(أمــي وآلَزمــــن )
للكــآتــبــهّ نــوٌر الهدى
آلبـآرت آلسابع عــشــر
(بارت طويل لعيونكم الحلوه 😍)
ليت الذي خلق العــــيون الســــــودا
خــلق القلـــوب الخــــافقات حديدا
لولا نواعــســهـــــا ولولا ســـحـــــرها
ما ود مـــالك قـــلبه لـــــو صـــــيدا
عَـــــوذْ فــــــؤادك من نبال لحـاظها
أو مـن كمـــا شاء الغرام نسيجاا
إن أنت أبصرت الجمال ولم تهــــــم
كنت امرءاً خشن الطباع ، بليدا
وإذا طــــلبت مع الصـــــــبابة لـــذةً
فــلقد طــلبت الضـائع المــوجــودا
يــا ويــح قـــلبي إنـه في جـــــانبي
وأظــنه نـــائي المــــــزار بعـيدا
مــســـتوفـــــزٌ شــــوقاً إلى أحـــبابه
المـــرء يكره أن يعــــيش وحيدا
بـــــــرأ الإله له الضــــــــــلوع وقايةً
وأرتـــــــه شقوته الضلوع قيودا
فإذا هــــــفا بــــــــرق المنى وهفا له
هــــــاجــــت دفائنه عليه رعــــودا
جــــشَّــــمتُهُ صــــبراً فـــــلما لم يطقْ
جـــشــــمته التصويب والتصعيدا
لــو أســتطيع وقـيته بطش الهوى
ولـــو استطاع سلا الهوى محمودا
هي نظرة عَرَضت فصارت في الحشا
نــاراً وصــــار لها الفـــؤاد وقودا
والحــبٌ صوتٌ ، فهــــو أنــــــــةُ نائحٍ
طـــوراً وآونــــة يكون نشــــيدا
يهــــب البــواغم ألســـــــناً صداحة
فــــإذا تجنى أســــــكت الغريدا
ما لي أكــــلف مهـجــتي كتم الأسى
إن طــــال عهد الجرح صار صديدا
ويــلذُّ نفــــــسي أن تكون شـــقيةً
ويلــذ قلبي أن يكــــــــون عميدا
إن كنت تدري ما الغـرام فداوني
أو ، لا فخل العــــــــذل والتفنيدا
.......................................
ياسمين : طلع رضا من باب الحوش ذبيت الماي وراه وكلت امانه الله ومحمد وعلي واني اشهك بالبجي صاحتلي عمتي رحت دخلت بالغرفه يمها حطت ايدها على راسي وتمسد بشعري وگالت
حجيه خاتون : يمه هاي شبيج لاتموتين روحج من البجي هوا كم يوم وتشوفي راح يجي وانا هنا يمج شنو تردين تعتازين بس گولي احد يغثج يضوجج گليلي زين يمه
ياسمين : ان شاء الله عمه ماتقصرين وصاحت امنه واجت يمنه
امنه : ها بيبي صحتيلي
حجيه خاتون : امنه روحي نامي يم مرت عمج رضا ولاتعوفيها ابحدها يلا احبيبات روحن نامن وسدن بابجن عدل رحت لغرفتي اني وامنه وكامت تحجي وياي
أمنه : ياسمين لاتبجين حبوبه كافي لخاطر عمو رضا احنه گلنه نحبه ونموت عليه بس نندعيله يرجعلنه بسلامه احسن من البجي
ياسمين : كلامج صح بس أني مو بيدي كوه لازمه نفسي امنه : حقج ماألومج الفراق صعب وهم هستوه عرستو مالحكتو اتشبعون من بعض زين خلي اسولفلج عن صديقاتي ويايه بالمدرسه كلش حبابات
بدت اتسولف واني اسمعها وكالت
امنه : بعد كم يوم عيد ميلادي وراح يجون صديقاتي وراح اسوي كيكه
ياسمين : حلوو والله ياريت اني هم ضايجه وأريد اغير جو وياكم
امنه : خوش باجر نحظر كلشي ونشتري المواد مال الحفله
وره ماخلصنه سوالف دخنه ونمنه الساعه ٧ الصبح وكعدنه الساعه بالوحده الظهر كعدونه على الغده
كعدنه تغدينه واني بعدني مستحيه من اهل رضا وهمات الأكثرر لأن هوا مو يمي واحس بمكانه فارغ لان عروسه ألها اسبوع من زواجها ويعوفها زوجها صعبه شوي
وره يومين اجت انيسه واني كلش فرحت بجيتهه
