رجعت الكم مرة ثانية
كل الهلا بيكم
بعد ما انسطرت من حجي هذا الرجال الجبير وصلت البيت اردد الشعر مالته بس كلشي ما فهمت ..
المهم اتلكتني امي تصيح بوجهي وينك وين رحت تأخرت صار ساعة وجان تاخذ الصمون من ايدي بقوة وراحت للمطبخ تكمل الريوك ..
ورة شوية صاحت على اخوتي الاثنين الاكبر مني واختي الاصغر من بسنتين
اجه ابويه وكعدنه عالسفرة نتريك
صار هدوء بالموضوع كلت هاي فرصتي خل اسأل ابويه عن معنى كلام الرجال الي سمعته بس بنفس الوقت متردد لان ما حاجي وي ابوي بهيج مواضيع
تشجعت شوية ..
اجتني جرأة فجأة فسألته بابا
نعم بابا كالي
كلتله سمعت اليوم شعر
كال شنو هذا الشعر خير ان شاء الله
كلت اكو رجال جبير هو فقير كاعد يم الفرن سلمت عليه وسألته شمحتاج ما محتاج
فجاوبني بشعر
كال ابويه شنو هذا الشعر شو سمعلياه
هنا صرت شاعر تحنحنت شويه وبعدين حجيته بس مو بنبرة ذاك الرجال
ذاك الرجال كانت نبرة صوته بيهه حزن شوية
كلت
مو كلشي من تهواه يرهم نصيبك
يمكن دغش جذاب يطلع حبيبك
شويه صفن ابويه بس مو مثل صفنتي بعدين كالي بابا بعدك زغير على هاي السوالف وهذا الرجال لا تحجي ويا بعد ماشي ..
هزيت راسي ودنكت بس ما حصلت تفسير .. كملت ريوكي وكمت اني واخوتي ايام عطلة وكلنة بالبيت بس ابوية يطلع للشغل هو يشتغل تكسي
رحت لغرفتنه الي بيهه انام اني واخوتي ..
لحكني اخوية الجبير عمره ٢٣ سنة كلي تعال سنان شنو هذا الشعر شو عيدليه اني بسرعه هنا عدته
مو كلشي من تهواه يرهم نصيبك
يمكن دغش جذاب يطلع حبيبك
اخذ حسرة اخويه وبعدين كلي هذا صاحبك مضروب بوري معدل ...
جان يحب وحده والظاهر ما صايره قسمته
كلت بعقلي هاااااا هذا التفسير وبابا ما راد يسولفلي على الحب لان هيج مواضيع محرمه بالبيت تنفتح
بس اخويه ضل مبتسم
فأني سألته ليش مبتسم كال ماكو شي ماكو شي وخله وكام طلع من الغرفه هنا الحدس مالتي اشتغل وبديت افكر يمكن اخوية الجبير محسن يحب ومحد يدري بي
كملت ترتيب الغرفة وجان امي تصيحلي مرة ثاني رحت ركض ها ماما ..
كالت هاك فلوس جيب معجون خل اطبخ الغدة
طبعا دوام ماما ما يخلص من الريوك للتنظيف بعدين تبلش بالغدة ...
اني فرحت من دزتني لأن كلت الكي الرجال بعده كاعد يمكن واروح اسولف ويا ..
لأن قصته شغلتني الصراحة وحبيت اعرف تفاصيل اكثر الفضول يقرة الف عندي بهاي اللحظة ..
رحت امشي بسرعه وعيني على الفرن حتى سيارة رادت تدعمني واني ما منتبه حتى السايق كام يصيح ويغلط بس اني ابدا مو يمي الحجي
وصلت قريب الفرن اباوع ماكو الرجال ضجت حيل وانداريت رايح للاسواق الي بذاك الصوب من الشارع ..
وآني امشي بطريقي ومقهور شوية مو هواي كلت بعدين اشوفه او باجر مريت بطريقي على البقال واذا اشوفه كاعد هناك ...
ما أدري ليش فرحت ...
سلمت عليه وكعدت يمه ونسيت اني طالع اجيب معجون للغدة ..
باوعلي وبعدين دار وجهه بس ما رد السلام كلتله عمو شلونك ...
كالي زين بس بدون ما يباوع عليه هنا اني سألته بس بصوت ناصي حتى الناس الي يم البقال ما يسمعون
كلتله عمو شنو قصتك ؟
كالي ورة شويه صفنه حتى ضنيت ما سمعني ..
ليش عمي تريد تعرف قصتي ..
صراحة ما عرفت شجاوبه أخاف اكله فضول ويغلط علية لو يسوي شي أخاف اسكت ما يحجيلي ...
ضليت متحير ...
تالي كلتله عمو ما ادري حاس اكدر اساعدك
جان يطكهه بضحكة قوية انتبهت عليه الناس الواكفه تشتري
جان يحاجي البقال ها ابو ابراهيم خيرك شو تضحك
ما جاوب بس رجع دنك مرة ثانية كأنه استحى او شي
الموقف محرج
وآني ردت اكوم لأن العالم انتبهت عليه كاعد يمه هسة شيكولون عليه
ردت اكوم جان يكلي قصتي قصة يا عمي وانت بعدك زغير على الدنيا تكبر وتفهم ..
كلتله جرب وشوف يمكن افهم
ابتسم بوجهي وكال كوم منا خل نروح مكان مابيه احد حتى اسولفلك
بدون تفكير كلتله يله ...
مشينه كعدنه بالجزرة الوسطيه الي بين الشارعين جوة شجرة مو كلش عالية
كعد ولم رجليه بأديه وجرله حسرة جبيرة وبده بالكلام
اذا تحبون اكتبولي حتى انزل البارت الثالث
حيدر الباني
