اهلا بيكم من جديد ...
حيدر الباني
تقريبا هم نص ساعه وصلنه لمنطقتنه كلتله امشي على كيفك لأن هو مو مكان واحد يكعد اكثر من مكان خلصنه الشارع وما شفته ..
رجعنه بالجهة الثانيه هم ماكو ... يا ربي وين صار
لا يم الفرن ولا يم البكال ولا يم العطار ...شنو الموضوع معقولة اليوم ما طالع؟
بس لا ما معقولة هو يوميه هنا .. اكله وشربة وكل شغلاته بالشارع رحنه ورجعنه مرتين الساعه قربت على ال٣ العصر وبديت أأيس وهذا أحمد أكل راسي يكول انت تجذب علينه ماكو هيج شي والقصه من خيالك
اني ضليت ما اعرف شأحجي ...
بهاي الاثناء جان أشوف واحد كاعد بالجزرة الوسطيه شلون ذاك اليوم من كعدنه بس ما متأكد هو لو لا ...
جان كلتله لأحمد ذاك هو ذاك لكيته ومن كثر ما متحمس كمت أهز بأحمد حيل وردنا ننكلب بالدراجه
كام أحمد يصيح عليه هاي شبيك تخبلت اي أفتهمت وينه ...اشرتله بأيدي كلتله كدامك بالجزرة الوسطية ذاك هو كاعد ...
شافه احمد اقتربنه من عنده كلتله لأحمد انت
لا تجي خليك بعيد نزلني يمه وروح
خاف يشوفك وبعد ما يحجي ...أحمد كال هاي المسافه كلهه ومتخليني أحجي ويا ... كلتله احمد حباب لا تلح من أرجع للبيت احجيلك اوك ...
قبل أحمد بس يبين ما راضي .. راح على صفحه ويباوع عليه من بعيد ..
اقتربت منه سلمت عليه .. ما رد السلام جان باله شارد بمكان بس الله يعرف بيه ... كعدت يمه واسمعه يحجي كلمات بالبدايه ما فهمتهه ... بس شويه عرفت يمكن شعر همينه بس مو واضح لأن ما كمل ...
انتبه عليه بطل الشعر ...
طلع جكارة من جيبه وشعلها وكام يدخن ...
كلي انت شأسمك .. كلتله سنان
يبين عليه يمكن صحة وركز وياي..
كلي سنان شجابك لهنا ... كلتله ليش ...
كال انتو مو بيتكم هناك وجان يأشر على مكان بيتنه اني يبست بدمي هاذا شلون يعرف شوصله ...
كلت مو مال اجذب عليه .. هو المو صاحي كلشي يطلع منه ... كلتله اي صحيح انته شمدريك ؟
كال كل الناس الي بهاي المنطقه اعرفهم والمنطقه الي بصفهه والي وراهه حتى ذاك الولد اعرفه وأشر على احمد ابن خالتي ..
اني بديت اخاف كلتله عوفنه هسه منهم سولفلي عنك بعدين شصار ؟
شوكت سألني؟
بعد ما اكلت ابيت ام ابراهيم ..
كال هاااا اتذكرت ... بعد ما كملت اكل نعست شافتني نعسان كالت خل اخليك تنام .. كلتلهه لا كمليلي قصة ابراهيم ..
كالت شكملك من يومهه الحجي اتخربط وبدت صحته تدهور .. كام كل ولد يشوفه يصيحله ابراهيم كامت الناس تخاف من عدنه ومحد يوصلنه يكولون ابو ابراهيم اتخبل ..
ظليت اداريه وشوية شويه اتحسنت حالته كل يوم والثاني اكله ابراهيم راح يجي حتى قنعته بسالفه هو مهاجر لأمريكا ..
هنا فهمت شنو قصد بالغربه من حاجاني ..
اخذني النعاس ونمت بمكاني
كعدت الصبح لكيت نفسي متغطي والحجي والحجيه مكابليني وكاعدين صافنين عليهه ..
من كعدت كالت الحجيه صباح الخير يمه ..
الحجي كال ها كعد .. صباح الخير وليدي ..
اني جاوبتهم صباح النور ..
ردت احجي ما خلتني ام ابراهيم كالت راح سويلك ريوك برهومي ... وكامت
بقينه اني والحجي سألني كال هم ترجع بعد ؟
اني ترددت بالجواب بس بعدين كلت خطيه خل اعتبر نفسي ابراهيم واجاوبه ..