وضلينه نسولف وهيه تصبرر عليه وتكلي صيري سباعيه وافتخري بزوجج راح يدافع عن الوطن وجايبتلي اشياء حلوه وياها مكياج وشكالات وعطورات وظلت للعصرر وراحت سوينه حفلة عيد ميلاد امنه وامها فهيمه جابت جكليت وحلويات وشموع وصديقاتها جايبين الهه كيكه وسووها الها مفاجئه اني كلت بنفسي خطيه ليش ماجبتلهه هديه هيه امنه تستاهل كل خير وشويه واجتني فكره رحت للغرفه مالتي وطلعت شكاله وتاج كلش حلوين وحطيتهم بعلاكه ملونه وانطيتهن الها هيه كلش فرحت بيهن وصديقاتها اقبال ونسرين هم جابلها هدايه وشغلو المسجل وحطو كاسيت عبد الله رويشد وكامو يصفكون ويركصون واني اباوعلهم واضحك وصدك كلش تونسنه بوگتها احس شويه راحت الضوجه مني وره أسبوع جنت توني طالعه من الحمام وجاي أتشسور بشعري بت خالتي هاله وتسولف وياي واندگت الباب وجان تطفر هاله
هاله : منو منو ماكو حس
ياسمين : منو منو بالباب محد يرد عليه اني نخمط گلبي كلت لهاله اكلج بس لاسوالف ذولي أللي لايحلوون ولايحرمون اولاد عم رضا
هاله : دوخري اني اعلمهم هيه فتحت الباب
ياسمين : انفتح الباب حيل ومااشووف غير هذا العسكري دخل عليه و بسرعه شبگني اني كلت رضااا هاي انته گال
رضا : اي رضاا شبيج وجهج اصفر وصافنه ماكو لحمدلله عل سلامه
ياسمين : مااعرف شنو احجي شنو اگووول شبگته وظليت ابجي وهوه يبوس بيه كتله لحمدلله عل سلامتك ياعيوني ياأبو بيتي وكل شويه اصفن بوجهه ومامصدكه وضحكت عل هاله كاعده يمنه وتباوع وتنزل راسها
رضا : شبيج مامصدكه ترديني ارررجع
ياسمين :ههههه لالا لا ترجع حبوبي
رضا : هااي شبيج صدگتي بسرعه انا يلا حصلت اجازه بالكوه هنوب ارجع
ياسمين : اي والله صدك بس هاي احله مفاجئه وسلم على بت اخوو هاله أللي نسه يسلم عليها من دخل ألتها وياي خطيه شويه وكامت
رضا : هاي هاله ليوم عدنه شلونج عمي شخبارج
هاله : هلا عمي بخير زين ذكرتني ههههه لحمدلله عل سلامتك
رضا : هههههه الله يسلمج عذريني عمي بالي كله يم بت خالتج خذتلي تفكيري كله شنو أشوفج طالعه
هاله : اي عمي رايحه
رضا : وين رايحه ضلي بعد وكت
هاله : لا عمي اروح هسه امي يضل بالها عليه الله وياكم
رضا : الله وياج سلمي عل أهل
ياسمين : الله وياج هاله سلميلي عل خالتي
هاله : الله يسلمكم طلعت وسدت الباب وراها
ماشوف الهه شايلني ويفترر بيه من الفرحه ومامصدك انو رجعلي سالم لان الي يروح للحرب لو يرجع لومايرجع امره بيد الله والحمد الله من رجع سالم وكعد يسولفلي عل الجيش وشنو سوو وعلى بطولاتهم وگلي يلا هسه انتي سولفيلي شنو سويتي بغيابي وشلون گضيتيها
سولفتلهه گلشي لان احسن مااريد اضم شي عليه والصراحه حلوووه خاصه بالبدايه وگلي
رضا : وين رحتي مارحتي
ياسمين : والله ماطلعت لامنا ولامنا
رضا : اي احسن لان انا اغار عليج من الهووه واذا اطلعين من غير ماادري ازعل عليج وانا زعلي ثكيل ياسمين : ان شاء الله ماكوو اي زعل بيناتنه وتضل حياتنه كلهه سعاده وتفاهم اني شعندي غيرك ومااكدر على زعلك
رضااا : الله مشتاق لهذا الحجي الحلوو يلا گومي حضري الحمام اريد اسبح قبل المغرب وعدنه الليل طويل وين ترحين مني مشتاگلج بكد رحمة الله وراح اظل اسبوع يمج لحد ماتملين وتگليلي روح گافي
ياسمين : اني اگلك روح شبيه مخبله اني هم مشتاقتلك بكد رحمة الله ليليه احط راسي عل المخده واتذكرك واذكر سوالفك وحنيتك وابجي وانام دمعتي بعيني
رضا : اااوف شنو گتلج مو گتلج بعد لاتبجين
ياسمين : موبيدي والله لان انت عزيز عليه
رضا : يلا گومي ياعمري وحضري ملابسي على ما اسلم على امي لان شفتها نايمه من دخلت وماحبيت اكعدها
ياسمين : هسه ثواني بسرعه احضرلك الحمام
رضاا : طلعت من غرفتي ورحت لغرفة أمي وعيوني كلها شوگ الها اشتاقيتلها عافيتي شنوو وينهه شمعة البيت بعدهه نايمه
حجيه خاتون : هلا يمه تعال من فدووه لهل الصووت يمته اجيت الحمدلله على سلامتك يمه
رضا : هلا بالغاليه وريحتهه قبل ساعه اجيت وشفتج نايمه ماحبيت اكعدج كلت خليهه مرتاحه بنومتها بعدين اكعدها دنجت بست راسها
حجيه خاتون : يمه توه ردت رويحتي من شفتك وشفت طولك تعال يابزر الكعده انا من بعدك احبل اجيب
