هلا بيكم رجعتلكم
حيدر الباني
وصلنا البيت واني متلهف اشوف الورقه ..
اريد بس اختلي بروحي وأشوفهه اديه عركت كلت خاف الكتابه تنمسح طلعت ايدي والورقه بجيبي ..
وصلنه قريب الساعه خمسه العصر
دخلنه البيت رحت كبل للغرفه اشو كلهه اجتي ورايه كلهم كام يبدلون ملابسهم وأني منتظر يطلعون كالو ها سنان ما تبدل كلتلهم هسه بس اطلعو..
كالو شنو اليوم تستحي متبدل كدامنا ... كلت بكلبي يا استحي خاف ابدل وتوكع الورقه وانفضح واصير مزق .. كلتلهم لا بس شويه ارتاح بعدين ابدل .. شو سمير كام يلح ما ادري شجا .. المهم جرني من تيشيرتي وراد ينزعني .. دفعت ايده وكتله شبيك يا اخي هسه ابدل .. راح اطب التواليت ( عذراً للفظة) بعدين ابدل .. كلت بس هذا المكان الوحيد أمان ...
رحت التواليت لكيته محجوز فكرت كلت اروح للسطح اقراهه شو صارت صعبه الشغله ما ادري ليش زين اذا شافوني صاعد للسطح شراح يكولون واذا سألوني شأجاوب والله حيرة ..
بعدين كلت لا ارجع للغرفه وأشوف بلكي فرغت .. رجعت للغرفه لكيتهه فارغه كلهم مبدلين وطالعين ..
كمت سديت الباب وطلعتهه من جيبي خليتهه بين ملابسي خاف احد يطب عليه فجأه وبالليل من ينامون اقراهه ..
بدلت ملابسي وطلعت كعدت وياهم وبدت السوالف على بيت خالتي والغده وشلون اهتمو بينه من ضمن الحديث حجت ماما على بنت خالتي طوبه ... بس اثناء حجيهه تباوع عليه ما ادري ليش تكول كبرانه ما شاء الله وصايره مره .. اني خجلت وصرت احمر من الخجل ما ادري ليش .. اجت ابالي الورقه .. اني مقرر اخليهه لليل بس هسه صار عندي فضول اشوف الي بيهه ..
ردت اكوم امي سألتني سنان اني جمدت .. جاوبتهه ها ماما .. كالت شو ما حجيت .. كلتلهه على شنو احجي ..كالت على روحتنه تونست لا ...
كلتلهه اي ماما اتونست .. حسيت بيهه تعرف شي حاسه بشي .. ما اعرف بطلت ما كمت كلت هسه منتبهين بعدين عود اقراهه ..جان ماما تكلي وين طلعتو انت واحمد .. كلتلهه مو كنالكم رايحين نلعب طوبه ..
كالت اي بس رجعتو نظيفين يعني ما متربين عادة ترجع مترب من اللعب ... كلتلهه غسلنه هناك بالساحه كالت هااا بس مبين ما مقتنعه بحجيي
بعدين كام تحجي وياي بلهجه اول مره اشوفهه بيهه شويه دلع على ما ادري شنو يعني حركات نسوان كالت بعد ماكو شي منا ...منا ...
سويت نفسي غبي كلش .. كلتلهه يعني شنو ..
كالت ماكو شي ماكو شي .. بكلبي كلت بس لا تعرف انطتني طوبه الورقه ... بس لا صدك .. اويلي عليه
شلون بيه ... كلبي كام يدك ..
وراهه اتغير الموضوع على غير شي اني وراهه اتنفست براحتي وراح الشد الي جنت بيه ..
بس بقيت كاعد اخاف اكوم ويشوفوني كمت اتوقع الكل مراقبني .. شلون بله .. مصيبه واجتني بس يمكن احله مصيبه وبيهه طوبه 🤗
صارت الظروف ملائمه لان سمير طلع بره وأختي صعدت فوك وابويه دخل غرفته .. كلت هسه فرصتي مشيت سريع دخلت الغرفه وسديت الباب بس صوت الباب جان قوي لأن متلهف حيل ..
من صار الصوت قوي .. سديت عيوني ومنتظر صوت امي تصيح ... بس ماكو شي الحمد لله ..
صار هدوء فتحت الكنتور طلعت الورقه بهدوء باوعت ورايه ماكو أحد والباب مسدودة فتحت الورقه واني كوه اتنفس .. تكول كلبي يدك ابلعومي ..
فتحت الورقه على كيفي اخاف تتمزك لان عركانه جانت من ايدي .. هي مكتوبه بقلم جاف واكو مكانات بيهه ممسوحه من عركت ايدي بس اكدر اقراهه .. الورقه مال سجل جبير بس مطبكتهه زغيرة كلش حتى محد ينتبه عليهه
الخط يخبل .. والورقه معطره ما ادري اني اتخيل هذا الشي .. حسيت طوبه كاعده كبالي واشتم عطرهه
من فتحتهه من كثر ما متلهف ومتشوق كمت اباوع الكلمات كلهن سويه ...
الرساله مكتوب بيهه كلام مو مال عمرهه تصورت وحده جبيره بالعمر تكتب ...
