مطلقه فى سن العشرين

الحلقه السابعه و العشرون

أريج وقعت على الارض رجليها اتلوت فضلت تصرخ
أريج بصوت عالى: الحقونى اهاااا رجلى
شهاب اول ما سمع صوتها طلع يجرى عليها و الكل طلع يجرى وراه
شهاب: مالك يا قلبى ايه وقعك كده
الكل بص لبعض بأستغراب ماعدا حنين
أريج: رجلى وجعانى اوى الحصان رمانى و طلع يجرى
شهاب: طب تعالى نروح المزرعه
و جه يشيلها
يزيد: لا انا اللى هشيلها و كلهم راحوا وراهم سهام اول ما لاقيت يزيد يشيل أريج و جى طلعت تجرى عليهم
سهام: مالها بنتى
يزيد: وقعت من على الحصان و رجلها وجعاها
سهام: محمد اطلب دكتور بسرعه
محمد اتصل بالدكتور و جه كشف و ربط رجليها
الدكتور: متقلقوش ده جزع بسيط انا كتبتلها على مرهم تدهنه و هتبقى تمام
محمد: تمام شكرا يا دكتور
و مشى الدكتور و راح يزيد يجيب المرهم
سهام: انا فى مره هيجيلى ساكته قلبيه من الخضه عليكى كل شويه
أريج: بعد الشر عليكى يا مامى
حنين بضحك: احنا نسميكى أريج حوادث من كتر الحوادث اللى بتحصلك
أريج: اخص عليكى مكنش العشم
أيسل: حقيقه كل مره بتخضينا
أريج: ايوه عشان اتأكد من غلاوتى عندكوا
فاروق: حمدلله على سلامتك يا بنتى
أريج: الله يسلمك يا أونكل
جه يزيد و سهام خدت منه المرهم و دهنته على رجل أريج و الكل بعد كده نزل تحت و أريج فضلت فى الاوضه و مضايقه ان شهاب متكلمش معاها ولا قعد معاها و نامت
بالليل أريج صحيت من النوم خدت شاور و حنين جت قعدت معاها
أريج: انا مليت تعالى ننزل تحت
حنين: لا خلينا شويه الكل اصلا طلع اوضه
أريج: يا ستى مش مهم خلينا ننزل
حنين: لا لا خلينا قاعدين هنا
أريج: انتى مش عايزانى انزل ليه
حنين: عادى
شويه و تليفون حنين رن فضلت شويه قاعده
حنين: يلا ننزل
أريج: يلا
حنين: استنى حطى دى على عينك
أريج: ايه ده انتى هتخطفينى
حنين: مالكيش فيه حطى البتاعه على عينك و انتى ساكته
أريج: همشى ازاى يعنى
حنين: انا همشيكى
و فعلا أريج حطيتها و حنين مسكتها و نزلوا تحت و الكل كان واقف مستنيها و حنين شالت البتاعه من على عينيها
الكل: Happy birthday
أريج: الله ايه المفاجأه القمر دى انا كنت ناسيه عيد ميلادى
حنين: ده تخطيط شهاب و مخلاش حد فينا يقولك حاجه عشان المفاجأه متبوظش
أريج بأبتسامه حب: ميرسى يا شهاب
محمد: يلا نغنيلها يا جماعه
الكل: يلا
و غنوا ليها كلهم و جت أريج تطفى الشمع
حنين: لا ايتنى اتمنى امنيه
أريج بصت لشهاب و غمضت عينيها و اتمنت الامنيه و طفت الشمع و فجأة شهاب نزلت على ركبته قدامها