رضا : لا لا يمه ليش بعد ماتحبلين وتجيبين اريد
اخوو زغير نلعب عليه
حجيه خاتون : ولك دولي يااخوو هذا بعد انا ويني وين الحباله خليتها الكم انته ومريتك يلا شدوو حيلكم وجيبولنه ولد ابنيه نلعب عليهم
رضا : لايمه بعد وكت هستوه مزوجين خلي نتونس شويه نطلع نشوف الدنيه لاحگين عل الخلفه
حجيه خاتون : اي يمه جاا مو هسه گتلك يعني بعد شهرين اربعة اشهرر ودي اشوف جهالك داير مادايري يلعبوون
رضا : يمه لاتستعجلين اترسلج البيت ترس جهال واحد صاعد فوك راسج وحده من البنات تمشط بشعرج ووحده تعصر برجليج وبعد وبعد وتضلين تركضين وتردين ليوره وتصيحين ولك رضيوو تعال اخذ جهالك سودنوني
حجيه خاتون : اي يمه ان شاء الله اشوف خلفتك
قبل لا اموت
رضا : يمه اصمله عليج الله ينطيج طولت العمرر وتشوفين جهالنه وجهال جهالنه
ياسمين : دخلت عليهم شفتهم كاعدين ورضا حاضن امه كسر خاطري من فدووه لحنيتك ها عمه شلونج
حجيه خاتون : هلا بنيتي لحمدلله بشوفة رضا كلنه بخير
ياسمين : اي والله عمه يلا رضا حضرت الحمام ألك تعال اسبح مو تكول ميت حرر وهدوم العسكريه اكلن جسمي
رضا : اي كلش حاره هناك وتعب يلا جاي بست امي على راسهه الله لايحرمنه منج يمه بعد لاتحجين هيج عمرج طويل انشاالله
حجيه خاتون : أنشاالله بعد حيلي روح اسبح ورتاح وليدي
رضا : سبحت وخلصت طبيت للغرفه شفت ياسمين حاطه البخور والمعطرر للغرفه طك بخشمي ريحته طيبه ومنظفتها وفارشه الفرشه الجديده گلت الله جني عريس هستوني عرست وجان تجي تصير اكبال وجهي مبدله وفاتحه الشعرر جنها گمرر وحاطه مكياج خفيف
رضا : الله هاي شنو هل الريحه الحلوه والعطور شاطره ومرتبه وتعرفين شلون تتصرفين
ياسمين : هههه خجلتني اي احنه مو بعدنه عرسان هو بس اسبوع صارلنه وانت عفتني ورحت التحقت بالجيش كلت خلي اسوي الغرفه مثل يوم العرس لان احنه ماشفنه شي وره العرس او لأن بيتكم جان مايفرغ كل شويه خطار وجماعتك كل يوم جايين يتباركولك وحتى ماشبعت منك ولاسولفنه كله طالع بره
رضا : رفعت حواجبي هاا تردين اشبعين مني كاعد على گلبج ليل ونهار لحد ماتكولين كافي ضوجتني اطلع وهسه جيبي العشه خلي نتعشه سووه
ياسمين : لا والله مااگلك هيج انت يلا اجيت من الضيم من هاي العسكريه الگشره نوب اگلك اطلع انت روحي ونظرر عيني وهاك هذا احلا عشه كعدنه ناكل وهمس بأذني
رضا : الله على هلحجي الحلوو تعاي عيني تعاي خلي اشبع منج يارويحتي
ياسمين : هههه صدك رضا اهلي گالوو بس يجي رضا من العسكريه نعزمكم ونسويلكم عزيمه تليق بيكم انتي وعيالج
رضا : ان شاء الله نروح ليش مانروح انا شعندي غير ياسمين واهلها وشويه هم نغيرر جوو بعد سولفيلي شنو سويتي بغيابي ويهوو اجه ويهوو راح
ياسمين : سولفتله كلشي صار شوف عيني سوينه عيد ميلاد امنه وتونسنه اني والبنات واجوو اولاد عمك الشفيه واني بس شفتهم سديت الباب وكعدت بغرفتي ماطلعت لان كلش مااحبهم لان عينهم احسها عليه وين مااروح خصه هذا سليم كلش ماارتاحله
رضا : اي انا هم مااحبهم وماارتاحلهم بس شسوي اطردهم شلون هم فشل من عمي وهاي اختهم مره طيبه مامأذيتنه بشي كلما اريد احاجيهم توكف بعيني انتي مثل ماكتلج من تشوفيهم دخلي للغرفه وسدي الباب ومن يرحون طلعي خلصي شغلج
ياسمين : اوووف رضا والله الواحد حتى بيته متقيد
حسره عليه ابدل او البس شي مااشوف اله گبالي واحد يروح واحد يجي جنهم ماعدهم بيت استغفرر الله شنو من بشرر ذولي
