قصص واقعيه للعبره

#امن _يجيب _المضطر_اذا_دعاه!!

رسالة انهاردة مثال بسيط جدا لمقولة ان مفيش حاجه اسمها #مستحيل مع ربنا وبإيده في لحظة يغير حالك تماما م حال لحال🌺

🌸🌸🌸🌸🌸🌸🌸🌸🌸

انا طالبة فى طب بشرى وداخلة الكلية عن حب
جيت فى سنة تانية للأسف شلت #اناتومى تشريح -والنتيجة للأسف كانت اتأخرت جدا جدا وكان جدول الدور التانى نزل قبلها  .... مكنش فاضل غير أسبوع بالظبط من وقت ظهور النتيجة ووقت الامتحان .....
اللى فى طب عارف يعنى ايه تشريح وان أقل وقت ليها عشان تتلم غالبا شهر ...
تخيلى يا هدير ان ذاكرتها فى شهر شيلتها مابالك مش باقي غير أسبوع ... غير ان ضاع يومين كمان فى العياط والصدمة اللى كنت فيها ....
عايزة اقولك ان نظام كليتنا انك مينفعش تطلعى حتى بمادة واحدة لو منجحتيش الدور التانى هتشيلى السنة كلها تانى متخيلة صدمتى! !!!
لا قادرة اخد وقت اعيط فيه ولاقادرة استغل الأيام انى اذاكر. ..... 😭😭
قبلها بفترة كنت حضرت درس دينى فالمعلمة كانت بتقول حد عنده حال مع الله في استجابة دعوته بمعنى أن حد كان عايز حاجة وكانت شبه مستحيلة واتحققت ؟!!
ف مفيش حد رفع ايده غير 2 من اصل 100 مثلا
ف اتفاجئت بالعدد وقالت كل واحد لازم يخلق الحال ده مع الله لازم يزلزل نفسه لازم يكرر الدعوات ويقف على باب ربنا ويبلغ درجة اليقين أن دعاؤه يستجاب لازم يدعى دعاء المضطر وان دى القشاية الوحيدة اللى هتنجده. ....
والله يا هدير وقتها افتكرت الكلام ده وقولت لازم الموقف ده اصنع من خلاله حال مع الله ...
فضلت ادعى ادعى كتير اوى اوى وبرده باخد بالأسباب واذاكر وأقول يارب انا مش عايزة امتحن انا مش هقدر يارب ادخل دور تانى لو دخلت هشيل السنة كلها مش باقي غير 3 أيام على مادة ذى الاناتومى المفروض تتذاكر وتتراجع يارب اى حاجة تحصل
لحد ليلة الامتحان متخيلة بردو بدعي.. الامتحان بكرة بذاكر وبعيط وبدعي. ......
والله ياهدير والله دا حصل ..
لقيت  رقم غريب بيرن من رئيسة شؤون الطلبة ان دى مش درجتى وانتى ناجحة ومش هتدخلى الامتحان ❤
طبعا انا فضلت اسجد كتير واتنطط جامد والله عمرى ما فرحة اد الفرحة دى
حتى فرحة الثانوية متجيش حاجة جنب الفرحة دى....
عايزة اقول احنا ف شهر مبارك شهر الدعاء اصنع لنفسك حال مع الدعاء كل ما تقع فى أزمة بعد كدة تفتكر أن ربنا كان معاك ❤❤❤
الحمد لله انا حاليا فى سنة 5 دلوقتى وخلصت من التشريح خاالص ومش عايزة اشوف وشه طول حياتى😂😂
كل اللى يشوف رسالتى دى بقى ممكن يدعيلى بالزوج الصالح المصلح اللى يقر عينى عاجلا
الله يبارك فيكم جميعا يارب ❤❤❤

🌸🌸🌸🌸🌸🌸🌸🌸🌸🌸🌸🌸🌸🌸
كلام المعلمة اللي في الدرس محتاج #يتبروز ✋

ارجعوا بالذاكره كدا هتلاقوا ان اغلبنا حصل معاهم موقف مشابه وربنا نجدنا ع آخر لحظة..وفي كل مره ربنا بيستجيب بطريقة بتدهشنا وبتخلينا نتمسك بالدعاء اكتر واكتر 💙

#من_الرسايل
#حكاوي_هدير
#هدير_ابراهيم