاري ، انت جدو موش
_ههههههههههه معقول اقوم جاري ههههههههههه والله ضحكتيني لكن وانا حادي علي حاج العبيد ما داير اضحك اسبوع ههههههههههه اي انا جدو ود ام سلمة كدي افتحي وشك دا
_توعدني انك ما تضحك علي
_في زول بضحك على خلقة الله ؟
حليمة شالت النقاب وجدو دا لمن شهق قمر شنو القدامو الفجة دي زي الضوت والعجب لمن ضحكت قلبو قال شححححح عيون الصيد الواحدة قدر الفنجان والوش مدور ما حاكتو الا القمرة وجدو قعد يبلع في ريقو وغلبو تب من غير ما يشعر قال ليها اقسم بالله يا بت الجاك جرير لمن قال
ان العيون التي في طرفها حور
قتلننا ثم لم يحيين قتلانا ، نهائي ما كضب ،
جدو ذكي شديد واتذكر الجاك ومرتو واولادو اصلا هم جيرانهم وبشوفهم طوالي واتذكر ما عندهم الا بت واحدة وشينة ومتزوجة قعد يضحك لانو عامر ما عرف يكضب بس عينو اصلو ما نزلها من حليمة وبقى مقهي فيها قهيت السحلية في الشمش وشاكي هل دي حليمة وللا لا وفكر قبل ما يتورط بكلام ينحسب عليهو يتأكد اول مع انو عرفها من صوتها ما بغباهو وطريقة كلامها الزي طريقة عبير وهي اتبسمت وقالت ليهو
_ شينة موش ؟
_شينة شديد وليك حق تتنقبي ما تخوفي الناس ههههههههههه غايتو انا لو ما خاطب كنت اتقدمت ليك
_خاطب ؟ متين ما سمعنا بيك
_خاطب لي واحدة من اهلي واحلى منك بكتير مع اني ما شفتها وهي زاتها منقبة عشان كدا قلت ليك النقاب دا طلع موضة وللا شنو
_دي منو المن اهلك ومنقبة ؟
_اسمها حليمة امها الرضية بت عمتي حليمة عرفتيها
_عرفتها بتقرا معاي بس ما حلوة ، وكيف خطبتها وانت ما شفتها
جدو اتأكد تب انها دي حليمة وبدا يستعمل السياسة والدهاء
_حبيتها من صوتها وشفتها بقلبي ما سمعتي بالاذن تعشق قبل العين أحيانا
_ سمعت بيها لكن داك شاعر اعمى عشان كدا قال كدا
_كمان مثقفة وبتعرفي الشعراء ، حليمة برضو بتكون مثقفة كدا موش لانها بتقرا معاك ،
_غايتو علي كيفك بس حليمة ما حلوة زي ما انت فاكر
_لو ما حلوة برضو بحبها ولو ما وفاة حاج العبيد دي كنا تمينا الخطوبة وحددنا الزواج
_بسرعة كدا امكن تطلع شينة وما تعجبك
_انا قلبي عمرو ما خزلني وشفتها بقلبي واتحكرت جواهو وبقت لي زي الهواء البتنفسو
حليمة غلبها الكلام ولا عرفت ترد بشنو قالت ليهو انا بستأذن وهو رغم انو ما دايرها تفوت وداير يشبع فيها شوف قال يخليها تمشي لانو وصل ليها الداير يقولوا ولو بطريقة مباشرة لكن بالنسبة ليها كانت غير مباشرة وطريقة كيفتها منو كيف شديد ووصلها الباب وكان متأكد تماما انها ما عرفت انو عرفها وكمان متأكد انها ما جات براها عشان كدا ما طلع معاها وصلها الباب وقالت ليهو يللا باي ودعها وقفل الباب وجرى علي غرفتو شبابيكها في الشارع طفى النور ووقف في الشباك لانها بتجي بعندو عشان يعرف المعاها منو ولو اتكلمت بتقول ليها شنو
جن بعندو ابتسم وضحك لمن شاف هدى معاها بس ما اتكلمن نهائي قريب منو وحليمة دايرة تنطط من الفرح
عامر جاهو قال ليهو عارف يا جدو دي منو الجات هنا دي ؟
قال ليهو عرفتها دي حليمة
آي صاح بس هي قالت لي ما توريهو عشان كدا انا قلت دي فاطنة بت الجاك ههههههههههه هو الجاك زاتو ما عندو فاطنة وعندو بت واحدة بس وقلت ليك كدا عشان تعرفني كضبت عليك
جدو قال ليهو انت ذكي والله ياخ وانا زاتي فهمت قصدك بس لو في اي يوم لاقتك ما تقول ليها وريتو
حليمة أكانت مبسوطة شديد واصلو ما متخيلة جدو دا يطلع بحبها كدا ورغم جمالها الشافو قدامو ما غير فكرتو ولا اتأثر بيهو ولسة باقي علي حليمة الما شافها وبقت متشوقة للمفاجأة البتحصل ليهو لمن يجيهم ويشوفها ويلقاها هي دي زاتها ، وكلمت هدى بكل شي ، هدى عرفت انو جدو ذكي وعرفتو عرفها من كلامو ليها دا ولانو مافي زول ما عارف انو الجاك ما عندو غير بت واحدة وكبيرة ومتزوجة بس ما ورتها عشان ما تخرب ليها فرحتها دي ، وعرفت جدو داهية لانو ما مرق وقدمها ومتأكدة انو كان بعاين ليهم بالشباك من شافت النور انطفى
جدو بعد ما كان زهجان وقلقان وقافلة معاهو جيت حليمة دي وشوفتو ليها خلتو متكيف شديد وقال بكرة الصباح وهو طالع يمشي ناس عمتو حليمة ويحقق الخطوبة ويسافر لشغلو ويشوف ليهو اي طريقة يرجع بيها سريع وقال دا اسلم حل وعندو نفوذو هناك وواسطاتو مع انو ما ماسك شغل مهم وشغلو هامشي لانو ما مؤهل لكن لو داير يبقى مدير البنك ببقى بس هو شايف احسن ليهو كدا لا يجدع ولا يجيب حجار ولا ليهو اي تأثير غيابو ووجودو واحد في البنك اداري وبس لكن لازم يداوم عشان يعمل فيها مهم
حليمة ولا نامت من السعادة والفرح وشافت كأنو اسعد منها اليوم مافي جدو البتحلم بيهو اي بت في الحلة بحبها موت ومن غير ما يشوفها كمان وقعدت تتكلم براها زي المجنونة تشوف في صوتها سمح وللا ما سمح ودايرة تعرف كيف أثر في جدو وخلاهو يحبها وقعدت تعيد في الكلام القالتو قدامو يوم جاهم اول مرة داك صوتها ما اقتنعت بيهو وبقت كل مرة تغير فيهو لمن امها صحت بيها وقالت ليها نومي ها مالك جنيتي ؟ حتى انتبهت لروحها ضحكت وسكتت تحنس في النوم اكان يجيها وتب مابي
جدو برضو ما نام والعجب هدى كانت واقفة قريب من الباب وسمعت كلامهم كلو وقطع قلبها تقطع وما ندمت علي حاجة الا سوقتها لحليمة دي خربت بيها اي حاجة ، وقطعت العشم من جدو تب تب وبقت مساهرة بس السقد لكن السقد اخير داك صاح بساهر لكن لا شايل هم ولا ببكي علي حالو البقى يحنن ولا علي حب العمر الراح ساي في الهواء
يتبع....