بسم الله الرحمن الرحيم
شونك شنان شلون صحتك صح سؤالي غبي صح
بس ردت ابدي الكلام ما اعرف شأكتب
هاذي الورقه الخامسه الي ابدلها شككت هوايه اوراق قبلها راح احجي الي بكلبي وانت بكيفك ترد عليه او ما ترد
من عرفت بيكم جايين لبيتنه كلت احجي وياك اذا صار مجال و اذا ما كدرت راح اكتب ورقه وانطيكياهه اني من كثر ما اهلي يحجون باخلاقك وشلون انت مؤدب كمت احس بشي اتجاهك ما جنت اعرفه ومن قربت جيتكم ويجيبون طاريكم كلبي كام يدك بسرعه ما اعرف ليش حسيتك قريب علي ومواصفاتك هي الي ادور عليهه هسه تكول بعدج زغيرة على هذا الكلام وانت حقك بهذا الشي
بس اني شي بداخلي يجبرني اكتب ما اعرف شنو سنان اريد تجاوبني بصراحه وما تظم عليه اذا عندك شي اتجاهي كوله واذا لا هم كلي وعندي طلب اخير من تخلص قراءة الورقه اتلفها وما اريد اي شخص يعرف بأني كتبتلك حتى اختك ماشي
طوبه (مفاخر )
خلصت قراءة الورقه وآني متفاجئ .. يعني اكو واحد بهاي الدنيا مهتم بيهه ويحبني .. ما معقوله رجعت قريتهه اكثر من مره كمت اتخيل نفسي بالافلام شلون يسوون ويركصون وي الورقه بس كلت خاف واحد يدخل عليه وتنلاص
خل اكوم اتلف الورقه .. بس كلبي ما ينطيني هاي اول رساله احصلهه واريد احتفظ بيهه ذكرى للزمن ..
بس بنفس الوقت اخاف ..كل شي يصير توكع بيد واحد ويقراهه وخاصة انو كنتورنه مشترك وتجي ماما اطلع الملابس للغسل منهن اويلي .. وادور بالجيوب خاف اكو ورقه او فلوس خفت بالزايد ومتردد بين ابقيهه وبين اخليهه .. عشت بعالم ثاني كمت اتخيل شغلات مو على بالي ولا مره مفكر بيهه ..
صراحة الشعور جان حلو ما اكدر أوصفه .. فد شي بيه حلاوه وطعم غريب .. وياهه نفسي اتغير وصرت احس بنفسي خفيف طاير بالهوا ..
بهاي الاثناء واني سارح بأفكاري دخل عليه سمير شافني امدد على فراش وعيني بالسكف ومبتسم ... الموقف جان غريب .
صفن عليه كال ها سنانو شكو ...
عدلت كعدتي كلتله شنو شكو شبيك .. كال لا ماكو شي بس مبين فرحان والدنيا ما شايلتك ..
صدك اني جنت هيج بس خو ما اسولفله غير يفضحني بالبيت ويخليني مسخره الهم ...
كلتله لا بس اجيت امدد لان تعبت من الطلعه وحسيت بفراشي اني ملك ... كال سمير خل يولن ..اكو شي
كلتله بعصبيه وصوت عالي يعني شنو اكو شي يعني هسه أشايفني اركص مثلا انتبهت اني اصيح اويلي بس لا يجي ابويه أو امي ويكولون شكو ...
سكتت وكعدت عاقل سمير من شافني هيج عافني وراح الكنتوره طلع كتاب وكام يقره بي
بعد ما مدد على فراشه اسم الكتاب لفت انتباهي بي كلمة حب بس ما ركزت على باقي العنوان كأنما اني اريد بس هاي الكلمه حتى اعرف الي يصير بيه حسيتهه اشاره اليه
كمت طلعت من الغرفه .. صاير وكت الغروب والدنيا بدت تظلم .. كلت خل اطلع بره احرك الورقه بس شلون آخذ الجداحه من البيت ... امي بالمطبخ وتحتاج الجداحه خاف آخذهه وتحس عليه ...
بعدين قررت اطلع بالباب واشككهه زغار ازغار واخلي الهوا يطيرهه ..اخذت قراري وطلعت .. سألتني ماما وين رايح سنان كلتلهه .. ماما بالباب طالع ..
كالت خوش اخذ الماسحه ونظف باب الحوش .كلت صار ماما .. اني بداخلي كيفت كلت اجاني الفرج ..
طلعت وأخذت الماسحة وأشوف الشارع مليان ناس والجهال مال المنطقه بالشارع خفت اطلع الورقه كلت خاف واحد يجمع الصاكيص ويعرف ..
كلت اكمل تنظيف ومن يصير الشارع فارغ اشككهه واطيرهن بالهوا
من صار الوقت المناسب طلعتهه وشككتهه كلش ناعم
باوعت ماكو احد وجان اشمرهن حيل بالهوا ..
بهاي الاثناء .. طلعت امي بالطارمه وشافتني اشمر الاوراق كالت شنو هاي سنان .. اني اصفريت
بعدين نكمل
يتبع ...
حيدر الباني