شهاب: انتى عارفه انا بحبك قد ايه صح اعترف انى زمان كنت غبى و ضيعتك من ايدى بس انا كنت من ساعة ما اتولدتى و حبى ليكى كان كبير كل ما تكبرى كنت بعرف اغبى مشاعرى بس بعد كده بقيت طايش و عايز اعمل زى شباب اليومين دول فقررت ابعدك عنى لانى كنت خايف من طيشى عليكى و فوقت بعد فوات الاوان بعد ما اتجوزتى و مشيت فى طريق غلط بس بعد كده لاقيتك ظهرتى تانى قدامى بس و انتى سنجل فرحت وقررت انى هرجعك ليا و هفضل احبك لاخر عمرى و بعدت عن طيش. و اوعدك دلوقتى قدام الكل انى هحترمك و هحافظ عليكى و اخليكى ملكه على عرشك و ملكه لقلبى و عمرى ما ازعلك. أريج تقبلى تتجوزينى
أريج كنت بتسمع كلامه و هى فى حاله مش عارفه معناها حاله لا تحسد عليها فعلا كانت فرحانه و مبسوطه و مصدومه و خايفه
أريج هزت رأسها: موافقه موافقه موافقه
شهاب لبسها الخاتم و بعدين حضنها و لف بيها و الكل سقفلهم
احمد:و هنبقى نسيب يا صديقى
محمد: انا يشرفنى نسبك يا صديقى
سهام: مبروك يا ولاد
نها: مبروك يا حبايب قلبى
و الكل بارك ليهم
معتز و مهاب: احنا هنتجوز امتى
احمد بمكر: انا بفكر نجوزكوا بعد سنتين ايه رأيك يا فاروق
فاروق: فكره بردو اهو اكون شبعت من بنتى
مهاب و معتز بصوا لبعض بصدمه و بعدين معتز اتكلم
معتز: نعاااااام و الله اخدها و اهرب و محدش هيعرف مكانا
مهاب: و انا هاخدها و اتويها فى الجبل
محمد: ايه يا ولاد امسكوا نفسكوا شويه
معتز: مستحيل
احمد: يابنى فضحتنا الله يفضحك
معتز: معلش يا بابا بس قرروا عشان مصورش قتيل
يزيد: الفلل هتكون جاهزه الاسبوع الجاى
محمد: يبقى نعمل فرح الاولاد الاسبوع اللى بعده
مهاب: انا موافق
معتز: و انا كمان موافق
احمد: خلاص اتفقنا البنات بقا جهزوا الفساتين بتاعتكوا
وئام و أيسل: ماشى
شهاب: و بعد فرحهم بيومين كتب كتابنا
أريج: أيه السرعه دى
شهاب: ولا سرعه ولا حاجه ولا انتى مش عايزه
أريج: لا عادى
معتز: و حضرتك يا عمو فاروق لازم تيجى تعيش معايا انا و أيسل انا عارف انكوا متعلقين ببعض اوى و مينفعش تفضل لوحدك
احمد: فعلا كلام معتز صح مينفعش تبقى لوحدك
فاروق: و ليه ابقى عله عليهم
معتز: حضرتك زى بابا بالظبط و عمرك ما هتبقى عله علينا و بيتنا هو بيتك بالظبط
أيسل: عشان خاطرى وافق يا بابى انا فعلا مش هعرف أعيش من غيرك
فاروق: ماشى خلاص موافق
الكل كان فرحان و مبسوط من التطورات اللى بتحصل فى حياتهم و رجعوا القاهره و كل واحد رجع لشغله و اعلنوا فى الشركه خطوبة أريج و شهاب و أريج قررت تعمل للعرايس فساتينهم و كانت معظهم الوقت مشغوله و حابسه نفسها فى اوضتها و بعد ما خلصتهم وريتهم للعرايس
أريج: ها ايه رأيكوا
وئام: جمال اوى بجد
أيسل: تحفه يا قلبى تسلم ايدك
حنين: عقبال فستان فرحك يا قلبى
أريج: ميرسى يا قلبى
و عدى اسبوع و الكل نقل الفلل بتاعته معتز كان بيظبط ديكور فيلته و كذلك مهاب و شهاب و يزيد كانوا بيساعدوهم
شهاب: اتمنى الاقى المساعدات دى فى فرحى
مهاب: انوى بس معاد الفرح و انت مش هتلاقينا
شهاب: ده العشم بردو يا صديقى
