رواية_ #جروح_القلب
#للكاتبه_هميلو ,,
الحلقة 13/
قراءة ممتعه /
وسمير قرر ايطلع فرحه وحكا لبلقيس اللي سكتت وماردت بشي وهو شك بحبها لعدي او العكس بس خبا في قلبه وحكا لأشرف اللي وافق عالفكرة وقال: خلاص يوم واحد في القاعه واتم الحكايه وبنت عمك وجاتك 😒
سمير : خلاص يوم واحد وحفلة مشتركه وثاني يوم بنسافر بيها برا ,,😊
اشرف : على بركة الله ,
وطلع سمير وهو فرحاااااان ,, ووصل لحوش هله وخبر هله وحكالهم وامه سألاته عليش خلاهم يعجلو بالفرح وتحجج بانه عنده شغل بره وبيسافر بيها ووافقت وقعدو ايجهزو لفرحتهم. بالرغم انها حتكون عالساكت عشان الحاجه مريم الله يرحمها ,,
وعدي وصل لحوشه وقعد حاير وغامة عنده ومتضايق وجاته امه لقاته مقمعز في داره ,,
فوزيه : عدي ? كنك حبيبي ?
عدي بضيق : مافي شي ,, متضايق اشويه ,,
فوزيه : عشان الصلح اللي صار ?
عدي : لالا ,,, بالعكس افرحت بعد انحلت القصه واطمني مش احمد اللي اسبب في قتل باتي الله يرحمه ,,, تقريبا عرفناه صاحبنا ,, وحنبشروك اقريب ,
فوزيه بلهفه : من طلع قول ياعدي ?
عدذ : مانقدرش نحكي توا نين نتأكدو بس ,, وبعدها وراسك نقولك وناخذ بثار باتي وتشوفي ,
فوزيه بحزن : ربي يستر ,, اهم شي اترد بالك علي روحك ياغالي ,
عدي : ماتخافيش ,,, ادعيلي بس ,
فوزيه : عدي بنسألك سؤال !!
عدي : اسألي ياست الكل ,
فوزيه : انت في عقلك وحده معينه ?
عدي سكت وشاف لأمه بأستغراب ,,😕
فوزيه : بصراحة القيت وحدة وعجبتني ,,, ونبي نخطبها لكي ,, واذا مافيش وحدة في بالك ,, من بكره انكلم امها ,, شن رايك ?
عدي غمممت عنده ووقف وبعصبيه قال : بس انا مانبيش نتجوز ياأمي ,, وسكري عالموضوع ,😠
فوزيه بلهجه عاليه : وعليييش ? ديما اتقولي هكي ونا مليت ,,, نبي نفرح بيك وانشوف اولادك ,,, راس اوليد واحد وضحيت وكملت عمري عليك ومن حقي انجوزك ونفرح بيك ونشيل اولادك بين ايديا ,,, ولا ترجه نين انموت وتتجوز ?😥
عدي قرب من امه وباس راسها وقال : بعيد السو عليك ياامي ,,, والله انموت وراك كان اتسيرلك حاجه ,,, مستحيل نتحمل فيك حاجه ,,, بس ... انا ... انا قصدي توا مانفكرش في الزواج نين ناخذ بثار باتي قبل .. والا انتي شن رايك .. عشان انكون رايق ومايشغلش بالي شي ,
فوزيه برضا : خلاااص ... بس اول مايتم موضوع اللي قاتل باتك الله يرحمه ,,, بنخطبلك وانجوزك باهي ?😒
عدي هز راسه بالموافقه ,, وباس يدها وطلع وهو حاسس بضيييق وانه مخنوق وركب في سيارته ورن علي عمه فارس ومشاله طوووول ,
انجو لبلقيس اللي سارحه وعلامات الحزن باينه في وجهها ,, خشت عليها مرت عمها ,,
فاطمة : انتي ياحنة ,, صبي ساعديني عالحوش هيا ,,😒
بلقيس شافتلها وقالت : بس نا مانقدرش رجلي توجع فيا ,😔
فاطمة : ايوا ايوا ,,, ديري عليا الطروح ,, بعد درتيها حتضمي الحوش واطيبي العشا شن رايك ? والا حتكون ليلتك ليله راه ,, مانيش ملزومه نخدم وانطيب وانضم لكم مش خدامة لكم ,
بلقيس استغربت من كلامها وقالت : بلييز مافيش داعي للعصبيه ,, وبعدين تقصدي علي من ?انتي اطيبي واتضمي لراجلك وعيالك مش ليا ,
