بعد انتهى العرس وقضبت ايام حلوة في الجزيرة رجعت اخيرا البيت😴😴بس كان لازم اقعد مع ناس عمي على 😪😴. عشان ناس امي للان ماجو. وقاعدين ليهم كم يوم كدا، وانا عشان الجامعة جيت راجعة. خالو فارس أجر لي تكسي وصلني لحدي البيت بعد ما ودعتهم، وصلت ناس عمو قريب للمغرب كدا😪💔، دقييت الباب عمو فتح لي،. ورحب بي، وقال لي ادخلي، عايز يشيل مني الشنطة حلفت قلت ليهو ماتقيلة يدخلها براي☹️💔، مشيت سلمت ع مرت عمي، وسألت من العروس كانت في الغرفة جوة. كنت زعلانه شديد، بس بعددا ماعايزة أظهر ليهم حاجة، ادوني موية شربت ومشيت دخلت شنطي في الغرفة الحأقعد فيها طول ايام قعادي معاهم. جيت طالعة، سألت مرت عمي لو كان سامر في الغرفة ماف عشان امشي اسسلم ع العروس😪💔، قالت لي هو طلع قبل ماتجي بي حبة، مشيت خبطت ع الباب فتحت لي، وسلمت على، 😢💔، قالت لي ادخلي، دخلت. وقعدت اتونس معاها، قدمت لي حلاوة، وانا اشيل واتأمل في الغرفة كانت حلوة شديد، وقعد اقول أسى كان ممكن تكون الغرفة دي حقتي ويكون سامر بتاعي😭💔. في الأثناء ديك الباب فتح، قمت مخلوعة، كان دا سامر، شافني، وطلع برهه، اظنو ماعرف انو دي انا، لما مرتو قالت ليهو دي رهف ياسامر تعال داخل. بالفعل جا، سلم على، وبارك ليهو ماقدرت اعاين في عيونو، سلمت عليهو وطلعت طوالي😪💔، قدر ماقال لي اقعدي رفضت. ماشة ع غرفتي مرت عمي قالت لي جهزت ليك الغدا، اعتذرت ليها اني ماأقدر اكل أسى، باخد لي نومة، وحأجي اكل بعدين. مشيت غرفتي قفلت الباب على، وأعاين في يدي السلمت بيها ع سامر حضنت يدي، ونمت 😴😴 وكنت قعدة ابكي دموعي ما جفو. بعد العشا طالعة من غرفتي، لقيت سامر بره ماشي على الحمام، وبس شفتو عاينت ليهو، وهو زاتو قعد يعاين لي، رجعت غرفتي وقفلت الباب على. كنت مستغربة من طريقة سامر معاي، ومن سلامو لي، واسي نظراتو الغريبة، بالجد ظني كان في محلو، وهو ما وفي لي بي وعدو😭💔مع انو قال لي، حتى لو عرست مستحيل اتغير عنك بعد العرسسس، بس هو أسى اتغير وتغير شديد كمان. مفروض كنت أتوقع التغيير دا منو ف اي لحظة، لانو هو بعددا عندو اهتمامات غيري. وحتكون عندو مشاغل مافاضي لي بعددا😪💔وفوق دا كلو، من ما سافر ماكلف نقسسو عشان يضرب لي💔. بقيت واقفة وراء الباب، ماطلعت الاسمعت باب غرفتو بقفل، عرفت انو خلاص دخل الغرفة، مشيت سرعة استحميت، واتوضيت صليت العشا، وكنت لابسة توبي مامصلتو خالص. جيت لقيت مرت عمي جهزت العشا، ما بديت اكل، قالت لي اكلي، لانو سامر حيتعشي مع مرتو برهه، ماحياكلو معانا، ونحنا قاعدين ناكل، جا هو ومرتو وكانو قاشرين، وطالعين يتعشو برهه. قعدت اعاين فيهم لحدي ماطلعو، ومرت عمي مالاحظت لي، بعد اتعشبنا لميت العدهه ومشيت غسلتها، وعملت الشاي💔😴. جيت قعدت مع مرت عمي نتونس، وقعدت احكي ليها عن عرس فارس بي تفاصيلو المملة، في الأثناء دي تلفوني ضرب، لقيتو دا فارس سألني وصلت كيف، طمنتو على، وبعدها ضربت لي ناس امي وسلمت عليهم، جيت راجعة اكمل باقي ونستي مع مرت عمو😴😴كانت مستمتعه شديد، بي ونستي معاها، ماكان عندها بنات ولا اولاد، ياهو سامر دا ولدها الوحيييد😪😪. بعد شوية كدا سامر ومرتو جو داخلين، جا سلم ع امو وبعدها دخل غرفتو، طفا النور ونام💔😴😴، انا زاتي كانت الساعة إسب 12 