كرونيك بعنوان💕 احببت _لقيطة💕

09

الحلقة التاسعة :
فرح : لا تأجلت للشهر الجاي ....و المحامي قالي لازملك على الأقل شهرين باه تفض الإجراءات راح نبقى على قلبك ...
فطوم : أمشي قلبي وجهك عليا بدلي جرودك و أرواحي عاودنيني في العشاء السي بشير عارض أصحابو ... مابقاش الوقت ....
فرح : دخلت للبيت الي نرقد فيها بديت نحي في قشي نحيت السروال و زدت البودي حتى ندور نلقى مراد في الجنينة واقف الدقيقة الي جريت باه نرجع الريدو هو دار على غفلة و شافني هكاك و من زهري لصق الريدو ماحبش يرجع بقيت نجبد فيه حتى طيحتو على راسي غطيت روحي بالريدو هو راح و أنا بقيت بحشمتي في الأرض ماصبت نلبس قشي و لا نحكم راسي الي ضربتني عليه الباڨات حشمت و تبهدلت صعيب تعيش في دار فيها الذكورة ....أمور موش متعودة عليها لبست و خرجت كانت فطوم قريب تضربني كي طولت عليها و أنا ندعي في ربي ما نتلاقاش بمراد الي شافني بالدوبياس ثالث يوم تاعي في الخدمة ...
كانت الوليمة كبيرة جات نجوى خدمت الحلوى و المقبلات (نجوى 26سنة تخصص حلويات عصرية عنطها محل خاص بصح تجي كي تكون مناسبة )
و خالتي حليمة مرأة كبيرة تطيب أكل تقليدي هايل و الله يا الكسكسي تاعها يشهي تاكل صوابعك من وراه بداو المعاريض يجيو و أنا كانت خدمتي نوصل الماكلة للبوفي و نغسل المواعن الناس الي جات كلها شخصيات حتى نشوف عبد الرحمان داخل مانعرف علاه دخلت بعضايا و سيحت الشربة على قشي الحمد لله ماشافنيش يا زهري يا زهري واش درتي فيا ....
فطوم : هاااااي جات البهلولة مسيحة الشربة على قشها ماقلتلكمش ما تبهدلنا غير هي!!
خالتي حليمة : خليها أو خلي الطفيلة صغيرة مسكينة الي قدها مازالو يلعبو البرة ....روحي تروح بنتي بدلي قشك....أسمعي انتي اللبسة تاع إكرام مازالت ؟؟
فطوم : ماعلاباليش ...و ديجا ماتجيهاش ...
رحت وين قالتلي خالتي حليمة جبدت قش إكرام (وحدة كانت تخدم و بطلت ) بصح كي لبستو حسيت روحي عريانة خاتر كان عبارة عن مايوو تاع بحر ..جاتني لاروب فوق الميني بشوي و ضيقة بالسيف قفلت السنسور رحت كملت خدمتي الحمد لله فات العشاء على خير الحاجة الوحيدة الي وترتني هو عبد الرحمان الي مانحاش عينيه مني و تلفلي المشية.......