مراحب عيوناتي
حيدر الباني
من صارت الغرفه ظلمه وكلشي ما اشوف اجاني الهام الكتابه واجت ابالي هوايه افكار وشلون افكار حلوه
ضليت اردد بيهن حتى ما انسه عادة المولد مال المنطقه عشر دقايق ويشغل اليوم صارت ساعه مو تكول عشر دقايق هسه تجي ماكو .. هسه تجي ماكو وتجرلهه نص ساعه
اخيرا جتي الكهرباء اشتغلت المروحه .. سمير جان عركان ومن ضربه الهوا كعد من شفته تحرك رأسا ضميت الدفتر جوه المخده وسويت روحي نايم ..
باوع عليه وكال سنان .. سنان انت طفيت المروحه
كلتله لا جانت طافيه الكهرباء وهسه اجت ...
كال هااا لعد كوم طفي الضوه خل انام ...
كلتله لا بعدني كاعد اريد اقره شويه ...
جان كلي مو هسه شفتك نايم .. كلتله اي هسه اجاني واهس اقره ...
كال خوش اطلع بالصاله اقره وخليني انام ...
كلتله لا بالصاله ما اريد اقره اقره هنا ...
كال اكلك سنان لا تضوجني طفي الضوه واطلع بره لا اخليك تحلم تلزم كتبي ...
كلتله ماشي راح اطلع .. بكلبي كلت اليوم الظاهر ما راح اكدر اكتب ما جاي تجي عدل
راح اطلع للصاله واشوف شأكدر اسوي ...
طلعت للصاله لكيت مطفين الضوه ..علكته وكعدت حطيت الكتاب اريد اقره .. وره شويه طلعت امي كالت
- ها سنان خير شبيك
- شبيه ماما ماكو شي
-شمكعدك هنا
- مجاي تشوفيني اقره
- اول تالي انت تقره
- اي ماما ما جاني نوم كلت اقره شويه بلكي انعس
- هاااا خوش من تكمل مو تنسى اطفي الضوه اوك
- اوك ماما تدللين
هاي شلون يا ربي .. منين ما اجيبهه سوده مصخمه
انوب طلعتلي امي بعد شويه يطلعلي ابويه وراهه سرور
يمكن اكو سر بالموضوع ...
يمكن اني مو مال هاي السوالفة مال الحب ..
خل اروح انام احسنلي ... وين ليش انام وطوبه شلون بعد اسبوعين تجي واني ما كاتب ....
باجر اكتب خل يصيرون ١٣ شنو المشكله
لا شنو هالحجي هاي من اول شي تنهزم لا سنان اثبت على موقفك واكتب ..
اي والله اكتب وشيصير خل يصير
يا الله
بسم الله الرحمن الرحيم
اليوم وبعد معاناة طويله مسكت القلم لأكتب ما في داخلي وعسى ان أوفق في ما اريد ان اقول ..
قبل زيراتنا لكم كانت في داخلي مشاعر غريبه تجاهك لم اكن اعرف ما هي .. وخشيت ان قلتها لك ستواجهيني بالرفض وقد اخسرك للابد فقررت ان انتظر الوقت المناسب لأقول لكي هذا الكلام
بالاضافة الى علاقة القرابة التي تربطنا كانت هنالك احاسيس في داخلي تزدحم وتتخبط ولا استطيع تفسيرها ولكن بعد ما عرفت منك انك تكنين لي المشاعر اصبح الامر واضحا واصبحت مستعدا لأعترف لكي واكتب ما في داخلي من كلمات
انا الان اراك في كل مكان .. واتمنى ان اكون بقربك لتسمعي دقات قلبي تهتف بأسمك
لكن بعد المسافة يحول بيننا ويمنعنا من ان نكون مع بعض من الممكن ان يكون القدر هو من يتحكم بنا ليصبح الشوق للقياك كبير
ولتقليل المسافة التي بيننا قررت ان اكتب لك كل يوم حتى عندما نلتقي وتأخذين الدفتر نكون قد التقينا طيلة هذه المدة
المخلص لكي سنان
هسه اكدر انام مرتاح .. اكوم اضم الدفتر بكنتوري لا أحد يروح يشوفه وارجع كتاب سمير لمكانه خاف يسويلي مشكله
راح تكولون الكتابه مو مالتك .. الكتابه الي بس كتاب سمير هوايه ساعدني بأختيار الكلمات وهذا الكتاب كمت احبه كلش
صباح الخير .. هاي ماما كالتلي هي بغرفتنا هسه
- صباح النور ماما ها اكو شي
- لا ماكو شي اليوم ما تكعدون ما تتريكون
- اي ماما نتريك ليش لا
- خوش لعد كوم جيبلنه صمون
- اي ماما حاضر بس اغسل
هله هله اليوم اجيب صمون وينك حجي جايك
غسلت ورحت لأمي يله ماما انطيني فلوس
- هاك سنان بس والله اذا أتأخرت اشلع اذاناتك
- لا ماما شبيج اذا اكو سره طويل خو شأسوي
- ما تسوي شي بس لا تروح منا منا
حجتهه بشويه عصبيه بس ميخالف
كلتلهه ميخالف يوم ميخالف
طلعت امشي بسرعه الى ان وصلت الفرن لكيت الحجي كاعد على صفحه حجزت سراي بالصمون ورجعتله كلتلهه ها ابو ابراهيم شلونك
باوعلي من فوك ليجوه كال هله
شفته مثل المامرتاح لجيتي
كلت اذكره وين وصلنه حتى ميتأخر بالكلام طبعا اني كعدت يمه هو يفر بسبحته وباله مو يمي ويدردم بكلام ما فهمته ..
كلتله وصلنه لأهلك همه السبب الي انته بيه
كال
اهلي اي والله اهلي لو خاطبيلياهه لو بس حاجين بموضوعهه ما صار الي صار
ليش هو شصار ...
شصار ...
وره فتره تقريبا ٣ اشهر واني كل ما اطلع بالشارع الناس تتغامز عليه وتكول هذا ابو اسيل ومن هالحجي
قررت اخلي امي تروح لبيت ام اسيل وتحجي وياهه
امي ما قبلت تكول ما عايزين فضايح ..
ليش هو بقه احد ما يعرف وفضيحتنه كل الناس تعرفهه
كالت يمه جوز من هاي السالفه وشوفلك شغله صنعه تستفاد منهه وينه وين هاي السوالف
كلتلهه اذا ما تروحين الهم راح اطلع من البيت وبعد ما ارجع ...
كالت وين تروح
كلتلهه وين ما عند الله كاع
وخليت وطلعت
رحت دكيت الباب على بيت ام اسيل .. كلت احجي وياهم ..
طلعتلي ام اسيل واول ما شافتني كامت تعيط وتصيح الحكوني مخبل يريد يطب البيتي يبوووو
يبوووو
الناس اجت تركض عليه وبالطابوك وبالنعل
اني خليت وانهزمت والعالم تركض ورايه واركض ويركضون ورايه لحد ما تيهتهم بالفروع ..
كلت بعد وين اروح شيرجعني للبيت .. خل اروح يم ام ابراهيم احسلي هي تعرف بقصتي ووعدتني تخطبلياها