فاطمة قربت من بلقيس وبدت اتلعلع ,,
فاطمة : ياعييييني ياااعييييني شن قصدك يابنت بدور ,, وانتي وين رحتي من هضا كله ? انا نضم ونخدم راجلي وعويلي بكيييفي لكن لما اتكون وحدة بليييدة ولصقه قاااعدة معااااي وعلي قلبي اذا طيبت بنوكلك واذا ضميت انتي قاعده معايا ,,, فلازم تخدمي واتسلكي حق قعدتك ووكلتك معانا ,, انا مش مجبورة انعانيك وانتي اتشاركي فينا في حوشنا والا نسيتي ,
بلقيس لفت وجهها للروشن وقالت : والله انا قاعدة في حوش جدودي الله يرحمهم وبابا ,, ومش قاعده في حوشك ,,
وفاطمة بتفتح فمها وتسمع صوت رجولي عالي قال : فااااااااطمة 😠
التفتت هي وبلقيس اللي مقمعزة عالسرير وايشوفن اشرف ,, بلقيس بدت تررررعش وخافت والدموع اجمعن في اعيونها وحست بان نهايتها قربت وفاطمة تلسونت لأشرف ودارت وجه الحمل الوديع وقعدت ادير في جو الدموع وقالت : شروفا حبيبي ,, تسمع في بنت خوك شن اتقول ,, عشان قلتلها ساعديني اشويه نا اتعبت بين الحوش والعويل ,,اتقولي هضا حوشي وحوش اجدودي وبابا ومنيش خادمه وانتي تخدمي لعويلك وراجلك وهكي ,,😔
اشرف شاف لمراته وبعدها شاف لبلقيس القيها نزلت راسها وترررعش من الخوف وانكمشت علي روحها والدموع بدن ينزلن ,, قرب منها وشافلها وعمتكن فاطمة فرحااانه وبتشمت في بلقيييييس وعلي غفلة طااااااف 👋 كف ينطبع في شدوق فاااطمة انعنها ماترد ,,وانفجعت ومن الفجعه نين طاحت وحطت يدها علي خدها وبصوت عالي قالت : فاطمة:ااشششررررفف ? تضربني ناااا ? 😨
اشرف بصوت عالي نين خافن هن الاثنين : بلااااش كذب واتقي الله في نفسك عندك اصغار مش خايفه عليهم ولا كيف ? تكذبي عليا ديما ونا انصدق فيك بس اليوم لااااا مش كيف ماتبي ايسير 😡
فاطمة : عللليييش بشنو كذبت عليك ? بنت خوك.هذي من يوم جت وهي معايا ونا مش مجبورة بيها مفروض اتصبي وتخدم اتساعدني 😠
اشرف : هي اللي مش مجبورة بيك ولا بيا ولا بعويلنا ,, خلاااص بعد كم يوم حتتجوز وتخدم راجلها وانتي كيف يسير يعني بتعيطي في من بيش يخدم معاك ?
بلقيس بعد سمعت كلام عمها استكت 😨 وخافت من لحظة اللي بتتجوز فيها من سمير ,, ونزلت راسها واشرف طلع قدامه مراته وهي تبكي ,,,😭
ومرن الايام والكل متوتر وصابرين نقمت علي بلقيس وصدقت كلام راجلها واتصلت بخوها وتعاركت معاه واشرف هزبها وسكر في وجهها ,,
وسامي مستمر ايدز في رسايل لبلقيس شي تهديد وشي رومانسي وشي مانقدر انقول عليه وبلقيس تتحسب عليه وبعد يتصل بيها سمير مرة اترد ومرة اتفوت فيه وهي متضايقه ,,, بلقيس مشاعرها متخلبطه سمير تشعر معاه بالامان والراحه بطيبته وهدؤه ودفء كلامه وحنيته 💜,,وفي نفس الوقت عندها مشاعر اتجاه عدي وهي خايفه ايكون حب ,,,❤
وقررت في يوم وهي مروحه من مدرستها بعد تحسنت رجلها شافت سيارة عدي وفرحت وخففت في طريقة مشيتها لعند وصل فيها عدي ونزل قزاز سيارته وقال : بسرعه عالحوش ,, بلا رخوة ,
بلقيس ابتسمت ولاول مرة تبتسم لعدي وقالت بهدوء. : وانت عليش تمشي ورايا ? تونس فيا ?
