الفصل الخامس والعشرون
___________________
ابتسمت باستغراب: اتفضلي
رؤية: محتاجة منك حاجة شبه حياة.أو موت
فرح: اتفضلي اطلبي..لو أقدر أساعدك هساعدك من غير كلام أكيد!
رؤية: بنت هند نايا
ابتسمت: لاء بقي اسمها هند أنا وعمار غيرنا أسماء الولاد..
رؤية كررت بهمس: هند!
بعدها انفجرت في العياط وجوزها حضنها ولحد دلوقتي مفهمتش حاجة!..بلعت ريقي بحزن عليها بس أعتقد إن حضن جوزها مكفيها..!
بصيت لهم بتوتر: اهدي بس يا رؤية..ولو..لو عوزتي مني طلب أكيد مش هتأخر عنك..
حسيت بهدوءها وانتفاضتها بتهدي.بصيت بقلق لجوزها وجيت أقف شاورلي إن كدا كويس..
سألته بحزن عليها: هي لسه تعبانه علي فراق والدتها؟
ياسر: مش عارف أقول ايه بس حالتها اتدهورت أكتر بعد استئصال الرحم بتاعها..دايما حزينة والكسرة باينة في عينيها..مع اننا مكناش منتظرين حاجة..أنا مش فارق معايا الطفل اللي سقط قد مافارق معايا حزنها بالشكل دا
بربشت بعيوني..:أعتقد انها دخلت في اكتئاب مابعد الإستئصال
ياسر: لو توضحي يبقي أفضل يادكتور
اتنهدت: الشخص عموما ممكن يجيله اكتئاب طفيف بعد استئصال أي عضو من جسمه..مابال الرحم اللي بالنسبة لأي ست حياة كبيرة ومختلفة..اه ممكن تكون مش بتخلف بس استئصاله صعب..غير ان الإكتئاب لقي فيها أرض خصبة..وفاة والدتها بعد وفاة هند اللي كانت عزيزة علينا..كمان وفاة الطفل اللي حلمت انها تكمل حلمها بيه غير ان تم استئصال رحمها
ياسر بحزن وهو شارد:بس لييه؟..دا حتي ربنا رازقنا بدل البنت اتنين..ليه كل دا
سألت بارتباك: هي كانت عايزة ايه؟
ياسر: أفضل اني مقولش حاليا..
فرح: هي حاجة كبيرة أوي
ياسر: بالنسبة ليها كبيرة
اتكلمت بحزن عليها: طب هعرف امتي..أكيد عايزة أساعدها هي تعبانة أوي ويعز عليا اني أشوفها كدا..!
ياسر: علي العموم شكرا لحضرتك لتنبيهي للجزء دا..أنا هشاورها تاني..وأسفين ان احنا جينا من غير معاد
فرح:لاء ولا يهمكم..رؤية مش مجرد صاحبة بالنسبة ليا وهي تستاهل كل خير.
رؤية جوزها فوقها وهي مشيت معاه في صمت وهي في شبه حضنه وهي متمسكه بيه زي البنت اللي بتقفش في ايد باباها خايفة تتوه منه..!
قفلت الباب وراه وأنا متحيرة بشكل كبير..ياتري ايه الحاجة اللي أقدر أقدمها لرؤية؟..
قعدت قرب باب الشقة بشرود وتفكيري في السبب مُحتلني.. ياتري ايه دخلي؟ ايه الموضوع اللي شبه حياة أو موت؟ هل فعلا كلامها دا ولا مجرد تعبير؟ ليه انفجرت في البكي بعد ماعرفت ان اسم البنت بقي هند.. سمعت صوت في الأوضة.. أكيد هند صحيت.. دخلتلها لقيتها بتعيط.. شلتها وأنا بهديها: هشش خلاص.. خلاص.. جعانة ثواني أجيبلك أكل شلتها علي ايدي ودخلت المطبخ.. حضرت كوباية لبن بسيطة وجبت بسكوت من الكرتونة اللي بابا جايبها ليها مخصوص.. شلتها علي ايد وبالتانية طبق فيه الكوباية والبسكوت.. حطيت البسكوت في الكوباية لحد ماداب وبدأت أكلها.. وهي مستمتعة.. همهمت: رح رح.. امب امب
بصيت لهآ من لغتها اللي بدأت أفهمها وضحكت: أنتي عايزة تشربي ماية.. عيوني ليكي.. شربتها وهي شربت بنهم وكأني مش ماكلاها الفجر مثلا..
