رواية المافيا

الحلقة 6

رواية المافيا😈
للكاتبة: لولو حبيب❤ الحلقة:6
___________________________
عندي اني اول ماطلعت امشيت للبحر كعمزت علي الشط قعد نشكي للبحر ونبكي
بعدين ولعت سيارتي وطلعت بيها درست السيارة وقعدت مكعمزة فيها
اني: هادا الشارع لعبت فيه هادا الشارع كبرت فيه هادا حوشنا اااااه ليا سنة مجيتاش هادا الحوش الي كبرت فيه وتربيت فيه لكن الحوش هادا اكبر جرح ليا الحوش هادا حطملي احلامي وكسر قلبي واني حلفت معاش نحط فيه رجلي كان عزي ودلالي الحوش هادا بعدين انقلب وابدي اكبر كابوس وجرح ليا
نزلت من السيارة وكعمزت اعليها من قدام وقعدت نتفرج علي حوشنا ونبكي
خطم ولد: السلام عليكم
اني مسحت دموعي: وعليكم السلام
الولد بعد ماقدم وخر : صوت بنت ولا اني غالط
اني: اي بنت
الولد: اول مرة نشبح بنت طالعة في اليل
اني: به بطول عمرك
الولد: به يااختي روحي لحوشكم
اني سحبت المسدس: ليك دخل
الولد: لا وزيادة مسدس شني تسحابي روحك وداد انتي
اني تلفتت الي الولد
الولد: وداد
اني: علي
علي: عاش من شافك وين وين معقولة انسيتي الشارع بكل
اني: وين باقي الجماعة شني امورهم
علي كعمز علي السيارة: كلهم ديما يسالو اعليك ويدورو في اخبارك واستاحشوك هلبااا
اني: حتي اني استحشتهم شني صاير فيهم
علي: مودة تجوزت
اني: بالحق اتجوزت حبيبها هداكا
علي: اي
اني: واخيرا الي تجوزاته
علي: ايمن خطب
اني: مشالله
علي: والباقي قاعدين يقرو
اني: مشالله غبت سنة اتغير كل شي
علي: فقدنا واحد من مجموعتنا
اني: مني
علي: يزن
اني: خيره
علي: من بعد ماانتي هربتي قعد ممكن اسبوعين هكي وبعدين معاش نندرو اعليه وين ولا نعرفو حتي وين
اني: اني نعرف
علي: وين
اني: مكعمز عندي في المستشفي
علي: كيف
اني: ابدي يخدم تاجر اعضاء وديما اندير اعليه في مداهمة المرة هادي هوا ضربني بقناصة في وسط حوشي وبعدين واحد معاي ضربه واهو توا الزوز في المستشفي
علي: حرام ضيعتو روحكم الزوز
اني: الله غالب ماعندنا مانديرو
علي: خلي نمشي انادي الجماعة كلهم اكيد بيفرحو امنين يشوفوك
اني: لالا اني شوي وبنروح منبيش ادير دوشة في الشارع
علي: امشيتي الي اهلك
اني: لا.. علي شني قالو الناس بعد ماهربت؟
علي: ماقالوش ولا حاجة غلط بالعكس جو معاك وقالو الي شافاته مش شوي اصلا الجيران كلهم يعرفوك انتي شني وزعلو هلبا امنين عرفو انهم معاش بيشبحوك مرة تانية
اني: وعيلتي
علي: بالنسبة الي خوتك كرهوك هلبا وحتي قعدو فترة ايجو يسالو فينا بالك نعرفو اعليك حاجة لكن بوك
اني: نعرف بوي امي شني
علي: امك نفس خوتك في الحوش هادا الي قاعدين ايحبوك هما بوك ومرت خوك بس
اني: نعرف
علي: حتي اويس هرب
اني: اي جاني
علي: اعلاش مجبتيشي معاك
اني: امنين اويس قال شني صار في بوي طلعت من غير عقل
علي: الله غالب هوا ضحية زي ماانتي ضحية امك وخوتك
اني: لكن اني غبية ظلمته وخليته يبكي اعليا
علي: انتي الي شفتيه في الحوش هادا مش شوية وعندك الحق امنين هربتي بوك تو فترة ويتعود
اني: شكرا علي وقفتكم معاي مقدرتش نشكركم يوم الي ساعدوني
علي: معاش تشكرينه احني صحابك وجيرانك ولازم انساعدوك
مودة: علي هيا اني جيت بش نسهرو واحني بعتناك الي محل مش بش تكعمز تهدرز
علي غمض عيون مودة: قولي هادي مني الي معاي
مودة: هيا بنت
علي: اي قولي منهيا