عدي ابتسم عالجنب وقال : بكل تي كلا انتي ثقه ** لا كنت بالصدفة عند واحد صاحب وشفتك ,, حبيت ننصحك تخفي روحك في المشيه عشان مايسيرلكش الا فات ,,
غمت عند بلقيس وشافت قدامها وقالت : اطمن ,, انا ماشيه امروحه وفوني معايا وحنتصل بسمير يجيني لو صار موقف غيره و هو مش حيقصر ,
عدي حس بغيرة لعبت فيه بعد سمع اسم سمير وقاللها : تم ,,, خلي فونك واتي بس للطواري ,,, وعلي فكرة لاباس علي رجلك ,
وصطرب السياره ورااااح وماخلا غير عجاجات وراه وبلقيس حست في قلبها وجع💔 بس كابرت وروحت وتفادت تتواجه مع مرت عمها وخشت لدارها غيرت وتوضت وصلت وخشت للمطبخ خذت سندوش جبنه وهريسه وطاسة عصير وخشت للدار تاكل ماتبيش اتشوف مرت عمها النكديه ,,,
وقعدت تذكر في كلام عدي وقالت لروحها : انا كني بس ,, انا مخطوبه لسمير وهو انسان اكويس وجذاب وحنون ,, ومتأكده انه حيشيلني في عيونه ,,
وبعدها تنهدت وقالت بحزن : عدي مغرور ,, انا متأكده انه في مشاعر اتجاهي بدليل خوفه عليا وديما ايتبع فيا ,,, قال صدفه قال ,,وكان عند واحد صاحبه ,,😒 علي من ياشاطر ,,😏
وقعدت علي هالحاله تفكر وتخمم وهاملة سمير اللي مكبببببد عليها تكبيد رسمييي ,,,
المهم مرن الايام والاسابيع والشهور وبدن الامتحانات النهائيه وكملتهن في توتر وخوف ,, وسمير طبعا اجل الفرح بحكم اتفق هو واشرف علي موعد الفرح ,, بعد الامتحانات وفي يوم اشرف خش علي بلقيس وقاللها : بلقيس نبيك في موضوع مهم ولازم تفهميني زيييين وتفكري في اللي بنقوله لكي ,
بلقيس بخوف : نعم عمو تفضل ,
اشرف : طبعا حكالي سمير علي صار بينك وبين سامي راجل عمتك ,,
بلييس بخوف : والله ياعمو هو اللي ايضايق فيا وماقدرتش نحكي خفت علي عمتو تطلق بسببي ,😧
اشرف بهمس : عااارف ومقدر وضعك ,,وفهمت كل حاجه بس الكلب هضا قال كلمة سمعها عدي وسمير وخلتنا انشكو ان هو اللي فتن بين عيلتنا وعيلت عيت سالم.😐
بلقيس : حتى نا بعد سمعت كلامه ,, شكيت انه هو ورا اللي صار وخلا بابا يتغرب ونعيشو في الغربه بسببه ,
اشرف : عشان هكي بنطلب منك طلب مهم ,, وياريت توافقي وكوني واااثقه اني مستحيل انضرك ,
بلقيس شافت لعمها وقالت : شنو عمو ,,,ونا متأكدة انك مستحيل تأذييني ,
ياترا شن يبي اشرف من بلقيس وشنو حتكون ردت فعلها ,,,
هااانت هاااانت 😌✋ بكرة الاخيرة انتظروووني ,
اسفة عالتأخير لظروف صحية ،
