الحـــب رغماً ❤️😊
يقولوا ان الحب يغلب في كل شي مهما كان الشخص سيئ او كويس اسمر ابيض الحب مايعرفش الحاجات هادي مرات تبدي انتي من عيلة فلوس وتتعلقي بواحد على قد حاله و مرات العكس هادا اللي نعرفه لاكن روايتنا ماتحكيش على الحاجات هادي ح تعرفو على شن تتكلم......و طبعاً ح تقروا حاجات مش زي ما احنى عايشين ح تكون في ناس مشهورة و مستشفى معروف في البلاد اقروا و تخيلوا ان الحاجات هادي صايرة في بلاد تانية لان ممكن الحاجات هادي تكون مش موجودة في ليبيا. .... و زي كل ديما في بداية كل بارت من رواياتي تكون في عبارة تتعاود لآخر بارت و العبارة هادي....
-(الحـــب يغلب كل شي) - ❤️
يقين :تبكي و تحاول تهرب من محمد راجلها اللي بعمر بوها وهو يجري وراها على كبر الحوش :ارجوك عمي لوسمحت ماتقربش مني....
محمد : من عمك انا راجلك ماتبينيش نقرب منك لأنك مش بنت ولالا....
يقين :لالا لالا مش هكي انا بنت وحق ربي بنت....
محمد:مش بوعيه :تعاالييي قتلك...
(وشدها قعد يضرب فيها )
قبل ساعتين :)
قبل اسبوع :-
جي محمد طلب يقين من بوها مقابل ان يعطيه فلوس و طبعا بوها أكرم عنده الفلوس هي كل شي وافق بوها وقررو ان العرس بعد اسبوع ومحمد هادا متزوج وعنده سبعة اولاد انصدمتو صح مزال الصدمات ماتكملش....مرو الايام ويقين توصل بيها الدرجة تفكر بالانتحار وبعدين تستعود من الشيطان اليوم الفاتحة طبعاً مش مدايرين عرس حتى يقين لبسوها قفطان عادي وبسيط جدا........
يقين :انا يقين مواليد 95 كنت نقرا في الجامعة علم نفس حلمي بس نكمل قرايتي وقفوني على قرايتي و خلوني محبوسة في دار فوق الحوش لين جي عمي محمد صاحب بابا خطبني ووافقوا على طول اليوم بعد أربعة سنين طلعت من هديكا الدار اللي ملوحيني فيها زي (......) خلوني ساكتة... شديت التليفون اتكلم في الولد اللي انحبه من اول ماجي عمي محمد حكيتله ان في راجل كبير يبي يتزوجني لاكن ماقلتلاش اسمه لان هو بروحه ماسألش ومنها وهوا معاش يدور فيا و فاتني قعد يسمع فيا في كلام استغفر الله مع انه كان واقف في جنبي في الظروف اللي مريت فيها اليوم فاتحتي وانا مقعمزة نبكي نبعتله في مسجات ومايردش عيلتي متجاهليني تقول مش مقعمز معاهم حد بنتهم انا....
لقمان :الو يقين شن تبي اكتر من مرة انقولك معاش تتصلي خلاص انتي اخترتي الفلوس تو ينفعوك.
يقين :تبكي :اسمعني لقمان افهم ان كل شي صار غصبا عني...
لقمان :كملتي ¿! انا حبيتك وانتي فضلتي الفلوس عليا خليني قاعد مع أمير توا مش فاضيين..
يقين :تمام باي انا ح ننساك زي ماانت نسيتي...
لقمان :و النبي ياسر دراما على اساس مضايقة يعني....
يقين :صكرت في وجهه ومسحت دموعها :ماحد يستاهل نبكي على خاطره حقير....
عائلة يقين :-
بوها :أكرم
امها:كريمة
خوها :يعقوب مواليد 93 ..
اختها :يسرى.... 99
اكرم :يقيينن يقيينن...
يقين :نعم بابا
أكرم :اطلعي راجلك يستنى فيك..
يقين :مشت لبست عبايتها وجت بتسلم على امها و بوها لطوها قدام خالاتها تقول عدوتهم شبحتلهم بعيون معبيات دموع و ترجى كأنها تقولهم خلوني اهني وديرو فيا اللي تبوه (قالت لنفسها بهمس) :ان شاء الله مايقربش عليك يقين مانبيش ندمر اكتر...
طلعت من الحوش و ماحد ودعها شبحت مرة اخيرة لحوشهم و مشت ركبت في السيارة و هي منهارة وصلو للحوش و عمكم محمد يشبحلها وعيونه قلوب قلوب خشت للحوش على طول غيرت بيجامتها و بترقد جاها عمكم محمد وهو يبتسملها يحاول يقرب منها وهي ادف فيه
أنت تقرأ
الحـــب رغماً
Randomرواية الحـــب رغماً تحكي على ناس حبوا بعض رغم كل شي صار معاهم حبو بعضهم هلبا لدرجة متيقدروش يسبيوا بعض و بما إن الحب يغلب كل شي ما حد يقدر يفرقهم.. 💜💜