كلتله لا هاي هيه بعد ما ارجع وسكتت هو هم سكت
وره شويه هم نفس السؤال واني جاوبت نفس الجواب وعاده عليه خمس مرات الى ان كمل الريوك
الحجيه تسمعنه لان المطبخ بابه على الصاله وتسمع كل شي ..
جابت الريوك بي جبن مثلثات واكو بيض وخبز وكلاص جاي اني من جوعي كبل بلشت بالاكل كملت الخبزة والجبن وشربت الجاي وكلت الحمد لله ..
قررت بداخلي انو اكلهم اروح لبيتنه هم اشوف اهلي وهم اشوف اسيل لان بكل هاي الضروف ما نسيتهه وشلون حولتني لأنسان ثاني بداخلي جنت اعتبرهه السبب بكل شي ما ادري حبيتهه ما ادري اريد انتقم على الي صار وياي..
كلتلهه لأم ابراهيم بس بصوت ناصي اريد اروح لأهلي
كالت لا يمه وين تروح انت ما حجيتلي قصتك ما اعوفك الا تحجيلي قصتك بعدين تروح ..
كلتلهه ميخالف احجيلج وتخليني اروح كالت اي ..
حجيتلهه كل شي من البدايه للنهايه ..
من خلصت كلتلهه يله انوب اروح وكمت جان تلزم ايدي وسحبتني كعدتني مرة ثاني كالت اصبر خل الحجي ينام خطيه يتأذه اذا دره بيك طلعت ..
اني اقتنعت بكلامهه وكعدت .. هي ضلت تسألني على اسيل وأمهه هواي اسئله ما اعرف شنو ليش شتريد تعرف ..
من كملت كالت شوف ... اني راح اروح لمنطقتك واسأل على ام اسيل واشوفهه واحجي وياهه وبعدين ارجعلك خبر بس توعدني ما تطلع من البيت ...
اني من سمعت الحجي فرحت كلتلهه يعني اسيل تصير من نصيبي ... كالت ان شاء الله ...هسه اكوم البس عباتي واطلع بس مثل ما اتفقنه ماشي كلتلهه ماشي كالت خوش عينك على الحجي ومن يريد ينام وديه لغرفته وشيله خليه بالجربايه مو تخليه بالعربانه خوش كلتلهه ماشي صار ..
لبست عبايتهه وطلعت وقفلت الباب اني من كثر ما متلهف اسمع اخبار زينه ما انتبهت لقفلة الباب وضليت كاعد يم الحجي ...
وره ساعه تقريبا وسوالف وي الحجي كمت أألف من كلبي على امريكا شكو شي سامعه عن امريكا سولفته وهو كل شويه يعيد نفس الاسئله وراهه يكول توهه رت روحي من رجعت الي حبيبي وليدي اني مره ابجي مره اضحك حيل انقهرت على حالتهه
وره هاي الساعه سمعت صوت فتح القفل مال الباب وجان تدخل ام ابراهيم اني كمت على حيلي كبل كلتلهه ها بشري ...
كالت اوكف خل أجر نفس تعبت من المشي كلتلهه ميخالف بس اني اريد اسمع الحجي بعد ما عندي صبر
شافت الحجي بعده بالعربانه كالت ليش ما منوم الحجي بفراشه ..
كلتلهه ما كلي اريد انام ..
كالت يحظي ما يكول انت تشيله وتودي بفراشه ..
يله كوم وياي خلي انيمه بفراشه وبعدين احجيلك ..
كمنا ودينا لفراشه ومددنا على جربايته وطلعنه من الغرفه ...كلتلهه يله احجيلي ..
كالت شأحجيلك .. غير وكعت رجليه الا لكيت بيت ام اسيل ..قاطعتهه كلتلهه شفتي اسيل ..
كالت اي شفتهه وحجيت وياهه ..
كلتلهه اي وبعدين .. كالت ام اسيل كلش ندمانه على الي سوته ... وتكول بنتي مو مال زواج هسه ..
كلتلهه يعني شنو ندمانه على شنو
كالت ندمانه انو حجت عليك بالمنطقه وما جان قصدهه تضحك العالم عليك ...