مودة: منهيا
علي: وحدة اتحبيها هلبا وكانت اصغر وحدة في شلة شارعنا
مودة: اصغر وحدة كانت وداد
علي: شطورة ونحا ايديه
مودة بعياط: حي وداااااد
اني: اسسسسس منبيش حد يعرف
مودة جت حضنتني: استشحتك ياكلبة
اني: الف مبروك
مودة: الله يبارك فيك العقبة ليك
اني: تتجوزي ومتعزمنيش
مودة: قوللها ياعلي
علي: حاولنا نوصلو فيك مقدرناش
اني: عادي
مودة: هي تعالي نمشو بسرعة
اني: به اسسسسس من دون صوت
مودة: به
صقرت سيارتي
مودة: خيرها رجلك
اني: مضروبة بطلقة
مودة: احني هربناك وندمنا
اني: اعلاش
مودة: خشيتي في طريق غلط
اني: ههه عادي
امشينا
اني: قاعدين تكعمزو في نفس الجيهة
مودة: اي
علي: جبتلكم مفاجاة
كلهم: شنهيا
مودة: شوفو مني جي
كلهم بعياط: ودااااااااااد
اني: ووووه عليك فضح الزفت
كلهم قعدو يسلمو اعليا كعمزت معاهم
كلهم: وين استحشناك
اني: اهو جيتكم
كلهم يشبحولي وفرحانين
اني: الف مبروك الخطبة ياايمن
ايمن: الله يبارك فيك
اني: شني اموركم وشني جوكم
كلهم: تمام وانتي
اني: ماشية
علي: تتذكري فيها الشجرة هادي
اني تلفتت وقعدت نضحك: هههه مني ينساها هادي اكثر حاجة استحشتها في الشارع
كلهم: واحني
اني: هههه الشجرة استحشتها اكثر منكم
كلهم: 😂😂
علي: قداش لينا كاتبين اعليها اسامينا
ايمن: من امته وداد عمره 4 سنين
اني: ههههههه يعني توا ليها 14 سنة
ايمن: كانو احلي 14 سنة
مودة: وداد كنتي كل مانكعمزو اهني تبدي تقري في اسامينا
اني: ههه كاتبينهم بالترتيب
علي: اكبر واحد ايمن
اني: هههه وابديت نقرا من عالشجرة
اني: ايمن..علي..مودة..ياسمين..فؤاد..نرجس..يزن..وداد
مودة: اكبر وحدة في البنات
ياسمين: واصغر وحدة فيهم في العقل
مودة ضربتها علي ظهرها: خزي
نرجس: قلنا تتجوز تو تعقل لكن مصارش
كلنا: 😂😂😂
علي: مني هادا الي طالع من حوشكم
اني تلفتت وشبحت احمد وخوتي
اني: علي تقدر اتجيبلي سيارتي اهني بسرعة
علي: به هاتي المفتاح
اني مدتيله المفتاح: مانبي حد يعرف انه اني اهني او جيت بكل انسو انكم ريتوني به
كلهم: به
امشي علي يجيبلي في السيارة ودرسها قدامي
احمد ركب في سيارته وخوتي واقفين في الروشن
اني ركبت في السيارة ونزلت الروشن: هي باي
كلهم: بنتلاقو مرة تانية
اني: اكيد
ايمن: اي حقا هدية عيد ميلادك قاعدة
اني: عيد ميلادي
فؤاد: اي قلنا مرات اتجي للشارع وتينا الهدية ومجيتيش
اني: مرة تانية ناخدها توا مستعجلة
كلهم: تمام
احمد طلع بالسيارة واني طلعت وراه طول
//////
وائل: كلم احمد في سيارة طلعت وراه طول
اوس: احمد متخافش اعليه
وائل: غير كلمه
طلع تلفونه وشرين
اوس: الو احمد
احمد: ها
اوس: في سيارة اتبع فيك رد بالك
احمد: اي اهي اديرلي في ضي
اوس: رد بالك توقف
احمد: متخافش اعليا هي سلام
اوس: سلام امنين توصل للحوش كلمني
احمد: به
/////////
اني: اوووووف تي هيا درس
ودرتله الضي مرة تانية
اني ابديت نجري ودرست السيارة قدامه بالعرض سحبت المسدس ونزلت
احمد سحب مسدسه ونزل
اني شاده السلاح اعليه: لف التالي
احمد دار اعليا السلاح: نزلي سلاحك
اني: وكان منزلتش
احمد ضرب طلقة فوق : نفرغه فيك
اني: ههههه مقدمها
احمد: مني انتي؟
اني: اني عزرائيل جاي بنرفع روحك
احمد: كان قدرتي ياعزرائيل
اني قربت اعليه ودرت السلاح علي راسه ولصقته في السيارة شاده السلاح بيد وربطتله ايديه بيد شديته ورفعته فتحت الكوفينو
