Metapora sa Pluma

MAGSASAKA

Magsasaka

Pastoral (Dalitbukid)

Kita ang mga ibong umaawit sa puno,
Pati ang sumisibol na ganda ng mga liryo,
Aming bukiri'y talaga namang nakamamangha,
Tanawi'y hahanap-hanapin ng mata

Masdan ang nahinog na bunga ng mangga,
Ngayo'y nahulog na sa tuyong lupa

Ang kalabaw na siyang katulong sa gawain,
Pag-aararo ay aatupagin,
Kasama ang baka't pato,
Mga alagang sa bukid ay kukumpleto

Ang barongbarong na nagsisilbing pahingahan,
Sa tanghali'y nagbibigay ng kapayapaan,
Ipikit ang mata't matulog ka,
Matitiyak mong makalalasap ka ng ginhawa

Damhin ang preskong hangin,
Nakakapagpakalma ng damdamin,
Mga dahong sumasayaw,
Pagaspas nito'y sumisigaw

Ngunit ang mas bibigyang halaga sa lahat ng ito,
Ay ang pangunahing paksa

Ang magsasaka,
Magsasakang nagpapakahirap upang maiahon ang pamilya
Nagpapakapawis upang makapaghanap ng salapi,
Pagtitiyaga ang karaniwang gawi

Nagtatanim ng samotsaring gulay
Ibebenta, dahil ito ang pamumuhay

Mga butil ng palay, ngayo'y kulay ginto,
Paggapas na naman ang gagawin
Magtatawag ng kasama para dito,
Upang may maani rin

Hindi mo ba batid ang kanilang paghihirap?
Na ginagawa ang lahat para sa pangarap?

Nais mapaaral ang kanilang mga anak sa eskuwelahan
Makapagtapos at mabigyan ng magandang kinabukasan

Tinitiis ang bawat pagod,
Sa putik nakangudngod

Naglilinang kahit tirik na tirik ang araw,
Nagtatrabaho sa gabing mapanglaw

Ekta-ektaryang palayan,
Ang sinasaka upang matugunan,
Kumakalam na tiyan,
Ng bawat Pilipino't kanilang pangangailangan

Nawa'y pahalagahan ang sakripisiyo,
Ng mga magsasakang dulot ay pag-unlad
Bayaning nagmula pa sa malayo,
Ang kasipagan ay walang katulad.