كرونيك بعنوان💕 احببت _لقيطة💕

15

الحلقة الخامسة عشر :
فرح : يكتت موش فاهمة واش يقصد و مراد حاط يديه على راسو و ساكت.
خرج معاذ و مراد عينيه معبيين بالدموع كان يسكت فيا حتى لقيت روحي نسكت فيه ...واش قال معاذ موحال تقتل مستحيل عبد كيفك يكون مجرم راهو غاير منك برك أحكيلي مراد ...
مراد: كانت أكسيدون تمنيت كون أنا الي متت في بلاصتهم .
فرح :كان هذاك الكبرياء و الرزانة الي نعرفهم فيه كل راحو كان يبكي كي الصغير و انا قلبي تفتت عليه كان في حضني يبكي و كان قلبي يقلي هذا هو الي تحبيه هذا هو الي تبغيه ...كان راح يروح بصح أنا قتلو أبقى معايا ماتخلينيش علابالي عيب علابالي الناس راح تهدر عليا بصح نعرف أنهم ندير ولا مانديرش راح يقولو الكبولة هذيك ق*** مالا خليني نحس الحنان و أنا أكبر إنسانة محرومة في الدنيا كان هذاك الفوتاي الي في الصالون شاهد أنو ماصرى بيناتنا والو كنت متخبيا بين ذرعيه راقدة على صدرو كنت متأكدة أنو كان محتاجني أكثر ما كنت محتاجاتو ....
06:00تاع الصباح الوقت باه نروح للخدمة فقت هزيت راسي و بقيت نشوف معاه و طايح شعري على وجهو ....و فاق من النوم حكملي راسي جبدو لصدرو .... و قالي ماتروحيش ...
فرح : مانقدرش و الحاج شكون يعملو الفطور فطوم راحت ...
مراد : هيا نوصلك ...
فرح : .....بصح عيب الجيران ...
مراد : مالا نروح أنا و انتي ألحقي ....
خرج مراد و انا كنت طايرة مع السحاب إحساس الحب هذا واش مليح صح ماقالهاش مانطقهاش بفمو بصح كل شيء قالوه عينيه ....
فات الصيف و بدات القراية و سجلني مراد عندو في المدرسة واش صعيبة نكون قريبة ليه و في نفس الوقت مانقدرش نهز حتى عيني معاه صعيبة نحب المدير تاعي الي عينين البنات كل عليه و هو يشبه لأبطال القصص الخيالية ....بدات الغيرة تاعي تزيد و أنا نشوفو يهدر مع المعلمات و يضحك و أنا مازلت الطفلة الصغيرة الي عمرها 18سنة و مازالت تلعب ...
و بديت نستعمل في الطرق الملتوية باه نخليه يتعلق بيا ماكانش يهمني حتى واحد المهم هو ...أنا كنت حبست الخدمة في القصر على جال القراية بعت ذهب ماما عقيلة و خلصت بيه شوي و حكمت شوي نصرف فيه ...
معاذ و فطوم مابقاوش مع بعضاهم بعد ما فاق بيها هي الي عملت الفيديو و كان يتلاقاني في الطريق و يحاول فيا نسامحو...