اني: اركب
احمد: حتندمي متعرفيش مع مني تلعبي راك
اني: نلعب مع عيل قصدي نلعب فيه واعطيته ضربة علي راسه بالمسدس ودفيته في الكوفينو وصقرته تلفتت امشيت درست سيارته علي الجنب وصقرتها وامشيت ركبت سيارتي
اني: ايوا
علاء: نعم
اني: تعالي انته ومحمد للمقر وخلي عادل واويس مع فارس وجيبو يزن معاكم
علاء: تم
اني: بسرعة
علاء: به وانتي لازم تقعدي في المستشفي بش تاخدي المضاد
اني: تو ناخده في المقر
علاء : الدكتور معطاكش خروج
اني: علاء تعالي ومن دون كثرة دوة
علاء: به
امشيت للمقر وفتحولي الباب خشيت وكعمزت في الدروج نستنا في علاء ومحمد واحمد قاعد في السيارة
///////////
علاء: عادل
عادل: نعم
علاء: وداد في المقر وقالتلنا تعالو خليك انته واويس بحدا فارس
عادل: بنمشي معاكم نطمن اعليها
علاء: هيا قالت عادل يقعد مع فارس
عادل: به طمني اعليها امنين توصل
علاء: به
طلع امشي الي يزن طلع هوا وياه نزلو لوطة القي محمد مكعمز يدخن ويمسح في دموعه
علاء حط يده علي كتفه محمد تلفت
علاء: هي نوض وانسي ياصاحبي
محمد وقف ركب السيارة من تالي وشاد السلاح علي يزن
////////
واحد يخدم معانا: في واحد خش للمخزن رقم 1
اني: يخدم معانا
الولد: اي
اني: شني عنده ايدير غادي
الولد: قال سمع صوت لقاها قطوسة
اني: تمشو توا اتفرغو المخزن رقم 1 وترفعو البضاعة كلها الي مخزن 2
الولد: بس هيا قطوسة
اني: تنفذ الأوامر وتسكت
الولد: حاضر وامشي
خش علاء بالسيارة
نزل محمد واتكا في الدروج يتفرج علي النجوم
علاء نزل يزن: خيره شني يبي الي كان اهني
اني: قال واحد من الي معانا خش للمخزن لانه سمع صوت و طلعت قطوسة
علاء: به اعلاش ناديتينا اهني
اني: عندي ليكم مفاجأة
محمد ولع دخان: مش وقت مفاجأت
اني جبدت الدخان ولوحته: اعقل
محمد: تي خيرك النم
اني: خيرك انته
علاء: خليه مضايق هلبا
محمد طلع واحد تاني وولع
اني: اوووف
احمد ابدي يخبط علي الكوفينو
احمد بعياط: افتحيي معاش عندي اكسجين افتحييييي
علاء: هادا شنو
اني: المفاجأة
محمد ناض فتح الكوفينو
محمد: هادا مني
اني: احمد
محمد: يافرحة فارس
اني: نزله
علاء: هادم الولاد الزوز مزال البنات
اني: ماعندنا مانديرو بيهم
علاء: كيف وهما ناويين الحرب
اني: مايقدرو ايديرو شي
يزن: يعني احني نقدرو انديرو
اني: عمرك شبحت عيل ايدير حرب
محمد: 😂😂
علاء: خيرك
محمد:كساد قلت خلي نضحك شوي
اني& علاء: 😂😂
اني: هادم الزوز اربطوهم ومنبيش ولا واحد يهرب وغذوة تو نفضالهم
احمد: انتي وداد
اني:شني رايك
علاء: هي قدامي
محمد: هي الحقه
دخلوهم ربطوهم بحدا بعض وصقرو اعليهم الدار وطلعو
اني: تقدرو توا ترقدو وسامحوني تعبتكم معاي
محمد & علاء: معاش تتسافي احني خوتك
اني ابتسمت وركبت واذن الفجر توضيت وجيت بنصلي شبحت الي في المقر كلهم يوتو في روحهم بيصلو جماعة لبست طرحة الصلاة ونزلت نجري
كلهم واقفين واني وقفت وراهم بعيدة شوي ابدو يصلو صليت معاهم
محمد: الله عالراحة بعد ماصليت
علاء: مفيش راحة زي الصلاة
محمد:شوف وداد كانت اتصلي معانا
علاء: ياراجل مش كافرة هيا
محمد: اي عارف غير ليا فترة معاش ريتها صلت
علاء: والفترة هديكا ديما في حوشها شني امنين بتصلي اتجي اتقولك والله
محمد: صح خيرني ابديت غبي شوي
علاء: هوا انته ديما غبي مش جديد اعليك
محمد: اتفو