كدا، وكنت نعسانه شديد، مشيت عايزة أنوم، ختيت راسي في المخدة، وشريط زكرياتي مع ساَمر كلو بمر قدام عيوني، وونستو الزمان معاي 😭😭💔وكيف كنت بكون متششوقة عشان مكالمة الساعة 9. كنت بأجل اي حاجة عشان بسس اسمع صوتو، واسي دا كلو ماف، كنت بتهرب من اي علاقة، في سيَبيل اني اظفر بي سامر، وضحيت عشان يكون معاي، بس كلو مانفع واسي هو اتزوج😪💔😭. كنت انطوائية ماعندي أصحاب كتيرين بس سندس، وكنت مكتفية بي سامر ومدياهو أكبر جزو في حياتي، وزواجو دا خرب لي حياتي ونهى لي حاجة كنت بخطط ليها💔😭😪. الصباح مشيت الكلية، ولاقيت سندس عادي سلمت علي😴😴ماكان في مواضيع في الكلية غير المحاضرات بعد خلصنا، قعدنا في المقصف، كنت عايزة افرق حبببة، وماعايزة امششي البيت. أثناء ماانحنا قاعدين سندس تلفونها ضرب مشت ترد وانا منتظراها، جا أيمن قعد معاي، سلم على سلمت علييهو عادي😴😴. قعد يسأل فيني لشنو ماجيتي قعدتي معانا، اتجاهلتو وقلت ليهو ماعشان شي بس ناس عمو ع قريبين لي بيتنا، بالفعل عمو على كانو جيرانا بالحيطة اما ناس أيمن بعدينا بي كم بيت💔😴. كان بحاول يفتح معاي مواضيع، بس انا كنت بختصرو واحاول اتجاهلو😪💔، لما اتغلظ مني، وضرب لي الطربيزة كل الكانو في المقصف قامو مخلوعين، بس ماف زول سألو كلهم كانو بخافو منو😪💔. قعد يتنرفز فيني، انا ماسكتت ليهو وصوتي على، كنت ناوية اشاكلو، رفع يدو وعايز يديني كف، قدام كل الناس ديل اديتو كف 😴😭، انا زاتي ماعارفة نفسسسسي عملتها كيف، بقيت بعاين في يدي منططة عيوني ومستغربة. كان حيجي يضربني، بس الاولاد جو مسكو، وسندس جات جرتني وشغال تقول لي انتي مجنونة يابنت ☹️💔دا شنو العملتيهوا دا. كنت ببكي وبقول ليها ماكنت عايزة اديهو كف، براهو خلاني اضطره اعمل كدا، أيمن والأولاد بحجزو فيهو كان بمسح في إثر الكف، ويقول لي والله حتندمي، بس اصبر لي 😠. كنت متجاهلة كلامو، وبقيت مستغربة في الجراءة الخلتني أمد يدي عليهو، كل الناس ف المقصف كانو بتفرجو فينا، ماقدرت اقعد تاني شلت شنطي وطلعت. سندس كانت لاحقني، بس ماأنتطرتها سقت عربيتي ومشيت☹️😭💔، كنت ببكي وسايقة عربيتي ماعارفة انا زاتي ماشة ع وين وكانت الوقت عصرية كدا😭💔. مشيت شارع النيل نزلت من العربية وقعدت حبة كدا، افكر في تصرفي القبيل وهل كان صاح ولاخطأ😭💔بس مهما كان انا ماكان اديهو كف كدا قدام الناس وهم كلهم بعاينو لينا. انا غلطت غلطت شديد بي عملتي دي، كنت خايفة شديد، وبفكر ياربي أيمن حيعمل لي شنو😭💔بعد الإهانة القدمتها ليهو قدام الناس كلها اكيد ماحيخليني ف حالي. بقيت قاعدة ف شارع النيل لحدي بعد المغرب😴💔، سندس تشيل واضرب، اتجاهلتها، وماكنت عايزة اتكلم مع زووول😴💔، طلعت سماعتي وبقيت بسمع ف الاغاني وسرحانة لحدي ماانتبهت للساعة لقيتا8 مساء. الوقت اتأخر شديد، أسى يكون ناس البيت مقلقين على، سقت عربيتي بي أقصى سرعة عشان اصل البيت، كنت طول الطريق، بفكر ياربي يكون أيمن كلم زول بالكف، وامشي القى سامر يقوم يرجعو لي، لانو المرة الفاتت حزرني من الحاجة دي. بقييت خاتة يدي ع قلبي، وخايفة😭💔، بعد ساعة كدا ومع زحمة الشارع اخير وصلت البيت، بس دخلت البيت كان صاني شديد، ومعظم الأنوار مطفية ما من عادتهم ناس عمي يطفو الأنوار من بدري