حاليًا بنعيش في عصر الانفتاح والعولمه ،،
مجتمع في الظاهر مع المرأه ، وفي الخفاء #عدوها اللدود ...
كبرنا واحنا مش قادرين نستقر ع رأي ،
هل البنت زي الولد ماهيش كِمالة عدد !؟
ولا عايشين في مجتمع ذكوري بحت !؟
من زمن ليس ببعيد بدأت المرأه تخرج م بيتها للعمل وتنادي بحريتها والمساواه بينها وبين الرجل و... و... و..... !
اصبح شغلها الشاغل انها تثبت وبس انها زيها زي الراجل في كل شئ ،،
بدأ فكر بنات كتير يتغير بدل م كان حلمها من وهي طفله بضفاير #الفارس اللي هياخدها ع حصانه الابيض ،
للبنت اللي كل طموحها واولاويتها الشغل .. الفلوس .. السفر ...
ولذلك اقول لكِ #خدعوكِ_فقالوا ... !
*******
انا بنت لأسره مكونه من أب وأم وأخ ولد اكبر مني ب 3 سنين ...
فتحت عيني ع مشاكل وخلافات مستمره بين والدي ووالدتي ، وكنت دايما بسأل نفسي ؛ ايه المبرر القوي اللي يخلي اتنين بالغين عاقلين راشدين وفي كامل قواهم العقليه انهم وفي ظل كل الخلافات والمشاكل دي مش بس #يخلفوا طفل ، لا يجيبوا طفلين للدنيا ومن غير م يفكروا ابدا في اثر خلافاتهم دي عليهم ... !
#طفولتي كانت عباره عن مشاهدات يوميه لخناقات بابا وماما ،
وزاد عليها احساس اني كائن غير مرحب بيه لان والدي كان عنده عُقدة #البنت ،
ولأن في معظم الاسر العربيه الولد بيكون ليه الحظ الاكبر من الدلع والترفيه ..
ف بكدا اخويا نجا م معاملة والدي السيئه ..!
كبرت وانا بسأل نفسي اسئله كتير جدا وللاسف مفيش حد ابدا كان بيرد عليها !؟
كنت بسأل ليه اهلي برغم كل المشاكل دي محصلش انفصال بينهم او حتى يحصل بينهم هُدنه ولو ليوم واحد بس !؟
ليه في الغالب الولد مميز والبنت لا ، ع الرغم ان البنت في الغالب هي اللي بتشيل هم اهلها بعد م يكبروا اكتر م الولد ، دا غير انها احن كتير م الولد !؟
ليه اتولدت في اسره ومجتمع زي دا ، وليه جيت الدنيا م الاساس !؟
ازاي بيقولوا دا مجتمع متدين بطابعه وانا والدي كان بيصلي وبعد م يخلص صلاه ع طول يهين امي ويهيني !؟
اي رب كان بيسجد ليه وبيعبده امره بكدا !؟
اسئله واسئله واسئله .... ؟
كبرت وانا واخده اهم قرار وهو #مفيش_جواز ، في شغل واني اثبت نفسي مش بس لوالدي لا وللمجتمع كله ،،
تجاهلت تماما ايذاء والدي النفسي ليا وفضلت مصممه ع اني احقق هدفي ،
كان حلمي بيكبر جوايا وقدامه كانت بتضيع حاجات كتير قصاده حلوه منها طفولتي ومراهقتي وايام كُليتي ،،
حققت بداية حلمي ودخلت كلية هندسه ،
مش حبًا فيها اد م هو اثبات انها مش بس للولاد ، او هما بس اللي يقدروا يتفوقوا فيها ويتحملوا مشقة شغلها ،،
كان بينضرب بيا المثل في عيلتي كلها ، كل الناس كانت مبهوره بيا وبتفوقي الا واحد بس ،
اللي بسببه وصلت لكل دا .. والدي !
بس كنت برضو مكمله وطموحي بيزيد اكبر واكبر ،،
سافرت بره مصر وحققت انجازات كبيره جدا بالنسبه لاي حد في سني ،
وفجأه تحولت كل نظرات الانبهار من عيلتي لنظرات شفقه ، ودا تحديدا لما تخطيت عمر ال 30 ...
الكل نسي شغلي وتعبي ومجهودي وبقيت في نظرهم مش اكتر م بنت #عانس تستحق الشفقه لان قطر الجواز بدأ ينتهي وفرصتها في الانجاب هي كمان قربت تنتهي ،،
بس انا ولا فرق معايا كل الكلام دا خالص ،
لوقت م حصل موقف معين كان مع #طفل صغير ،
اكتشفت وقتها اني نسيت او تناسيت ان ربنا خلق جوايا اكتر حاجه الانثى بتضعف قدامها وهي #الأمومه .. !
كانت وقت #ولادة طفل ساقه القدر ليا اني احضر ولادته واسمع صوته مجرد وصوله للدنيا وهو عباره عن جسم ضعيف هزيل لا حول له ولا قوه ،
حسيت نفسي هو وانا لا حول لي ولا قوه في الدنيا دي ،
وكأن ولادة طفل جديد اعلنت عن بداية حياه جديده وولاده ثانيه لحياتي ... !
أنت تقرأ
قصص واقعيه للعبره
Historia Cortaكل واحد في حياته قصه بتحركه تجاه مستقبله وحياته اللي جايه قصه بياخد منها عبره لحياته بيتعلم منها ويحفظ منها تجارب وخبرات بتعلمه ازاي يبص علي اللي جاي.
