مرحبا بيكم
رجعنالكم 😇
من طبينه بيت خالتي .. لكيناهم مستعدين لجيتنه وذاك الاستقبال الحافل وترحيب وأهلا وسهلا جانت الساع قريب ال١٠ ...
اول شي قدمونه مي وراهه شربت وعجنات بس ابوية طلب جاي تدرون بالكبار بالعمر يتذوق الجاي ويحبه اكثر من الشرابت ...
بيت خالتي عدهم ولد بكدي وواحد ازغر مني ... بالابتدائية وثنين بنات وحدة بالمتوسطة ووحدة زغيرة ما مسجلة يعني يطلع عمرهه اربعه لو خمس سنين ..
الولد الي بكدي اسمه أحمد هو الجبير لعائلتهم والبنية الي بالمتوسطة اسمهه شوية ما أحبه لأن احسه ثكيل بالنسبة اليه اسمهه" مفاخر "
يدلعوهه طوبه شنو الربط ما أدري ...
هاي طوبة معانيهه واضحة تكول محدديه بقلم ومرات اخاف من عدهه أحس شخصيتهه قويه ولسانهه طويل يعني مو مثلي تخجل وتجبجب من واحد يجيهم يعني خل نكول اجتماعية شوية ...
اختي تقريبا بعمرهه بس هي اكبر يمكن بسنه او كم شهر
طوبة اجتي كعدت يمنه اني واحمد وعافت اختي اني خجلت جان تسألني شلونك سنان كلتلهه الحمد لله بخير
جاوبت واني مدنك باوعت على امي لكيتهه منتبهه رأسا دنكت كلت خل أغطي على الموضوع
كتله احمد نطلع بره شويه كال لا ليش نطلع خل نصعد بغرفتي نلعب بلي انت مو تعرف تلعب كلتله اي يله بس اريد اطلع من الموقف ..
صعدنه للغرفة شغل البلي وكعدنه نلعب ..
هو لاعب قوي غلبني تلاث مرات ويضحك عليه ..
اني ضجت اتنرفزت شمرت اليده بالكاع وكتله بعد ما العب
كالي لا لا بعد ما اضحك تعال العب ...
كلتله لا ما اريد العب تعال خل أحجيلك قصه ..
كال قصه شنو دعوفنه كتله لا ولك قصة تخبل واحداثهه مشوقه بس خل احجيلك ..
كال دروح يا قصه يا بطيخ ...وعافني ونزل اني ردت انزل اجتي طوبه تعرفوهه بت خالتي ..
كالت سمعتك تحجي على قصه شنو هاي القصه كلتلهه لا هيج قصه تعبانه مال واحد فقير ...
كالت اني احب القصص عفيه احجيلي ...انوب اجتي اختي كالت اني اسولفلج تعالي بغرفتج ..كالت لا اريد سنان يسولفلي هو حلو يسولف قصص ...
اني انصدمت شنو هالحجي اني عمري ما حاجي وياهه جمله مفيدة وحدة كل الحجي الي بيناته سلام وبس ومن بعيد ...
حسيت بخجل على ارتباك على فد شي غريب ما عرفته بوقتهه حسيت انو هي تريد تتقرب مني وبس ..
كلتلهه ماشي بس ننزل جوة كالت ميخالف نكعد بالصاله بعيدين شويه لأن اهلنه بالاستقبال ومراح نسمع شي اذا كعدنه يمهم
اني وافقت ونزلنه للصاله كعدت على التخم مال القنفات اجتي كعدت بصفي
والتخم كله فارغ اني تفاجأت وادنيت شوية هي هم ادنت عليه وكالت يله بلش خل نسمع القصه
اختي كعدت بصفي من الجهة الثانية يعني صرت محاصر بيناتهن ... اول شي عركت وهو الجو زين لا حار ولا بارد وكلبي كام يدك بسرعه ..
كلت بكلبي اذا اجتي خالتي شراح تكول عليه او زوج خالتي بس لا راح يحجون عليه ...
شافتني عركت كالت اكوم اعلك المروحة اشو عركت محتر شنو
كلتلهه .. لا بس انتو حيل قريبين عليه
كالت هاااا ... بس مبين عليهه ما راضيه كام تحرك عيونهه وحواجبهه بحركات غريبه ..
