قصص واقعيه للعبره

#بين_علمي_علوم_ورياضه_يا_قلبي😃

بصي بقي ياست البنات انا حد قعد من سن اربع سنين لحد ١٧ سنه ع أمل أبقى دكتورة ..بس الحمد لله محصلش نصيب وجبت ٩١ اول سنه..اول كلمه اخويا المهندس قالها متأكلش عيش حاف 😂..طبعا أنا واحده بتعشق الرياضيات. بس كان صعبان عليا أضيع حلم علمى علوم عشان الحاج ابويا اللي بالتالي كاه زرعه جوايا..لدرجة انى اصريت اكمل متفهميش ازاى!
واخدت ست حصص احياء ..المهم انى افهم كلمة ابدا🤣..طبعا كتير قالى احول ادبي لانى خلاص مش هطول حاجة..وانا مصرة ع ال بدماغى تقوليش يابنتى بعاند الواقع 😳..لحد ما ربنا رزقني واخويا ال مسافر رجع واقنعنى احول علمى رياضه ..والله ياهدير انا كنت مستنيه حد يقولى بس عشان كرامتى كانت ناقحه عليا انى احول🤣..مش اتلم واذاكر بقي ..نيفر ي اوختى والله
كنت اروح المدرسة ال من حظى النحس كله يغيب في تالته ثانوى وانا ال يطلعلي قرار جديد بمنع الغياب واروح الدرس وارجع انام واقول هصحى اذاكر وربنا مااصحى غير تانى يوم بس لو صحيت كنت اصلي الفجر واقول هريح ساعه واقوم
المهم ياستى كل الناس بتذاكر وانا لسه بنام وبحلم انى في طب وأقوم مخنوقة وكانى بعترض ع القدر
لحد ماقامت الثورة ي اوختى يناير ٢٠١١🤣😂
وإذا فجأة طقت بدماغى احول علمى علوم تانى لييييه عشان الرياضه ال كنت بعشقها مبقتش فاهمه منها ولا رقم والله هو كان نوع من الهروب موضوع التحويل دا
لحد مااستاذ ربنا يباركله #هزقنى وقتها بس من خوفه عليا وحرفيا دلوقت بدعيله ..مع ان جوايا كان رافض التحويل بس عقليا بقول احول ومدرس يشرحلى الاحياء من اول وجديد
الرياضة صعبه جدا وكانت في الثانوية لل ميعرفش ست فروع بنمتحنها ع تلات مرات
طبعا في الوقت دا قررت اني مش هعمل اى حاجة من شغل البيت وهركز في المذاكره وبس
اقسم بالله انا فعلا معنديش طاقة للمذاكره بكرهها حرفيا وبكره سيرتها واسمها
المهم وقتها قعدت احاول اذاكر وبرضو انا والحمار واحد😂🤣
يمكن دى اول مره فيها اعرف واحس بحلاوة #قيام_الليل
وال كان بداية تحول في حياتى حرفيا!!
المهم ياستى ابتديت أقيم الليل وابكي
واقول يارب انا عارفه اني مستاهلش اى حاجة وغيري يستاهل كتير بس انت ال بتقول انا عند ظن عبدي بي وأنا احسنت الظن بك..

بصي بقى فضلت وقتها ادعي يارب اجيب ١٠١٪
ودا ال هو قبل الامتحانات ب ٤٠ يوم
وقتها والله كنت ابتديت اذاكر وكل ماحاجة تصعب اقوم اعيط مع ربنا وادعيه
وبعدها اذاكر الاقي الدنيا اتيسرت
لحد ماجات الامتحانات وحصلي فيها ابتلاءت كتييييير وبلاوى كبيره حدث ولا حرج ولا مذاكرتى بقي ولا يحزنون تنجحني
ال حصل في الامتحانات لوحده محتاج قصة والله بس مش هطول عليكي
المهم لحد م عرفت ان النتيجة ظهرت وكان دا ليلة النصف من شعبان دخلت اوضتي ودعيت يارب اجيب ٩٩
وقد كان اقسم بالله جبتها بعد مافضلت حوالى شهرين بدعى اجيب ١٠١%
وكأن ربنا بيعلمنى درس ال هو اثبتى وع اد ثقتك بيا هعطيكي
ودخلت هندسة ياستى
ومن رحمة ربنا ادخل #هندسة_طبية وآخد مواد من طب
واحمده طول عمرى انى مدخلتش طب لانى كنت بكره المواد ال باخدها جدااا وبنجح فيها بالعافيه
مع ان مواد هندسة جيد جدا وامتيازات
وتقديرى التراكمى ج ج مع مرتبة الشرف..

حاليا انا موظفه حكومه ي اوختى اد الدنيا وطبعا لسه معنسه داخله ع اربع سنين بعد الجامعه وخناقات كل شوية بس الحمد لله ربنا يرزقنا الخير وادعولى يصلح قلبي لانه فعلا مبقاش زى الاول!.
ربنا لما أنعم عليا بهندسة كان اول نعمه هو حضور ربنا بقلبي واطمئناني واستشعاري فعلا لمعنى
" أمن يجيب المضطر إذا دعاه"
"ونحن اقرب اليك من حبل الوريد"
أعتقد أن لو كل حد فينا دعا بال بيتمناه بجد من قلبه وهو مستشعر وجود ربنا واستجابته هيحصل اللي بيتمناه فعلا وبالصورة ال عايزينها تماما ويمكن أجمل❤
🌸🌸🌸🌸🌸🌸🌸🌸🌸🌸🌸🌸🌸
بنفضل نجري ورا حاجه ونتعب قلبنا ونعاند وهي فعلا مش خير لينا وبمجرد م نستسلم ونلجأ لربنا وندعي ونتوكل عليه بنرتاح وبنفهم حكمته 💜
ف مش شرط الحاجه اللي تقعد سنين تدعي بيها وتستناها تكون هي فعلا الخير ليك ويكون الخير في حاجه تانيه مش هتشوفها طول م انت باصص تحت رجليك..

#من_الرسايل
_حكاوي_هدير
#هدير_ابراهيم