الفصل الأول
___________'
الساعة ٧ الصبح..صحيت بملل..نبطشيتي بليل للأسف..النهاردة الخميس..حبيت أعمل حاجة مختلفة فأصحي إخواتي..!..وكالعادة ماما أول المستيقظين لما قلتلها إني هصحي أخواتي ملقتش غير علامات االمفاجأةوالصدمة ظاهرة بوضوح علي ملامحها..تجاهلت الريأكشن بتاعها وبدأت بالصغير..اصغر حد فينا أحمد اخويا ثانوية عامة السنة دي..دخلت بهدوء لقيته نايم ومسترخي جدا..بدأت أصحيه بهمهة بسيطة: أحمد..أحمد
همهم من غير شعور:امم
فرح: أحمد...يابني..اصحي..
نغزته في كتفه بإيدي..والإجابة كانت عدم الرد..شخطت فيه بصوت عالي..:
ولاااا ولاااا.. احمددد
انتفض من سريره بفزع وملامح الغضب باينة بوضوح عليه..صرخ فيا:
_يخربيت احمد وسنينه... عايزة من امي ايه...ايه حرام أنا مبصحاش دلوقتي.
للحظة تراجعت..حاولت اختراق أي كذبة تصحيه..نغزته تاني وبصوت عالي قلتله:
وراك درس يلا.. يلا بسرعة امك بعتتلي اصحيك
خرج من تحت البطانيه.. بص ليا بإستنكار.. عدها رجع تاني للسرير وغطي جسمه بلامبالاة لكلامي..اتكلم من تحت البطانيه:
ماشي.. ماشي.. قوليلها حضروا الفطار بس
مسحت علي وشي بعنف:
يبني اصحي بالادب.. أمك مش هتسمي عليك.. يخربيتك ردد!
مردش عليا ..وسابني...اتنهدت بغضب وسبته وخرجت..اول محاولة فشلت!..اتجهت للأوضة المجاورة ودخلت بهدوء..هنا الوسطانية في رابعة هندسة جامعة طنطا...أختي اللي مش علي وفاق نهائي معايا..كنت هتكلم بهدوء..بس الطريقة دي فشلت مع هنا..فبدات بالخطوة اللي بعدها..صرخت فيها بعلو صوتي..: هنا...هناااااا..أصحييي..وراكي جااامعة
شالت البطانية اللي كانت مدفونة تحتها.. وبصت ليا بتحاول تستوعب وشعرها كنت ببص ليه لأنه محور اهتمامي انه ازاي بيبقي شائك كدا.. أو بالهيئة دي
انتفضت من تفكيري علي صراخها: حسبي الله عليكي.. يابنتي انا اختك مش كفار اسرائيل.. انا بنوته.. يعني اتعامل برقة..دا صحيان دا..نبرتها رقت..بعدها ارتفعت والغضب محتلها:
..كأني في الجيش مش في بيتنا!
رددت بهدوء مخالف لنبرتي أول مادخلت:
أنا غلطانة اني بحاول أصحيكي بدري عشان الكلية
زعقت في وشي بكل زهف: فرح ابعدي عن امي، اقسم بالله افتح تربة وادفن نفسي فيها حية..انا بقلك اهوه مش انتي وامك عليا!..هي الساعة كام أصلا؟
فرح: حوالي سابعة..سابعة وربع
حركت ايديها كأنها هتعمل حاجة..عضت علي شفايفها بغضب..ومسحت علي وشها
_ اه ووأنتي جاية تصحيني دلوقتي.. يلا بقي من هنا..سيبيني انام ممكن لو سمحت..
واتغطت هيا كمان،طلعت بره في الصالة..اه نسيت اعرفكم انا فرح 28 سنة ..خريجة طب جراحة..قضيت سبع سنين من عمري طب..يعني دراسة..انا اي حاجة بره الدراسة مفهمش فيها أو مع الأصح محاولتش أجمعمعلوماتعن حاجة غيرمجالي ودي حاجة متقللش مني نهائي ..يمكن بعوض نقصي بيها..كتبي كانت حياتي بالفعل..ماما وبابا...خلصت جامعةولقيت شغل بس في الجامعة..اصلي من اوائل الدفعة اتعينت..بس مكتفتش بدا عملت ماجستير وكمان دكتوراة في وقت قياسي بعدها اتعينت في مستشفي عسكري فسيبت الجامعة لأني مليش في التدريس..المفروض اني كنت أترقي وكدا بس الروتين وعمايله ...مليش صحاب نهائي بس أنا مش نكدية ولا هادية أوفر بس كل طاقتي كنت بستنفذها في الكتب لأني بحب القراءة جدا ..إخواتي أحمد و هنا..بعدما خلصت الدكتوراة والماجستير حسيت فجأة إن الدنيا وقفت من حواليا..فجأة لقيت عيدميلادي اللي فكرني بيه أهلي وان مكتوب علي تورتةالعيدميلاد 28 ..ياه أنا فجأة بقيت 28 طب ازاي أنا فاكرة إن حياتي الطبيعية وقفت من وقتما كنت في إعدادية يمكن كنت مستمتعةشوية..كان عندي وقتها 15 سنة يعني 13 سنة من حياتي راحو كدا...مش هقول هباءا بس أنامستمتعش بشبابي..كل حاجة..كل وجع...بدأت أحس بيه من يوم عيدميلادي التمانية وعشرين....