ادنت شويه واختي هم ادنت بديت احجي القصه وره شويه اجه احمد من الاستقبال شافنه كاعدين نسولف كال هاي شنو شمكعدكم هنا همزين اختي يمنه جان صار غير حجي ...
جاوبته اخته كالتله هاي شبيك مو كلك احجيلك القصة وانت ما قبلت مو..
كل هاااا يله شو بله سمعنه ... وجرله كرسي وكعد كبالي اني استمريت بالاحداث واسولف ومندمج وهم كل شويه يسألوني وأجاوبهم بس اني اختصرت هواي شغلات مطيتهم بس المهم من الاحداث
صار وكت الغدا ...
اتفلشت الكعده كامو البنات للمطبخ واني واحمد كمنه نرتب السفره جانو مسوين سمج شوي وجايبين طرشي ولبن وخبز حار يعني الغدا فد شي روعه
على الغده احمد جان كاعد بصفي لزك كلي من نخلص غده نطلع بالدراجه هو عنده دراجه من هاي الزغيرة يسموهه ذبانه كلتله ميخالف بس وين انروح ؟
كلي انت معليك بس خل نخلص الغدة ونشرب جاي ونطلع .... سألته شراح تكل لأهلك كالي معليك انت اني ادبر الموضوع
ضل بالي متشوش هذا وين يريد يروح؟
كملت اكلي شو اشوف بنت خالتي عينهه عليه هاي شبيهه هاي كل ما اشيل راسي اشوفهه اتباوعلي
اني ما ادري شصارلي كمت هم اباوعلهه اشو ابتسمت بوجهي .. اني هم ابتسمت بس لا اراديا لأن ما جنت اعرف شتقصد من ابتسامتهه ..
خلص الغده وشالو المواعين والسفره اني بيهه هواي اكلت ما ادري اجاني واهس على الاكل وهو جان كلش طيب ..
جابت بنت خالتي الجاي قدمتلهم وصلت يمي خلت الجاي كدامي وياهه ابتسامه مثل مال الغدا هنا بديت افهم انو يمكن اكو انجذاب من عدهه الي بس كلت يمكن على القصة تريد تعرف تفاصيل اكثر
بدت عندي حرارة بمعدتي .. يمكن خربطت بالاكل
هذي الحرارة كام تزيد وخصوصا من اشوف طوبة تقترب مني ..
صرت حريص بتصرفاتي اخاف يصير موقف محرج ويا فشلة الفشله اذا صار ..
من خلصنه الجاي ورة شويه احمد صاحلي بصوت عالي سنان ... سنان
كلتله نعم كال يله تروح .. هنا سألت أمي وين رايحن بهالضهريه مو حارة عليكم جاوبهه احمد خاله رايحين نلعب طوبه بالساحه كالت ماما يا ساحه يا طوبه توكم ماكلين جاوب احمد خاله هسه الاكل تصرف ماكو شي
خاله لا تخافين علينه يله سنان ..
اني هم طلعت جان ابو احمد زوج خالتي كال لأحمد بابا على كيفكم بالدراجه الشارع مو أمان جاوبه احمد صار بابا صار ...
صعدنه الدراجه وطلعنه الساعه عبرت ال٢ الضهر اشو احمد اخذني على طريق اعرفه هذا طريق بيتنه كلتله احمد وين ماخذني كال انت مو تريد تشوفه للرجال ابو القصه .. كلتله اي بس بيتنه بعيد كال لا هسه بالدراجه بالدرابين تصير اقرب .. صراحه اني كيفت بس هسه بالي مشغول بغير شي تعرفون شنو اقصد مو 🤩
طوبه يعني مفاخر ظلت ابالي شو كل شويه اشوف ابتسامتهه ابالي ..
تريدون الصراحه قل أهتمامي بقصة الرجال وتحول مسار التفكير بطوبه بنت خالتي ..
بين خجلان بين اريد اعرف شتقصد من ابتساماتهه بين اريد اشوف الرجال ..
صرت بس اريد قصة الرجال تكمل حتى اركز بقصتي صار عندي قصه انوب ...😇
بعدين اكمللكم باي
حيدر الباني