رضا : يلا حبيبتي اتحملي لخاطيري وانا هم احجي وياهم بالتفاهم وبلكت يحسون أو احجي ويه اخوهم حسان هوه يعرف شلون يتصرف وياهم عاد هذا سبع وصاحبي وماعنده عين نگسه مثلهم ويصدهم ويخاف الله بس اهم شي ماضوجين وصيري سباعيه طكيهم طك بعينهم واذا شي ماعجبج احجي وگفيهم عد حدهم انا احب المرآه القويه وانتي قويه صديهم يلا هسه خلي نغسل ونروح انام عوفينه منهم نگدوو علينه
ياسمين : وره يومين اجه رجل خالتي قبل لا تصير الحرب كلش قويه وگال
حجي أبو صباح : خويه رضا أبو عصام عازمنه الجمعه عل الغده وكال مو ماتجون
رضا : ان شاء الله خلي اشوف الوالد والاهل حتى كلنه نلتم ونروح دخلت لغرفة امي كعدت يمها يمه وين ابوي عمي ابوعصام عازمنه الجمعه كلنه عل الغده واريد انطيه خبر
حجيه خاتون : اي يمه أنشالله نروح بس خلي نشوف ابوك بس لا تطلعله شغيله منا منا يمه بعد انت شوفهم يبعد امك
رضا : يمه حتى لو عنده شغله يأجلهه فشله من عمي خلي اشوفه بالدوانيه لو طالع طلعت رحت للدوانيه انتظرته ماكو شويه واجه الوالد
رضا : الله يساعدك بويه
حجي زاهد : هله بويه شلونك شخبارك ها ولك اسد لو ذيب شرايد مني
رضا : هههه لابويه ابنك اسد من ظهرر اسد اجيت اكلك عمي ابو عصام عازمنه الجمعه عل الغده وگال خلي الاهل كلهه تجي
حجي زاهد : ان شاء الله بويه الجمعه ماعندي شي كلت لاخوانك خلي يصير عدهم علم حتى اذا كلش نروح كلنه بالكوسترر مالت ابو صباح وله يابويه يا سياره تكفينه
رضا : اي صدك بويه انا مافكرت بهذا الشي لان جاسم وعائلته وقاسم وأنيسه وجهاله واحنه وامي هم يلا تكفينه الكوستر واخوي ابو صباح هم عازميهم وبناته واولاده يمكن حتى كوستر ماتكفي يايابه ههههه
حجي زاهد : يلا الله كريم خلي نشووف العدد شكد ونقرر
رضا : كلت بكلبي خلي اروح لياسمينة گلبي اشتاقيت الها يلا بويه من رخصتك
حجي زاهد : بويه براحتك وليدي دخلت على ياسمين للغرفه طلعت مو بالغرفه جاي تغسل ملابس ظليت انتظرها يمكن ماتدري بيه رحت امشي شويه شويه ودكيت باب الحمام لان هيه من تغسل ملابس اتسد الباب خاف واحد من هذولي ألي مو راحه يجي دكيته دكه خفيفه وهيه كالت
ياسمين : راح رضا لامه وأبوه حت يكلهم عل ابويه عازمهم وكلت خلي اروح اغسل ملابس دخلت وسديت الباب لان اعرف ذولي يدخلون جفت كعدت اغسل بديت اخلص ماأسمع أله الباب انركعت مره ومرتين كلت منو منووو بالباب
رضا : انا سكتت ودكيت مره ثانيه وثالثه وهي تصيح منو هذا وانا غيرت صوتي ودكيته الباب حييييل وهيه من الخووف ظلت تبجي وتكول
ياسمين : حيل خفت اكول منو محد يجاوب وصوت خشن ويدفر بالباب كمت ابجي من غير شي روحي رايحه من الخوف كلت شنو تريد مني
رضا : بس سمعتها تبجي بسرعه كتلها فتحي وهيه قافلته وشويه واجتني الضحكه ومااشوف غير فتحته وتولتني بوكسيات على وجهي وعلى صدري وشويه غرفة ماي من الجك وذبتهه على وجهي وهيه تصرخ بعلوو صوتهه
ياسمين : اني عايزه بلى حت تخوفني هيج وخررر من وجهي لا اااااصرخ بعلوو صوتي نشفت دمي
رضا : انا اضحك وهيه صايره ناار وتدفع بيهه انا شبگتها وگتلها
رضا : ياسمين حياتي هاي اخرر مره بعد مااعيده والله حبيت اشاقيج
ياسمين : بعدني وادفع بيه ماحب هيج شقى و انت بس فكر اتسويها بعد وشوف صدك بوكتها كلش خفت كلت بس لا واحد من ذولي اولاد عمه عرف اني بالحمام واجه وراي وظليت ارجف من الخوف لحد ماحجه رضا وياي وضحك وسمعت صوته صدك هبطني بس تنهدت وكلت بنفسي الحمد الله هذا رضا بس اني بعدني اغلي غلي ظليت اضرب بيه على وجهه وعلى صدره وماكفاني هذا اخذت بالجك ماي وذبيته عليه خفت وارجف مو شلون ماجان وهوا يضحك وأني اضرب بيه بكل قوه ونزلت دموعي بسرعه وكام غسل وجهي و وخذاني للغرفه
رضا : عمي اسف واعتذر ومسحي دموعج غاليه عليه
ياسمين : اقبل اعتذارك بس هاي سوايه اتسويها بيه اني بروحي عايشه برعب ابيتكم نوب تجي انت اتكمل عليه الخوف