يوم عيدميلادي..اتفاجئت بصحاب ليا موجودين وبيباركولي عالدكتوراة... كانت علاقتي بيهم شبه منقطعة.. كانو موجودين...بس متغيرين جدا..جدا جدا...حسيت إني ضعيفة مش قوية نهائي خصوصا ان رؤيتهم جددت فيا رغبات ومشاعر مختلفة...بصيت لهم
أولهم هند كانت فرفوشة الشلة بالأحري..مش عارفةاقولها ازاي بس كانت متدلعة أوي.. لبس قصير ومحزق وخصلتين مصبوغين مش بيتغطو بطرحتها أبدا...أنآ فاكرة كويس إني حضرت خطوبتها..هتستغربو لو قلتلكم انها كانت بتحكيلنا عن خطيبها واحنا في اعدادية كان إسمه محمد باين..هند أصغر مني بسنة بس دخلت المدرسة بدري عن سنها...أول واحدة تتخطب وأول واحدة تتجوز وتخلف في الشلة...لقيتها معاه ولدين حوالي من تقديري ٥ سنين وبنت صغننة علي إيديها... بس مش هي هند دي واحدة شبهها..دي حجابها ملفوف بإهمال ولبسها طول أو بقي فضفاض ممكن..و مكياجها يكاد يكون معدوم بالنسبة لهند اللي أعرفها
ثانيهم كانت رؤية...رؤية بنت هاديةجدا وملتزمةلأبعدحد او هي نشأت في عيلةكدا..جميلةبس بهدوءمش عارفةافهمكم ازاي بس هي جميلة بخمارها جدا..لقيتها مش معاها اولاد! هل ممكن ما أنجبتش؟؟ الله أعلم..رؤيةكانت سبب قوي في التزامي أنا محجبة بطرحة بس شعري او جيب هدومي او رقبتي بيبقي متغطي ..والجيب دا فتحة الصدر من الهدوم..بحس براحة جدا وانا لابسة كدا..بلبس بناطيل ومليش علاقة بالجيب بس بلوزاتي بتبقي طويلة قبل الركبة بشوية كدا...
واخرهم سهيلة...سهيلة دي أنا دايما كنت معجبة بتصرفاتها وبالمناسبة هي اللي حببتني القراءة...هادية جدا اوقات وشعنونة اوقات..باردة من ناحية أي محاولة استفزاز من اي كائن...
يو عيد ميلادي اتفاجئت بمنقبة جاية تحضني..حضنتني بحب او انا حسيت كدا
رؤية: كل سنه وانتي طيبة وبخير يافروح
فرح: وا.انتي طيبة..بس أسفة لو معرفكيش
كنت واقفة وقتها في زاوية لاني مكنتش عارفة اندمج...ايه الناس دي حسه كأني من كوكب تاني..
لقيتها رفعت نقابها بخفة وبعدين غطت وشها بيه تاني..من ملامحها أنا عارفاها بس
رؤية ضحكت برقة وخفة دم: شكلك معرفتنيش..أنا ياستي رؤية..رؤية إبراهيم
لقتني اتبسط فجأةوبكرر الكلمة تاني: رؤية..رؤية؟؟
رؤية: اه رؤية..ايه رأيك اتغيرت صح
فرح: اتغيرتي..اتغيرتي جدا..أنتي ازاي كدا
رؤية مسكت طرف فستانها : طب للحلو ولا الوحش
ضحكت: حلو جدا..أنتي مشفتيش نفسك في المراية
رؤية ضحكت: ربنا يجبر خاطرك زي ما أنتي جابرة خاطري كدا
اتكلمت بانبهار لأن شكلهم اختلف جدا..أكيد هيختلف بس ماكنتش متوقعة كدا!..: لاء بس عدي وقت كتيير..من أخر مرة شفتكم فيها
رؤية: فعلا تعالي اوريكي باقي الشلة..