يزيد: عارف يا شهاب لو فى يوم زعلت أريج هقطع رقبتك
شهاب: و انا اقدر ازعل قلبى مستحيل ازعلها يا عم بس انت وصيها عليا بس
يزيد: لا اختى تعمل اللى هى عايزاه فيك و انت متتكلمش
شهاب: واضح انك بتحبنى
يزيد: مش واضح حبى ولا ايه
معتز: و انت يا مهاب اوعى اوعى تفكر تزعل توأمتى القمر
مهاب: دى فى قلبى يا عم مقدرش
معتز: ايوه كده شاطر بتسمع الكلام
مهاب: يا شيخ اتنيل
شهاب: متقلقش يا مهاب انا موصيها تظبطك و تعلمك الادب
مهاب: ده العشم بردو يا صديقى
و عدى اسبوع و قبل الفرح يوم البنات كانوا قاعدين مع بعض
أيسل: انا متوتره خالص
وئام: و انا جدا جدا
حنين: ده قلق طبيعى بس هيروح مع الوقت
أريج: انتوا بنات فافى اوى بجد
حنين: ما بلاش انتى
أريج: احم اتلمى
أيسل: انا خايفه اتقعبل و اقع
حنين: لا متقلقيش مش هتقعى
وئام: انا خايفه اجوع و معرفش اكل
أريج: همك على بطنك انتى
وئام: طبعا بطنى لازم تبقى مبسوطه
أريج: ايوه طبعا
حنين: كل ده بكره هيتنسى و يلا كل واحده تتخمد
و الكل نام
تانى يوم الكل كان مشغول بتجهيزات و الكل متوتر
العرايس كل واحده لبست فستانها و الكوافيرات حطوا الميكاب و كان شكلهم قمر و بعدين أريج و حنين لبسوا فساتينهم و حطوا ميكاب و كان شكلهم قمر و جم ابهات العرايس كل واحد خد بنته و نزل بيها و العرسان انبهروا بجمال عرايسهم و خدوهم و نزلوا يرقصوا سلو
شهاب بيبص لأريج بحب: تعرفى ان جمالك غطى على العرايس
أريج بأبتسامه حب: يا سلام
شهاب: ايوه انا شايفك احلى واحده موجوده فى الفرح
أريج: تعرف انا بردو شيفاك احلى شاب فى الفرح
شهاب: بحبك يا أريج
أريج: و انا كمان بحبك يا قلب أريج
و بعدين أريج مسكت المايك و غنتلهم اغنيه صاحبتى و عشرة عمرى
اه يا قلبي ع الجمال قمر مشاء الله حطها في عينك دي اغلى بنت في الدنيا يعني تتدلع ومالو ما القمر عارف جماله مش هتبعد عنها يوم ولا ساعة ولا ثانية اه يا قلبي ع الجمال قمر مشاء الله حطها في عينك دي اغلى بنت في الدنيا يعني تتدلع ومالو ما القمر عارف جماله مش هتبعد عنها يوم ولا ساعة ولا ثانية دي صاحبتي وعشرة عمري وبينا سنين من صغري وانا ايدي في ايديها تعدي سنين فرحة باينة من عينيها لايق الابيض عليها، والعريس ايده في ايديها الله على جمالها اه يا قلبي ع الجمال قمر مشاء الله حطها في عينك دي اغلى بنت في الدنيا يعني تتدلع ومالو ما القمر عارف جماله مش هتبعد عنها يوم ولا ساعة ولا ثانية دي صاحبتي وعشرة عمري وبينا سنين من صغري وانا ايدي في ايديها تعدي سنين فرحة باينة من عينيها لايق الابيض عليها، والعريس ايده في ايديها الله على جمالها.
و بعد كده الكل رقص سلو و بعدين اشتغلت اغانى شعبى و الكل رقص و هيص بعدين كل عريس خد عروسته و راح عش الزوجيه
#نهايه_الحلقه_السابعه_والعشرون
#Rawan