رضا : شدعوه ياسمين سويتيها رعب وخوف شنو احنه بغابه شحده الي يتقرب من مرتي غير ارجعه ابطن امه ومو كتلج صيري قويه محد يندك بيج مدام انا موجود
ياسمين : انت كم يوم وتروح وتخليني وحدي وبيتكم كله زلم اني شلون مااطلع اظل محبوسه هنا بالغرفه هم أطك روحي واذا اطلع يم امك ارجع لغرفتي الگه واحد كاعد عل الجربايه مالتي وحتى العطرر هم خلصووه كل ساع واحد طاب يرش عطرر جنهم ماشايفين مو ذيج غرفة اختهم مايرحولها ليش يكعدون بغرفتي
رضا : اتحملي ماتضل هيج نشوفلنه حل
ياسمين : ماشي اتحمل كلشي لخاطيرك يوم ثاني كعدنه تريگنه وكال
رضا : رايح للسوك تردين شي اجيبلج وياي
ياسمين : امممم اريد بس رماااان
رضا : شنو تتنسين ولج بس لاحامل
ياسمين : هههه لا يمعود بس مشتهيه
رضا : تدللين هسه اجيبلج احلا رمان
ياسمين : رضا تتاخرر لو ترجع بسرعه
رضا : لا مااتاخر شويه واجي
ياسمين : اخذ الدراجه مالته وراح اني الك عيني ضامتها الك سالفة البارحه من خوفتني گلت خلي قبل لايجي افكر شلون اخليه يدور عليه ومايلگاني
فكرت وين اختل عنه ااااي بالكنتور لان الكنتور مالتنه جبير نجاره هوا مسويه بأيده والباب الوسط كلش جبير للشراشف والمخاد والبطانيات گلت خلي هنا اختل وخليه يدوور لحد مايتعب سويتلي مكان بالوسطه حتى بس اسمع صوت الدراجه اضم روحي يمكن اقل من نص ساعه وسمعت صوت الدراجه واني بسرعه شلت النعال مالتي من يم الباب ودخلت طبيت بالكنتور وسديت الباب وحصرت روحي بين البطانيات والمخاد وضيعت روحي لان اني زغيره وهمات اخر فتره ضعفت كلش وبسرعه دخلت وضميت روحي واسمع صوت رجلين وفتح الباب وضل يصيح
رضا : ياسمين ياسمينتي يااا هاي وين راحت دخل للغرفه مره ثانيه ودور ومالگاني وطلع راح يسأل امه ورجع مره ثالثه باوع بالزاويه مال الجربايه وگال ياربي هاي وين صارت وهم طلع من الغرفه واعتقد راح للحمام يدور
واسمع عمتي
حجيه خاتون : يمه وين تروح هسه تلگاها يم البنات
وهم راح يم البنات ومالكاني. جان اسمعه يصيح
رضا : يمه ماكو دورت مالكيتها وين راحت هيه ماتطلع اله بشوري وماتعرف احد
حجيه خاتون : يمه خاف راحت لخالتها يجوز ضاجت وراحت تغير جوو يم البنات
رضا : لايمه قبل شوي گالت مشتهيه رمان جيبلي وياك
ياسمين : اني اختنكت اله شويه لان الكنتور مسدود وحاره وجان صيف ورجع للغرفه وضل صافن ويدورر بعد شويه ويبجي واهله كلهم خبصهم ويدورون وكلمن يكول وين راحت وراحو سألووا خالتي هم گالت لاما اجت النه ياسمين
ضل رضا محتار وين يدور حتى يلكاني واني شويه وطلعت لان متت حرر لو ما الحر جان طولت بعد
دخل للغرفه ولگاني كاعده عل الجربايه وهوه بسرعه فك عيونه عليه وصاير عصبي نارر
رضا : وين جنتي صاااااارلي ساعه ادور عليج وگضني من ايدي حيل وسحبني عليه وكعدني يمه عل الجربايه هسه تگليلي وين جنتي لااتصرف وياج تصرف ثاني
ياسمين : ها وووين جنت جنت بالگنتور لابده وانت ماتعرف ادور عدل بس اهم شي خوفتك عليه ههههااي ضحكت واني اشوف تعابير وجها مختلطه خوف عل قلق عل اعصاب فايررره سديت حلكي وسكتت
رضا : لاتجذبين يعني ماطلعتي منا منا
ياسمين : لا والله وين اروح يعني
رضا : ليش هيجي تسووين بيه وتحرگين اعصابي تدرين اصار بيه كل ساع يخطرر ابالي شي وكلت بيني وبين نفسي اذا ماالكاهه اسوي بنفسي شي أو ارجع للعسكريه وبعد مااجي بس اريد اعرف ليش هيج سويتي وخليتي صغير وجبير بهذا لبيت يدور عليج ولج اتخبلتي فكرت بيج خطفوج او احد أذاج
ياسمين : رديت بكل برود سويت هيج لان اريد احرك اعصابك مثل ماحرگت اعصابي البارحه وخوفتني وانت تضحك
