#جدو (٢٣)
مجاهد يوسف
السيد وصل البيت ولقى نادر قاعد زهجان مقلق وما عارف وين جدو والخلاهو يقلق انو قال ليهو برجع سريع ما بتأخر وقعد يفتش في دولابو واوراقو عن اي ارقام لزول بعرفو او زول يقدر يسألو ما لقى شي حتى ابو جلمبو ما عارف عنو حاجة ، لكن رغم قلقو وخوفو على جدو لكن لمن السيد جاء البيت حاول بقدر الامكان انو يكون عادي وزي المافي حاجة
السيد بعد سلم علي نادر وقبل يقعد سألو من جدو
_جدو دا من امبارح طلع استدعوهو لمأمورية
_مأمورية شنو هو موش شغال في البنك ؟
_لا لا ما مأمورية عندو شغل قال عندو شغل وبغيب يومين تلاتة
_انا مشيت البنك وقالوا لي اليوم ما جاء
_قلت ليك قال عندو شغل بغيب يومين تلاتة لكن ما وراني ماشي وين وشغلو شنو
_وانت نزلت شغل وللا لسة ؟
_سلمت البنك اوراقي ومنتظر الرد احتمال يردوا علي في اليومين ديل
ونادر حول الموضوع والونسة عن الحلة وناس الحلة والجابو الخرطوم شنو
بعد شوية جاهم طه وقال لنادر وين جدو ؟ انا كلمني ابو جلمبو قال لي الزول دا من امس مختفي ، ما قال ليك مشى وين ؟
_ما قال لي والله لكن قال لي عندي شغل بغيب يومين تلاتة ،
نادر ما داير يغير الكلام القالو للسيد عشان السيد ما يعرف اي حاجة عن جدو عن طريقو وقرص لطه وساقو برة وقال ليهو المعاي دا نسيبو وانا ما داير اتكلم قدامو هو عارف جدو شغال في البنك وبس ما عارف اي حاجة غير كدا
_طيب هو طلع الساعة كم ومع منو ؟
طلع الساعة واحدة تقريبا ومع منو ما عارف والله لكن قال طوالي بطلع في اوقات زي دي
طه اتخارج ونادر دخل للسيد ودا فهم في حاجة وانو نادر زي الداسي منو شي قال ليهو شوف يا نادر انت وجدو من خيرة شباب الحلة والناس كلهم بشهدوا بكدا ، ودي ما فيها كلام بس انت عندك مشكلة وانا بعرف الزول من كلامو ومن نظراتو ففي شنو بالواضح كدا انا ما دايرك تدس مني حاجة ،
_ادس منك حاجة كيف يعني ؟
_جدو غير البنك شغال شنو ؟
_ما شغال اب شغل تاني ، البنك وبس
_طيب الجاء هنا دا منو ، من خلقتو ساي دا ما زميلو في البنك
_دا واحد صاحبو ساي من شباب الحي وبجي طوالي يتونس معاهو انت عارف جدو زول اجتماعي وبصاحب اي زول
_عموما انا ما بكتر معاك في الكلام بس ياريت لو في حاجة توريني ليها لانو نحن اهلو ما اغراب والواحد مصيرو يعرف اي حاجة ولو ما عرف اليوم بكرة بعرف
طه رجع لابو جلمبو والاتنين مشوا لعباس وقالوا ليهو جدو وين يا ركس ؟ اول حاجة عباس قال ليهم انا زاني قاعد افتش ليهو معاكم طه قال لعباس اركب معانا براحة كدا دايرنك ، عباس قال ليهم مافي داعي يا شباب للحركات دي وانتو عارفني ما الزول الكدا
ابوجلمبو قال ليهو شوف يا ركس في حاجة دايرك تفهمها جدو دا لو جاتو حاجة او ما ظهر سريع والله بتتعب معاي
_دا تهديد ؟
_تهديد ما تهديد المهم انت بتتعب معاي لانك زول ما كويس وانا كلمت جدو بالمناسبة يوم قلت لي ما تركز معاهو وشايفك لمن انا مشيت ليهو انت مراقبني لكن عملت رايح عشان اثبت ليك انو انا ما ببيع صاحبي
_يا شباب انا زاتي ما الزول الببيع صاحبو وصدقوني ما عارف ،
طه قال ليهو علي كيفك بس انا بشمشم لو لقيتك عارف حاجة وداسيها وجدو دا جاتو حاجة وليك يد في الموضوع لا انت لا المك بتاعك بحصل ليكم خير
_المك الدخلو شنو هسي ، وكمان بقيت تتكلم في ناس زي دا
_علي كيفك انا ما فارق معاي زول والمك حقك دا تحت جزمتي دي
_طه مافي داعي ياخ واتوكلوا امشوا وانا معاكم وما زول خاين وانتو عارفين علاقتي بجدو
عباس فات وطه قال لابو جلمبو كان نرفع الوهم دا ونقيفو شوية ونوريهو كتاب عشان ما يرفع قرن تاني
ابو جلمبو قال ليهو يومداك قطرني المعفن لكن خليهو هسي ونشوف جدو بكرة بحصل معاهو شنو وارح نشوف الفرد احتمال في زول عارف عنو شي
اليوم تم والسيد بيت مع نادر في بيت جدو واتخارج الصباح ونادر لمن اليوم التاني والتالت مرن وجدو ما ظهر ولا عارف ليهو جهة ولا اي خبر ولا عارف يسأل منو شال الشنطة الفيها القروش ومشى وداها الحلة ودساها في بيتهم وكلم هدى قال ليها دي امانة ووراها اي حاجة عن جدو وقال ليها انا ماشي افتش ليهو بس القروش دي ما رضيت اخليها في البيت وخليها معاك لمن ألقى جدو ورجع في نفس اليوم ولمن امو سألتو قال ليها نسيت لي اوراق مهمة طلبوها مني ناس الشغل جيت اشيلها وما شافت الشنطة
ناس البنك وافقوا على توظيف نادر وطلب منهم يومين تلاتة قبل ينزل الشغل لحدي ما يشوف آخر جدو شنو لكن ياسر رفض اديهو يومين تلاتة قال ليهو يا تستلم من بكرة يا اما تنسى وهو مافي يدو حاجة يعملها لجدو غير الانتظار بس جاء طوالي اليوم التاني استلم شغلو والكويس انو كان اتدرب في بنك بعد اتخرج يعني عارف الشغل كويس وطوالي استلم واشتغل بس بالو مشغول بجدو
اليوم التاني ياسر ما جاء البنك ولا اخد اذن من الادارة والمدير اتصل عليهو موبايلو مقفول زي جدو
يتبع ....
