فـتـاة مـن فـولاذ

الحلقة التاسعة و العشرون

الحلقة التاسعة و العشرون
**********************

الكل جهز نفسه عشان يقبضوا علي عادل و المهمه الساعه ٣ بالليل و دلوقتي الساعه ٦ الصبح
و ريما صحيت بدري و راحت قعدت في الجنينه و مازن راح قعد جنبها
مازن : صاحيه بدري ليه عندك مهمه بالليل
ريما براحه : امممم حلمي خلاص قرب بعد سنين من العذاب و الشقي حق ابويا خلاص راجع
مازن : بعدتي عن يزن ليه انتوا الاثنين طول عمركم جنب بعض وانا لاحظت أنه اتلهي و انتي بعدتي
ريما بهدوء : خلاص يا مازن احنا كبرنا أننا نفضل مع بعض طول الوقت ويزن لازم يشوف حياته و انا مش زعلانه منه بالعكس فرحانه عشانه وأنه لقي حبه
مازن بص ليها وهي استغربت ده
ريما : مالك
مازن : مستغرب كلامك من امتي الكلام ده
ريما بهدوء : من الفتره اللي بعدت فيها عن يزن تعرف أنا وحشني ليث اوي
وبصت ليه : بس دايما كنت جانبي انت أنا بحبك اوي ذي ما بحب ليث بالظبط انت احسن اب في الدنيا مازن اوعي تنساني أنا مهما بعدت دايما هفضل جنبك و تحت عيوني وخلي بالك من يزن و صهيب أنا متاكده انك بتحبه ذي يزن عندك
مازن بقلب مقبوض : مالك يا ريما ليه بتقولي الكلام ده
ريما بابتسامه : مافيش يا مازن بس حبيت اقولك كدا واعرف اني بحبك اوي
مازن بقلب مقبوض : ريما هترجعي ثاني ليا صح
ريما بهدوء : اها هرجع ثاني وعد هتاخد بالك من نفسك
مازن : مش عارف حاسس انك متغيره بقالك فتره
ريما : بالعكس ده اول مره ارجع ذي ماكنت
وسكتت شويه وهو احترم ده
ريما : مزون هات حضن كبير
مازن حضنها بلهفه وهي ابتسمت
مازن : أنا بحبك اكتر من اي حاجه في الدنيا يا ريما اوعي تزعلي لو في يوم زعلتك
ريما : مش زعلانه منك و عمري ما ازعل خد بالك من نفسك ماشي أنا هطلع بقي اشوف يزن وصهيب عشان مش هلحق اقعد معاهم بالليل يلا أنا طالعه
ومشيت و مازن بص بشرود : مش عارف يا ريما نفس كلام ابوكي قبل ما يموت ربنا يخيب ظني يا رب

_______________

وريما طلعت اوضه صهيب لقته نايم وهي راحت قعدت جنبه و لعبت في شعره

ريما : سفروت يا زفت انت
صهيب قام و لقي ريما و بص ليها بخوف : ايه ده ريما بتعملي ايه هنا
ريما : اخويا الصغير السفروت كان نفسه اطلع اصحيه مره و حلمه اتحقق
صهيب ضحك وهي حضنته
صهيب : مالك بقالك فتره متغيره
ريما اتنهدت : لا أنا تمام اول مره اكون كويسه كدا سفروت عايزه منك طلب
صهيب : ملكتي تؤمر
ريما بحنان : صهيب أنا بحبك بجد وعندك ذي يزن عندي و اوعي في يوم تفكر اني بكرهك بالعكس انت فيك كتير من ليث وده يخليني احبك اكتر خلي بالك من نفسك ومن مازن و ساره والكل و اتجوز رهف أنا عارفه انك بتحبها وعلي فكره هي كمان بتحبك اتجوزها وعيش حياتك ماشي
صهيب حس بحاجه غريبه ومش مرتاح
صهيب بمزاح : لا كدا اقول اختي حد خطفها وجه بدالها وواحده ثانيه فين سفروت
ريما ضحكت وضربته في كتفه : غور يا سفروت من هنا خساره فيك حبي وربنا
صهيب ضحك وحضنها وهي حضنته
ريما : خد بالك من نفسك يلا هروح ليزن
صهيب : ماشي
و ريما خرجت و صهيب : هو انتي مالك يا ريما حاسس قلبي مش مرتاح