رضا : ها بس انا گتلج بعد مااعيدهه هاي اخرر مره ياسمين : واني هم اخرر مره بعد مااعيدها يلا وحده بوحده هسه ارتاحيت
رضا : يمه منج اثاريج موهينه طلعتي ضامتهه الي يلا سقط حقج بعد ماكوو رررررمان
ياسمين : لا فدووه حبوبي هاي اخرر مره بعد مااعيدهه لان اختنگت بالكنتور اله شويه وكلش انقهرت عليك من اشوفك تدخل وتطلع واني اگول بنفسي الله شگد يحبني روميووو
رضا : هاا يعني جي اختنگتي من الحرر طلعتي جان انا لحد هسه ادوور عليج ولج تعاي شسويلج اكتلج مايهون عليه امد ايدي عليج لان احبج واتخبل من ما اشوفج يمي وبعيده عني بس بعد لاتعيديهه زين وتعاي شبگيني واعتذري مني وطاح الحطب
ياسمين : امممم. صدك
رضا : يلا تعاي انا مو رجلج شبيج مستحيه مني
ياسمين : يلا اجيت وحضنته وبست راسه وجاب الرمان وهوه يوكلني بايده
رضا : اكلي اكلي يابعد عمري اليوم تعبتيني كلش وحيلي كله راح من وراه سالفتج هاي وماعرفت شنو اسوي وين اروح وادور عليج عقلي طار حتى الرمان حزنان عليه
ياسمين : هههههه اي جاي اكل فدوه رحتلك شلون رمان يخبل بعد مااعيدها كتلك وعد مني والله يجعل ايامنه كلهه خير وتفاهم ولاواحد يزعل من الثاني وعرفت شكد اني عزيزه عليك وتخاف عليه مثل الأم من تخاف على طفلها
رضا : عودك صدك انتي جنتي تجربيني احبج لو لا ولج انتي بالنسبه ألي كل حياتي انا هسه وياج عرفت طعم الحياة والدنيه صارت حلووه بعيني
ياسمين : ها ها توك عرفت طعم الحياة الحلووه وووذيج ماعرفت طعم الحياة ويااااااا فزيت عل نفسي شجاي احجي اني
رضا : شنو كملي ياذيج قصدج منوو عليمن تقصدين
ياسمين : لا ماكوو شي ماقصدي احد
رضا : ها ياسمين مو تونه حلوين مثل الورد شلج بهل السوالف نوب تعاي تقصدين منو اله اعرف
ياسمين. :اووو رضا لا تكبر السالفه هيه حجايه وطلعت ماقصدي احد
رضا : يلا هسه خلي نشبع من بعضنه هيه كله كم يوم وراجع لهاي العسكريه ألي تعصر الگلب خلي نغير الموضوع ونرجع لسوالفنه الحلوو اذا صارت عدنه بنيه اريدهه تطلع اتشبهج وهجي شعرها سرح مثلج وعيونها مثل عيوونج جنها سواد الليل ومعانيهه حلوه مثلج واذا الله رزقنه ولد هم اريده حلوو عليج يطلع
ياسمين : شنو سالفتك كلهم عليه تريدهم اذا ولد انشالله عليك يطلع انت شبيك تخبل شنو عايزك شو معانيك تخبل وطولك وجسمك هيبه
رضا : اي صحيح بس انتي احله مني واني اريد جهالي كلهم عليج حلوين و الله كريم شنو يجي من الله نعمه
ياسمين : بس اني هسه ماافكرر بالجهال ودي اتونس وياك واطلع واشوف العالم لان توني اتزوجت ماشفت شي بحياتي
رضا : اي والله حتى انا هم اريد اطلع وياج ونتونس بعدنه عرسان شنو شفنه من حياتنه صدك انا احب الجهال واموت عليهم بس لاحكين عل الدووخه والوااااق ويييييق
ياسمين : ههههه صدك والله اني ابدي اطلع واشتري ملابس واروح للمنتزه واركب بكل الالعاب لان ابووي جان يكول اخاف عليكم من المنتزه هناك ولد وشباب واخاف عليجن لان كبرتو
رضا : يلا انشالله انا اعوضج هسه تعاي يمي اشم ريحتج يلا اغفى يابعد ريحة هلي شگد ريحتج طيبه
ياسمين : حضنته ونمنه للمغرب كعدنه على صياااااااح اني گلت ياستار شنو صار مااسمع اله واحد يبجي ويصيح ويكوول ولك يلا امشي خلي نروح نشوفه بس لاماااااات ومرت حماي الجبير تگلهم ابووي شبيه ماااات وتصرخ واني گعدت على حيلي كلش خايفه ورضا هم طفرر من الجربايه ولبس ملابسه
ياسمين : يارب سترك رضا شصاير
رضا : الله يسترر شنو صاار خلي اشووف
ياسمين : طلع رضا من الغرفه واني بدلت ملابسي وظليت اباوع من الباب شويه فتحته واشوووف عمي زاهد خطيه مخبوص وكلش مبين مقهور ولبس جفيته وعگاله وبدل بسرعه وخذه الاولاد ومرت حماي وياهم
