الفصل الثاني
بابا: في عريس متقدملك
كنت باكل واللقمة وقفت في حلقي: ايه..عريس أنا مش عاوزة اتجوز حاليا..نهائي
بابا: ودا ازاي..انا حددت معاه الرؤية يوم الخميس والخطوبه بعد اسبوعين
فرح: بابا.. ازاي تقرر عني دي حياتي أنا يا بابا
بابا: أنا قلت اللي عندي...وهتتجوزيه غصبن عنك ورجلك فوق دماغك!
فرح بصدمة: دا ازاي دا..بابا أنا مش عاوزة اتجوز...دا جواز ماهواش كلية هترغمني عليها...دا شخص هعيش معاه الباقي من عمري
بابا: أنتي بتردي عليا..عاوزة تكسري كلمتي..دا أصله ايه دا..أنا قلت هتتجوزيه يعني هتتجوزيه..الشاب كويس ومفهوش غلطة..ولا أنتي عايزة تكسري كلمتي يا دكتورة
فرح: يا بابا ا
بابا: ولا كلمة أنا قلت اللي عندي ويلا علي شغلك
مشي وسابني ايه دا أنا عايزة أعيط بجد الإجبار وحش أوي..لاء وحش جدا...ياريته طقم ولا خروجة بيجبرني عليها لاء دا جواز..جوازه..يعني شخص هعيش حياتي معاه..هنعيش باقي عمرنا قريبين من بعض..الجواز تبادل مشاعر وسكينة..ازاي عايزني اتجوز شخص أنا مجبورة عليه..ازاي شخص المفروض هنحلي حياتنا مع بعض يبقي اول لحظة بكي وقهرة..أنا سكت اني ابعد عن صحابي..اني ادخل كلية مش عاوزاها..واشتغل بردو تحت معرفته..لكن جواز لاء والف لاء..قبل كدا كنت ببره..لكن موضوع زي دا مفيهوش بر..دا ممكن يدمر حياتي..!
دخلت الحمام غسلت وشي وبصيت لنفسي في المراية: بنت ببشرة خمرية.. عيون بلون القهوة مش طويلة ولا قصيرة..جسم لا كيرفي ولا مليان...دكتورة جراحة بحب القراءة..حصلت علي ماجيستير ودكتورتة في مجال الجراحة ...بشتغل وباخد مرتب كويس...عملت حساب في البنك وبحط فيه مرتبي..لان بطبيعتي مش بصرف او بخرج...يعني أقدر أعتمد علي نفسي مش هحتاجلهم بعد كدا..بس بس...عيطت تاني ودموعي غرقتني..دموعي مش بتبطل تقف ..دول أهلي يعني عمري كامل..بس هل معني انهم أهلي انهم يتحكموا فيا بالشكل دا...انهم يجبروني علي شخص معرفهوش حتي..
غسلت وشي للمرة اللي حتي مش عارفه عددها..انا مبقتش عارفة حاجة خالص... خدت شنطتي ولبست كوتشيّ..وركبت تاكسي للمستشفي...
مستشفي عسكري...
دخلت غرفة التبديل..قلعت الجاكيت التقيل اللي كنت لبساه وفضلت ببلوزة تقيلة مع بلطو الشغل..البلطو الأبيض..ابتسمت بسخرية..البلطو الأبيض..أنا بكره وظيفتي لأني أجبرت عليها برضو...
خرجت ورحت العيادة..مليش أي أصدقاء في شغلي نهائي..
لسه هبدأ بأول حالة لقيت اتنين داخلين عليا وفي ايديهم علبة شوكولا
ابتسمتلهم..عرفتهم فاطمة وهادي..اشهر كابلز في المستشفي...فاطمة ممرضة تحت ايدي بينما هادي دكتور
فاطمة: اسفة والله يادكتورة علي التأخير..بس بصي الأول حلي بوقك
فرح: الف مبروك بس لايه
هادي حاوط فاطمة بايده: انا وبطتي كتبنا كتابنا امبارح
فرح: الف مبروك والله فرحتوني حلو ان الواحد يبدأ يومه بخبر حلو زي دا
فاطمة: ربما يبارك فيكي..عقبالك معلش المره دي عملناها علي الضيق...في الليلة الكبيرة هتكوني اول المعزومين
فرح: أكيد هكون اول واحده..مبروك يا بطة مبروك يا دكتور
هادي: الله يبارك فيكي ... معلش بقي هاخد بطة منك النهاردة لسه المستشفي كبيرة..
فرح: دا أنا اللي كنت هقولك خدها..ووقت ماترجعها رجعها مش مشكله
بطة: ربنا يجبر بخاطرك يا أختي...اصله كان هيتحجج عشان ميخرجنيش ملكش حجة اهوه
هادي: انتي طيبة ليه كدا..انتي مش عارفة انا هيحصل فيا ايه..بس اقلك ايه الااهي يرزقك عريس..لاء عريس يدفعك اجرة التاكسي عشان تحسي بيا يا بعيدة
فرح ضحكت من قلبها: لاء حرام الا كدا..خلاص..بطة يلا حضري نفسك عندنا شغل
هادي: انتي كدا طينتيها اكتر اشد في شعري
بطة: أنا ماليش دعوة كدا كدا هتخرجنييا سكر انت
هادي: شفتي حسبي الله عليكي يا بعيدة..يلا نبدأ اليوم من أوله
بطة: سلام يا دكتورة
