#جدو (١٦)
مجاهد يوسف
حاج العبيد بعد صلوا عليه ودفنوهو رجعوا قعدوا في زاوية في الفريق مخصصنها للمناسبات الزي دي والسيد ابو حليمة نهائي ما قصر وعربيتو نهائي ما وقفت اكان سايقها هو وللا غيرو وقف معاهم وقفة تمام وجاب الصيوان للشباب دقوهو وجاب الترامس حقات الموية والتلج ونادر زاتو ما قصر ولا شباب الحلة قصروا والبنقص كلو كانوا بتموهو بدون كلام
ولمن جاء وكت الغداء اي زول في الحلة جاب عمودو حتى عامر اخو جدو جاب العمود حقهم
بعد الغداء جدو مشى بيت ناس نادر وحاول اول يمشي بيت ناس عمتو داير يلاقي حليمة لانو بكرة لازم يسافر خلاس اجازتو انتهت لقى بيت ناس عمتو ملان حريم لانهم جيران ناس البكاء ولا عندو اخت يرسلها لحليمة تناديها ولا بقدر يرسل اي بت قال مافي غير هدى بس وهي البتحل ليهو المشكلة دي ومشى ليها في البيت ولقى البيت فاضي لا هدى ولا علوية امها الاتنين كانن عند ناس البكاء ونادر خلاهو في ديوان الفراش فتح الديوان وقعد فيهو منتظر جيت اي زول فيهم
نادر ماسك الدفتر حق الكشف وما بقدر يبعد من الديوان كتير وخاتيهو في الشباك والبمشي عليهو كلو بجيهو عشان يستلم منو القروش
وجدو مقلق وزهجان والواطة قربت تمغرب وما بقدر بكرة يغيب عندو يوم الليلة دا بس اكان ما شافها خلاس الا يقعد يوم بكرة ويغيب يوم من الدوام ، فكر يتصل علي ناس البنك يوريهم لو اضطر انو يتأخر وفعلا اتصل قال يشوف الحاصل شنو لكن مافي زول رفع التلفون وموبايل المدير مقفول وبقى مصر الا يقابل حليمة اليوم ولازم
رجع الديوان يفتش للسيد ابوها وللا الطيب والاتنين من الصباح أكانوا يتحاوموا قدامو وهسي الاتنين ما لقاهم ولا هدى القال بتحل المشكلة برضو ما لقاها ، قام كورك لنادر قال ليهو انا بكرة مسافر شوف لي حل داير لي مرة تدخل عند الحريم تنادي لي حليمة هسي دي
نادر قال ليهو ما مشيت بيتنا مالك وكلمت هدى تجي تناديها ليك ؟
قال ليهو مشيت ومافيشة ياخ وبيتكم فاضي دي جيتي منو وحتى أمي زاتها ما لاقيها عشان اكلمها وبرضها جوة مع الحريم
نادر قال ليهو خلاس امشي بيتنا انتظرني فيهو وانا بتصرف
_داير تعمل شنو يعني ؟
_انت مالك امشي بس وبتصرف انا قلت ليك
جدو فات ونادر مشى مسك الدفتر لواحد من الشباب ومشى علي بيت البكاء وقف جمب الباب لمن جات بت داخلة قال ليها نادي لي هدى أختي من جوة ، هدى جات وساقها على جمب
_جدو في بيتنا ودايرك تجي هناك ومعاك حليمة انتي عارفة انو خطبها من غير ما يشوفها وبكرة مسافر
_طيب طيب لكن حليمة مافي جوة هنا ما شايفاها وقبيل امها نادتها مرقت معاها وما رجعت تاني
_امشي اتأكدي واسألي منها امها شوفيها وين المهم اتصرفي
قالت ليهو خليني امشي بيتهم اول
هدى مشت ولقت حليمة في بيت اهلها ولا كلمة ما قالتها ليها ما قدرت تكلمها ورجعت لنادر قالت ليهو برضو هنا ما شايفاها
نادر رجع يفتش للطيب وللا السيد وجدو منتظرو في البيت لمن شاف روحو اتأخر مشى ليهو في البيت