علاء: عليك
وامشو فرشو في الجنان ورقدو
اني ركبت اول ماتكيت جي في عيوني بابا وبعدين تفكرت خوتي ووامي قعدت شوي نفكر وبعدين رقدت
/////////
ساعة 10 الصبح
اني نضت دوشت ولبست سروال ابيض وبلوزة سوداء وسبيدرو اسود ووشاح ابيض في الاسود ونزلت وتيت الفطور وطلعت برا وقفت
اني بعياط: محمد علاء
علاء: محمد قاعد راقد
اني: به تعالي خش افطر وتو نمشي انوضه
علاء: لالا انتي رجلك
اني: لا تو نمشي
وامشيت قعدت نطقطق علي دار محمد
محمد: وااااااك ياعلاء برا واخطاني
اني فتحت الباب
محمد طلع مسدسه من تحت المخدة وداره اعليا: برا ياعلاء وخليني نرقد
اني جبدت المسدس: الي يشد المسدس يشبح للهدف امتاعه مش حاشي راسه في المخدة وبعدين شني بتقتل علاء عالخاطر النوم
محمد تلفت
اني: لازم تتعلم انته
محمد: وداد اني نعرف كل شي
اني تلفتت بنطلع: اول قاعدة لما اتشد السلاح كون مركز علي الهدف وخلي تفكيرك فيه هوا بس
اني تلفت وشبحتله: هي بسرعة الفطور واتي
و طلعت
محمد: به ناض دوش ولبس حوايجه
///////////
علاء: ناض ولا قاعد راقد
اني: ناض وكعمزت وطلعت تلفوني وشرينت الي عادل
عادل: الو
اني: صباح الخير
عادل: صباح النور
اني: كيف حال فارس اليوم
عادل: اموره تمام والدكتور اعطاه خروج
اني: كويس
عادل: الدكتور سال اعليك وقال لو قعدت توجع فيها رجلها اعطوها المضاد
اني: لا متوجعش فيا
عادل: به اويس من بكري يبكي يبيك
اني: شوي تانية ونجي
عادل: انتي ارتاحي اني تو نكمل باقي الإجراءات ونروح بي فارس واويس
اني: اوك اصلا تفكرت عندي شني بندير
عادل: تمام
وصقر
محمد: السلام عليكم
احني: وعليكم السلام
وكعمز وابدينا نفطرو
اني: عندنا مابنديرو بعد الفطور وبسرعة في اسرع وقت
علاء: شني بنديرو
اني: تو تعرف
كملنا فطور
اني طلعت شكارة كبيرة: هاكم انفخو البالونات وزينو الحوش عالخاطر فارس بيروح
علاء: سمعت يامحمد ولا😉
محمد: سمعت فارس بس خوها احني صغار الجيران
اني: لهدرجة اتغارو
علاء: امالا شني
اني: كلمكم خوتي وبعدين اول واحد يكمل فيكم يمشي للمطار يحجز 4 تذاكر ليكم
محمد كعمز: اني مانيش مداير شي لين نعرف اعلاش تبينا انسافرو
اني: هكي نبيكم تاخدو راحة
محمد: نقدرو ناخدو راحة اهني
اني: اني نعرفكم متارتحوش اهني
علاء: مني قالك نبو راحة واعلاش انتي متمشيش معانا
اني: علاء تعرف اني منحبش نطلع من ليبيا وبالذات تونس تعرف قداش نكرها وباللهي نفذو الكلام من دون دوة زايدة
محمد: هي توا انزينو وبعدين تو نفضوله الكلام هادا
امشيت اني للكوجينة غسلت الماعين وطلعت زينت معاهم شوي وطلعت برا وقفت قدام الدار الي فيها يزن وواحمد
وطلعت تلفوني وشرينت الي مودة
اني: ايوا مودة
مودة: مني معاي
اني: وداد خيرك
مودة: ها دودي شني الجو
اني: تمام مودة تعرفي المقر متاعي ولا
مودة: لا ممكن ايمن يعرفه
اني: تمام اليوم كلكم بتجو للمقر فيه حفلة
مودة: حفلة شنو
اني: عندي واحد من خوتي معاش في المستشفي واليوم بيطلع
مودة: شوي بس قصدك حفلة ولاد وبنات
اني: عينك خوتي وانتم بس
مودة: به تم تو انقوللهم
اني: تمام
صقرت وفتحت الباب وخشيت
اني: ........................
_________________________
شني تتوقعو صار واعلاش وداد تبي الولاد ايسافرو وهيا الي شني تخطط اكتبولي توقعاتكم في التعليقات
مع السلامة 💖
للكاتبة: لولو حبيب ❤