كدا. ووفوق دا كلو الشغالة للان مازالت قاعدة، زمان كان حدها العصرية وتمشي بيتا، واسي هي للان قاعدة، والبيت مختلف ومنطرو قريب كدا💔😴. مشيت عليها سألتها وانا متأكدة انو في حاجة حصلت ☹️😴طلع زي ما كنت متوقعة، عمو على جاتو صدمة سكري ودوهو المستشفى، مادخلت غرفتي بي دربي داك، مشيت المستشفى، لقيتهم كلهم قاعدين برهه وظاهر عليهم زعلانين شديد، كان سامر ومرتو😴وأمو ومعاهم أيمن وابوهو. سألتهم من حالتو وروني انو لسسسة ف العناية، قعدت معاهم فترة طويلة ولسة ما طلعو من العناية، وأيمن يشيل ويعاين لي، مرت عمي قالت لي خلاص ياايمن انت سوق رهف وصلا وامشو البيت💔. دي اخر حاجة كنت حأفكر فيها انو أيمن يوصلني كنت خايفة شديد منو، واصريت اني اقعد معاهم لحدي مااعمو يبقى كويس. قعدت معاهم ومنتظرين عمو يفوق من الغيبوبة، وكنت نعسانه شديد، بحاول اطير ف النعاس عشان مااضطر ارجع البيت، الوقت اتأخر شديد، وانا كنت مصرة ماامشي البيت. ناس امي في ليلهم داك عرفو انو عمو تعب وودو المستشفى 💔☹️ضربو ف الليل يسألو عنو وامي كانت متابعة معاي بالتلفون، الوقت اتأخر الساعة بقت واحدة عديل، بقيت ماقادرة اقاوم النعاس، عيني غلبتني ونتَمت 💔☹️. صحيت الصبح ع صوت مرت عمي وكانت بتكورك بأعلى صوتها، صحيت مخلوعة وخاتة يدي ع قلبي، 💔☹️جريت عليها وكانت بتقول علي😭😭خليتني لي منو هان عليك تموووت قبلي😪💔💔😭. 😭😭، بقيت قاعدة ابكي واصببر فيها، ومرت سامر، سامر ومعاهو عمي جو جارييييين 💔😭من برهه كانو في صلاة الصبح، بس سامر سمع امو بتبكي من الصدمة خت يديهو في راسسسو، وقعد ف الارض، يضرب في الأرض بي يدو ويشيل ويبكي وعمو معاهو يشيل ويصبر فيهو.وهو زاتو كان زعلان ع فقد اخو😭😭💔💔بسس ف النهاية لازم يكون فيهم واحد قوي😭💔ومرتت عمي مابطلت بكا لحدي ما أعمى عليها.كلهم كانو شغالين يبكو ا وسامر يبكي وهو ماواعي💔😭جربت احساس دا لما اتوفى ابوي، وكان نفسي الشي، جابو لينا الخبر، اليوم داك كنت جاية من المدرسة، بعد نزلت من الترحيل، دخلت البيت لقيت ناس كتيرة.وبقيت بعاين فيهم خالص مابكيت، ومشيت افتش لي امي، واكورك ليها، خالتو جات مسكتني، عشان ماادخل لي امي😭💔بس كنت حاسسسة انو ابوي اتوفى، دخلت على امي، ولقيتا لابسه توب ابيض، ودموعا اصلا ماجفتتتت. بقيييت ابكي وابكي، لحدي ماحسسييت دموعي خلاص جفو، 😭💔وماكنت واعية بالحاجة الانا بعمل فيها. وفاة ابوي عملت لي صدمة عديت زمن عشان قدرت اتجاوزتها💔😭، وسامر كان بحب ابوهو شديد ومتعلق ببهو😭ماظن وفاتو تمر ساي من غير ما تأثر على نفسياتو بس ان شاءالله مايحصل ليهو شي. 😭😴، كل الأجواء كانت حزينههه وانا كنت قاعدة ابكي، مرة على عمو، ومرة ع ابوي، ومرات اتذكر كمان حظي مع سامر. طلعنا من المستشفى، بعد عملو شهادة الوفاة، وشالو الجثمان في عربية الإسعاف، سامر حيلو ماكان شايلو يمشي ويقع، لي درجة انو عمو بقى تاكلو. ومرت عمي كمان حالتها كانت صعبة، تاكلنها انا ومرت سامر😭😴☹️، انا حاولت ابقى طبيعية، لاني لو قعدت قلبت الأحزان حأتذكر ابوي تاني، ولي بكرهه ماحأسكت، 😭. وصلنا البيت، وكل الاهل عرفو بي وفاة عمو، البيت كلو كان ملان ناسسس، وشغالين يبكو، كنت عادية، بسس وصلت البيت، والناس متجمعة، ذكروني وفاة ابوي..
يتبع...
