خطايا حواء

الحلقه الاولى

#خطايا حواء

بقلمي زهراء الميالي 💕

#الحلقه الأولى

إن الأنانيه والجشع من اتعس الصفات التي من الممكن أن يمتلكها الأنسان ... تدفعه للقيام بالكثير من الخطايا ... في مجتمع لايرحم المخطأ .... فماذا لو كانت تلك الخطايا ارتكبتها حواء ! وما عقابها في مجتمع لا يتقبل اخطاء المرأه ؟

❤،،،،،،،،،،،،،،،خطايا حواء ،،،،،،،،،،،،،❤

ديالى ... المقداديه .. الساعه 5 عصرا

كملت ترتيب شعري وسويته شد وخليت المشط عالميز وباوعت عالمرايه اللي جانت طويله بس مكسوره شويه .. جنت لابسه بنطرون اسود ضيق وويا قميص احمر نص ردن ابتسمت وباوعت الوجهي جنت مخليه حمره حمره وكحله خفيفه وعدسات خضر و باودر خفيف جنت طالعه حيل حلوه ولو هو اني بدون شي حلوه وويا هذا المكياج طلعت..... اشرررد ..

لبست اسوار وحجل فضي ناعم برجلي وحذاء فلات مفتوح ... واخذت مبايلي وطلعت

اليوم لازم اخبل المنطقه كلهه لان بصراحه هاي الايام فلست فلازم اقطلي كم واحد

طلعت من الغرفه شفت امي كاعده تدخن اركيله ... اتعديتهه ورحت من يمهه فتحت باب البيت وطلعت بدون مااكللهه اني وين رايحه وهي اصلا متسال ... لان احنه بالضاهر عائله لاكنه بالواقع اغراب محد اله علاقه بالثاني مجرد اشخاص ينامون بنفس البيت

سديت الباب وبديت اتمشه بمنطقتنه برهاوه ... جان الوقت عصر واغلب الولد اللي بالمنطقه جانو طالعين ... اتمشه واشوف شلون عيون الولد عليه ... واللي يصفر واللي يعض شفته واللي يصيح .. طلع البدر علينا

-هههههه اضحك وامشي ...

خلي اعرفكم عليه ... اني عطور عمري 20 سنه اني وحيده اهلي ..... اني طولي وسط ورفيعه وشعري قصير الحد كتفي .... وبشرتي حنطاويه وعيوني سود بس منو اللي يشوفهن يكول عيونج وكحات ... مبينه بيهن الوكاحه والقوه من نضرتهن

وصلت للاسواق الي يصير بالشارع اللي ورانا ... دخلت ورحت للميز اللي كاعد عليه عماد تقربت يمه هو جان مدنك ويسجل بالدفتر وممنتبه الوجودي تقربت عليه وحطيت ايدي على خده وكتله واني اميل براسي

- بشنو مشغول الحلو

هو رئسا فز والبتسامه مرسومه على وجهه

- هله ... هله بجماره كلبي وعطر سنيني ... شلونج يابعد عشيرتي وين هاي الغيبه

- مممم آسفه حبيبي ... اعذرني بس صدكني صارت عندي ضروف ومكدرت اجيك ... احجي وآني اجر بالكلام واتماوع

- واهون عليج ... لج حتى بإتصال ماكلفتي نفسج واتصلتي

- اييي كلت بكلبي اجيت عالمهم .... كتله ..