انه گلت بگلبي بس لا ام فهيمه ماتت لان امها مره جبيره كلش بالعمرر تالي كلت لا توني اسمعتها تكول ابوي بس لامات گلت يوو هسه شبيه اباوع من الباب خلي اروح اشووف شصاير ومنوو المات لبست دشداشتي الطويله ورداناتها طوال وحطيت الربطه على راسي گلت خاف احد غريب هناك ودخلت للغرفة مالت حماي جاسم واشوف الكل كاعد ويبجي عمتي الحجيه والبنات وررضا كاعد يسكت بيهن ويهديهن
ياسمين : باوعت الرضا بقلق شنو الصارر
رضا : عمي ياسمين عمي سحگته سياره وهسه بالمستشفى بين الحياااة والمووت
ياسمين : انصدمنه بهل خبر صحت بعلوو صوتي لا لا صدك تحجي رضا
رضا : والله ماتشووفين هاي الهووسه والصريخ والبيت مگلووب
ياسمين : رحت اني يم البنات وظليت اهدي عليهم خطيه يكسرون الخاطر طبعاا ينقهرون جدهم ابو امهم وهوا دائما يجيهم مايكطع بيهم وحنين وصاحب نخوه
شوي وكامت تحجي عمتي
حجيه خاتون : يمه كافي مو كطعتن روحجن بلكت الله مابيه شي ويصير زين ويرد لبيته الله يحيي العظام وهيه رميم
امنه : بلكت بيبي الله يسمع من حلگج
هند : بس بيبي هما يگولون السياره طاگته براسه وحالته خطره شلون مانبجي
ياسمين : شويه وصاحلي رضا وطلعت من يمهم
رضا : تعاي ياسمين طلعيلي ملابسي خلي اروح للمستشفى اشوف شنوو الأخبار شلون حالته خو مااظل اكابل النسوان وكاعد
ياسمين : هاا اجيت شنو تريد يادشداشه الجوزيه لوو الزركه
رضا : هاي الزرگه الطووخ لان مايله للسواد ومااريد البس اسود ونفاول عليه بلكت الله يصير زين عمي ويگوم على حيله
ياسمين : انشالله خير لبس الدشداشه وطلع للمستشفى واني رحت كعدت يم البنات بعدهن يبجن خطيه سويتلهم أكل لان ماتعشو واني هم رحت شويه لغرفتي سويتلي لفه وكلاص جاي واكلت ورحت لغرفة عمتي حطيت الها عشه
حجيه خاتون : مااشتهي عمه لاتعبين روحج
ياسمين : لا عمه مايصير اكلي رحت سويتلها حليب وشويه جبن رحت يمها جانت كاعده عل جربايه اكلي عمه لان عندج دووه مايصير ماتاكلين لااطيحين علينه
حجيه خاتون : احبيبه مشكوره رحم الله والديج ياسمين : والديج عمه بالعافيه ورجعت يم البنات هيه مرت حماي الجبير يوميه تعشيها وتنطيها دواها مال الضغط والقلب لان هيه خطيه گلها الدكتور گلبج تعبان ومايصيرلج قهرر وينطونها حبايه جوه اللسان من تنقهر او تنفعل اني مانطيته هاي الحبايه مااعرف شلون اتصير لان عدهه دووه اشكال وشويه واحنه مثل ماكاعدين اني والبنات ونسولف نريد انام. شويه لان دخنه حطينه راسنه عل الكرويته هستوه نريد نغفه واندگت الباب دگه قويه طفرنه من مكانه دخل حماي جاسم ورضاا ووجوهم صفرره ماتتفسر ومبين عليهم القهرر والتعب وبسرعه گالووا وين امي الحجيه
ياسمين : خيرر رضا شبيكم خرعتونه كولوا ردوو عليه عمي مااااات اباوع لرضا نزل راسه ورفعه عليه وعيونه تدمع
رضا : بس امي لاتسمع لان بسرعه تنقهرر وموزين عليهه القهر
ياسمين : راح للغرفه رضا ودخلو للبنات وخبروهن جدكم ماات البقيه بحياتكم وهنه خطيه ظلن يبجن ويلطمن على روسهن كطعن روحهن خطيه ورضا سد الباب كال لاتسمع امي وتتخربط بهل الليل
وصاحلي عل صفحه
رضا : امي تعشت لو لا
ياسمين : عشيتها وانطيتها دواها بس الحبايه مال القلب ماانطيتها لان ماعرفته
رضا : هاا عفيه زين سويتي هسه اروح اشوفها اذا كاعده انطيها الهه بس كون ماتسألني وتحقق وياي على عمي
ياسمين : طلع رضا من الغرفه ودرت اباوع للبنات يكسرون الخاطرر تالي كل شويه وگالن نريد نروح يم امي احنه شعدنه ظالين هنا
رضا : اجيت لغرفة امي فتحت الباب على كيف وشفت امي تتگلب بعدهه مانايمه بسرعه دارت راسها وسألتني حجيه خاتون : هاا يمه رضاا اجيت من عمك شلوونه وشلون صحته
رضا : يمه على الله بعده تعبان بلكت الله للصبح يصيرر زين يمه شربتي الحبايه مال القلب