كلتلهه هسه هذا مو مهم العالم تضحك اول وتالي ما تهمني العالم المهم اسيل الي لو لا
كالت اسيل بعده زغيره وما تزوجهه يرادله فد ١٠ سنين بعد
كلتلهه ميخاف انتضر ١٠ سنين بس خل توافق ..
كالت شوف اذا ضليت يمي ازوجكياهه واذا رحت اني معليه شتكول ...
هنا كمت افكر ابقه لو اروح ابقه لو اروح ..
كلتلهه زين اخبار اهلي شنو ..كالت اهلك ..
اهلك كالبين الدنيا عليك ما خلو لا شرطه لا مستشفيات لا جوامع ويدورون عليك ..
يعني ما دليتهم بمكاني؟ كلتلهه ...
كالت لا شلون ادليهم اريدك انت تقرر ترجع لو لا ..
الصراحة عرفت نقطة ضعفي ... اسيل
وكامت تساومني على بقائي يمهم ....
كلت بعقلي خل اروح يم اهلي حتى اصير قريب على اسيل هم اشوفه وهم تشوفني وخلي اليصير يصير حتى لو يصيحولي مخبل .. اقبل
وأخلي امي تحاجيهه لأم اسيل ونخلص من الموضوع واذا ما صرت الشغله صار عندي بيت ثاني بيت أم ابراهيم اي اعيش وياهم وهي تدبرلي الموضوع كله
كلتله لا اروح لبيت اهلي ..
حاولت كل الطرق تبقيني ساعه تكلي الحجي يتخربط ساعه تكلي اخطبلك اسيل ساعه تكلي ادللك
واني ما اقبل كالت خوش انت تندل بيتنه وشوكت ما يعجبك تعال ...
كلتلهه موافق اني مراح اعوفكم ..
كامت فتحتلي الباب وطلعت بس قبل لا اطلع نطتني شحاطه البس لأن حافي اجيتهم وانطتني فلوس حك الكروة مال سيارة توصلني لأهلي ...
طلعت من البيت مشيت للشارع وركبت سيارة راجع لأهلي ...
نزلت براس الشارع جان تشوفني الجهال ونفس الركضه تركض عليه وتصيح مخبل .. مخبل .. اسوله ... اسوله
اني هم ركضة وحده للبيت ..
طبيت تلكوني اهلي يشبكون بيه ويبوسون بيه ..
يكولون هاي وين جنت ضل بالنه عليك ...وبجي وصوت عالي ...
اني ولا كلمه بس ابجي وره شويه واني ولا حجايه كالت امي فوت للحمام اسبح وبعدين نحجي ..
اني هم كبل للحمام ..بدون اي كلمه بس عين على ابويه وعين على امي ..
ما اعرف ليش ... يمكن لأن اعتبرهم هم السبب
هنا احمد صاحلي كل اتأخرنه يله سنان
كلتله يله جايك الساعه صارت فوك الاربعه وهسه اهلي يجوز يردون يرجعون للبيت ..
كلتله لأبو ابراهيم اني رايح ..
كالي وين بعد وكت خل احجيلك ...كلتله لا أتأخرت اروح
كال كلهه عافتني مو بس انته وكام عافني وراح
صراحه كلامه أثر بيه حيل ... انقهرت
مشيت صعدت وي احمد بالدراجه ورجعنه بالطريق كال احمد احجيلي فحجيتله لحد ما وصلنه
دخل الدراجه للبيت لكيت اهلي مستعدين يردون يطلعون ..
كالو همزين ما أتأخرتو انريد نمشي اني ما حجيت شي بس عيوني ادور على طوبه ..
طلعت فوك وي اختي ..
صاحتلهم خاله.. نزلت ركض ما ادري تريد تشوفني لو تريد تودعنه ...
من شفتهه ما ادري شصار بيه ..رجعتلي الحرارة بمعدتي وهم اخذتني العركه وكامت كصتي تصب عرك ..
باوعت عليه وابتسمت بس هالمره مبينه مال وداع
ما ادري شلون اجت يمي وخلت ورقه بجيبي ..
اني خشبت ...وكمت ادعي شوكت نوصل واشوف الورقه شنو بيهه
ما اسولفلكم الطريق كله افكر شنو بيهه الورقه لازمهه بأديه حيل خايف تطير من السيارة او يشوفهه واحد بأيدي وتصير قصه ...
يتبع
حيدر الباني