هدى بهناك قعدت تلوم في روحها وليه عملت كدا ؟ جدو خلاس خطب ومفروض تنساهو وتعتبرو زي اخوها نادر وزي ما قالت ليهو يومداك ، وحتى لو اتقدم ليها بعد كدا مفروض ما تفكر فيهو لانو ما ح يتقدم ليها اصلا وقررت تساعدو ورجعت تاني بيت ناس حليمة وكلمتها بجدو وانو منتظرها في بيتهم لكن حليمة قالت ليها اعتذري لي ليهو قالت ليها اعتذر ليك بياتو عذر وانتي كمان ما تبالغي المانعك شنو؟ وحليمة لقت ما عندها اي عذر قالت تغير هدومها وتمشي معاها
نادر مشى لجدو وقال ليهو رسلت نادوا لي هدى فتشت البيتين ما لقتها احتمال تكون فاتت مع السيد ابوها والطيب خالها لانهم الاتنين مافي
جدو قال ليهو خير ومرق فات بيتهم قال يجهز نفسو للسفر بكرة بدري لو ما لقى موبايل المدير مفتوح
وصل بيتهم وبقى يرتب في ملابسو ويلملم في شنطتو وبهناك نادر رجع ديوان الفراش وهدى وحليمة جن البيت لقن ما فيهو اي زول لا جدو ولا نادر وهدى عرفت غلطتها القبيل لمن كضبت علي نادر وقالت ليهو مافيشة
قالت لحليمة ورح لجدو في بيتهم حليمة أبت اول حاجة لكن هدى اقنعتها لازم تمشي معاها لجدو في بيتهم وقالت ليها انو خلاس بقى شبه خطيبها ولو ما الوفاة دي أكان خطبك رسمي
حليمة قالت ليها انتي مالك مهتمة بالموضوع دا شديد كدا ؟
قالت ليها انا اخت جدو لو ما عارفة اعرفي من هسي
والكلام دا قالتو وقلبها داير يتقطع من جوة وحليمة رضت بعد تعب وفاتت معاها
جدو في البيت رتب شنطتو وكان قافلة معاهو وقال فلنفرض اني ما لاقيتها ومشيت هل اعتبر نفسي خاطب وللا ما خاطب؟ ولو اعتبرت نفسي خاطب مثلا مثلا اكون خاطب منو ؟ وقعد يضحك وقال خاطب لي اسم بس والله انا جدو الزول الما فكر في حاجة الا عملها في الآخر أخطب لي اسم ؟
في الطريق هدى قالت لحليمة رايك شنو في جدو دا ؟
_من أي ناحية ؟
_من كل النواحي
_زول كويس وجنتل وانا اول مرة اشوفو عجبني شديد ما بكضب عليك لكن لمن لاقيتو واتكلمت معاهو ما عارفة زي الشفتو متكبر وللا حاجة زي دي كدا وقلبي اباهو ولمن اتقدم لي فكرت كتير ووافقت
_وافقتي لشنو يعني شنو الخلاك تغيري رايك مش قلتي قلبك أباهو؟
_والله ما عارفة شنو الخلاني اوافق بس هو ما فيهو عيب وكلهم شكروهو لي وقالوا ما متكبر بعدين العملو مع ناس حاج العبيد قبل يموت حسسني بإنو زول كويس ، عشان كدا يعني
_هو شافك ؟
_ما شافني لكن قال امو كلمتو بي وانا زاتي استغربت ليه اتقدم لي قبل يشوفني
_يللا قسمة ونصيب واهو نحن ماشين ليهو وهسي بشوفك وبتكون مفاجأة طبعا
_ممكن أطلب منك طلب يا هدى وتخليني اعملو
_ممكن طوالي بس ما يكون الفي بالي
_في بالك شنو عليك الله
_اني ما ادخل معاك وهو ما بعرفك طبعا وتدخلي براك زي الانتي ما حليمة عشان تشوفيهو بعرفك وللا لا
_بسسس اي والله دايرة اعمل كدا لو ما عندك مانع
_انا كنت دايرة اقول ليك كدا لكن خفتك ما توافقي
_بتكون مفاحأة موش
_ أكيد
جدو لملم هدومو وظبط امورو واتصل تاني كم مرة على المدير ما لقى أي اجابة ولسة موبايلو مقفول وقال بعد كدا الا تجي امو يمشي معاها تناديها ليهو ويلاقيها في اي مكان المهم يشوف حليمة قبل يسافر وحليمة دقت الباب
يتبع.....
