ما كنت مستوعبة الكلام الكان بقولو لي فارس كيف يعني نحنا أخوان و اشمعنا لما أحب يطلع البحبو أخوي 💔 أنا لي بحصل معاي كدا حسيت بعيوني اتملت دموع شلت شنطتي و طلعت ركبت العربية و بقيت سايقة بي تهور و ببكي و ما شايفة قدامي كويس لحدي ما طقشت العربية القدامي الحمدلله جات خفيفه بقيت بضرب في الدركسون و ببكي فيهو 😭 سمعت صوت زول بدق في شبك العربية نزلت القزز من دون ما ارفع راسي
_ يا أستاذة أنا الزول الضربتي عربيتو بس جيت أتأكد من إنك كويسة
رفعت راسي و لقيتو جمال قشيت دموعي بسرعة
جمال : فصال دا شنو العاملاهو في نفسك دا
_ جمال أنا تعبانة 😭
_ هدي هدي ممكن تنزلي تركبي في الكرسي التاني
_ لي ؟! واديني وين
_ واديك مكاني المفضل 😉
ركبنا و اتحركنا طول الطريق جمال كان بحاول يونسني لكن ما كنت قادرة أتكلم كنت بس بهز راسي و الغريبه إنو ما حاول يضغط علي عشان أوريهو القصة وقف العربية عاينت بالشباك لقيتو شارع النيل
فصال : لي وقفتنا هنا
جمال : أكتر مكان ممكن ترتاحي و ترمي همومك فيهو هو البحر أرح انزلي هو نزل قدامي و أنا قعدت افكر إنو هو لي بعمل معاي كدا رغم السويتو فيهو نزلت بعد مسافة وقفت و بقيت بتأمل في النيل و في منظر الغروب جمال كان ساكت و بعاين في النيل حسيت الجو برد شوية ضميت يديني مع بعض و أتلفت على جمال : أنا اكتشفت انو الدنيا ما دايرهو معاي
أتلفت علي و رفع حاجبو بإستغراب
_ من صغيرة شفت الويل إتولدت و لقيت أمي متوفية و أبوي مختفي و ما سأل مني و هسى أكتشفت إنو فارس أخوي 💔
_ كيف يعني اخوك
_ دي قصة طويلة ما قادرة احكيها بس المختصر بتاعها اني ما لي لزمة في الحياة دي
_ فصال كلنا في حياتنا بنمر بفترات صعبة بتاخد فترة و بتنتهي بس كل المفروض نعملو هو إنو نصبر مثلا شوفيني أنا خسرت اختي و صحبتي الوحيدة 💔 كانت أسوأ فترة من حياتي عارفة ( و ابتسم ابتسامه خفيفه باين فيها الحزن ) كنت كل ما أضايق بجي بقعد هنا في النيل مكان دنيا المفضل بقعد بتزكر في المواقف الجمعتنا هنا و بشتكي للبحر كل همومي
_ الله يرحمها ( عاينت لي ساعتي ) الوقت أتأخر جدو بعد دا بشاكلني
_ طيب أرح أنا الحاوصلك
_ توصلني بشنو نسيت عربتك الإتكسرت 😂
_ تصدقي نسيت
_ طيب ما مشكلة أنا الحأرجعك البيت
و صلتو البيت نزل و اتحرك على باب بيتهم و جاني راجع تاني : تعالي اشربي معانا الشاي عمتي لو عرفت انك جيتي بيتنا و ما دخلتي حتشاكلني