الباب اتفتح وماما دخلت وفي ايديها حاجات من السوق.. قعدت وفكت حجابها وهي بتهوي بيه: أوف الجو حر جدا وبزيادة.. مش تخلصيني بقي ونخلص جهازك
رديت بصدمة: ليه احنا مش جبنا معظم الحاجات؟
ماما: دا عشان انا كنت بشتري حاجات في الشتا لكن لسه فيه.. ماجبناش مفرش ليلة الفرح ولسه بقية حلل المطبخ
فرح: هو احنا مش جبنا..
ماما: اتبقي الجرانيت ولا عايزة تدخلي من غير جرانيت
فرح: جرانيت ايه وبتاع ايه يا ماما.. مش عندي اللي يكفي خلاص
ماما: اسكتي أنتي.. ولسه منقتوش الخشب
فرح: لاء عمو توفيق ورانا تصاميم واحنا اختارنا وهيجبهم هو
ماما: أنتي جوازتك سهلة كل اللي هنجيبه لبسك وشوية حاجات هبلة كدا.. حظك ان توفيق كدا كدا كان هيغير الشقة ومرضاش ان أبوكي يدفع حاجة قد كدا..البنت كلت
فرح:قوري..قوري..واه كلت
ماما:هو في حد كان هنا؟
بصيت لنفسي لأني لسه بإسدالي:اه رؤية وجوزها
ماما:امم..جوزها غريبة دا مش بيدخل هنا أبدا
شردت وأنا بكلمها:حصلت حاجة غريبة جدا
ماما:غريبة!..ايه اللى حصل؟
فرح:*****وقالي انه حابب ميقولش دلوقتي
ماما سكتت وبعدها حطت ايديها علي دقنها بتفكير:والله يابنتي..لو اللي في دماغي صح..يبقي كويس جدا
سألتها وأنا ببلع ريقي:وايه اللي في دماغك؟
ماما:إن رؤية عايزة تربي حد من ولاد هند
بربشت أستوعب:بس ليه دي حتي مخلفة؟وبدل البنت عندها اتنين
ماما:فراق الضنا مش سهل خصوصا لو مش هتقدري تعوضيه؟..أنا لما سقطت قبل ما أخلفك..كنت هتجنن..
فرح:بس ليه الإنهيار..لو كان متقدرله يجي كان هيجي..زائد مش أحسن مايتولد فتتعلق بيه!
ماما ابتسمت: الست وقتها مابتفكرش في كدا..لاء دا خسرت حاجة كانت جزء منها في يوم..ومين قلك انها مش بتتعلق بيه..دي أول مابتعرف شعور تاني بتحسه..مش هقدر أشرحهولك لأنك مجربيتهوش..بس مهما خلفت كل حمل بيبقي حمل تاني لوحده..مش معني انها حابة تخلف يبقي لأنها مش مكتفية بولادها لاء.ددا هي حابة انها تكون سبب في بناء عيلة لوحدها..!
فرح: طب وياتري هتاخد مين فيهم؟
ماما:متهيئلي البنت!
شدت بايدي على هند وهي في حضني:اشمعني
ماما:لأنها حابة تعيش جو الأمومة في بدايتها..تسمع كلمة ماما من بيبي تاني..وكمان لأنها بنت عشان لما تكبر متبقاش غريبة بينهم
فرح: واحنا هنسيبهالها
ماما:مش أنتي تتمني للبنت انها تتربي صح
فرح:اه بس تتربي جمب اخواتها بينهم ومعاهم
ماما: وايه اللي هيقطع بيكم أنتي وهي صحاب وكون انها تربي البنت دا هيقوي علاقتكم أكتر..البنت محتاجة رعاية وهي صغيرة ورعاية أكبر لما تكبر وكون انها هتعيش مع بنات دا لوحده هيساعدها..وكمان هتتقدر تتكيف وياهم بسهولة اما الطفلين فاحتياجتهم ممكن تلبيها لأنها مش صعبة زي البنت اللي لسه مكملتش سنتين محتاجة اهتمام ومتابعة وغيره.
سكت أستوعب الموضوع..لأني اتلخبطت أكتر وأكتر..!
________
اللّهُـمَّ إِنّـي أَعـوذُ بِكَ مِنَ الْكُـفر ، وَالفَـقْر ، وَأَعـوذُ بِكَ مِنْ عَذابِ القَـبْر ، لا إلهَ إلاّ أَنْـتَ
________
بابا عرف وأيد كلام ماما بعد تفكير دام ليومين
بعد ماجيت من الشغل : أمك صح؟
فرح:أنت مأيدها؟
بابا:جدا انا فكرت مرة واتنين لقيت انهم لو طلبو حاجة زي كدا فدا في مصلحة الجميع طالما هيوفروا للبنت حياة هادية يبقي فين المشكلة؟
فرح: أنتم بتقولو لوكأنه طلبها مثلا..دي كلها مجرد توقعات ملهاش أي صحة
الباب خبط..بابا قام فتح الباب..بصيت من وراه كان عمار ومعاه ياسر..بلعت ريقي وهما دخلو بعد السلام وكل الرسميات دي..كلهم قامو لكن أنا لسه قاعدة مكاني!
