مرحبا رجعنا وياكم نكمل
اتمنالكم قراءة سعيدة
حيدر الباني
اشترينا المعجون اني واخوي وهو مستمر بالرزايل الناشفه انواع ما سامعهه قبل ما اسولفلكم عن الراشديات الي اكلتها من اخويه كام يتفنن بيهن الى ان وصلنا البيت ..
كملت امي مسلسل الرزايل بس بنكهه نبع الحنان طبعا طعهما غير شكل
الاكل أتأخر وبعد شوية يرجع ابويه من الشغل واذا لكه الاكل مو جاهز هاي هيه راح يصير كتلي رفس من كل القبائل الي بمنطقتنه والمنطقة الي بصفنه وحتى يمكن يجيبون اقوام مهاجرة هم تشارك بالعملية...
كل هاي الاحداث واني ما ابالي شي غير اعرف قصة ذاك الرجال بحيث اتحمل الكتل كد ما متشوق اعرف بقية القصة ..
ورة نص ساعه رجع ابويه من الشغل والاكل بعده ما جاهز وامي تباوعلي بنظرة غضب عجيبه اول مرة اشوفهه
لان اذا عصب ابويه كل الي بالبيت راح يلوحهم شرار من عصبية ابويه ويبدي بيه اكيد وبعدين يكمل السلسلة وبالاخير يوصل الامي المسكينه الي ما الهه ذنب بس شتسوي
فضولي راح يدمرني ..
بس المفاجأة انو ابوية ما سأل على الاكل كال اكلو انتو اني اكلت بره ...
هو مو كال هيج تكول بشرونه بالعيد قبل موعده
رجع الهدوء النفسي للعائلة واتنفست براحتي بعد ما روحي رادت تطلع من الخوف
ابوية راح نام بغرفته واني واخوتي على السفرة صبتنله امي الغدة وراحت للغرفة ورة ابوية ...
بدينه نتغدة تعالي ماما اتغدي صحنالهه ..
كالت اتغدو انتو هسة اجي اشوف ابوكم خاف رايد شي
على الغدة سألتني اتي الزغيرة عمرهه يطلع بال١٣ سنه
يعني مو طفلة نجحت للثاني متوسط كالت وين جنت بله افندي بأعتبار اني وياهه متقاربين بالعمر ...كلتلهه انجبي ولج لا تدخلين ...
شلون ما ادخل وردنا ننكتل من وراك سنانو ..
رفعت ايدي عليهه جان اخوية الجبير نزلهه وكلي كافي احترم النعمة ..
اني بعد ما حجيت لأن شلون فاصولية جانت مسوية امي تخبل ما تتفوت مو مال واحد يزعل ويعوف الاكل
بس امي ما رجعت اتأخرت جوه يم ابوية
كملت اكلي وكمت غسلت ودخلت لغرفتنه ورة شوية دخلت اختي سهى وكعدت يمي
اكلك سنان عفية احجيلي شبيك صارلك يومين كل ما تطلع تجيب شغلة تتأخر حباب سولفلي اني مو أختك حبيبتك عفية سولفلي
وتعرفون دلع البنات ...اني بالبداية ما جنت رايد احجيلهه بس بعدين كلت احجيلهه حتى من اتأخر مرة ثانية تصير بجانبي يعني تساعديني اذا اشتدت الامور لأن ابوية حيل يحبهه وما يريد يزعلهه..
بديت احجيلهه القصة من البداية وهي تتفاعل وي كل التفاصيل وتعابير وجهه ما اسولفلكم شلون خلتني حتى اني احب قصة الرجال واتشوقلهه اكثر ...بعد ما كملنه السوالف وصار تقريبا العصر جنت اتمنى امنية وحدة بس وهي ان امي تصيحلي علمود اشتري شي
بس اني ادري هذا الشي ميصير وأحتمال كم يوم ما يدزوني على شي بعد الي سويته ..
سمعتهه لماما تصيح على اخوية الجبير تكله تعال جيبنهه غاز خلص الغاز ...