فرح: استني بس هو أنتم عرفتو ازاي..عيد ميلادي وكدا
اتكلمت بحماس : بص يا ستي احنا حبينا نرجع بعض فعملنا جروب وكدا وبدنا واحدة واحدة نرجع مع بعض زي زمان..في البعض سافر مع اجوزاتهم واللي اشتغلو واللي نقلو..واللي معندهوش نت..وبما اننا كنا شلة اساسية مع بعض فاوليتنا كانت لبعض وكدا..وعرفنا عيد ميلادك والحفلة كدا عن طريق سهيلة...اتواصلت مع أختك وعرفنا وكدا...وحشتيني اوييي
ابتسمت ليها : وأنتم والله..تصدقي يا رؤرؤ معرفتش أعمل صداقات بعدكم!
رؤية: طبعا يا بنتي..احنا استثنائيين..استني هنادلهم
شاورتلهم...لقيت واحدة جاية علينا لبسة لبس قريب من البس الفورمال اويي..أو حاجة زي كدا بس من غير حجاب عرفت انها سهيلة...بسيطة وجميلة
سهيلةة بمرح: كل سنة وانتي طيبة يا فرحتنا
ابتسمت ابتسامة حب ليها..كل واحدة فيهم كنت بلجألها في حاجة معينة..٣ شخصيات مختلفة في كل حاجة بس يدخلو القلب..
دمعت وعينيا لمعت : أنا..أنا مبسوطة أوي إن أنتم موجودين
حضنتني رؤي من جمبي..مسحت دموعي بطرف كمي
قربت هند وطفلين ماسكين طرف فستانها بيهزوه وشايلة طفلة علي إيديها بتعيط
هند: يوووه..اخرسو بقي زهقتوني
شدها الولد اللي علي اليمين تاني..بكل قوة ضربته بالقلم
وسىرخت بنبرة مكتومه: اخرس خالص
الولد بصلها ودموعه بتجاهد..ضربها علي رجلها وجري ولحقه التاني اعتقد توءمه
هند وهي بتنهج وبتجاهد تظهر ابتسامة: كل سنة وأنتي طيبه يا فروح
فرح بإبتسامة تلطف الجو: وأنتي طيبة يا هند
شاورت لبنتها في دعوةإني أشيلها ادتهالي..بنوتة كانت جميلة أويي لكن فيه جرح جذبني علي طول دراعها ظهر لما شيلتها وكمها اترفع
قلت ممكن تكون البنت اتخبطت في حاجة أو وقعت مثلا
فرح بإبتسامة: اسمهاايهالقطة
هند ووشهاللأرض: عنايات
اتصدمت صراحة ان البنت اسمها كدا ازاي دا..لاحظت ملامح الدهشة عليا
ردت بتوتر وبتحاول ترسم ابتسامة: علي علي..اا سم جدتها
معلقتش بس البنوته كانت تعبانه جدا
فرح: بس ايه القمر دا يا هند البت قشطة خالص..بوست البنت...مهلبية يا ناس..لاعبت البنت وبدأت تستجيب وتضحك
هند ملامحها ابتدت تهلل وتشرق: من زوقك..يافروح احلي حاجة ان نايا حبتك بسرعة
بوست البنوتة العسل المقلبظة دي الامورة دي..هو أنا قلتلكم اني بحب الكائنات الصغننة دي...طب بحبهم اووي
فرح: أحلي نايا في الدنيا يا ناس
بصيت لرؤية وسهيلة: وأنتم فين عيالكم مش شايفاهم..عايزة عيال حواليا انا
رؤية ضحكت: يعني أجيبهم في عيد ميلاد وناس دول كان زمانهم فضحوني
فرح كشرت: ليه كدا طب ودتيهم فين
رؤية: وديتهم عند ماما سلوي
فرح: سلوي..يابنتي انتي مش امك اسمها مني
رؤية: لاء دي والدة ياسر جوزي
فرح: علي العموم ربنا يباركلك فيهم..بس لازم أشوفهم هاه تمام
رؤية: تمام
بصيت لسهيلة اللي كانت بتتكلم في الفون: وانتي فين عيالك
سهيلة : معنديش
استغربت يمكن مثلا عندها مشاكل: أسفة والله يا سهيلة مش قصدي انا بس..
سهيلة: يابنتي ليه كل دا متخافيش أنا مش زعلانة بس الحكاية وما فيها .. انا و يس اتفقنا علي الخلفة لكن مش دلوقتي عشان سفره وعشان شغلي كمان
رؤية حضنتني تاني: المهم احنا مع بعضينا ولا ايه..أنا بجد مبسوطالك انك دخلتي طب وكمان خلصتي ماجيستير ودكتوراة...لاء برافو
