هلا بيكم من جديد ...
نكمل قصتنه...
يا عمي هاي الناس هي سبب الي اني بي ...
شلون عمي اني كتله ..
كال يا عمي من جنت بعمر شوية اكبر منك يعني تقريبا بالعشرين وهسة اني عمري بالستين
يعني قبل اربعين سنة ... جنت ساكن الحلة تندلهه مو ؟
كلتله اي عمي بس اني من شدة تركيزي ويا احس ركبتي طولت وصلت يمه لأن يحجي بصوت ناصي دمرني ....
كمل عمي كمل كلتلة..
كال هناك بالحلة جنت عايش وي اهلي وامورنة المادية ماشية يعني الوالد الله يرحمة موظف بالسكك وامي ربة بيت يعني ما تشتغل.... زين
كلتله زين بس اني بذيج اللحظة جنت اتمنى شغلتين
الاولى ان ما يتوقف بس يحجي
والثانية انو الوقت ما يمشي لأن اني طالع اجيب معجون خو ما ناسين
المهم ... كمل الحجي سوالفه وكال يوم من الايام اجت جارتنه ام اسيل ... ام اسيل حيل حلوة بيضة ومربربة
ومن تلبس العباية بالشارع تعوفهه مفتوحة يعني بس خالتهه على راسهه
من تطلع بالمنطقة كل الزلم تباوع وتاخذلهه صفنه والي يمه مرته تجرجرة كوة للبيت او يعوف الشارع
ام اسيل زوجهه موظف همين بس هو فقير نفس يعني بكلامنه لا يحل ولا يربط
ام اسيل من جانت تجي على البيت البيت كله تصير بي طاقة نشاط نكوم كل احنة اني واخوتي نرتب ونعدل ونجيب مي ومهتمين بيهه لان نحس بيهه شلون الاجانب عايشين بحريه
ما كلتلكم اخوتي اكبر مني وما متزوجين بس اني جنت بيناتهم يسموني الفقير لان ما احجي هواية وكتوم حيل حتى من ابجي محد يشوفني ولا يدري بيه
نرجع لأم اسيل ... بعد ما سلمت على امي وشربت مي كالت لامي
* دادا ولدج كبرو دزوجيهم دا نفرح بيهم ونركص شوية واخذتلهه هزه مال جتف ويه الحجي ...*
هنا الرجال جرله حسرة وطلع جكارة وكام يدخن بس من ياخذ النفس احس الدخان يطب للاعماق وما يطلع
اخذله كم نفس ورجع كلي تدري وليدي وره سالفة العرس امي شنو جاوبتهه
شنو عمي سولفلي...
كال اخوتي الي كتلك اكبر مني أثنينهم كيفو على السالفة وكام يهزون ركبة يعني اجتهم على الجرح
امي كالتلهه اوووو خيه وينه وين العرس يمعودة شلج بهالسالفة عوفينه دادا عوفينه ورادت تغير الموضوع
بس اخوية الجبير ما خلاهه تغير الموضوع كاللهه ام اسيل عندج بنية تزوجيني ...
طكتلهه ضحكة عالية وسحبت نفس كوة كالت
لا والله ما عندي وهي تضحك وصوتهه مكطع كالت بس اسولة وهي بصف ثاني ابتدائي والله لو عندي ازفهن الكم تلاثتهن ...
ذيج اللحظة لمعت براسي فكرة بنت ام اسيل يعني هي احله من امهه اكيد لأن اني ما شايفهه ولا مرة لان من امشي بالشارع امشي مدنك مالي شغل بكلشي اروح لمدرستي وارجع
ما ادري ليش ولاول مرة وبدون سابق انذار ومن دون ما اشوفهه تعلقت بيهه ... كمت طلعت من البيت رحت لبيت ام اسيل بس من امشي احس انو اني وحدي بالشارع وامشي بهمه عالية ما بيهه تردد ..
وصلت الباب .. دكيته .. ورة شوية سمعت صوتهه من ورة الباب تصيح منو ... ؟ الصوت طبعا صوت طفله بس اني حسيته موسيقى تخبل عمري ما سامع مثلة حتى بالراديو هي عمرهه تقريبا ٨ سنوات او شوية اكبر
انفتحت الباب طلعتلي بكصايبهه ولابسة تراكسود لونه وردي ... اول مرة بيهه اشوف بنيه لابسة تراكسوت لان عدنه عيب البنية تلبس غير الدشداشة ... ومتروسة شوية وبيضة كطن وجهه ينفط دم كلش حلوة اكثر مما توقعت ..
انصدمت ما عرفت شأحجي وما اعرف شصار بيه اني الفقير المؤدب الي ما عندي هاي السوالف ولا مفكر بيهه لا من قريب ولا من بعيد
المهم .. سألتهه أمي يمكم .. ضحكت .. كال هي امي يمكم شبيك انت هزت اديهه وطبت وسدت الباب
ضليت بالباب شوية ... مثل الصنم ما اعرف شسوي وما اعرف شجاني تبسمرت بالباب ...
شوية ومشيت رجعت للبيت وكبل بوجهي عدل رحت لأم أسيل ...
كلتلها خالة ام أسيل .. كالت ها يمه كول شتريد
كلتلهه بنتج اسيل الي ... طبعا اخوتي وامي كاعدين يمهه بعدهم .. شوية صفنو .. بعدين طكوهه بضحكة كلهم بس الضحك ما بطل شلون واحد حاجي نكته جديدة ما مسموعه قبل والضحك يصعد وينزل وأستمر واني ضليت مثل " الغبي " بيناتهم اباوع بوجوههم بس دمي يغلي واديه صميتهه حيل حتى اصابعي طكطكت
ضربت الباب ضربة قويه وطلعت امشي بره ...
ركض وراية اخويه الجبير وهو يضحك تعال يمعود تعال نتشاقة وياك ..
كلامهم جان شقه واني كلامي جان صح مية بالمية
جرجرني للبيت طبيت شافوني ابتسمو يعني ضحك على خفيف كالتلي ام اسيل تعال يمي تعال نسيبي وجان يضحكون مرة ثانية اني ما همني شي رحت يمهه جرتني من ايدي كعدتني يمهه كالت انت شكد عمرك كلتلهه راح اصير عشرين كالت اي واسوله عمرهه ٩ راح يصير يعني فرق جبير بيناتكم متصيرلك
كمت على حيلي كلتلهه لا تصير وماكو غيري ياخذهه
كالت فديت العصبي ماشي ماشي الك بس شوية ريح نفسك لان شافتني كلش معصب صاحت على اخوي كالت جيبله ماي ليمون خل يريح
كمت مرة ثانية وكلتلهه اسيل اليه واذا تنطيهه لغيري ما يصير خير سمعتي وطلعت ...
مشي بالشارع ورة ساعة تقريبا واني ماكو بعقلي غير شكل اسيل رجعت للبيت لكيتهم داخلين انذار ...
وين جنت يمصخم .. هذا كلام امي ..
اخويه كال رجع العاشق الولهان ..
بعده الرجال يسولف وما احس الا واحد عتني من قميصي حيل وطاخ سمطني راشدي طلع اخوية الجبير كال وين وليت يالاثول وين المعجون امي خبصت الدنيا اليوم تكطعك ...
البارت الرابع ان شاء الله بالعيد
كل عام وانتم بالف خير
حيدر الباني