حجيه خاتون : يمه ماادري يابعد امك دايخه وماادري ياسمين انطتني لوو لا
رضا : لا يمه ياسمين تگول ماعرفته لان دوه واجد هسه انا اشربج حليب وانطيج الحبايه انطيت امي دوه وشويه ونامت سديت الباب على كيف ورحت يم بنات اخووي مابطلن بواجي وخليت ياسمين يمهن و رحت اتمددت بغرفتي شويه لان الساعه بالوحده هم وراي روحه للفاتحه ماال عمي عاد انام كم ساعه
نمت ماحسيت من التعب كعدت 6 الصبح
رضا : ياسمين صباح الخير يعمري كعدي سوويلي جاي وريوك لان مستعجل وراي فاتحه وفره
ياسمين : اي كلبي صباح النور ان شاء الله كاعده غسلت وجهي ورحت صليت الصبح ورحت بسرعه للمطبخ سويت ريوك لرضا بالعجل لان مستعجل يريد يروح وطلعتله الدشداشه السوده
هوا بسرعه تريك ويريد يطلع من الباب ورجع وباسني وباس راسي
رضا : حبوبه ديري بالج على امي وانطيها دواهه
ياسمين : احطها بعيوني لايضل بالك
رضا : افيش ماشبعت منج هيه كم يوم وراح يخلصن بالفاتحه حظي واعرفه بس گلبي كله يمج وافكر بيج دوم لوبيدي اكابلج ومااطلع كلش
ياسمين : فدووه لكلبك واني وياك وين متروح
يحفظك الله بس رضا والبنات خطيه منو ياخذهن
رضا : خلي اخوي موعنده سياره هوا يجيبهن يلا الله وياج قفلي بابج ونامي
ياسمين : انشالله الله وياك يبوي ماينشبع من حجيگ الله يحفظك يبعد الروح خلي انام كلش نعسانه دخلت للغرفه ونمت ومافزيت اله على صووت عمتي وبسرعه كمت ذبيت الربطه على راسي ورحت شفتها كاعد عل الجربايه ألي بالحوش
ياسمين : صباح الخير عمه
حجيه خاتون : صباح الخير يمه شنو رضاا وين بعده نايم اني ظليت امتمت بالحجي كتله لا كعد من الصبح ورراح للمستشفى يشوف عمه
حجيه خاتون : والبنات وينهن اشو مالهن حس وحجرتهن مسدووده
ياسمين : ظليت صافنه شنوو اگلهه ياربي خاف اگلهه وتتخربط عليه واذا ماااحجي هم تكلي اجذبين علي واني هم اخاف عليهه خاف تتخربط ومحد بالبيت من الولد اباوعلها تفرك بأيديهه
حجيه خاتون : عمج زاهد هم مااجه هاي لازم اكوو شي صايرر
ياسمين : واني خايفه شنو احجي وحدي بالبيت والكل بالفاتحه يعني اذا صار بيهه شي يگلوولي انتي المسؤوله ظليت محتاره سكتت شويه وكتلها
ياسمين : عمه ماادري وين راحوو بس كالو للمستشفى رايحين
حجيه خاتون : جا هما الغمان مايكولون ميت ليش عود حسبالهم انا ماادري
ياسمين :اني فكيت عيوني لا لاعمه منو يكول ميت هما عنده بالمستشفى
حجيه خاتون : جا ليش البنات راحن لبيت جدهن جان اجن سلمن عليه وكالن احنه راح نروح راحن بسكات يردني مااسمع
ياسمين : عمه حبوبه لاتقهرين روحج بعدنه كلشي ماندري سويتلها كلاص حليب وحطيتلها شويه گيمر وريكتها وانطيتها دواها رضا علمني عليه ورحت للمطبخ نظفته وعمتي مارتاحت كل شويه تروح وتجي كلبها حاس رحت يمها كعدت
ياسمين : عمه شنو اسويلج غده
حجيه خاتون : كلشي مااريد لاتعبين روحج يمه مااشتهي العسل هسه هذولي وين راحوو ولوو وخلونه وحدنه مانعرف السالفه ساسهه من راسهه
ياسمين : ههههه عمه شنو ساسهه من راسهه
حجيه خاتون : يعني يمه مانعرف اصار ماصار لو ردناهم مانلگه ولا واحد منهم واذا مانحتاجهم تلگيهم مثل النمل داير مادايرج
ياسمين : ها هسه فهمت عمه راح اسوي شي خفيف عالغده تمن وروب وعدنه رطب نعمه فضيله من الله
حجيه خاتون : يمه بكيفج شماتسوين نعمه من الله وهم هوا يهو يشتهي يأكل يايمه خلي ارووح اتوضئ مابقى شي على الصلاة واروح لحجيرتي ارتاح
يتبببببببع............
أنت تقرأ
امي والزمن 💔
Fiksi Umum🌸 استفد من جميع الناس ، الكبير والصغير ، العالم والجاهل ، ولا تحتقر رأي أحد مهما كان ، فقد يكون لديه من سداد الرأي ما يفوق تصورك. 🕊🌺