يابه مو سمعته تريد شي تكول سمعت وزعو النتائج واني ناجح ..
رحت ركض لكيتهه واكفة ومتخوصرة والفلوس بأديهه
من وصلت يمهه خزرتني ... خزرة تخوف معناه
ما تروح انت لو تموت
بقت عندي فرصة اخيرة ... انو اتوسل بأخوي أو اقنعه بأي طريقة وأروح بمكانه ..
اشتغل شارلوك هولمز الي بدماغي ادور على حيله اقنعه بيهه .. شنو يا ربي شنوووو
اهااا لكيتهه .. اخويه يحب الفلوس لأن دائما يشتري ملابس وابويه مسويلنه مصرف اسبوعي وهو صارف اسبوعيته كلت اغرره بالفلوس بلكي يقبل..
كتله سمير حبيبي ... كال ها ولك شتريد
كلتله خل أروح بمكانك اجيب غاز ..كال هاااا غاز أشو قبل انكلك تكول اني ما ادبر شغلة الغاز شو فجأة كمت تكدر سنانووو
كلتله عفيه لا تعقدهه ...كال شوف امي متقبل و..
قبل لا يكمل كلامه طلعتله الفلوس هو سكت كال ملعون ...ميخالف بس بشرط كلت شنو الشرط كال اروح وياك حتى أمي متعرف بالموضوع ..
اني رأسا وافقت بس اريد اطلع اروح اشوف الرجال
اخذنه القنينه واطلعنا بس ما خليت امي تشوفني شافت بس سمير يدفع بالقنينة ...
من طلعنه من الباب كال يله ابو السون ادفع ..
كمت ادفع بالقنينة برجلي بس عيني على الشارع يمنه ويسرة ادور عليه ...لحد ما شفته يم ركن مطعم الكباب كاعد ...
هنا كتلة سمير كمل انتة ومن ترجع اني اشوفك واجي عليك ... كال لا عيني نشتري غاز وبعدين ترجع كلتله عفيه حباب جان كال يله ورق لعد جيب المالات طلعت الفلوس ونطيتهيا بس مو كلهن وركضة وحدة رحت يم الرجال..
شافني اركض عليه .. اقتربت لكيته يضحك كلتله شبيك كال الخبلني راح يخبلك ..
كتله فدوة سولفلي بسرعه لا يجي اخويه بهاي اللحظة حسيت روحي شلون المدمن ...
كال زين اني ذاكرتي ضعفت من السنين ذكرني وين وصلنا ..
كلتله عمو انت كلت لأم اسيل اسيل اليه وما تصير الغيري
جان يكول ايبااااااخ اسييييييل اويلي عليج وضرب على فخذه حيل وكام يفرك بيهه ويضرب مرة ثانية وثالثة هسه اني اريد اسمع القصة وهذا شبع رجله كتل يابه دسولف عوف الاكشن
جان يكول ...
ثاني يوم العصر طلعت بالمنطقة واشوف النسوان الي بالشارع والشباب الي بكدي او اكبر مني وحتى الرياجيل يباوعولي ويضحكون ...كلت خير يا ستار شبيه ..معقولة طالع حافي لو مالابس هدوم شنو الموضوع باوعت على روحي ماكو نقص المهم كملت طريقي جنت رايح للعطار اشتري بيبسي لان اشتهيته وصلت لمحل العطار واسمع اثنين نسوان وراية يكولن هو هذا الثانية تكلهه اي هو هذا . شنو الموضوع الحجي يمكن علية لأن بس اني دا اريد ادخل المحل التفتت عليهن جان يديرن وجهن ..
فتت على المحل صاحب المحل يعرفني ابو اسماعيل ابنه وياي بالمدرسة كلي هلو عيني صاير تحب وطكهه بضحكه اني هنا انسطرت دخت طلعت من المحل ركض على البيت وبعد ما طلعت اخذتلي يومين اهلي داخو بيه هذا شبيه ...يسألوني اني ما اجاوب
يتبع ...
حيدر الباني