عمار:أعتقد بإن الكلام دا يهمك
حركت عيني بتوتر:أنت تعرف؟
عمار رفع حاجبه:كلنا عارفين ومتوقعين ايه اللي هيقوله!
ابتسمت بتوتر:خايفة ليكون توقعنا صح
عمار:كلنا هنبقي كويسين جدا لو توقعنا صح..بصي كدا لقدام أنتي عندك شغلك..هنا كلها سنة وتتخرج وتشتغل..أحمد هيمتحن اهوه وهيدخل جامعته..حتي لو مامتك اهتمت هي ووالدك بس لإمتي..غير اننا لسه في البداية فهيبقي صعب انك تهتمي بيها!
فرح:بس هو يعني مش هنخلف أكيد..بردو هتبقي تربية ومسئولية
عمار:تربية طفل مش اتنين..حسن و..قصدي كرم وكريم اتكيفتي معاهم وأهم دخلو الحضانة وشوية شوية هيدخلو المدرسة وهيبقي سهل التوفيق لأنك مش هتضطري تسبيهم مع أهلك طول اليوم
اتنهدت:كلامكم كله صح..بس أنا اتعلقت بيها
عمار:حبك ليها انها تعيش أفضل هيساعدك انك تتعاملي مع تعلقك
فرح:بس مش عايزة أدخل بلاش
عمار:بالعكس لازم تتدخلي..ماينفعش نبقي قاعدين هنا وهو جوا يلا
________
اللّهُـمَّ إِنّـي أَعـوذُ بِكَ مِنَ الْكُـفر ، وَالفَـقْر ، وَأَعـوذُ بِكَ مِنْ عَذابِ القَـبْر ، لا إلهَ إلاّ أَنْـتَ
________
سحبني من إيدي وأنا مشيت وراه من غير اعتراض
دخلنا وسط الكلام..سكتو
عمار:كمل يا ياسر
ياسر:أنا عارف ان الموضوع صعب..لكن رؤية لقتها بتواجهني بكدا..غير اني حسيت انها هتبقي أفضل لو ربت البنت وأنا بالنسبة ليا هعتبرها واحدة من بناتي..
بابا:احنا معندناش مانع طالما البنت هتتربي بما يرضي الله..لكن البنت بكرا تكبر و
ياسر قاطعه:هي كملت السنتين ولا لاء
بصو ليا..فرديت:هتكملو كمان أربع شهور
ياسر:كويس جدا..عموما أنا ليا بنت خالي أختي في الرضاعة ولسه مخلفة مش من فترة كبيرة..هترضعها والشروط تكمل وأبقي خال البنت من الرضاعة وبكدا مش هيبقي فيه أي مشكلة
عمار: طب وأهل حضرتك هيتقبلو حاجة زي دي؟؟
ياسر: أنا هربي البنت وأنا اللي هشيل مسؤليتها ومش هغير اسم عيلتها لأن دا يعتبر تبني وهو حرام..ومقدرش أشيل ذنب زي دا..!..هاه هاخدها امتي؟
فرح:هي رؤية تعرف؟
ياسر:لاء الحقيقة حبيت أعمل ليها مفاجأة..من ساعة ماجينا هي وبعدها هديت وحقيقي مكسوفة انها تطلب طلب زي دا..فحبيت اعمله من وراها عشان لو محصلش متكونش اتعلقت علي الفاضي
بابا بص ليا وأنا غمضت عيني بموافقة..:والله ياسر يابني أنا ارتحتلك وحاسس بثقة فيك وحقيقي معندناش مانع ان البنوتة تتربي معاك..تقدر تاخدها بكره
ياسر:زي دلوقتي كدا
ياسر مشي وبابا قالي وهو محاوطني من كتفي: انا فخور بيكي انك فكرتي في البنت فعلا من غير أي أنانية...ابتسمت وسكت وهو مسح علي خدي بحنية..
عمار:بس هتوحشني بنت الإيه
فرح: هتوحشك ولا هتوحشك وقفة البلكونة
عمار: والله الاتنين مش فارقة..عارفه لما كنت اهديها بليل لحد ماتحضريلها أكلها كنت بحس بإحساس غريب ومختلف..بس ضوافرها فظيعة
ضحكت: طب يلا علي شقتك
عمار:شقة ايه بقي وسط البويا وحاجات النقاشين
زقيته: من طلب العلا سهر الليالي ولا ايه
عمار: لليالي قولي شهور..أنا ماشي أحسن
